《綠色短評》

 | | | 轉寄

中國國民黨射出「迴力鏢」！

作者 李南衡, TsoânTâijī/全台字 by Tsng Hūiphêng 2021.09.19

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng
Tiongkok Kokbîntóng siātshut "Huela̍tpio"!

Tiongkok Kokbîntóng tsèngtī jînbu̍t kah pō͘hūn mûithé lâng, ittsài tsitgî tsùe̍kbiâu tējī lūi lāité ê tē 6 hāng kah tē 7 hāng "îtshî hônge̍k théhē ūntsok ê tiongiong tsènghú kah tēhng tsènghú tiōngiàu kuaⁿoân" ê tsùsiā tsênghêng, mē kóng sī "jînsò͘ phòngtiòng","tshin sio̍k te̍kkoân", mē kóng tsiahê tiongng tōakuaⁿ bô beh tsù Kotuan e̍kbiâu, hoántńg kah lāuehsèⁿ tshiúⁿ tsìnkháu e̍kbiâu, tshiúⁿ jînbîn ê e̍kbiâu. Tiongkok Kokbîntóng li̍púi Lîm E̍khôa piáusī, Ōehokpō͘ ê phiautsún hō͘ lâng tsin pháiⁿ tsiapsiū, in ēng kakī koânle̍k ê hongpiān, beh hō͘ siáⁿlâng tsù e̍kbiâu tio̍h hō͘ siáⁿlâng tsù e̍kbiâu, bo̍kkòai tējī lūi ê jînoân ē ùi goânlâi ītēng ê káubān gōalâng phòng kàu jītsa̍p gōa bān lâng, Tiongiong Liûhêng E̍ktsêng Tsíhui Tiongsim kám bián hō͘ jînbîn tsi̍tê kautài?

　　 Pehgo̍eh saⁿtsa̍p, ū kìtsiá kongkhai mn̄g " Tiongiong Liûhêng E̍ktsêng Tsíhui Tiongsim " Tsíhuikuaⁿ Tân Sîtiong pō͘tiúⁿ, tàuté si̍ttsāi ê tsênghêng sī ántsóaⁿ? I kóng, tējī lūi lāité ê tē 6 hāng kah tē 7 hāng, îtshî hônge̍k théhē ūntsok ê tiongiong kah tēhng kuaⁿoân lóngtsóng ū nn̄gbān la̍ktshing lâng tsù e̍kbiâu. I kóng, tiongiong kuaⁿoân m̄sī siōng tsē. Tiongiong tsènghú tiōngiàu kuaⁿoân tsō tsheh 1,710 lâng, kîtiong tsù tēit tse ê ū 1,692 lâng, tsù tējī tse ê ū 925 lâng; îtshî hônge̍k théhē ūntsok ê tēhng tsènghú tiōngiàu kuaⁿoân tsō tsheh ê ū 28,794 lâng, tsù tēit tse ê ū 24,793 lâng, íking tsù tējī tse ê ū 5,886 lâng.

　　 Ū kìtsiá khì ó͘ tsuliāu huathiān, tsoânkok 16 koāntshī the̍hpò "tēhngkuaⁿoân" miâtsheh tiong, Nâiâⁿ tsiptsèng ê 4 ê koāntshī, the̍hpò jînsò͘ tio̍h tshaputto tsiàm tējī lūi tē tshithāng îtshî hônge̍k théhē ūntsok tēhng kuaⁿoân tsóngsò͘ ê 77.4％.

Pehgo̍eh saⁿtsa̍pit, sinbûn pòtō kóng, tī tēhng kuaⁿoân tsōtsheh tiong, jînsò͘ tsêng 4 miâ hūnpa̍t sī Tsionghòa koān ū 8,238 lâng ( tsiàm 27%), Hûnlîm koān ū 5,499 lâng ( tsiàm 18%), Lâmtâu koān ū 4,710 lâng ( tsiàm 15%), Ka gī tshī ū 3,842 lâng ( tsiàm 12%), lóng sī Nâiâⁿ tsiptsèng ê koāntshī.

　　 Lâmtâu koān ná ē hiahtsē tsē kàu piàn tsoânkok tēsaⁿ ? Kuantiúⁿ Lîm Bêngtsin kóng, inūi kā sàng tsōtsheh miâtuaⁿ ê lîntiúⁿ, hō͘tsèng jînoân kah hônge̍k tsìkang lóng lia̍ttsoh îtshî hônge̍k théhē ūntsok ê tiōngiàu tēhng kuaⁿ oân. Bîntsìntóng li̍phuatúigoân Tshòa Īû ēng Kagītshī tsohlē kóng, Kagītshī sinpò ê tējī lūi tē tshithāng tiōngiàu tēhng kuaⁿoân ū 3,842 lâng, lán khòaⁿ jînkháu sò͘ sī Kagītshī 2 pōe ê Kagīkōan, kantaⁿ the̍hpò bô kàu 150 lâng. I tshiò kóng "Tsiàntàunâ" tio̍h násiōng tsi̍tê siā "Hôela̍tpio" ê lâng, siā tshutkhì pue tòtńglâi phah kakī.

　　 Káugo̍eh tsheit tsákhí, Tiongkok Kokbîntóng li̍phuatīⁿ tóngthoân tiàukhui kìtsiáhōe , Tsóngtiàu Hùi Hôngthài hoánkik Bîntsìntóng li̍púi Tshòa Īû kóng, "Mài o͘pe̍h phuah sái", jîtshiáⁿ hiòng Tsíhui Tiongsim huahsiaⁿ, iaukiû kongpò͘ "tējī lūi, tē tshithāng tàuté ū siáⁿkhoán ê lâng, bôkoán tó ittóng tsiptsèng ê koāntshī, tsoânpō͘ kongpò͘ hó boh?"

　　Ánne kám hó? Só͘ū ê miâtuaⁿ kongpò͘ tshutlâi, Tiongkok Kokbîntóng ê bīn beh giâ khì tóūi? Hùi Hôngthài tsintsiàⁿ m̄tsai iáⁿ "Hôela̍tpio" sī siáⁿ? Hùi Hôngthài lín tio̍h kín siám khah khui, á·sī kín sió khû·lo̍hkhì tsi̍tē, lín siā tshutkhì ê " Hôela̍tpio " teh beh se̍h tò tńglâi tôaⁿ tio̍h lín kakī ah! (210903)


Pe̍h-ōe-jī-pán/白話字版
《 Le̍k-sik toán-phêng 》 Lí Lâm-hêng
Tiong-kok Kok-bîn-tóng siā-tshut "Hue-la̍t-pio"!

Tiong-kok Kok-bîn-tóng tsèng-tī jîn-bu̍t kah pō͘-hūn mûi-thé lâng, it-tsài tsit-gî tsù-e̍k-biâu tē-jī lūi lāi-té ê tē 6 hāng kah tē 7 hāng "î-tshî hông-e̍k thé-hē ūn-tsok ê tiong-iong tsèng-hú kah tē-hng tsèng-hú tiōng-iàu kuaⁿ-oân" ê tsù-siā tsêng-hêng, mē kóng sī "jîn-sò͘ phòng-tiòng","tshin sio̍k te̍k-koân", mē kóng tsiah-ê tiong-ng tōa-kuaⁿ bô beh tsù Ko-tuan e̍k-biâu, hoán-tńg kah lāu-eh-sèⁿ tshiúⁿ tsìn-kháu e̍k-biâu, tshiúⁿ jîn-bîn ê e̍k-biâu. Tiong-kok Kok-bîn-tóng li̍p-úi Lîm E̍k-hôa piáu-sī, Ōe-hok-pō͘ ê phiau-tsún hō͘ lâng tsin pháiⁿ tsiap-siū, in ēng ka-kī koân-le̍k ê hong-piān, beh hō͘ siáⁿ-lâng tsù e̍k-biâu tio̍h hō͘ siáⁿ-lâng tsù e̍k-biâu, bo̍k-kòai tē-jī lūi ê jîn-oân ē ùi goân-lâi ī-tēng ê káu-bān gōa-lâng phòng kàu jī-tsa̍p gōa bān lâng, Tiong-iong Liû-hêng E̍k-tsêng Tsí-hui Tiong-sim kám bián hō͘ jîn-bîn tsi̍t-ê kau-tài?

　　 Peh-go̍eh saⁿ-tsa̍p, ū kì-tsiá kong-khai mn̄g " Tiong-iong Liû-hêng E̍k-tsêng Tsí-hui Tiong-sim " Tsí-hui-kuaⁿ Tân Sî-tiong pō͘-tiúⁿ, tàu-té si̍t-tsāi ê tsêng-hêng sī án-tsóaⁿ? I kóng, tē-jī lūi lāi-té ê tē 6 hāng kah tē 7 hāng, î-tshî hông-e̍k thé-hē ūn-tsok ê tiong-iong kah tē-hng kuaⁿ-oân lóng-tsóng ū nn̄g-bān la̍k-tshing lâng tsù e̍k-biâu. I kóng, tiong-iong kuaⁿ-oân m̄-sī siōng tsē. Tiong-iong tsèng-hú tiōng-iàu kuaⁿ-oân tsō tsheh 1,710 lâng, kî-tiong tsù tē-it tse ê ū 1,692 lâng, tsù tē-jī tse ê ū 925 lâng; î-tshî hông-e̍k thé-hē ūn-tsok ê tē-hng tsèng-hú tiōng-iàu kuaⁿ-oân tsō tsheh ê ū 28,794 lâng, tsù tē-it tse ê ū 24,793 lâng, í-king tsù tē-jī tse ê ū 5,886 lâng.

　　 Ū kì-tsiá khì ó͘ tsu-liāu huat-hiān, tsoân-kok 16 koān-tshī the̍h-pò "tē-hng-kuaⁿ-oân" miâ-tsheh tiong, Nâ-iâⁿ tsip-tsèng ê 4 ê koān-tshī, the̍h-pò jîn-sò͘ tio̍h tsha-put-to tsiàm tē-jī lūi tē tshit-hāng î-tshî hông-e̍k thé-hē ūn-tsok tē-hng kuaⁿ-oân tsóng-sò͘ ê 77.4％.

Peh-go̍eh saⁿ-tsa̍p-it, sin-bûn pò-tō kóng, tī tē-hng kuaⁿ-oân tsō-tsheh tiong, jîn-sò͘ tsêng 4 miâ hūn-pa̍t sī Tsiong-hòa koān ū 8,238 lâng ( tsiàm 27%), Hûn-lîm koān ū 5,499 lâng ( tsiàm 18%), Lâm-tâu koān ū 4,710 lâng ( tsiàm 15%), Ka- gī tshī ū 3,842 lâng ( tsiàm 12%), lóng sī Nâ-iâⁿ tsip-tsèng ê koān-tshī.

　　 Lâm-tâu- koān ná ē hiah-tsē tsē kàu piàn tsoân-kok tē-saⁿ ? Kuan-tiúⁿ Lîm Bêng-tsin kóng, in-ūi kā sàng tsō-tsheh miâ-tuaⁿ ê lîn-tiúⁿ, hō͘-tsèng jîn-oân kah hông-e̍k tsì-kang lóng lia̍t-tsoh î-tshî hông-e̍k thé-hē ūn-tsok ê tiōng-iàu tē-hng kuaⁿ- oân. Bîn-tsìn-tóng li̍p-huat-úi-goân Tshòa Ī-û ēng Ka-gī-tshī tsoh-lē kóng, Ka-gī-tshī sin-pò ê tē-jī lūi tē tshit-hāng tiōng-iàu tē-hng kuaⁿ-oân ū 3,842 lâng, lán khòaⁿ jîn-kháu sò͘ sī Ka-gī-tshī 2 pōe ê Ka-gī-kōan, kan-taⁿ the̍h-pò bô kàu 150 lâng. I tshiò kóng "Tsiàn-tàu-nâ" tio̍h ná-siōng tsi̍t-ê siā "Hôe-la̍t-pio" ê lâng, siā tshut-khì pue tò-tńg-lâi phah ka-kī.

　　 Káu-go̍eh tshe-it tsá-khí, Tiong-kok Kok-bîn-tóng li̍p-huat-īⁿ tóng-thoân tiàu-khui kì-tsiá-hōe , Tsóng-tiàu Hùi Hông-thài hoán-kik Bîn-tsìn-tóng li̍p-úi Tshòa Ī-û kóng, "Mài o͘-pe̍h phuah sái", jî-tshiáⁿ hiòng Tsí-hui Tiong-sim huah-siaⁿ, iau-kiû kong-pò͘ "tē-jī lūi, tē tshit-hāng tàu-té ū siáⁿ-khoán ê lâng, bô-koán tó it-tóng tsip-tsèng ê koān-tshī, tsoân-pō͘ kong-pò͘ hó boh?"

　　Án-ne kám hó? Só͘-ū ê miâ-tuaⁿ kong-pò͘ tshut-lâi, Tiong-kok Kok-bîn-tóng ê bīn beh giâ khì tó-ūi? Hùi Hông-thài tsin-tsiàⁿ m̄-tsai iáⁿ "Hôe-la̍t-pio" sī siáⁿ? Hùi Hông-thài lín tio̍h kín siám khah khui, á-·sī kín sió khû-·lo̍h-khì tsi̍t-ē, lín siā tshut-khì ê " Hôe-la̍t-pio " teh beh se̍h tò tńg-lâi tôaⁿ tio̍h lín ka-kī ah! (210903)


中國國民黨政治人物kah部分媒體人，一再質疑注疫苗第二類內底ê第6項kah第7項「維持防疫體系運作ê中央政府kah地方政府重要官員」ê注射情形，罵講是「人數膨脹」、「親屬特權」，罵講tsiah-ê中央大官無beh注高端疫苗，反轉kah老百姓搶進口疫苗、搶人民ê疫苗。中國國民黨立委林奕華表示，衛福部ê標準hō͘人真pháiⁿ接受，in用家己權力ê方便，beh hō͘啥人注疫苗tio̍h hō͘啥人注疫苗，莫怪第二類ê人員ēùi原來預定ê九萬外人膨到二十外萬人，中央流行疫情指揮中心kám免hō͘人民一個交代？

　　八月三十，有記者公開問「中央流行疫情指揮中心」指揮官陳時中，到底實在ê情形是按怎？伊講：第二類內底ê第6項kah第7項，維持防疫體系運作ê中央kah地方官員lóng總有兩萬六千人注疫苗。伊講：中央官員m̄是上tsē。中央政府重要官員造冊1,710人，其中注第一劑ê有1,692人、注第二劑ê有925人；維持防疫體系運作ê地方政府重要官員造冊ê有28,794人，注第一劑ê有24,793人、已經注第二劑ê有5,886人。

　　有記者去挖（ó͘）資料發現，全國16縣市提報「地方官員」名冊中，藍營執政ê4個縣市，提報人數tio̍h差不多佔第二類第七項維持防疫體系運作地方官員總數ê77.4％。

八月三十一，新聞報導講，tī地方官員造冊中，人數前4名分別是彰化縣有8,238人（佔27%），雲林縣有5,499人（佔18%），南投縣有4,710人（佔15%），嘉義市有3,842人（佔12%），lóng是藍營執政ê縣市。

　　南投縣ná ēhiahtsē tsē到變全國第三？縣長林明溱講，因為kā送造冊名單ê鄰長、戶政人員kah防疫志工lóng列作維持防疫體系運作ê重要地方官員。民進黨立法委員蔡易餘用嘉義市作例講，嘉義市申報ê第二類第七項重要地方官員有3,842人，咱看人口數是嘉義市2倍ê嘉義縣，kan-taⁿ提報無到150人。伊笑講「戰鬥藍」tio̍h ná像一個射「迴力鏢」ê人，射出去飛倒轉來拍家己。

　　九月初一早起，中國國民黨立法院黨團召開記者會，總召費鴻泰反擊民進黨立委蔡易餘講，「Mài烏白潑屎」，而且向指揮中心喝聲，要求公布「第二類、第七項到底有啥款ê人，無管tó一黨執政ê縣市，全部公布好boh？」

　　Án-nikám好？所有ê名單公布出來，中國國民黨ê面beh夯去tó位？費鴻泰真正m̄知影「迴力鏢」是啥？費鴻泰líntio̍h緊閃khah開、抑是緊小khû落去一下，lín射出去ê「迴力鏢」teh beh se̍h倒轉來彈tio̍hlín家己ah！ (210903)