《綠色短評》

 | | | 轉寄

M̄知馬英九teh kā蔣經國哭tshan啥？

作者 李南衡, TsoânTâijī/全台字 by Tsng Hūiphêng 2021.01.31

Tsoânbîn Tâioânjī pán/全民台灣字版簡稱TsoânTâiJī


Itgue̍h tsa̍psaⁿ sī tsêng tsóngthóng Tsiúⁿ Kingkok tsòkì ê ji̍t, thàutsá tsêng tsóngthóng Má Ingkiú tio̍h piàⁿ khì Thôhn̂g Tāikhe. Kńgkhì liáuāu tī i ê Bīntsheh téngbīn siá bûntsiuⁿ tōatōa oló Tsiúⁿ Kingkok tùi Tâioân ê kònghiàn, tsioh kó͘tsá tāitsì lâi mē tsitmá, phuephêng kináji̍t Tâioân sin uikoân tsúgī hingkhí, tóngì kauh ap kòe bînì.

Má Ingkiú piáusī kóng, inūi ìsik hêngthài, khue̍k kingbō͘ tséngha̍p siū tsó͘gāi, Tâioân ê kēngtsing la̍t itti̍t hông pianiân hòa. Má Ingkiú suah bē kìtit kā Tsiúⁿ Kingkok kóng, Tâioân sêngkong títòng Búhàn hìiām e̍ktsêng, sī 2020 nî sūnlī îtshî kingtsè sêngtióng ê tsiósò͘ kokka tsi it, Tâioân koh tsi̍t piàn tsiâⁿtsò sèkài siōng sêngtióng siōng kín ê kingtsè thé tsi it. 2020 nî Tâioân ê GDP suijiân kantāⁿ sêngtióng iok 2%, tānsī íking sī tsoân sèkài tsiósò͘ tī e̍ktsêng tshiongkik hē iûgoân ētàng îtshî kingtsè sêngtióng ê kingtsè thé. Tse mā sī kúi tsa̍p nî lâi Tâioân kingtsè sêngtióng tēit piàn tshiauua̍t Tiongkok. Má Ingkiú mā bē kìtit kā Tsiúⁿ Kingkok kóng, i nn̄g piàn kēngsoán tsóngthóng ê sî lóng hiòng Tâioân lâng pótsèng, i nā tòngsoán tsóngthóng, Tâioân ê kó͘tshī ē khí kàu tsi̍tbān tiám. Bôiáⁿ. I ê tsō͘soán tāitsiòng tsi̍t ūi pō͘tiúⁿ sūāu kóng, he sī tsi̍t tsióng soánkí gígiân. Bô gîgō͘ Bîntsìntóng ê Tshòa Ingbûn liânjīm tsóngthóng liáuāu, Tâioân kó͘tshī m̄nā tshiaukòe tsi̍tbān tiám, bānit tiám, bānjī tiám, tshiaukòe tsi̍tbān gō͘tshing gōa tiám, kóng sī i Tshòa Ingbûn hóūn. 　　

Má Ingkiú kóng, inūi soánkí tshaulāng, nn̄g hōaⁿ kuanhē khongtsiân okhòa, Tâioân antsoân siūtio̍h uihia̍p. Má Ingkiú suah bē kìtit 1979 nî, Bíkok kah Tionghôajînbîn Kiōnghôkok tsèngsik kiànli̍p gōakau kuanhē liáuāu, Tsiúⁿ Kingkok tsútsèng ê Tionghôa Bînkok tsènghú kah Tiongkok Kokbîntóng, tùi Tiongkok kiōngsántóng só͘ tsháitshú ê tsèngtshik sī : “put tsiaptshiok, put tâmphòaⁿ, put thòhia̍p ê “ saⁿ put tsèngtshik". 2015 nî tsa̍pitgue̍h tshetshit, Tâioân tsóngthóng Má Ingkiú tī Sinkapho kah Tionghôajînbîn kiōnghôkok tsúse̍k, Tiongkok kiōngsántóng tsóng sukì Si Tsìnphîn hōetâm koh aktshiú ū 81 bió kú.

Má Ingkiú koh kóng, kináji̍t Tâioân sûijiân íking bîntsú hòa saⁿtsa̍psaⁿ nî, ti̍tsoán tsóngthóng íking tshit piàn, khiok tī tsiptsèngtsiá ê tòa thâu tsi hā, hiankhí tsi̍t kó͘ hoán bîntsú ê ge̍klâu. Tàuté Bîntsìntóng tsènghú ántsóaⁿ hoán bîntsú, mā kóng tsi̍tê lâi thiaⁿ. Lán kantāⁿ tsaiiáⁿ, bîntsú tio̍h sī jînbîn tsoh tsúlâng. Tsitmá ê bîntsú bô tshintshiūⁿ Tsiúⁿ Kingkok tsiptsèng hē ê bîntsú, ē phài o͘tō ê khì Bíkok àmsat Tâioân tsokka Kang Lâm, tsi̍tê ha̍ktsiá Tân Bûnsêng tńglâi kò͘hiong Tâioân hō͘ Kéngtsóng kiò khì mn̄gōe, lō͘bóe tio̍h m̄tsai ántsóaⁿ síkhì. Tsitmá ê bîntsú bô hithō o͘miâtuaⁿ, jīmhô Tâioân lâng lóng ēsái tsūiû tshutkok hôikok.

Má Ingkiú koh kóng, inūi soánkí tshaulāng, nn̄g hōaⁿ kuanhē khongtsiân okhòa, Tâioân antsoân siūtio̍h uihia̍p. Tsioh mn̄g tsi̍tē, ta̍k kang sī Tiongkok huiki puelâi tshimhoān lán Tâioân sai lâm hôngkhong sikpia̍t khu (ADIZ), á·sī lán ê huiki ta̍k kang pue khì tshimhoān Tiongkok hông khong sikpia̍t khu? Náē bô hóhó kā Tsiúⁿ Kingkok kóng tshingtshó?

Má Ingkiú phuephêng kináji̍t Tâioân sin uikoân tsúgī hingkhí. Bêngbêng sī ta̍h tio̍h Tsiúⁿ Kingkok ê thiàⁿkha, lí kóng sin uikoân tsúgī hingkhí, lí kóng siáⁿ lâng sī kū uikoân? Tsintsiàⁿ m̄ kiaⁿ Tsiúⁿ Kingkok peh khílâi khiak lí ê thâukhak? Nāsī kah láu pâi láu jīhō ê uikoân Tsiúⁿ Kingkok pí·khílâi, Tshòa Ingbûn sǹgtsò siáⁿmi̍h sin uikoân, ánne loān kóng m̄ kiaⁿ tshiò phòa lâng ê tshùi? Má Ingkiú teh kā Tsiúⁿ Kingkok khàu tshan siáⁿ? (210115)


Pe̍h-ōe-jī-pán/白話字版


It-gue̍h tsa̍p-saⁿ sī tsêng tsóng-thóng Tsiúⁿ King-kok tsò-kì ê ji̍t, thàu-tsá tsêng tsóng-thóng Má Ing-kiú tio̍h piàⁿ khì Thô-hn̂g Tāi-khe. Kńg-khì liáu-āu tī i ê Bīn-tsheh téng-bīn siá bûn-tsiuⁿ tōa-tōa o-ló Tsiúⁿ King-kok tùi Tâi-oân ê kòng-hiàn, tsioh kó͘-tsá tāi-tsì lâi mē tsit-má, phue-phêng kin-á-ji̍t Tâi-oân sin ui-koân tsú-gī hing-khí, tóng-ì kauh ap kòe bîn-ì.

Má Ing-kiú piáu-sī kóng, in-ūi ì-sik hêng-thài, khu-e̍k king-bō͘ tséng-ha̍p siū tsó͘-gāi, Tâi-oân ê kēng-tsing la̍t it-ti̍t hông pian-iân hòa. Má Ing-kiú suah bē kì-tit kā Tsiúⁿ King-kok kóng, Tâi-oân sêng-kong tí-tòng Bú-hàn hì-iām e̍k-tsêng, sī 2020 nî sūn-lī î-tshî king-tsè sêng-tióng ê tsió-sò͘ kok-ka tsi it, Tâi-oân koh tsi̍t piàn tsiâⁿ-tsò sè-kài siōng sêng-tióng siōng kín ê king-tsè thé tsi it. 2020 nî Tâi-oân ê GDP sui-jiân kan-tāⁿ sêng-tióng iok 2%, tān-sī í-king sī tsoân sè-kài tsió-sò͘ tī e̍k-tsêng tshiong-kik hē iû-goân ē-tàng î-tshî king-tsè sêng-tióng ê king-tsè thé. Tse mā sī kúi tsa̍p nî lâi Tâi-oân king-tsè sêng-tióng tē-it piàn tshiau-ua̍t Tiong-kok. Má Ing-kiú mā bē kì-tit kā Tsiúⁿ King-kok kóng, i nn̄g piàn kēng-soán tsóng-thóng ê sî lóng hiòng Tâi-oân lâng pó-tsèng, i nā tòng-soán tsóng-thóng, Tâi-oân ê kó͘-tshī ē khí kàu tsi̍t-bān tiám. Bô-iáⁿ. I ê tsō͘-soán tāi-tsiòng tsi̍t ūi pō͘-tiúⁿ sū-āu kóng, he sī tsi̍t tsióng soán-kí gí-giân. Bô gî-gō͘ Bîn-tsìn-tóng ê Tshòa Ing-bûn liân-jīm tsóng-thóng liáu-āu, Tâi-oân kó͘-tshī m̄-nā tshiau-kòe tsi̍t-bān tiám, bān-it tiám, bān-jī tiám, tshiau-kòe tsi̍t-bān gō͘-tshing gōa tiám, kóng sī i Tshòa Ing-bûn hó-ūn.
　　 Má Ing-kiú kóng, in-ūi soán-kí tshau-lāng, nn̄g hōaⁿ kuan-hē khong-tsiân ok-hòa, Tâi-oân an-tsoân siū-tio̍h ui-hia̍p. Má Ing-kiú suah bē kì-tit 1979 nî, Bí-kok kah Tiong-hôa-jîn-bîn Kiōng-hô-kok tsèng-sik kiàn-li̍p gōa-kau kuan-hē liáu-āu, Tsiúⁿ King-kok tsú-tsèng ê Tiong-hôa Bîn-kok tsèng-hú kah Tiong-kok Kok-bîn-tóng, tùi Tiong-kok kiōng-sán-tóng só͘ tshái-tshú ê tsèng-tshik sī : “put tsiap-tshiok, put tâm-phòaⁿ, put thò-hia̍p ê “ saⁿ put tsèng-tshik". 2015 nî tsa̍p-it-gue̍h tshe-tshit, Tâi-oân tsóng-thóng Má Ing-kiú tī Sin-ka-pho kah Tiong-hôa-jîn-bîn kiōng-hô-kok tsú-se̍k, Tiong-kok kiōng-sán-tóng tsóng su-kì Si Tsìn-phîn hōe-tâm koh ak-tshiú ū 81 bió kú.

Má Ing-kiú koh kóng, kin-á-ji̍t Tâi-oân sûi-jiân í-king bîn-tsú hòa saⁿ-tsa̍p-saⁿ nî, ti̍t-soán tsóng-thóng í-king tshit piàn, khiok tī tsip-tsèng-tsiá ê tòa thâu tsi hā, hian-khí tsi̍t kó͘ hoán bîn-tsú ê ge̍k-lâu. Tàu-té Bîn-tsìn-tóng tsèng-hú án-tsóaⁿ hoán bîn-tsú, mā kóng tsi̍t-ê lâi thiaⁿ. Lán kan-tāⁿ tsai-iáⁿ, bîn-tsú tio̍h sī jîn-bîn tsoh tsú-lâng. Tsit-má ê bîn-tsú bô tshin-tshiūⁿ Tsiúⁿ King-kok tsip-tsèng hē ê bîn-tsú, ē phài o͘-tō ê khì Bí-kok àm-sat Tâi-oân tsok-ka Kang Lâm, tsi̍t-ê ha̍k-tsiá Tân Bûn-sêng tńg-lâi kò͘-hiong Tâi-oân hō͘ Kéng-tsóng kiò khì mn̄g-ōe, lō͘-bóe tio̍h m̄-tsai án-tsóaⁿ sí-khì. Tsit-má ê bîn-tsú bô hit-hō o͘-miâ-tuaⁿ, jīm-hô Tâi-oân lâng lóng ē-sái tsū-iû tshut-kok hôe-kok.

Má Ing-kiú koh kóng, in-ūi soán-kí tshau-lāng, nn̄g hōaⁿ kuan-hē khong-tsiân ok-hòa, Tâi-oân an-tsoân siū-tio̍h ui-hia̍p. Tsioh mn̄g tsi̍t-ē, ta̍k kang sī Tiong-kok hui-ki pue-lâi tshim-hoān lán Tâi-oân sai lâm hông-khong sik-pia̍t khu (ADIZ), á-.sī lán ê hui-ki ta̍k kang pue khì tshim-hoān Tiong-kok hông khong sik-pia̍t khu? Ná-ē bô hó-hó kā Tsiúⁿ King-kok kóng tshing-tshó?

Má Ing-kiú phue-phêng kin-á-ji̍t Tâi-oân sin ui-koân tsú-gī hing-khí. Bêng-bêng sī ta̍h tio̍h Tsiúⁿ King-kok ê thiàⁿ-kha, lí kóng sin ui-koân tsú-gī hing-khí, lí kóng siáⁿ lâng sī kū ui-koân? Tsin-tsiàⁿ m̄ kiaⁿ Tsiúⁿ King-kok peh khí-lâi khiak lí ê thâu-khak? Nā-sī kah láu pâi láu jī-hō ê ui-koân Tsiúⁿ King-kok pí·khí-lâi, Tshòa Ing-bûn sǹg-tsò siáⁿ-mi̍h sin ui-koân, án-ne loān kóng m̄ kiaⁿ tshiò phòa lâng ê tshùi? Má Ing-kiú teh kā Tsiúⁿ King-kok khàu tshan siáⁿ? (210115)


《綠色短評》 李南衡 M̄知馬英九teh kā蔣經國哭tshan啥？ 一月十三是前總統蔣經國做忌ê日，透早前總統馬英九tio̍h拼去桃園大溪謁陵。轉去了後佇伊ê面冊頂面寫文章大大o-ló蔣經國對台灣ê貢獻，借古早tāi-tsì來罵tsit-má，批評今仔日台灣新威權主義興起，黨意kauh壓過民意。

馬英九表示講，因為意識形態，區域經貿整合受阻礙，臺灣ê競爭力一直hông邊緣化。馬英九煞bē記得kā蔣經國講，台灣成功抵擋武漢肺炎疫情，是2020年順利維持經濟成長ê少數國家之一，台灣koh一遍成作世界上成長上緊ê經濟體之一。2020年台灣ê GDP雖然干單成長約2％，但是已經是全世界少數tī疫情衝擊下猶原會tàng維持經濟成長ê經濟體。這mā是幾十年來台灣經濟成長第一遍超越中國。馬英九mā bē記得kā蔣經國講，伊兩遍競選總統ê時攏向台灣人保證，伊若當選總統，台灣ê股市會起到一萬點。無影。伊ê助選大將一位部長事後講，he是一種選舉語言。無疑誤民進黨ê蔡英文連任總統了後，台灣股市m̄-nā超過一萬點、萬一點、萬二點、超過一萬五千外點，講是伊蔡英文好運。　　

馬英九講，因為選舉操弄，兩岸關係空前惡化，臺灣安全受tio̍h威脅。馬英九煞bē記得1979年，美國kah中華人民共和國正式建立外交關係了後，蔣經國主政ê中華民國政府kah中國國民黨，對中國共產黨所採取ê政策是:不接觸、不談判、不妥協ê「三不政策」。2015年十一月初七，台灣總統馬英九佇新加坡kah中華人民共和國主席、中國共產黨總書記習近平會談koh握手有81秒久。

馬英九koh講，今仔日臺灣雖然已經民主化三十三年，直選總統已經七遍，卻佇執政者ê帶頭之下，掀起一股反民主ê逆流。到底民進黨政府按怎反民主，mā講一個來聽。咱干單知影，民主tio̍h是人民作主人。Tsit-má ê民主無親像蔣經國執政下ê民主，會派烏道ê去美國暗殺台灣作家江南，一個學者陳文成轉來故鄉台灣hō͘警總叫去問話，路尾tio̍h m̄知按怎死去。Tsit-máê民主無hit號烏名單，任何台灣人攏會使自由出國回國。

馬英九koh講，因為選舉操弄，兩岸關係空前惡化，臺灣安全受tio̍h威脅。借問一下，逐工是中國軍機飛來侵犯咱台灣西南防空識別區（ADIZ），抑是咱ê軍機逐工飛去侵犯中國防空識別區？Ná-ē無好好kā蔣經國講清楚？

馬英九批評今仔日台灣新威權主義興起。明明是踏tio̍h蔣經國ê疼腳，你講新威權主義興起，你講啥人是舊威權？真正m̄̄驚蔣經國peh 起來khiak 你ê頭殼？若是kah老牌老字號ê威權蔣經國比起來，蔡英文算作啥物新威權，按呢亂講m̄驚笑破人ê嘴？馬英九teh kā蔣經國哭tshan啥？ (210115)