《綠色短評》

| | | 轉寄

奧運會選手獎牌領了,續落去leh?

Tsoânbîn Tâioânjī pán/全民台灣字版簡稱TsoânTâiJī
《 Le̍ksik toánphêng 》          Lí Lâmhêng
     Òūnhōe soántshiú tsióng pâi niá liáu, sòa lo̍hkhì leh?

   Tsit piàn Tangkiaⁿ Òūnhōe tī pehgue̍h tshepeh oânboán pìbō͘. Lán khòaⁿtio̍h múi tsi̍t hāngba̍k, kiklia̍t piàⁿ tshut tsoân sèkài siōng kiông ê tsêng saⁿ miâ tittio̍h tsióng pâi ê soántshiú, ta̍ttit lán kā tsunkèng phòeho̍k. In khiā tī tâi téng, tsiapsiū pantsióng ê sî, hōetiûⁿ sing kiò tshut soántshiú ê kokmiâ, singkhí soántshiú ê kokkî, tôngsî iántsàu in ê kokkua, sī hôténg ê kongêng. Lēgōa ê sī lán Tâioân soántshiú tittio̍h iusèng pantsióng ê sî, kiò tshut hithō m̄tsiâⁿ kok iâ ê Tionghôa Tāipak, singkhí hithō m̄tsiâⁿ kokkî ê óaⁿko kî, iántsàu hithō m̄tsiâⁿ kokkua ê óaⁿko kua.

   Koktsè Olympic úigoânhōe tûliáu panhuat kimpâi, gînpâi, tângpâi ígōa, bô jīmhô tsióngkim. Iusèng ê soántshiú tsióngpâi niá liáu, tsiapsiū ê bô tshiūⁿ óngnî o͘khâmkhâm kuantsiòng ê huanho͘ kah phah phoká, kiⁿî e̍ktsêng kuanhē, hiāntiûⁿ kuantsiòng bô kúiê. Tsióngpâi niá liáu sòa lo̍hkhì leh?

Iusèng ê soántshiú tńgkhì kò͘hiong, thènghāu in ê sī inkok tsènghú kah in tôngpau jia̍ttsêng ê gêngtsiap kah bu̍ttsit siōng ê kó͘lē. Siōng si̍ttsāi ê bu̍ttsit siōng kó͘lē sī hiānkim. Thiaⁿkóng tsióngkim siōng koân ê sī Sinkapho, Òūnhōe tit kimpâi tsióngkim 74 bān 4 tshing bíkim iok sin tâipè 2,083 bān, gînpâi tsióngkim 37 bān 2 tshing bíkim iok sintâipè 1,041 bān, tângpâi tsióngkim 28 bān 6 tshing bíkim iok sin tâipè 800 bān. Tâioân kah sèkài kok kok ē píphēngtit, kimpâi tsióngkim sintâipè 2,000 bān, gînpâi sin tâipè 750 bān, tângpâi sin tâipè 500 bān.

Huilu̍tpin ê Hitilin Tiatsu(Hidilyn Diaz), tī lútsú 55 kongkin kip giâ tāng písài tiong tua̍ttio̍h kimpâi, Huilu̍tpin tsoân kok huaⁿhí kah tshù kòa beh giâ tiāu, inūi i tittio̍h Huilu̍tpin le̍ksú siōng tēit bīn Òūn kimpâi, hông tsúntsoh kokka inghiông, Huilu̍tpin tsóngthóng phah tiānōe tsiokhō tshintshùi tapèng i kòjîn kah tsènghú ê siúⁿkim lóngtsóng ū 60 bān bíkim iok sintâipè 1,680 bān ê tsiónglē, lēnggōa sàng i tsi̍t king konggū. Ū nn̄gūi singlí lâng tapèng sàng i 1,500 bān Piso iok sintâipè 750 bān koh tsi̍t king pia̍ttsong.

Múi tsi̍t kok ê tsiónglē bô kângkhoán, Gôlôsu ê soántshiú nā Òūn tittio̍h tsióng pâi, bô tējī kù ōe, sing sàng tsi̍t tâi kiautshia, tongjiân kimgîntâng pâi só͘ sàng ê tshia ū tshapia̍t. Iáu ū tshùthe̍h kah tsióngkim tsióngtsióng ê tsiónglē. Khah kîkhiáu ê sī Lâmhui, 2012 nî Lûntun Òūnhōe tittio̍h lâmtsú khinliōngkip sìlâng sáitêng hāngbo̍k kuankun, múi tsi̍tê lâng tittio̍h tsi̍t tsiah gûbó, sī tsi̍t ūi singlí lâng só͘ sàng ê.

   Tsióng pâi niá liáu, siúⁿkim tsióngphín niá liáu, sòa lo̍hkhì leh? Káⁿ ū lâng siūⁿtio̍h ūntōng soántshiú ê tsionglâi?

   Sinbûn pòtō, Tiongkok tsêng thétshau koktshiú TiuⁿSiōngbú , 2001 nî tī sèkài tāiha̍k ūntōnghōe thétshau hāngbo̍k ūi Tiongkok tittio̍h nn̄g bīn kimpâi, āulâi kha siūsiong, jînsing tsū ánne oântsoân tōa káipiàn, i tûliáu thétshau ígōa, bô pa̍t hāng kilêng, tìsú līkhui thétôaⁿ liáuāu, tī tsènglâng bīntsêng piáuián kántan ê thétshau tōngtsok, tán lâng siúⁿ i kúi sián tsîⁿ, kóng khah hóthiaⁿ kiò tsoh "kethâu gējîn", sūsi̍t siōng téngî sī khittsia̍h.

   Lán kîthāi lán ê ūntōnggoân tī āupiàn ê Òūnhōe ū hó ê sêngtsik, lán koh khah kîthāi lán ê tsènghú ētàng hóhó kuiōe, ántsóaⁿ pangtsō͘ ūntōnggoân ê tsionglâi. Tongjiân, huangêng ū sim ê khìgia̍p thoânthé mā ēsái tshamú. Íbián ta̍k piàn Òūnhōe liáu, tio̍h mn̄g kóng, Òūnhōe soántshiú tsióngpâi niá liáu, sòa lo̍hkhì leh? (210811)

Pe̍h-ōe-jī-pán/白話字版
《 Le̍k-sik toán-phêng 》          Lí Lâm-hêng
     Ò-ūn-hōe soán-tshiú tsióng pâi niá liáu, sòa lo̍h-khì leh?

   Tsit piàn Tang-kiaⁿ Ò-ūn-hōe tī peh-gue̍h tshe-peh oân-boán pì-bō͘. Lán khòaⁿ-tio̍h múi tsi̍t hāng-ba̍k, kik-lia̍t piàⁿ tshut tsoân sè-kài siōng kiông ê tsêng saⁿ miâ tit-tio̍h tsióng pâi ê soán-tshiú, ta̍t-tit lán kā tsun-kèng phòe-ho̍k. In khiā tī tâi téng, tsiap-siū pan-tsióng ê sî, hōe-tiûⁿ sing kiò tshut soán-tshiú ê kok-miâ, sing-khí soán-tshiú ê kok-kî, tông-sî ián-tsàu in ê kok-kua, sī hô-téng ê kong-êng. Lē-gōa ê sī lán Tâi-oân soán-tshiú tit-tio̍h iu-sèng pan-tsióng ê sî, kiò tshut hit-hō m̄-tsiâⁿ kok -iâ ê Tiong-hôa Tāi-pak, sing-khí hit-hō m̄-tsiâⁿ kok-kî ê óaⁿ-ko kî, ián-tsàu hit-hō m̄-tsiâⁿ kok-kua ê óaⁿ-ko kua.

   Kok-tsè Olympic úi-goân-hōe tû-liáu pan-huat kim-pâi, gîn-pâi, tâng-pâi í-gōa, bô jīm-hô tsióng-kim. Iu-sèng ê soán-tshiú tsióng-pâi niá liáu, tsiap-siū ê bô tshiūⁿ óng-nî o͘-khâm-khâm kuan-tsiòng ê huan-ho͘ kah phah phok-á, kin-nî e̍k-tsêng kuan-hē, hiān-tiûⁿ kuan-tsiòng bô kúi-ê. Tsióng-pâi niá liáu sòa lo̍h-khì leh?

Iu-sèng ê soán-tshiú tńg-khì kò͘-hiong, thèng-hāu in ê sī in-kok tsèng-hú kah in tông-pau jia̍t-tsêng ê gêng-tsiap kah bu̍t-tsit siōng ê kó͘-lē. Siōng si̍t-tsāi ê bu̍t-tsit siōng kó͘-lē sī hiān-kim. Thiaⁿ-kóng tsióng-kim siōng koân ê sī Sin-ka-pho, Ò-ūn-hōe tit kim-pâi tsióng-kim 74 bān 4 tshing bí-kim iok sin- tâi-pè 2,083 bān, gîn-pâi tsióng-kim 37 bān 2 tshing bí-kim iok sin-tâi-pè 1,041 bān, tâng-pâi tsióng-kim 28 bān 6 tshing bí-kim iok sin tâi-pè 800 bān. Tâi-oân kah sè-kài kok kok ē pí-phēng-tit, kim-pâi tsióng-kim sin-tâi-pè 2,000 bān, gîn-pâi sin tâi-pè 750 bān, tâng-pâi sin tâi-pè 500 bān.

Hui-lu̍t-pin ê Hitilin Tiatsu(Hidilyn Diaz), tī lú-tsú 55 kong-kin kip giâ tāng pí-sài tiong tua̍t-tio̍h kim-pâi, Hui-lu̍t-pin tsoân kok huaⁿ-hí kah tshù- kòa beh giâ tiāu, in-ūi i tit-tio̍h Hui-lu̍t-pin le̍k-sú siōng tē-it bīn Ò-ūn kim-pâi, hông tsún-tsoh kok-ka ing-hiông, Hui-lu̍t-pin tsóng-thóng phah tiān-ōe tsiok-hō tshin-tshùi tap-èng i kò-jîn kah tsèng-hú ê siúⁿ-kim lóng-tsóng ū 60 bān bí-kim iok sin-tâi-pè 1,680 bān ê tsióng-lē, lēng-gōa sàng i tsi̍t king kong-gū. Ū nn̄g-ūi sing-lí lâng tap-èng sàng i 1,500 bān Piso iok sin-tâi-pè 750 bān koh tsi̍t king pia̍t-tsong.

Múi tsi̍t kok ê tsióng-lē bô kâng-khoán, Gô-lô-su ê soán-tshiú nā Ò-ūn tit-tio̍h tsióng pâi, bô tē-jī kù ōe, sing sàng tsi̍t tâi kiau-tshia, tong-jiân kim-gîn-tâng pâi só͘ sàng ê tshia ū tsha-pia̍t. Iáu ū tshù-the̍h kah tsióng-kim tsióng-tsióng ê tsióng-lē. Khah kî-khiáu ê sī Lâm-hui, 2012 nî Lûn-tun Ò-ūn-hōe tit-tio̍h lâm-tsú khin-liōng-kip sì-lâng sái-têng hāng-bo̍k kuan-kun, múi tsi̍t-ê lâng tit-tio̍h tsi̍t tsiah gû-bó, sī tsi̍t ūi sing-lí lâng só͘ sàng ê.

   Tsióng pâi niá liáu, siúⁿ-kim tsióng-phín niá liáu, sòa lo̍h-khì leh? Káⁿ ū lâng siūⁿ-tio̍h ūn-tōng soán-tshiú ê tsiong-lâi?

   Sin-bûn pò-tō, Tiong-kok tsêng thé-tshau kok-tshiú TiuⁿSiōng-bú , 2001 nî tī sè-kài tāi-ha̍k ūn-tōng-hōe thé-tshau hāng-bo̍k ūi Tiong-kok tit-tio̍h nn̄g bīn kim-pâi, āu-lâi kha siū-siong, jîn-sing tsū án-ne oân-tsoân tōa kái-piàn, i tû-liáu thé-tshau í-gōa, bô pa̍t hāng ki-lêng, tì-sú lī-khui thé-tôaⁿ liáu-āu, tī tsèng-lâng bīn-tsêng piáu-ián kán-tan ê thé-tshau tōng-tsok, tán lâng siúⁿ i kúi sián tsîⁿ, kóng khah hó-thiaⁿ kiò tsoh "ke-thâu gē-jîn", sū-si̍t siōng téng-î sī khit-tsia̍h.

   Lán kî-thāi lán ê ūn-tōng-goân tī āu-piàn ê Ò-ūn-hōe ū hó ê sêng-tsik, lán koh khah kî-thāi lán ê tsèng-hú ē-tàng hó-hó kui-ōe, án-tsóaⁿ pang-tsō͘ ūn-tōng-goân ê tsiong-lâi. Tong-jiân, huan-gêng ū sim ê khì-gia̍p thoân-thé mā ē-sái tsham-ú. Í-bián ta̍k piàn Ò-ūn-hōe liáu, tio̍h mn̄g kóng, Ò-ūn-hōe soán-tshiú tsióng-pâi niá liáu, sòa lo̍h-khì leh? (210811)


  Tsit遍東京奧運會tī八月初八圓滿閉幕。咱看tio̍h每一項目,激烈拼出全世界上強ê前三名得tio̍h獎牌ê選手,值得咱kā尊敬佩服。Inkhiā tī台頂,接受頒獎ê時,會場先叫出選手ê國名、升起選手ê國旗、同時演奏inê國歌,是何等ê光榮。例外ê是咱台灣選手得tio̍h優勝頒獎ê時,叫出hit號m̄成國名ê中華台北、升起hit號m̄成國旗ê碗糕旗、演奏hit號m̄成國歌ê碗糕歌。

  國際Olympic委員會除了頒發金牌、銀牌、銅牌以外,無任何獎金。優勝ê選手獎牌領了,接受ê無像往年烏khâm-khâm觀眾ê歡呼kah拍phok-á,今年疫情關係,現場觀眾無幾个。獎牌領了續落去leh?

優勝ê選手轉去故鄉,等候inê是in國政府kah in同胞熱情ê迎接kah物質上ê鼓勵。上實在ê物質上鼓勵是現金。聽講獎金上koânê是新加坡,奧運會得金牌獎金74萬4千美金約新台幣2,083萬,銀牌獎金37萬2千美金約新台幣1,041萬,銅牌奬金28萬6千美金約新台幣800萬。台灣kah世界各國ē比phēng得,金牌獎金新台幣2,000萬,銀牌新台幣750萬,銅牌新台幣500萬。

菲律賓ê Hitilin Tiatsu(Hidilyn Diaz),tī女子55公斤級giâ重比賽中奪tio̍h金牌,菲侓賓全國歡喜kah厝kòa behgiâ掉,因為伊得tio̍h菲律賓歷史上第一面奧運金牌,hông準作國家英雄,菲律賓總統拍電話祝賀親嘴答應伊個人kah政府ê賞金lóng總有60萬美金約新台幣1,680萬ê獎勵,另外送伊一間公寓。有兩位生理人答應送伊1,500萬Piso約新台幣750萬koh一間別tsong。

每一國ê獎勵無仝款,俄羅斯ê選手若奧運得tio̍h獎牌,無第二句話,先送一台轎車,當然金銀銅牌所送ê車有差別。猶有厝宅kah獎金種種ê獎勵。Khah奇巧ê是南非,2012年倫敦奧運會得tio̍h男子輕量級四人賽艇項目冠軍,每一个人得tio̍h 一隻牛母,是一位生理人所送ê。

  獎牌領了,賞金獎品領了,續落去leh?敢有人想tio̍h運動選手ê將來?

  新聞報導,中國前體操國手張尚武,2001年tī世界大學運動會體操項目為中國得tio̍h兩面金牌,後來腳受傷,人生自án-ne完全大改變,伊除了體操以外,無別項技能,致使離開體壇了後,tī眾人面前表演簡單ê體操動作,等人賞伊幾sián錢,講khah好聽叫作「街頭藝人」,事實上等於是乞食。

  咱期待咱ê運動員tī後遍ê奧運會有好ê成績,咱koh khah期待咱ê政府ētàng好好規畫,按怎幫助運動員ê將來。當然,歡迎有心ê企業團體māē使參與。以免ta̍k遍奧運會了,tio̍h問講:奧運會選手獎牌領了,續落去leh? (210811)