《綠色短評》

 | | | 轉寄

聽tsit陣小人án怎講！

作者 李南衡, TsoânTâijī/全台字 by Tsng Hūiphêng 2021.02.07

Tsoânbîn Tâioânjī pán/全民台灣字版簡稱TsoânTâiJī

　　2021 nî itgue̍h jītsa̍p tsákhí ( Tâioân sîkan jīit thàutsá ) tī Bíkok siúto͘ Washington te̍k khu Bíkok kokhōe tāihā piⁿ·á kíhêng tē 46 jīm Bíkok tsóngthóng Biden ê tsiūtsit tiánlé. Lán kok tsù Bíkok tāipiáu Siau Bíkhîm siū iautshiáⁿ tshamka. Tse sī 1979 nî TâiBí toānkau ílâi lán kok gōakaukuaⁿ thâutsi̍t piàn tittio̍h Bíkok tsóngthóng tsiūtsit tiánlé tiûpī úigoânhōe ê tsèngsik iautshiáⁿ. Tiongkok Kokbîntóng li̍púi Tân Gio̍ktin kóng, tshamka Bíkok tsóngthóng tsiūtsit kiⁿî m̄sī tēit piàn. Tân Gio̍ktin li̍púi késian m̄tsaiiáⁿ, kòikhì Tâioân bôlūn sī tāisài á·sī ùi Tāipak khì ê "tsiok’hō thoân" tshutsik Bíkok tsóngthóng tsiūtsit tiánlé, lóng sī thàukòe Bíkok kokhōe gīoân thêkiong, tsōūi sī itpuaⁿ bîntsiòng ê kuantsiòngse̍k. Tân Gio̍ktin li̍púi koh kóng, 2016 nî, Bíkok tsêng tsóngthóng Trump ū kah Tshòa Ingbûn tsóngthóng thong tiānōe, tshamka tsiūtsit tsíputkò sī kah ítsêng ê gōakau sêngtsiū kāngkhoán, tsit piàn Tshòa Ingbûn tsóngthóng bô kah Biden tsóngthóng thong tiānōe sǹg sī bô ki̍pkeh.

　　 Tâioân sîkan itgue̍h jītsa̍p ēpo͘, Tiongkok Kokbîntóng li̍púi Bé Bûnkun tī i ê bīntsheh téngbīn sng lán tsènghú kóng, tsátsêng siuⁿkòe thīn Bíkok tsóngthóng Trump, tsit piàn Tâioân beh tshamka Bíkok tsóngthóng tsiūtsit tiánlé " Mén dū méiyǒu ", ìsù sī kóng bián siàusiūⁿ, sī bôkhólêng ê tāitsì. Tâioân sîkan jīit thàutsá, tsù Bí tāipiáu Siau Bíkhîm tī i ê bīntsheh téngbīn PO tsi̍t tiuⁿ i khiā tī Bíkok tsóngthóng tsiū tsit tiánlé hōetiûⁿ tsêng ê siòngphìⁿ. Tsi̍tsî tsi kan, Bé Bûnkun li̍púi ê bīntsheh hông koàn piak khì, ū lâng kóng " Mén dū méiyǒu ", lâng Siau Bíkhîm mā ētàng ji̍pkhì. Tiongkok Kokbîntóng li̍púi Tân Ísìn kóng, gōakau pō͘ ingkai kiámthó sī ántsóaⁿ kàu tsòeāu tsi̍t khik tsiah hō͘ lán kokbîn tsaiiáⁿ, tìsú hō͘ kokbîn ū tsin tsē gō͘hōe.

Tiongkok Kokbîntóng li̍púi Lōa Sūpó piáusī, Siau Bíkhîm tittio̍h iautshiáⁿ tshamka "tongjiân sī hó tāitsì", ta̍kê lóng tsin huaⁿhí, ta̍ttit tsoân kok jînbîn khéngtēng. M̄koh ántsóaⁿ tittio̍h tsit hūn iautshiáⁿhâm? Sī thàukòe sujîn kuanhē ? Á·sī Bíkok beh ài Tâioân tsò siáⁿmi̍h? Tûliáu tsia̍h lâiti (萊ti) , bé búkhì kah kunsū iōngphín ígōa, kám iáu ū siáⁿmi̍h tngteh tsìnhêng tiong ê? Iáu koh kiò lán bé siáⁿmi̍h? Siau Bíkhîm tāipiáu ittēng tio̍h hiòng tsoânkok jînbîn hóhóá suatbêng.

Tsiamtùi Bé Bûnkun bīntsheh huat bûn, Tiongkok Kokbîntóng suah hông tsitgî teh "tshiùⁿ sue" TâiBí kuanhē, Tiongkok Kokbîntóng tsúse̍k Kang Khésîn thè i kóng hóōe, kiôngtiāu Tiongkok Kokbîntóng tn̂gkî ílâi ê tsèngtshik tio̍h sī " Qīn měihé lù ", tse tsèngtshik bô káipiàn, m̄koh kokhōe gīoân ê kàmtok kaksik á·sī tùi tsènghú ê tshuisak si ap, sī kok’hōe gīoân khòaⁿ tāitsì ū bô kâng ê kaktō͘; tséngthé lâi kóng, iûgoân sī hibāng khòaⁿtio̍h TâiBí kuanhē tsintsiàⁿ si̍ttsit tshimhòa, ū si̍ttsit hō͘hūi tsok’ûi.

　　 Ū " Wǎng hóng " bô huattō͘ khéngtēng Siau Bíkhîm tāipiáu, o͘pe̍h sng Siau Bíkhîm sī tī tsháupo͘’á téngthâu phah khah. Li̍púi Ông Tēngú jīit àm tsuankang tī bīntsheh téngbīn PO tshamka Biden tsiūtsittián ê kúi kok tāisài phah khah siòngphìⁿ, paukuat Lâmhân tāisài, Sūitián tāisài, Òtsiu tāisài téng, lóng kah Siau Bíkhîm tī kâng tsi̍tê tētiám phah khah.

Lí thiaⁿ tsittīn lâng ántsóaⁿ ēng siáujîn ê sim teh siūⁿ tāitsì, kóng tāitsì. (210122)

Pe̍h-ōe-jī-pán/白話字版


　　2021 nî it-gue̍h jī-tsa̍p tsá-khí ( Tâi-oân sî-kan jī-it thàu-tsá ) tī Bí-kok siú-to͘ Washington te̍k khu Bí-kok kok-hōe tāi-hā piⁿ-á kí-hêng tē 46 jīm Bí-kok tsóng-thóng Biden ê tsiū-tsit tián-lé. Lán kok tsù Bí-kok tāi-piáu Siau Bí-khîm siū iau-tshiáⁿ tsham-ka. Tse sī 1979 nî Tâi-Bí toān-kau í-lâi lán kok gōa-kau-kuaⁿ thâu-tsi̍t piàn tit-tio̍h Bí-kok tsóng-thóng tsiū-tsit tián-lé tiû-pī úi-goân-hōe ê tsèng-sik iau-tshiáⁿ. Tiong-kok Kok-bîn-tóng li̍p-úi Tân Gio̍k-tin kóng, tsham-ka Bí-kok tsóng-thóng tsiū-tsit kin-nî m̄-sī tē-it piàn. Tân Gio̍k-tin li̍p-úi ké-sian m̄-tsai-iáⁿ, kòe-khì Tâi-oân bô-lūn sī tāi-sài á-·sī ùi Tāi-pak khì ê "tsiok-hō thoân"tshut-sik Bí-kok tsóng-thóng tsiū-tsit tián-lé, lóng sī thàu-kòe Bí-kok kok-hōe gī-oân thê-kiong, tsō-ūi sī it-puaⁿ bîn-tsiòng ê kuan-tsiòng-se̍k. Tân Gio̍k-tin li̍p-úi koh kóng, 2016 nî, Bí-kok tsêng tsóng-thóng Trump ū kah Tshòa Ing-bûn tsóng-thóng thong tiān-ōe, tsham-ka tsiū-tsit tsí-put-kò sī kah í-tsêng ê gōa-kau sêng-tsiū kāng-khoán, tsit piàn Tshòa Ing-bûn tsóng-thóng bô kah Biden tsóng-thóng thong tiān-ōe sǹg sī bô ki̍p-keh.

　　 Tâi-oân sî-kan it-gue̍h jī-tsa̍p ē-po͘, Tiong-kok Kok-bîn-tóng li̍p-úi Bé Bûn-kun tī i ê bīn-tsheh téng-bīn sng lán tsèng-hú kóng, tsá-tsêng siuⁿ-kòe thīn Bí-kok tsóng-thóng Trump, tsit piàn Tâi-oân beh tsham-ka Bí-kok tsóng-thóng tsiū-tsit tián-lé " Mén dū méiyǒu ", ì-sù sī kóng bián siàu-siūⁿ, sī bô-khó-lêng ê tāi-tsì. Tâi-oân sî-kan jī-it thàu-tsá, tsù Bí tāi-piáu Siau Bí-khîm tī i ê bīn-tsheh téng-bīn PO tsi̍t tiuⁿ i khiā tī Bí-kok tsóng-thóng tsiū- tsit tián-lé hōe-tiûⁿ tsêng ê siòng-phìⁿ. Tsi̍t-sî tsi kan, Bé Bûn-kun li̍p-úi ê bīn-tsheh hông koàn piak khì, ū lâng kóng" Mén dū méiyǒu ", lâng Siau Bí-khîm mā ē-tàng ji̍p-khì. Tiong-kok Kok-bîn-tóng li̍p-úi Tân Í-sìn kóng, gōa-kau -pō͘ ing-kai kiám-thó sī án-tsóaⁿ kàu tsòe-āu tsi̍t khik tsiah hō͘ lán kok-bîn tsai-iáⁿ, tì-sú hō͘ kok-bîn ū tsin tsē gō͘-hōe.

Tiong-kok Kok-bîn-tóng li̍p-úi Lōa Sū-pó piáu-sī, Siau Bí-khîm tit-tio̍h iau-tshiáⁿ tsham-ka "tong-jiân sī hó tāi-tsì", ta̍k-ê lóng tsin huaⁿ-hí, ta̍t-tit tsoân kok jîn-bîn khéng-tēng. M̄-koh án-tsóaⁿ tit-tio̍h tsit hūn iau-tshiáⁿ-hâm? Sī thàu-kòe su-jîn kuan-hē ? Á-·sī Bí-kok beh ài Tâi-oân tsò siáⁿ-mi̍h? Tû-liáu tsia̍h lâi-ti (萊ti) , bé bú-khì kah kun-sū iōng-phín í-gōa, kám iáu ū siáⁿ-mi̍h tng-teh tsìn-hêng tiong ê? Iáu koh kiò lán bé siáⁿ-mi̍h? Siau Bí-khîm tāi-piáu it-tēng tio̍h hiòng tsoân-kok jîn-bîn hó-hó-á suat-bêng.

Tsiam-tùi Bé Bûn-kun bīn-tsheh huat bûn, Tiong-kok Kok-bîn-tóng suah hông tsit-gî teh "tshiùⁿ sue" Tâi-Bí kuan-hē, Tiong-kok Kok-bîn-tóng tsú-se̍k Kang Khé-sîn thè i kóng hó-ōe, kiông-tiāu Tiong-kok Kok-bîn-tóng tn̂g-kî í-lâi ê tsèng-tshik tio̍h sī " Qīn měihé lù ", tse tsèng-tshik bô kái-piàn, m̄-koh kok-hōe gī-oân ê kàm-tok kak-sik á-·sī tùi tsèng-hú ê tshui-sak si ap, sī kok-hōe gī-oân khòaⁿ tāi-tsì ū bô kâng ê kak-tō͘; tséng-thé lâi kóng, iû-goân sī hi-bāng khòaⁿ-tio̍h Tâi-Bí kuan-hē tsin-tsiàⁿ si̍t-tsit tshim-hòa, ū si̍t-tsit hō͘-hūi tsok-ûi.

　　 Ū " Wǎng hóng " bô huat-tō͘ khéng-tēng Siau Bí-khîm tāi-piáu, o͘-pe̍h sng Siau Bí-khîm sī tī tsháu-po͘-á téng-thâu phah khah. Li̍p-úi Ông Tēng-ú jī-it àm tsuan-kang tī bīn-tsheh téng-bīn PO tsham-ka Biden tsiū-tsit-tián ê kúi kok tāi-sài phah khah siòng-phìⁿ, pau-kuat Lâm-hân tāi-sài, Sūi-tián tāi-sài, Ò-tsiu tāi-sài téng, lóng kah Siau Bí-khîm tī kâng tsi̍t-ê tē-tiám phah khah.

Lí thiaⁿ tsit-tīn lâng án-tsóaⁿ ēng siáu-jîn ê sim teh siūⁿ tāi-tsì, kóng tāi-tsì. (210122)


　　2021年一月二十早起（台灣時間二一透早）tī美國首都Washing ton特區美國國會大廈邊á舉行第46任美國總統Biden ê就職典禮。咱國駐美國代表蕭美琴受邀請參加。這是1979年台美斷交以來咱國外交官頭一遍得tio̍h美國總統就職典禮籌備委員會ê正式邀請。中國國民黨立委陳玉珍講，參加美國總統就職今年m̄是第一遍。陳玉珍立委假仙m̄知影，過去台灣無論是大使抑是ùi台北去ê「祝賀團」出席美國總統就職典禮，lóng是透過美國國會議員提供、座位是一般民眾ê觀眾席。陳玉珍立委koh講，2016年，美國前總統Trump有kah蔡英文總統通電話，參加就職只不過是kah以前ê外交成就仝款，tsit遍蔡英文總統無kah Biden總統通電話算是無及格。

　　台灣時間一月二十下晡，中國國民黨立委馬文君tī伊ê面冊頂面酸咱政府講，早前siuⁿ過thīn美國總統Trump，tsit遍台灣beh參加美國總統就職典禮「門都沒有」，意思是講免siàu想，是無可能ê tāitsì。台灣時間二一透早，駐美代表蕭美琴tī她ê面冊頂面PO一張她khiā tī美國總統就職典禮會場前ê相片。一時之間，馬文君立委ê面冊hông灌piak去，有人講「門都沒有」，人蕭美琴mā ētàng入去。中國國民黨立委陳以信講，外交部應該檢討是án怎到最後一刻tsiah hō͘咱國民知影，致使hō͘國民有真tsē誤會。

中國國民黨立委賴士葆表示，蕭美琴得tio̍h邀請參加「當然是好tāitsì」， ta̍k个lóng真歡喜，值得全國人民肯定。M̄-koh án怎得tio̍h tsit份邀請函？是透過私人關係？抑是美國beh ài台灣做啥物？除了食萊豬、買武器kah軍事用品以外，kám iáu有啥物當teh進行中ê？Iáu koh叫咱買啥物？蕭美琴代表一定tio̍h向全國人民好好á說明。

針對馬文君面冊發文，中國國民黨suah hông質疑teh「唱衰」台美關係，中國國民黨主席江啟臣替伊講好話，強調中國國民黨長期以來ê政策tio̍h是「親美和陸」，這政策無改變，m̄-koh國會議員ê監督角色á是對政府ê推sak施壓，是國會議員看tāitsì有無仝ê角度；整體來講，猶原是希望看tio̍h台美關係真正實質深化，有實質互惠作為。

　　有「網紅」無法度肯定蕭美琴代表，烏白酸蕭美琴是tī草埔á頂頭phah卡。立委王定宇二一暗專工tī面冊頂面PO參加Biden就職典ê幾國大使phah卡相片，包括南韓大使、瑞典大使、澳洲大使等，lóng kah蕭美琴tī仝一个地點phah卡。

你聽tsit陣人án怎用小人ê心teh想tāitsì、講tāitsì。 (210122)