《綠色短評》

 | | | 轉寄

外國贈送台灣疫苗，無hit號應該ê！

作者 李南衡, TsoânTâijī/全台字 by Tsng Hūiphêng 2021.08.01

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng
Gōakok tsēngsàng Tâioân e̍kbiâu, bô hitlō ingkai·ê!

　　 Tâioân sī m̄ sī ū khólêng tittio̍h Bíkok sik tshut ê Búhàn hìiām e̍kbiâu? Gō͘gue̍h tshela̍k, "Bíkok tsāi tâi hia̍phōe" tshùtiúⁿ Lê Ingkiat piáusī, Tâioân khaktsín jînsò͘ tī tsoân sèkài lâi pí iáu sǹg sī kē·ê, Bíkok tsènghú iáu teh gítēng e̍kbiâu sik tshut ê hunphòe phiautsún, ē khóliōng tsiapsiūhong ê khaktsínlu̍t, tsiaptséng e̍kbiâu pílu̍t, iliâu théhē ê khùila̍t téngténg. Tâipaktshī tn̂g Kua Bûnthiat thiaⁿtio̍h tòng bētiâu sûisî tshiàngsiaⁿ,"Lâi(萊) ti iā tsia̍hliáu ah, kunhóe mā bé liáu ah, só͘í leh, i ê ìsù sī kóng, lín tsiah sí tsa̍pitê lâng niāniā, bô sǹg tsē sī boh?" khóliân ê Kua tshītiúⁿ, tang sîá tsia̍h jōatsē Lâi(萊) ti lán lóng m̄tsai. Lán kā Bíkok bé siōng siantsìn ê búkhì kò͘siú Tâioân, Bíkok khéng bē lán, Kua tshītiúⁿ tsintsiàⁿ m̄tsai lán tio̍h ài thautshiò?
　　 Bíkok tsēngsàng lán ê 250 bān tse Moderna e̍kbiâu, la̍kgue̍h jītsa̍p ēpo͘ ūn kàu Tâioân. Tâipaktshī tn̂g Kua Bûnthiat ū tī bīntsheh téngbīn PO bûn, piáusī hiòng Bíkok pêngiú piáuta̍t jia̍ttshiat kámsiā. Ánne káⁿ m̄ sī tsin hó? Khósioh Kua Bûnthiat tshītiúⁿ tsin phòakeh, tī tshīgīhōe tsiapsiū tsit sûn=mn̄g kóng Bíkok tsēngsàng Tâioân e̍kbiâu, lán sī m̄ sī ingkai kámsiā ê sî ? Kua tshītiúⁿ hoán kháuking kóng," tshaputto niāniā. Lí hō͘ góa, góa iûgoân sī kámsiā, góa tsoh lí ê sèhàn ê, lí hō͘ góa tsi̍ttiámá anka hùi sī ingkai."Tâipak tshībîn tsin piai, tang sîá soántshut tsi̍tê o͘tō tshītiúⁿ ē kóng o͘tō "hāngálāi" ê ōe?

Bíkok sī ántsóaⁿ beh tsēngsàng lán e̍kbiâu? Tsúiáu sī inūi khòaⁿtio̍h Tâioân e̍ktsêng ùi gō͘gue̍h tiongsûn khaisí piàn tsoh tsin giâmtsùn, ùi tsi̍t kang tsa̍p kúiê khaktsín tsi̍tsiaⁿ tshèng kàu sìpah gōa ê, khaksi̍t ē hông kiaⁿ. Kasiōng Tâioân kūnî tio̍h hiòng kúi king e̍kbiâu tshiúⁿsiong tēnghòe, sīmtsì mā ū thàukòe “COVAX” tēnghòe, Tâioân beh the̍h tio̍h e̍kbiâu ê thonglō͘ hō͘ pháiⁿsimlâng tsah tn̄g. Bíkok khòaⁿ bē lo̍hkhì tsiah tshuttshiú oântsō͘.

　　 La̍kgue̍h tshesì, Ji̍tpún sàng lán 124 bān tse AZ e̍kbiâu, Ji̍tpún gōasiōng 茂敏充 itti̍t kóng tī tsa̍p nî tsêng 311 Tangpak tōa tētāng ê sî, Tâioân tēit sîkan kuan tsō͘ siānkhoán téng hō͘ Ji̍tpún bîntsiòng siongtong kámsim, só͘í tng Tâioân ū khùnlân ê sî, Ji̍tpún ittēng tio̍h tshun tshiú tsioân. Ū Tiongkok Kokbîntóng m̄bat jī ê li̍phuat úigoân tsitbūn, kóng 311 náē bô sàng lán saⁿpah tsa̍pit bān tse e̍kbiâu leh? Tsintsiàⁿ sī phîbīn tsia̍h m̄tsai pá! Kóngtio̍h ná tshiūⁿ lâng khiàm i ê. Ji̍tpún tsènghú tsiàu in ītēng ê kèe̍k tsìnhêng, tshitgue̍h tshepeh Ji̍tpún koh tsēng sàng Tâioân 113 bān tse e̍kbiâu, khólêng sī siūⁿ kóng " bû sam putsêng lé", tshitgue̍h tsa̍pgō͘ Ji̍tpún Hângkhong koh tsài Ji̍tpún tsēngsàng lán Tâioân ê 97 bān tse e̍kbiâu lâi. Lán móasim kámsiā tsài kámsiā!

　　 La̍kgue̍h jījī, Pak’au立陶宛ê gōakau pō͘tiúⁿ tī Twitter huat bûn piáusī, káugue̍h té ítsêng ē tsēngsàng nn̄gbān tse AZ e̍kbiâu hō͘ Tâioân, in ê Tsónglí kóng "goán ū siūⁿ beh sàng khah tsē, tānsī goán ū tsat goán ê khùila̍t, kanta ētàng ánne niāniā." 立陶宛ê gōakau pō͘tiúⁿ kóng, kámsiā tī kūnî e̍ktsêng siōng gûikip ê sî, Tâioân ū tsēngsàng 立陶宛 tsa̍pbānê tshùi’am. 立陶宛 tsin huaⁿhí ētàng tī tíkhòng sin kuantsōng pēⁿto̍k ê kòethêngtiong siaⁿoân Tâioân jînbîn. I kóng, ài hó tsūiû ê lâng goânpún tio̍h ingkai hō͘siong tsiàukò͘.

　　Mài kóng nn̄gbān tse e̍kbiâu, bôlūn sī tó tsi̍t kok, tsiūsī tsēngsàng lán tsi̍tpah tse e̍kbiâu, lán mā sī tshimtshim kā in kámsiā. Inūi lán lóng tsaiiáⁿ, gōakok tsēngsàng Tâioân e̍kbiâu, bô hitlō ingkai·ê! (210716)
Tsù, hitlō tha̍k tsoh hitlō 立陶宛 tshiáⁿ liām Hôagí


Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng
Gōa-kok tsēng-sàng Tâi-oân e̍k-biâu, bô hitlō ing-kai-·ê!

　　 Tâi-oân sī m̄ sī ū khó-lêng tit-tio̍h Bí-kok sik tshut ê Bú-hàn hì-iām e̍k-biâu? Gō͘-gue̍h tshe-la̍k, "Bí-kok tsāi tâi hia̍p-hōe" tshù -tiúⁿ Lê Ing-kiat piáu-sī, Tâi-oân khak-tsín jîn-sò͘ tī tsoân sè-kài lâi pí iáu sǹg sī kē-·ê, Bí-kok tsèng-hú iáu teh gí-tēng e̍k-biâu sik tshut ê hun-phòe phiau-tsún, ē khó-liōng tsiap-siū-hong ê khak-tsín-lu̍t, tsiap-tséng e̍k-biâu pí-lu̍t, i-liâu thé-hē ê khùi-la̍t téng-téng. Tâi-pak-tshī tn̂g Kua Bûn-thiat thiaⁿ-tio̍h tòng bē-tiâu sûi-sî tshiàng-siaⁿ,"Lâi(萊) ti iā tsia̍h-liáu ah, kun-hóe mā bé liáu ah, só͘-í leh, i ê ì-sù sī kóng, lín tsiah sí tsa̍p-it-ê lâng niā-niā, bô sǹg tsē sī boh?" khó-liân ê Kua tshī-tiúⁿ, tang sî-á tsia̍h jōa-tsē Lâi(萊) ti lán lóng m̄-tsai. Lán kā Bí-kok bé siōng sian-tsìn ê bú-khì kò͘-siú Tâi-oân, Bí-kok khéng bē lán, Kua tshī-tiúⁿ tsin-tsiàⁿ m̄-tsai lán tio̍h ài thau-tshiò?
　　 Bí-kok tsēng-sàng lán ê 250 bān tse Moderna e̍k-biâu, la̍k-gue̍h jī-tsa̍p ē-po͘ ūn kàu Tâi-oân. Tâi-pak-tshī tn̂g Kua Bûn-thiat ū tī bīn-tsheh téng-bīn PO bûn, piáu-sī hiòng Bí-kok pêng-iú piáu-ta̍t jia̍t-tshiat kám-siā. Án-ne káⁿ m̄ sī tsin hó? Khó-sioh Kua Bûn-thiat tshī-tiúⁿ tsin phòa keh, tī tshī-gī-hōe tsiap-siū tsit sûn=mn̄g kóng Bí-kok tsēng-sàng Tâi-oân e̍k-biâu, lán sī m̄ sī ing-kai kám-siā ê sî ? Kua tshī-tiúⁿ hoán kháu-king kóng," tsha-put-to niā-niā. Lí hō͘ góa, góa iû-goân sī kám-siā, góa tsoh lí ê sè-hàn ê, lí hō͘ góa tsi̍t-tiám-á an-ka hùi sī ing-kai."Tâi-pak tshī-bîn tsin pi-ai, tang sî-á soán-tshut tsi̍t-ê o͘-tō tshī-tiúⁿ ē kóng o͘-tō "hāng-á-lāi" ê ōe?

Bí-kok sī án-tsóaⁿ beh tsēng-sàng lán e̍k-biâu? tsú-iáu sī in-ūi khòaⁿ-tio̍h Tâi-oân e̍k-tsêng ùi gō͘-gue̍h tiong-sûn khai-sí piàn tsoh tsin giâm-tsùn, ùi tsi̍t kang tsa̍p kúi-ê khak-tsín tsi̍t-siaⁿ tshèng kàu sì-pah gōa ê, khak-si̍t ē hông kiaⁿ. Ka-siōng Tâi-oân kū-nî tio̍h hiòng kúi king e̍k-biâu tshiúⁿ-siong tēng-hòe, sīm-tsì mā ū thàu-kòe “COVAX” tēng-hòe, Tâi-oân beh the̍h tio̍h e̍k-biâu ê thong-lō͘ hō͘ pháiⁿ-sim-lâng tsah tn̄g. Bí-kok khòaⁿ bē lo̍h-khì tsiah tshut-tshiú oân-tsō͘.

　　 La̍k-gue̍h tshe-sì, Ji̍t-pún sàng lán 124 bān tse AZ e̍k-biâu, Ji̍t-pún gōa-siōng 茂敏充 it-ti̍t kóng tī tsa̍p nî tsêng 311 Tang-pak tōa tē-tāng ê sî, Tâi-oân tē-it sî-kan kuan tsō͘ siān-khoán téng hō͘ Ji̍t-pún bîn-tsiòng siong-tong kám-sim, só͘-í tng Tâi-oân ū khùn-lân ê sî, Ji̍t-pún it-tēng tio̍h tshun tshiú tsi-oân. Ū Tiong-kok Kok-bîn-tóng m̄-bat jī ê li̍p-huat úi-goân tsit-būn, kóng 311 ná-ē bô sàng lán saⁿ-pah tsa̍p-it bān tse e̍k-biâu leh? Tsin-tsiàⁿ sī phî-bīn tsia̍h m̄-tsai pá! Kóng-tio̍h ná tshiūⁿ lâng khiàm i ê. Ji̍t-pún tsèng-hú tsiàu in ī-tēng ê kè-e̍k tsìn-hêng, tshit-gue̍h tshe-peh Ji̍t-pún koh tsēng- sàng Tâi-oân 113 bān tse e̍k-biâu, khó-lêng sī siūⁿ kóng " bû sam put-sêng lé", tshit-gue̍h tsa̍p-gō͘ Ji̍t-pún hâng-khong koh tsài Ji̍t-pún tsēng-sàng lán Tâi-oân ê 97 bān tse e̍k-biâu lâi. Lán móa-sim kám-siā tsài kám-siā!

　　 La̍k-gue̍h jī-jī, Pak-au立陶宛ê gōa-kau pō͘-tiúⁿ tī Twitter huat bûn piáu-sī, káu-gue̍h té í-tsêng ē tsēng-sàng nn̄g-bān tse AZ e̍k-biâu hō͘ Tâi-oân, in ê Tsóng-lí kóng "goán ū siūⁿ beh sàng khah tsē, tān-sī goán ū tsat goán ê khùi-la̍t, kan-ta ē-tàng án-ne niā-niā." 立陶宛ê gōa-kau pō͘-tiúⁿ kóng, kám-siā tī kū-nî e̍k-tsêng siōng gûi-kip ê sî, Tâi-oân ū tsēng-sàng 立陶宛 tsa̍p-bān-ê tshùi-am. 立陶宛 tsin huaⁿ-hí ē-tàng tī tí-khòng sin kuan-tsōng pēⁿ-to̍k ê kòe-thêng-tiong siaⁿ-oân Tâi-oân jîn-bîn. I kóng, ài hó tsū-iû ê lâng goân-pún tio̍h ing-kai hō͘-siong tsiàu-kò͘.

　　Mài kóng nn̄g-bān tse e̍k-biâu, bô-lūn sī tó tsi̍t kok, tsiū-sī tsēng-sàng lán tsi̍t-pah tse e̍k-biâu, lán mā sī tshim-tshim kā in kám-siā. In-ūi lán lóng tsai-iáⁿ, gōa-kok tsēng-sàng Tâi-oân e̍k-biâu, bô hit-lō ing-kai-·ê! (210716)
Tsù, hit-lō tha̍k tsoh hit-lō 立陶宛 tshiáⁿ liām Hôa-gí


　　台灣是m̄是有可能得tio̍h美國釋出ê武漢肺炎疫苗？五月初六，「美國在台協會」處長酈（lê）英傑表示，台灣確診人數tī全世界來比猶算是低ê，美國政府猶teh擬定疫苗釋出ê分配標準，ē考量接受方ê確診率、接種疫苗比率、醫療體系ê量能等等。台北市長柯文哲聽tio̍h擋bē-tiâu隨時唱聲，「萊豬也食了ah、軍火mā買了ah，所以咧，伊ê意思是講，恁才死十一個人niā-niā ，無算tsē是boh？」可憐ê柯市長，tang時á食偌tsē萊豬咱lóng m̄知。咱kā美國買上先進ê武器顧守台灣，美國肯賣咱，柯市長真正m̄知咱tio̍h愛偷笑？

　　美國贈送咱ê250萬劑Moderna疫苗，六月二十下晡運到台灣。台北市長柯文哲有tī面冊頂面PO文，表示向美國朋友表達熱切感謝。Án-ne敢m̄是真好？可惜柯文哲市長真破格，tī市議會接受質詢問講美國贈送台灣疫苗，咱是m̄是應該感謝ê時？柯市長反口供講，「差不多niā-niā。你hō͘我，我猶原是感謝，我作你ê細漢ê，你hō͘我一點á安家費是應該。」台北市民真悲哀，tang時á選出一個烏道市長ē講烏道「巷á內」ê話？

美國是án怎beh贈送咱疫苗？主要是因為看tio̍h台灣疫情ùi五月中旬開始變作真嚴峻，ùi一工十幾個確診一聲tshèng到四百外個，確實ēhông驚。加上台灣舊年tio̍h向幾間疫苗廠商訂貨，甚至mā有透過“COVAX”訂貨，台灣beh the̍h tio̍h疫苗ê通路hō͘歹心人截（tsah）斷。美國看bē落去才出手援助。

　　六月初四，日本送咱124萬劑AZ疫苗，日本外相茂敏充一直講tī十年前311東北大地動ê時，台灣第一時間捐助善款等hō͘日本民眾相當感心，所以當台灣有困難ê時，日本一定tio̍h伸手支援。有中國國民黨m̄-bat字ê立法委員質問，講311ná-ē無送咱三百十一萬劑疫苗咧？真正是皮（phî）面食m̄知飽！講tio̍h ná像人欠伊ê。日本政府照in預定ê計劃進行，七月初八日本koh贈送台灣113萬劑疫苗，可能是想講「無三不成禮」，七月十五日本航空koh載日本贈送咱台灣ê97萬劑疫苗來。咱滿心感謝再感謝！

　　六月二二，北歐立陶宛ê外交部長tīTwitter發文表示，九月底以前ē贈送二萬劑AZ疫苗hō͘台灣，inê總理講「阮有想beh送khahtsē，但是阮有節(tsat)阮ê氣力，kan-taē-tàng án-ne niā-niā。」立陶宛ê外交部長講，感謝tī舊年疫情上危急ê時，台灣有贈送立陶宛十萬個嘴掩。立陶宛真歡喜ē-tàng tī抵抗新冠狀病毒ê過程中聲援台灣人民。伊講，愛好自由ê人原本tio̍h應該互相照顧。

　　Mài講二萬劑疫苗，無論是tó一國，就是贈送咱一百劑疫苗，咱mā是深深kā in感謝。因為咱lóng知影：外國贈送台灣疫苗，無hit號應該ê！ (210716)
註：hit號 讀作hit-lō 立陶宛　請唸華語