《綠色短評》

 | | | 轉寄

到底siáⁿ人幾十年不長進，永遠「逢中必反」？

作者 李南衡, TsoânTâijī/全台字 by Tsng Hūiphêng 2021.10.17

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　　　　　　　　　　　 Lí Lâmhêng

　　　Tàuté siáⁿ lâng kúi tsa̍p nî put tióngtsìn, éngoán "hông Tiong pit hoán"?

　　 Káugue̍h jīpeh ēpo͘, Tiongkok Kokbîntóng sinkho tsúse̍k Tsu Li̍plûn khì kàu Kelâng siāphiò , i phuephêng Bîntsìntóng "jītsa̍p nî lâi lâu tī goântiám put tióngtsìn", éngoán "hông Tiong pit hoán". Tsu Li̍plûn náē thâukhak tsiah bô tshingtshó, hô͘giân loāngí ! Kóng Bîntsìntóng kah só͘ū ê Tâioân lâng "hông Tiong pit hoán", ìsù sī kóng kìⁿ nā kóngtio̍h "Tiongkok", tio̍h ittēng hoántùi. Tsu Li̍plûn pháiⁿ simkuaⁿ, thiautî kā "Tiongkok kiōngsántóng"( Τiongkiōng) kóng tsoh "Tiongkok" kántshing tsoh "Tiong". Lán ná·sī "hoán Tiongkok"? Lán hoán·ê sī "Tiongkok kiōngsántóng"( Τiongkiōng).

Lán lâi khòaⁿ Bîntsìntóng tsiptsèng tsòikīn tsit kúi nî, Tâioân kah Tiongkok ê bō͘e̍k ónglâi, 2017 nî sianghong ê bō͘e̍k liōng sī 1,814.7 ik bíkim, 2018 nî sī 1,931 ik bíkim, 2019 nî sī 1,905.7 ik bíkim, 2020 nî sī 2,162.3 ik bíkim, jîtshiáⁿ tshaputto ta̍k nî lóng ū siókhóa tsēngka. Siáⁿ lâng hoán Tiong?

Kàu 2019 nî la̍kgue̍h té ûitsí, lán kok ê gōatsik phòingó͘ jînsò͘ ta̍tkàu 54.9 bān lâng, nā àn koktsikpiat lâi khòaⁿ, í Tiongkok phòingó͘ 34.5 bān lâng siōng kài tsē, iok tsiàm 62.8％. Beh ántsóaⁿ hoán Tiong?

　　 Tâioân Tiongkok sianghong lâióng líiû ê jînsò͘, lán í 2019 nî tsoh lē, Tiongkok lâi Tâioân líiû ê jînsò͘ ū 2,714,065 lângpái, sī hit nî lâi Tâioân líiû gōakok lâng ê tēit miâ, Tâioân lâng khì Tiongkok líiû ū 2,003,023 lângpái. 2019 nî tshitgue̍h saⁿtsa̍p it, Tiongkok kuattēng tsū 2019 nî pehgue̍h tsheit khí tsiāmthêng sìtsa̍ptshit ê khaihòng lâi Tâioân tsūiû kiâⁿ ê siâⁿtshī, tsoânbīn tsiāmthêng hu̍thuat thonghêng tsèng. 2020 nîtshe inūi Tiongkok Búhàn hìiām tōa liûhêng, sianghong lóng kìmtsí jînbîn khì tùihong líiû. M̄ sī hoán Tiong.

　　2018 nî Tiongkok lâi Tâioân ê giánsiusing ka ha̍kūising ū 25,049 miâ, inūi Búhàn hìiām e̍ktsêng énghióng, Tâioân Tiongiong Liûhêng E̍ktsêng Tsíhui Tiongsim suanpò͘ ùi 2020 nî itgue̍h jīla̍k khí tsiāmoān Tiongsing giánsiusing ji̍pkéng lâi Tâioân. Kám sī ū lâng hoán Tiong? M̄ sī.

　　 Tsiàu ánne khòaⁿ, Bîntsìntóng kah só͘ū ê Tâioân lâng ná ū "hoán Tiongkok" leh? In só͘ hoán·ê sī "Tiongkok kiōngsántóng" kántan kóng sī "Τiongkiōng". Tio̍h sī in tóng ê Tsóngsukì Xíjìnpíng tī Tsu Li̍plûn tòngsoán Tiongkok Kokbîntóng tsúse̍k siá hōtiān lâi hitê "Tiongkok kiōngsántóng". Lán ūisiáⁿmi̍h "hoán Τiongkiōng"? inūi "í tóng niá kun","í tóng niá tsèng" hitê "Tiongkok kiōngsántóng" suanpò͘ bô beh hòngkhì" ēng búle̍k phah Tâioân", tsng nn̄gtshing gōa lia̍p huitôaⁿ hiòng Tâioân, kok tsióng tsiànki ta̍k kang tshimji̍p lán Sailâm Khonge̍k Hôngkhong Sikpia̍t khu lâi loān, í káugue̍h jīsaⁿ tsoh lē, Tiongkok káihòngkun ū 24 kè tshù kunki ùi Tâihái tiongsòaⁿ í lâm khonge̍k, tsìnji̍p lán Sailâm Khonge̍k Hôngkhong Sikpia̍t khu. Tsu Li̍plûn kakī tèⁿ khong ké gōng to tshám síliáu ah! Iáu ū bīn mē Bîntsìntóng 20 nî put tióngtsìn, éngoán "hông Tiong pit hoán"? Lán khòaⁿ Tsiúⁿ Κàitsio̍h tsóngthóng kah Tsiúⁿ Kingkok tsóngthóng, Láutsiúⁿ tsìtsió ùi 1945 nî pehgue̍h tsa̍pgō͘ khòngtsiàn sènglī hit kang kàu 1975 nî sìgue̍h tshegō͘ síkhì ûitsí, 30 nî put tióngtsìn, éngoán "hông Tiong pit hoán", sió Tsiúⁿ kāngkhoán ùi khòngtsiàn sènglī hit kang kàu 1988 nî itgue̍h tsa̍psaⁿ síkhì ûitsí, tsútiuⁿ kah Τiongkiōng "put tsiaptshiok, put tâmphòaⁿ, put thòhia̍p" saⁿ put tsèngtshik, 43 nî put tióngtsìn, éngoán "hông Tiong pit hoán", hoán Τiongkiōng. Tiongkok Kokbîntóng sinkho tsúse̍k Tsu Li̍plûn, ánne mā in síkhì ê tóng tsóngtshâi , tóng tsúse̍k, kám hó? (211001)


Pe̍h-ōe-jī-pán/白話字版
《 Le̍k-sik toán-phêng 》　　　　　　　　　　　　 Lí Lâm-hêng

　　　Tàu-té siáⁿ lâng kúi tsa̍p nî put tióng-tsìn, éng-oán "hông Tiong pit hoán"?

　　 Káu-gue̍h jī-peh ē-po͘, Tiong-kok Kok-bîn-tóng sin-kho tsú-se̍k Tsu Li̍p-lûn khì kàu Ke-lâng siā-phiò , i phue-phêng Bîn-tsìn-tóng "jī-tsa̍p nî lâi lâu tī goân-tiám put tióng-tsìn", éng-oán "hông Tiong pit hoán". Tsu Li̍p-lûn ná-ē thâu-khak tsiah bô tshing-tshó, hô͘-giân loān-gí ! Kóng Bîn-tsìn-tóng kah só͘-ū ê Tâi-oân lâng "hông Tiong pit hoán", ì-sù sī kóng kìⁿ nā kóng-tio̍h "Tiong-kok", tio̍h it-tēng hoán-tùi. Tsu Li̍p-lûn pháiⁿ sim-kuaⁿ, thiau-tî kā "Tiong-kok kiōng-sán-tóng"( Τiong-kiōng) kóng tsoh "Tiong-kok" kán-tshing tsoh "Tiong". Lán ná-·sī "hoán Tiong-kok"? Lán hoán-·ê sī "Tiong-kok kiōng-sán-tóng"( Τiong-kiōng).

Lán lâi khòaⁿ Bîn-tsìn-tóng tsip-tsèng tsòe-kīn tsit kúi nî, Tâi-oân kah Tiong-kok ê bō͘-e̍k óng-lâi, 2017 nî siang-hong ê bō͘-e̍k liōng sī 1,814.7 ik bí-kim, 2018 nî sī 1,931 ik bí-kim, 2019 nî sī 1,905.7 ik bí-kim, 2020 nî sī 2,162.3 ik bí-kim, jî-tshiáⁿ tsha-put-to ta̍k nî lóng ū sió-khóa tsēng-ka. Siáⁿ lâng hoán Tiong?

Kàu 2019 nî la̍k-gue̍h té ûi-tsí, lán kok ê gōa-tsik phòe-ngó͘ jîn-sò͘ ta̍t-kàu 54.9 bān lâng, nā àn kok-tsik-piat lâi khòaⁿ, í Tiong-kok phòe-ngó͘ 34.5 bān lâng siōng kài tsē, iok tsiàm 62.8％. Beh án-tsóaⁿ hoán Tiong?

　　 Tâi-oân Tiong-kok siang-hong lâi-óng lí-iû ê jîn-sò͘, lán í 2019 nî tsoh lē, Tiong-kok lâi Tâi-oân lí-iû ê jîn-sò͘ ū 2,714,065 lâng-pái, sī hit nî lâi Tâi-oân lí-iû gōa-kok lâng ê tē-it miâ, Tâi-oân lâng khì Tiong-kok lí-iû ū 2,003,023 lâng-pái. 2019 nî tshit-gue̍h saⁿ-tsa̍p it, Tiong-kok kuat-tēng tsū 2019 nî peh-gue̍h tshe-it khí tsiām-thêng sì-tsa̍p-tshit ê khai-hòng lâi Tâi-oân tsū-iû kiâⁿ ê siâⁿ-tshī, tsoân-bīn tsiām-thêng hu̍t-huat thong-hêng tsèng. 2020 nî-tshe in-ūi Tiong-kok Bú-hàn hì-iām tōa liû-hêng, siang-hong lóng kìm-tsí jîn-bîn khì tùi-hong lí-iû. M̄ sī hoán Tiong.

　　2018 nî Tiong-kok lâi Tâi-oân ê gián-siu-sing ka ha̍k-ūi-sing ū 25,049 miâ, in-ūi Bú-hàn hì-iām e̍k-tsêng éng-hióng, Tâi-oân Tiong-iong Liû-hêng E̍k-tsêng Tsí-hui Tiong-sim suan-pò͘ ùi 2020 nî it-gue̍h jī-la̍k khí tsiām-oān Tiong-sing gián-siu-sing ji̍p-kéng lâi Tâi-oân. Kám sī ū lâng hoán Tiong? M̄ sī.

　　 Tsiàu án-ne khòaⁿ, Bîn-tsìn-tóng kah só͘-ū ê Tâi-oân lâng ná ū "hoán Tiong-kok" leh? In só͘ hoán-·ê sī "Tiong-kok kiōng-sán-tóng" kán-tan kóng sī "Τiong-kiōng". Tio̍h sī in tóng ê Tsóng-su-kì Xíjìnpíng tī Tsu Li̍p-lûn tòng-soán Tiong-kok Kok-bîn-tóng tsú-se̍k siá hō-tiān lâi hit-ê "Tiong-kok kiōng-sán-tóng". Lán ūi-siáⁿ-mi̍h "hoán Τiong-kiōng"? in-ūi "í tóng niá kun","í tóng niá tsèng" hit-ê "Tiong-kok kiōng-sán-tóng" suan-pò͘ bô beh hòng-khì" ēng bú-le̍k phah Tâi-oân", tsng nn̄g-tshing gōa lia̍p hui-tôaⁿ hiòng Tâi-oân, kok tsióng tsiàn-ki ta̍k kang tshim-ji̍p lán Sai-lâm Khong-e̍k Hông-khong Sik-pia̍t -khu lâi loān, í káu-gue̍h jī-saⁿ tsoh lē, Tiong-kok kái-hòng-kun ū 24 kè- tshù kun-ki ùi Tâi-hái tiong-sòaⁿ í lâm khong-e̍k, tsìn-ji̍p lán Sai-lâm Khong-e̍k Hông-khong Sik-pia̍t -khu. Tsu Li̍p-lûn ka-kī tèⁿ khong ké gōng to tshám sí-liáu ah! Iáu ū bīn mē Bîn-tsìn-tóng 20 nî put tióng-tsìn, éng-oán "hông Tiong pit hoán"? Lán khòaⁿ Tsiúⁿ Κài-tsio̍h tsóng-thóng kah Tsiúⁿ King-kok tsóng-thóng, Láu-tsiúⁿ tsì-tsió ùi 1945 nî peh-gue̍h tsa̍p-gō͘ khòng-tsiàn sèng-lī hit kang kàu 1975 nî sì-gue̍h tshe-gō͘ sí-khì ûi-tsí, 30 nî put tióng-tsìn, éng-oán "hông Tiong pit hoán", sió Tsiúⁿ kāng-khoán ùi khòng-tsiàn sèng-lī hit kang kàu 1988 nî it-gue̍h tsa̍p-saⁿ sí-khì ûi-tsí, tsú-tiuⁿ kah Τiong-kiōng "put tsiap-tshiok, put tâm-phòaⁿ, put thò-hia̍p" saⁿ put tsèng-tshik, 43 nî put tióng-tsìn, éng-oán "hông Tiong pit hoán", hoán Τiong-kiōng. Tiong-kok Kok-bîn-tóng sin-kho tsú-se̍k Tsu Li̍p-lûn, án-ne mā in sí-khì ê tóng tsóng-tshâi , tóng tsú-se̍k, kám hó? (211001)


　　九月二八下po͘，中國國民黨新科主席朱立倫去到基隆謝票，伊批評民進黨「二十年來留tī原點不長進」，永遠「逢中必反」。朱立倫ná-ē頭殼tsiah無清楚、胡言亂語！講民進黨kah所有ê台灣人「逢中必反」，意思是講見nā講tio̍h「中國」，tio̍h一定反對。朱立倫pháiⁿ心肝，thiau-tî kā「中國共產黨」（中共）講作「中國」簡稱作「中」。咱ná是「反中國」？咱反-·ê是「中國共產黨」（中共）。

咱來看民進黨執政最近tsit幾年，台灣kah中國ê貿易往來，2017年雙方ê貿易量是1,814.7億美金，2018年是1,931億美金，2019年是1,905.7億美金，2020年是2,162.3億美金，而且差不多ta̍k年lóng有小khóa增加。siáⁿ人反中？

到2019年六月底為止，咱國ê外籍配偶人數達到 54.9 萬人，nā按國籍別來看，以中國配偶34.5萬人上蓋濟，約占62.8％。Beh按怎反中？

　　台灣中國雙方來往旅遊ê人數，咱以2019年作例，中國來台灣旅遊ê人數有2,714,065人次，是hit年來台灣旅遊外國人ê第一名，台灣人去中國旅遊有2,003,023人次。2019年七月三十一，中國決定自2019年八月初一起暫停四十七個開放來台灣自由行ê城市，全面暫停核發通行證。2020年初因為中國武漢肺炎大流行，雙方lóng禁止人民去對方旅遊。M̄是反中。

　　2018年中國來台灣ê研修生加學位生有25,049名，因為武漢肺炎疫情影響，台灣中央流行疫情指揮中心宣佈ùi 2020年一月二六起暫緩陸生研修生入境來台灣。敢是有人反中？M̄是。

　　照án-ne看，民進黨kah所有ê台灣人ná有「反中國」咧？In所反-·ê是「中國共產黨」簡單講是「中共」。Tio̍h是in黨ê總書記習近平tī朱立倫當選中國國民黨主席寫賀電來hit-ê「中國共產黨」。咱為siáⁿ物「反中共」？因為「以黨領軍」、「以黨領政」hit-ê「中國共產黨」宣布無beh放棄「用武力拍台灣」，裝兩千外粒飛彈向台灣，各種戰機ta̍k工侵入咱西南空域防空識別區來亂，以九月二三作例，中國解放軍有24架次軍機ùi台海中線以南空域，進入咱西南空域防空識別區。朱立倫家己tèⁿ khong假gōng都慘死了ah！猶有面罵民進黨20年不長進，永遠「逢中必反」？咱看蔣介石總統kah蔣經國總統，老蔣至少ùi 1945年八月十五抗戰勝利hit工到1975年四月初五死去為止，30车不長進，永遠「逢中必反」：小蔣kāng款ùi抗戰勝利hit工到1988年一月十三死去為止，主張kah中共「不接觸、不談判、不妥協」三不政策，43年不長進，永遠「逢中必反」，反中共。中國國民黨新科主席朱立倫，án-ne罵in死去ê黨總裁、黨主席，kám好？ (211001)