《綠色短評》

 | | | 轉寄

借南京疫情tsit面鏡！

作者 李南衡, TsoânTâijī/全台字 by Tsng Hūiphêng 2021.08.22

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

Tsioh Lâmkiaⁿ e̍ktsêng tsit bīn kiàⁿ!

　　 Tshitgue̍h jītsa̍p, Lâmkiaⁿ Lo̍kkháu koktsè kitiûⁿ tùi oânkang tsìnhêng lēhêng hu̍tsng kiámtshik ê sî, huathiān ū 9 ê khaktsín pēⁿlē, tsit 9 ê lâng lóng sī tī kitiûⁿtsò huiki tshingkiat kangtsok ê tshingkiat oân. Kinkì Kangso͘ séng ōesing kiānkhong úigoânhōe ê pòkò, tshitgue̍h͘ jīgō͘ Kangso͘ séng sin tsingka púnthó͘ khaktsín pēⁿlē 39 lē tiong, Lâmkiaⁿ tshī tsiàm 38 lē, kîtiong ū 8 lē sī bô tsèngthâu kámjiám tsiá tsoántsoh khaktsín pēⁿlē. In tittio̍h ê Búhàn hìiām sī Delta iantsióng pēⁿto̍k.

　　 Tsū ánne e̍ktsêng ùi Lâmkiaⁿ khoktōa sin tsi̍tliàn ê e̍ktsêng, pēⁿto̍k íking thòaⁿ kàu Tiongkok tāilio̍k tsa̍p kúi séng tshī, Tāiliân, Tiuⁿ kakài, Siâⁿto͘, Pakkiaⁿ, Búhàn téng siâⁿtshī siosòa tshuthiān ū kuanliân sèng ê pēⁿlē, khaktsín jînsò͘ tshîsiok sing koân. Búhàn tshī pehgue̍h tsheit kàu tshejī, kingkòe hu̍tsng kiámtshik huathiān ū 7 ê lâng sī iôngsèng, tse sī Búhàn tshī ùi kūnî la̍kgue̍h͘ tshing lêng ílâi thâutsi̍t piàn tshuthiān sin ê àn. Kinkì 《 Pakkiaⁿ ji̍t pò 》 pòtō kóng, Lâmkiaⁿ e̍ktsêng thoânpò͘ liān iântn̂g kàu tsìtsió 365 ê lâng, ik tshutkhì 24 ê siâⁿtshī. Tiongkok tshitgue̍h lúikè sin tsingka pēⁿlē téngî sī tsêng gō͘ kò gue̍h ê tsónghô.

　　 Tsuanka piáusī, bo̍ktsêng tī Tiongkok thoânpò͘ ê to̍ktsu tsúiáu sī Delta to̍ktsu, thoânpò͘ soktō͘ tsin kín, thé lāi ho̍ktsè mā tsin kín, tsoánim ê sîkan khah tn̂g. Kok tē lóng thêtshéⁿ kubîn "hui pitiàu put tshut séng, put lī tshī". Bo̍ktsêng íking ū 17 séng tshuthiān khaktsín pēⁿlē; Tiongkok kuaⁿmûi《 Jînbîn ji̍t pò 》 kóng, tûliáu Hûnlâm, Siōnghái ígōa, kîtha tēkhu ê khaktsín sūkiāⁿ lóng kah Lâmkiaⁿ iúkuan, Pakkiaⁿ mā íking lûnhām.

Siósió tsi̍tê LâmkiaⁿLo̍kkháu koktsè kitiûⁿ ê 9 ê tshingkiat kanglâng, ētàng bú kah tsoânkok tōa kíntiuⁿ.

Siūⁿkhí 2019 nî tsa̍pjīgue̍h, tī Ōeho̍kpō͘ tsi̍tkoánsú tamjīm Hùsútiúⁿ ê Lô Itkun isu, tī bānglō͘ téngbīn huathiān ū bāngiú thêkhí Tiongkok Búhàn ê Hôalâm háisán tshītiûⁿ ū tshuthiān tshintshiūⁿ SARS ê ànlē, i sûisî hiòng téngsi pòkò, hiòng Tiongkok siongkuan tanūi tshâtsèng, jîtshiáⁿ hiòng sèkài ōesing tso͘tsit (WHO) thongpò. Tsa̍pjīgue̍h saⁿtsa̍pit, lán tsènghú tùi Búhàn ti̍thâng panki si̍tsi tingki kiáme̍k. 2020 nî itgue̍h tsa̍psaⁿ, anpâi thoânjiámpēⁿ hôngtī iliâu bāng Tsng Gîntshing tsíhuikuaⁿ kah hônge̍k isu Âng Bínlâm khì Tiongkok Búhàn, siutsi̍p tsi̍t kóa kah e̍ktsêng siongkuan ê tsusìn, itgue̍h tsa̍pla̍k tńglâi tiàukhui suatbênghōe. Tsiah tsaiiáⁿ tāitsì giâmtiōng. Itgue̍h tsa̍pgō͘, Tsi̍tkoánsú kongkò sin tsingka "giâmtiōng te̍ksû thoânjiámsèng hìiām" tsoh tēgō͘ lūi thoânjiámpēⁿ. Itgue̍h jīsaⁿ, Búhàn hong siâⁿ, lánkok kìmtsí Búhàn ê lâng ji̍pkéng, ti̍thâng panki thêng pue, liáuāu tsiah kái Tiongkok lâng lóng puttsún ji̍pkéng téng tshòsi. Itgue̍h jīsì, kìmtsí iliâuēng tshùiam tshutkháu; itgue̍h saⁿtsa̍pit,tingēng tsoânkok tshùiam kangtshiúⁿ singsán ê iliâuēng tshùiam; jīgue̍h tshela̍k si̍tsi tsoânkok tshùiam si̍tmiâtsè, ta̍k lâng lóng bé ū tshùiam. Ánne, Tâioân tsiah pí tsoân sèkài jīmhô kokka lóng khah tsá tsoh īhông, tī tēit pho tsoân sèkài tòe Tiongkok tio̍htse ê e̍ktsêng tiong, Tâioân itti̍t sī hônge̍k ê bô͘hōansing. Ūisímmih? Inūi lán tsátsá tsioh tio̍h Búhàn e̍ktsêng hitbīn kiàⁿ.

　　 Kináji̍t, lán tsioh tio̍h Lâmkiaⁿ e̍ktsêng tsit bīn kiàⁿ, siongsìn ētàng kā hông Búhàn hìiām Delta pēⁿto̍k tsitê hônge̍k kangtsok, iûgoân tsoh sèkài ê bô͘hōansing. 　　(210806)


Pe̍h-ōe-jī-pán/白話字版
《 Le̍k-sik toán-phêng 》 Lí Lâm-hêng

Tsioh Lâm-kiaⁿ e̍k-tsêng tsit bīn kiàⁿ!

　　 Tshit-gue̍h jī-tsa̍p, Lâm-kiaⁿ Lo̍k-kháu kok-tsè ki-tiûⁿ tùi oân-kang tsìn-hêng lē-hêng hu̍t-sng kiám-tshik ê sî, huat-hiān ū 9 ê khak-tsín pēⁿ-lē, tsit 9 ê lâng lóng sī tī ki-tiûⁿtsò hui-ki tshing-kiat kang-tsok ê tshing-kiat oân. Kin-kì Kang-so͘ séng ōe-sing kiān-khong úi-goân-hōe ê pò-kò, tshit-gue̍h͘ jī-gō͘ Kang-so͘ séng sin tsing-ka pún-thó͘ khak-tsín pēⁿ-lē 39 lē tiong, Lâm-kiaⁿ tshī tsiàm 38 lē, kî-tiong ū 8 lē sī bô tsèng-thâu kám-jiám tsiá tsoán-tsoh khak-tsín pēⁿ-lē. In tit-tio̍h ê Bú-hàn hì-iām sī Delta ian-tsióng pēⁿ-to̍k.

　　 Tsū án-ne e̍k-tsêng ùi Lâm-kiaⁿ khok-tōa sin tsi̍t-liàn ê e̍k-tsêng, pēⁿ-to̍k í-king thòaⁿ kàu Tiong-kok tāi-lio̍k tsa̍p kúi séng tshī, Tāi-liân, Tiuⁿ -ka-kài, Siâⁿ-to͘, Pak-kiaⁿ, Bú-hàn téng siâⁿ-tshī sio-sòa tshut-hiān ū kuan-liân sèng ê pēⁿ-lē, khak-tsín jîn-sò͘ tshî-siok sing koân. Bú-hàn tshī peh-gue̍h tshe-it kàu tshe-jī, king-kòe hu̍t-sng kiám-tshik huat-hiān ū 7 ê lâng sī iông-sèng, tse sī Bú-hàn tshī ùi kū-nî la̍k-gue̍h͘ tshing- lêng í-lâi thâu-tsi̍t piàn tshut-hiān sin ê àn. Kin-kì 《 Pak-kiaⁿ ji̍t pò 》 pò-tō kóng, Lâm-kiaⁿ e̍k-tsêng thoân-pò͘ -liān iân-tn̂g kàu tsì-tsió 365 ê lâng, ik tshut-khì 24 ê siâⁿ-tshī. Tiong-kok tshit-gue̍h lúi-kè sin tsing-ka pēⁿ-lē téng-î sī tsêng gō͘ kò gue̍h ê tsóng-hô.

　　 Tsuan-ka piáu-sī, bo̍k-tsêng tī Tiong-kok thoân-pò͘ ê to̍k-tsu tsú-iáu sī Delta to̍k-tsu, thoân-pò͘ sok-tō͘ tsin kín, thé lāi ho̍k-tsè mā tsin kín, tsoán-im ê sî-kan khah tn̂g. Kok tē lóng thê-tshéⁿ ku-bîn "hui pit-iàu put tshut séng, put lī tshī". Bo̍k-tsêng í-king ū 17 séng tshut-hiān khak-tsín pēⁿ-lē; Tiong-kok kuaⁿ-mûi《 Jîn-bîn ji̍t pò 》 kóng, tû-liáu Hûn-lâm, Siōng-hái í-gōa, kî-tha tē-khu ê khak-tsín sū-kiāⁿ lóng kah Lâm-kiaⁿ iú-kuan, Pak-kiaⁿ mā í-king lûn-hām.

Sió-sió tsi̍t-ê Lâm-kiaⁿLo̍k-kháu kok-tsè ki-tiûⁿ ê 9 ê tshing-kiat kang-lâng, ē-tàng bú kah tsoân-kok tōa kín-tiuⁿ.

Siūⁿ-khí 2019 nî tsa̍p-jī-gue̍h, tī Ōe-ho̍k-pō͘ tsi̍t-koán-sú tam-jīm Hù-sú-tiúⁿ ê Lô It-kun i-su, tī bāng-lō͘ téng-bīn huat-hiān ū bāng-iú thê-khí Tiong-kok Bú-hàn ê Hôa-lâm hái-sán tshī-tiûⁿ ū tshut-hiān tshin-tshiūⁿ SARS ê àn-lē, i sûi-sî hiòng téng-si pò-kò, hiòng Tiong-kok siong-kuan tan-ūi tshâ-tsèng, jî-tshiáⁿ hiòng sè-kài ōe-sing tso͘-tsit (WHO) thong-pò. Tsa̍p-jī-gue̍h saⁿ-tsa̍p-it, lán tsèng-hú tùi Bú-hàn ti̍t-hâng pan-ki si̍t-si ting-ki kiám-e̍k. 2020 nî it-gue̍h tsa̍p-saⁿ, an-pâi thoân-jiám-pēⁿ hông-tī i-liâu bāng Tsng Gîn-tshing tsí-hui-kuaⁿ kah hông-e̍k i-su Âng Bín-lâm khì Tiong-kok Bú-hàn, siu-tsi̍p tsi̍t kóa kah e̍k-tsêng siong-kuan ê tsu-sìn, it-gue̍h tsa̍p-la̍k tńg-lâi tiàu-khui suat-bêng-hōe. Tsiah tsai-iáⁿ tāi-tsì giâm-tiōng. It-gue̍h tsa̍p-gō͘, Tsi̍t-koán-sú kong-kò sin tsing-ka "giâm-tiōng te̍k-sû thoân-jiám-sèng hì-iām" tsoh tē-gō͘ lūi thoân-jiám-pēⁿ. It-gue̍h jī-saⁿ, Bú-hàn hong siâⁿ, lán-kok kìm-tsí Bú-hàn ê lâng ji̍p-kéng, ti̍t-hâng pan-ki thêng pue, liáu-āu tsiah kái Tiong-kok lâng lóng put-tsún ji̍p-kéng téng tshò-si. It-gue̍h jī-sì, kìm-tsí i-liâu-ēng tshùi-am tshut-kháu; it-gue̍h saⁿ-tsa̍p-it,ting-ēng tsoân-kok tshùi-am kang-tshiúⁿ sing-sán ê i-liâu-ēng tshùi-am; jī-gue̍h tshe-la̍k si̍t-si tsoân-kok tshùi-am si̍t-miâ-tsè, ta̍k lâng lóng bé ū tshùi-am. Án-ne, Tâi-oân tsiah pí tsoân sè-kài jīm-hô kok-ka lóng khah tsá tsoh ī-hông, tī tē-it pho tsoân sè-kài tòe Tiong-kok tio̍h-tse ê e̍k-tsêng tiong, Tâi-oân it-ti̍t sī hông-e̍k ê bô͘-hōan-sing. Ūi-sím-mih? In-ūi lán tsá-tsá tsioh tio̍h Bú-hàn e̍k-tsêng hit-bīn kiàⁿ.

　　 Kin-á-ji̍t, lán tsioh tio̍h Lâm-kiaⁿ e̍k-tsêng tsit bīn kiàⁿ, siong-sìn ē-tàng kā hông Bú-hàn hì-iām Delta pēⁿ-to̍k tsit-ê hông-e̍k kang-tsok, iû-goân tsoh sè-kài ê bô͘-hōan-sing. 　　(210806)


　　七月二十，南京祿口國際機場對員工進行例行核酸檢測ê時，發現有9个確診病例，tsit 9个人lóng是tī機場做飛機清潔工作ê清潔員。根據江蘇省衛生健康委員會ê報告，七月二五江蘇省新增加本土確診病例39例中，南京市佔38例，其中有8例是無症頭感染者轉作確診病例。In得tio̍h ê武漢肺炎是Delta變種病毒。

　　自án-ne疫情ùi南京擴大新一輪ê疫情，病毒已經湠（thòaⁿ）到中國大陸十幾省市，大連、張家界、成都、北京、武漢等城市相續出現有關聯性ê病例，確診人數持續升koân。武漢市八月初一到初二，經過核酸檢測發現有7个人是陽性，tse是武漢市ùi舊年六月清零以來頭一遍出現新個案。根據《北京日報》報導講，南京疫情傳播鏈延長到至少365个人，溢出去24个城市。中國七月累計新增加病例等於是前五個月ê總和。

　　專家表示，目前tī中國傳播ê毒株主要是Delta毒株，傳播速度真緊、體內複製mā真緊、轉陰ê時間khah長。各地lóng提醒居民「非必要不出省、不離市」。目前已經有17省出現確診病例；中國官媒《人民日報》講，除了雲南、上海以外，其他地區ê確診事件lóng kah南京有關，北京mā已經淪陷。

小小一个南京祿口國際機場ê 9个清潔工人，ē-tàng舞kah全國大緊張。 想起2019年十二月，tī衛服部疾管署擔任副署長ê羅一鈞醫師，tī網路頂面發現有網友提起中國武漢ê華南海產市場有出現親像SARS ê案例，伊隨時向頂司報告、向中國相關單位查證，而且向世界衛生組織（WHO）通報。十二月三十一，咱政府對武漢直航班機實施登機檢疫。2020年一月十三，安排傳染病防治醫療網莊銀清指揮官kah防疫醫師洪敏南去中國武漢，收集一kóakah疫情相關ê資訊，一月十六轉來召開說明會。才知影tāi-tsì嚴重。一月十五，疾管署公告新增加「嚴重特殊傳染性肺炎」作第五類傳染病。一月二三，武漢封城，咱國禁止武漢ê人入境，直航班機停飛，了後才改中國人lóng不准入境等措施。一月二四，禁止醫療用嘴am出口；一月三十一，徵用全國嘴am工廠生產ê醫療用嘴am；二月初六實施全國嘴am實名制，逐人lóng買有嘴am。Án-ne，台灣才比全世界任何國家lóng khah早作預防，tī第一波全世界tòe中國tio̍h災ê疫情中，台灣一直是防疫ê模範生。為什麼？因為咱早早借tio̍h武漢疫情hit面鏡。

　　今á日，咱借tio̍h南京疫情tsit面鏡，相信ē-tàng kā防武漢肺炎Delta病毒tsit-ê防疫工作，猶原作世界ê模範生。　　(210806)