《綠色短評》

 | | | 轉寄

中國國民黨新科主席朱立倫是siáⁿ款人？

作者 李南衡, TsoânTâijī/全台字 by Tsng Hūiphêng 2021.10.10

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

Tiongkok Kokbîntóng sinkho tsúse̍k Tsu Li̍plûn sī siáⁿ khoán lâng?

Káugue̍h jīgō͘, Tiongkok Kokbîntóng káisoán tóngtsúse̍k, tsóng soánkí jînsò͘ sī 37 bān 711 lâng, khuiphiò khui tshut 18 bān 7,998 phiò, iúhāu phiò sò͘ 18 bān 6,018 phiò, tsóng tâuphiò lu̍t sī 50.71%. Liân háigōa tâuphiò, Tsu Li̍plûn tittio̍h 8 bān 5,618 phiò, titphiòlu̍t 45.2%, tsiâⁿtsoh sinkho ê Tiongkok Kokbîntóng tsúse̍k. Tsu Li̍plûn tàuté sī tsi̍tê siáⁿmi̍h khoán ê lâng, lán kóng khah bē tsún, lán lâi thiaⁿ tsit piàn tshutlâi soán tóngtsúse̍k ê kēngtsing tùitshiú, kakī ê tôngtsì ántsóaⁿ kóng i.

Káugue̍h tsa̍pla̍k, Tsu Li̍plûn kóng,"Bîntsìntóng siōng hibāng Tiongkok Kokbîntóng soántshut tsi̍tê siōng lám, siōng ke̍ktuan ê tóngtsúse̍k", hông káitha̍k sī teh àmtiong tsí lēnggōa tsi̍t ūi hāusoánjîn Tiuⁿ Ationg. Káugue̍h tsa̍ptshit tsákhí, Tiuⁿ Ationg tsiapsiū mûithé liânhóng ê sî piáusī, 2016 nî tsóngthóng tōasoán, Tsu Li̍plûn su 300 gōa bān phiò, titphiòlu̍t kantāⁿ 31.04 %."tshiáⁿmn̄g ánne kám iáu bô kàu lám?".

Káugue̍h tsa̍pkáu, tī tsèngkiàn ē téngbīn, hiānjīm tóng tsúse̍k Kang Khésîn, tòpêng phue Tiuⁿ Ationg bô būsi̍t, tsiàⁿpêng phah Tsu Li̍plûn bô láusi̍t. Kang Khésîn kóng, In nn̄gê lāitàu m̄ hó, tónglāi hō͘ tàu sī bông tóng ê loāngoân.

　　 Káugue̍h tsa̍pkáu, tī Tâitiong tsèngkiàn huatpiáu hōe tiong, Tiuⁿ Ationg phuephêng Tsu Li̍plûn kóng i sī âng thóng, bú thóng, khiok the̍h bē tshut tsèngkì, sī "huisiông huisiông LOW ( kē kip)."

　　 Káugue̍h tsa̍pkáu àm, Tiongkok Kokbîntóng tsúse̍k hāusoánjîn Tiuⁿ Ationg huattshut singbêng, phàuhong lēnggōa tsi̍t ūi hāusoánjîn Tsu Li̍plûn kongkik i sī "âng thóng ","ke̍ktuan", ē tsōsêng "tónglāi hunlia̍t", koh tsè tshut "khìpó lūn" kah "bôngtóng lūn" lâi khiónghat tóngoân, tse sī "thúnta̍h tôngtsì tsungiâm","siōng kài bôkeh"ê tsokhuat, kohkhah sī tsi̍t tsióng "ūitio̍h soánkí, bô sioh tio̍h táⁿkik tôngtsì ê khópi hêngûi".

　　 Káugue̍h tsa̍pkáu, tī Tâitiongtshī kípān Tiongkok Kokbîntóng tsúse̍k tsèngkiàn suatbênghōe, tóngtsúse̍k tshamsoánjîn Tiuⁿ Ationg tī suatbênghōe tsìntsêng tsiapsiū mûithé tsháihóng ê sî piáusī, Tiongkok Kokbîntóng 40 hòe íhā ê tshingliân pílu̍t bô 3%, nā koh tsiàu ánne lo̍hkhì, Tiongkok Kokbîntóng khólêng tio̍h ē tsua̍t kiáⁿ tsua̍t sun.

　　 Káugue̍h jīsaⁿ, tóngtsúse̍k Kang Khésîn tsiapsiū mûithé hóngbūn ê sî kóng, tsíiàu sī ài tóng, tùi tóng ū kámtsêng, bô hibāng Tiongkok Kokbîntóng "tsua̍t kiáⁿ tsua̍t sun" ê lâng, ingkai lóng ē goānì tâuphiò tsitshî góa. Tānsī lán khòaⁿ tsit piàn Tiongkok Kokbîntóng tsúse̍k soánkí, tī 18 bān 8,486 tiuⁿ iúhāu soánphiò lāité, Kang Khésîn tsiah the̍h tit 3 bān 6,099 phiò, iok 19.15% niāniā, ánne sī m̄ sī kóng, kináji̍t tshutlâi soánkí ê Tiongkok Kokbîntóng tóngoân lāité, ū 80.85% ê tóngoân hiānhiān khòaⁿ Tiongkok Kokbîntóng ē tsua̍t kiáⁿ tsua̍t sun, ba̍ktsiu mā liân ni̍h tsi̍tē to bô. Khókiàn Tiongkok Kokbîntóng oân m̄ kiaⁿ Tiongkok Kokbîntóng tsua̍t kiáⁿ tsua̍t sun ê siongtong tsē. Káⁿ ē bú kah Tiongkok Kokbîntóng bô bóe khì? Lán bānbāná kā khòaⁿ.

　　 Káugue̍h tsa̍ppeh ēpo͘, kíhêng Tiongkok Kokbîntóng tsúse̍k soánkí tiānsī piānlūnhōe, Kang Khésîn ū the̍hmn̄g, tóng lāi hō͘siōng phah kah tsiah giâmtiōng, nā tòngsoán, beh ántsóaⁿ thoânkiat tóng? Lán tsioh Kang Khésîn tsit kù ōe, tshéngkàu sinkho tóngtsúse̍k Tsu Li̍plûn siansiⁿ. (210925)


Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng

Tiong-kok Kok-bîn-tóng sin-kho tsú-se̍k Tsu Li̍p-lûn sī siáⁿ khoán lâng?

Káu-gue̍h jī-gō͘, Tiong-kok Kok-bîn-tóng kái-soán tóng-tsú-se̍k, tsóng soán-kí jîn-sò͘ sī 37 bān 711 lâng, khui-phiò khui tshut 18 bān 7,998 phiò, iú-hāu phiò sò͘ 18 bān 6,018 phiò, tsóng tâu-phiò lu̍t sī 50.71%. Liân hái-gōa tâu-phiò, Tsu Li̍p-lûn tit-tio̍h 8 bān 5,618 phiò, tit-phiò-lu̍t 45.2%, tsiâⁿ-tsoh sin-kho ê Tiong-kok Kok-bîn-tóng tsú-se̍k. Tsu Li̍p-lûn tàu-té sī tsi̍t-ê siáⁿ-mi̍h khoán ê lâng, lán kóng khah bē tsún, lán lâi thiaⁿ tsit piàn tshut-lâi soán tóng-tsú-se̍k ê kēng-tsing tùi-tshiú, ka-kī ê tông-tsì án-tsóaⁿ kóng i.

Káu-gue̍h tsa̍p-la̍k, Tsu Li̍p-lûn kóng,"Bîn-tsìn-tóng siōng hi-bāng Tiong-kok Kok-bîn-tóng soán-tshut tsi̍t-ê siōng lám, siōng ke̍k-tuan ê tóng-tsú-se̍k", hông kái-tha̍k sī teh àm-tiong tsí lēng-gōa tsi̍t ūi hāu-soán-jîn Tiuⁿ A-tiong. Káu-gue̍h tsa̍p-tshit tsá-khí, Tiuⁿ A-tiong tsiap-siū mûi-thé liân-hóng ê sî piáu-sī, 2016 nî tsóng-thóng tōa-soán, Tsu Li̍p-lûn su 300 gōa bān phiò, tit-phiò-lu̍t kan-tāⁿ 31.04 %."tshiáⁿ-mn̄g án-ne kám iáu bô kàu lám?".

Káu-gue̍h tsa̍p-káu, tī tsèng-kiàn ē téng-bīn, hiān-jīm tóng- tsú-se̍k Kang Khé-sîn, tò-pêng phue Tiuⁿ A-tiong bô bū-si̍t, tsiàⁿ-pêng phah Tsu Li̍p-lûn bô láu-si̍t. Kang Khé-sîn kóng, In nn̄g-ê lāi-tàu m̄ hó, tóng-lāi hō͘ tàu sī bông tóng ê loān-goân.

　　 Káu-gue̍h tsa̍p-káu, tī Tâi-tiong tsèng-kiàn huat-piáu hōe tiong, Tiuⁿ A-tiong phue-phêng Tsu Li̍p-lûn kóng i sī âng thóng, bú thóng, khiok the̍h bē tshut tsèng-kì, sī "hui-siông hui-siông LOW ( kē kip)."

　　 Káu-gue̍h tsa̍p-káu àm, Tiong-kok Kok-bîn-tóng tsú-se̍k hāu-soán-jîn Tiuⁿ A-tiong huat-tshut sing-bêng, phàu-hong lēng-gōa tsi̍t ūi hāu-soán-jîn Tsu Li̍p-lûn kong-kik i sī "âng thóng ","ke̍k-tuan", ē tsō-sêng "tóng-lāi hun-lia̍t", koh tsè tshut "khì-pó lūn" kah "bông-tóng lūn" lâi khióng-hat tóng-oân, tse sī "thún-ta̍h tông-tsì tsun-giâm","siōng kài bô-keh"ê tsok-huat, koh-khah sī tsi̍t tsióng "ūi-tio̍h soán-kí, bô sioh tio̍h táⁿ-kik tông-tsì ê khó-pi hêng-ûi".

　　 Káu-gue̍h tsa̍p-káu, tī Tâi-tiong-tshī kí-pān Tiong-kok Kok-bîn-tóng tsú-se̍k tsèng-kiàn suat-bêng-hōe, tóng-tsú-se̍k tsham-soán-jîn Tiuⁿ A-tiong tī suat-bêng-hōe tsìn-tsêng tsiap-siū mûi-thé tshái-hóng ê sî piáu-sī, Tiong-kok Kok-bîn-tóng 40 hòe í-hā ê tshing-liân pí-lu̍t bô 3%, nā koh tsiàu án-ne lo̍h-khì, Tiong-kok Kok-bîn-tóng khó-lêng tio̍h ē tsua̍t kiáⁿ tsua̍t sun.

　　 Káu-gue̍h jī-saⁿ, tóng-tsú-se̍k Kang Khé-sîn tsiap-siū mûi-thé hóng-būn ê sî kóng, tsí-iàu sī ài tóng, tùi tóng ū kám-tsêng, bô hi-bāng Tiong-kok Kok-bîn-tóng "tsua̍t kiáⁿ tsua̍t sun" ê lâng, ing-kai lóng ē goān-ì tâu-phiò tsi-tshî góa. Tān-sī lán khòaⁿ tsit piàn Tiong-kok Kok-bîn-tóng tsú-se̍k soán-kí, tī 18 bān 8,486 tiuⁿ iú-hāu soán-phiò lāi-té, Kang Khé-sîn tsiah the̍h tit 3 bān 6,099 phiò, iok 19.15% niā-niā, án-ne sī m̄ sī kóng, kin-á-ji̍t tshut-lâi soán-kí ê Tiong-kok Kok-bîn-tóng tóng-oân lāi-té, ū 80.85% ê tóng-oân hiān-hiān khòaⁿ Tiong-kok Kok-bîn-tóng ē tsua̍t kiáⁿ tsua̍t sun, ba̍k-tsiu mā liân ni̍h tsi̍t-ē to bô. Khó-kiàn Tiong-kok Kok-bîn-tóng oân m̄ kiaⁿ Tiong-kok Kok-bîn-tóng tsua̍t kiáⁿ tsua̍t sun ê siong-tong tsē. Káⁿ ē bú kah Tiong-kok Kok-bîn-tóng bô bóe khì? Lán bān-bān-á kā khòaⁿ.

　　 Káu-gue̍h tsa̍p-peh ē-po͘, kí-hêng Tiong-kok Kok-bîn-tóng tsú-se̍k soán-kí tiān-sī piān-lūn-hōe, Kang Khé-sîn ū the̍h-mn̄g, tóng lāi hō͘-siōng phah kah tsiah giâm-tiōng, nā tòng-soán, beh án-tsóaⁿ thoân-kiat tóng? Lán tsioh Kang Khé-sîn tsit kù ōe, tshéng-kàu sin-kho tóng-tsú-se̍k Tsu Li̍p-lûn sian-siⁿ. (210925)


九月二五，中國國民黨改選黨主席，總選舉人數是37萬711人，開票開出18萬7,998票，有效票數18萬6,018票，總投票率是50.71％。連海外投票，朱立倫得tio̍h 8萬5,618票、得票率45.2%，成作新科ê中國國民黨主席。朱立倫到底是一個siáⁿ物款ê人，咱講khah bē準，咱來聽tsit遍出來選黨主席ê竸爭對手、家己ê同志án怎講伊。

九月十六，朱立倫講：「民進黨siōng希望中國國民黨選出一個上lám、siōng極端ê黨主席」，hông解讀是teh暗中指另外一位候選人張亞中。九月十七早起，張亞中接受媒體聯訪ê時表示，2016年總統大選，朱立倫輸300外萬票，得票率kan-tāⁿ31.04%。「請問án-ne kám猶無夠lám？」。

九月十九，tī政見會頂面，現任黨主席江啟臣，左pêng批張亞中無務實、正pêng拍朱立倫無老實。江啟臣講：In兩個內鬥m̄好，黨內互鬥是亡黨ê亂源。

　　九月十九，tī台中政見發表會中，張亞中評批朱立倫講伊是紅統、武統，卻提bē出證據，是「非常非常LOW（低級）。」

　　九月十九暗，中國國民黨主席候選人張亞中發出聲明，砲轟另外一位候選人朱立倫攻擊伊是「紅統」、「極端」，ē造成「黨內分裂」，koh祭出「棄保論」kah「亡黨論」來恐嚇黨員，tse是「踐（thún）踏同志尊嚴」、「siōng kài無格」ê作法，koh khah是一種「為tio̍h選舉，無惜tio̍h打擊同志ê可悲行為」。

　　九月十九，tī台中市舉辦中國國民黨主席政見說明會，黨主席參選人張亞中tī說明會進前接受媒體採訪ê時表示，中國國民黨40歲以下ê青年比率無3%，若koh照án-ne落去，中國國民黨可能tio̍h會絕子絕孫。

　　九月二三，黨主席江啟臣接受媒體訪問ê時講：只要是愛黨、對黨有感情，無希望中國國民黨「絕子絕孫」ê人，應該lóng ē願意投票支持我。但是咱看tsit遍中國國民黨主席選舉，tī18萬8,486張有效選票內底，江啟臣才the̍h得3萬6,099票、約19.15% niā-niā，án-ne是m̄是講，今á日出來選舉ê中國國民黨黨員內底，有80.85%ê黨員現現看中國國民黨會絕子絕孫，目睭mā連nih一下都無。可見中國國民黨員m̄驚中國國民黨絕子絕孫ê相當tsē。敢會舞kah中國國民黨無尾去？咱慢慢á kā看。

　　九月十八下晡，舉行中國國民黨主席選舉電視辯論會，江啟臣有提問：黨內互相phah kah tsiah嚴重，若當選，behán怎團結黨？咱借江啟臣tsit句話，請教新科黨主席朱立倫先生。 (210925)