《綠色短評》

 | | | 轉寄

中國國民黨tsit-ê溜尾á政黨！

作者 李南衡, TsoânTâijī/全台字 by Tsng Hūiphêng 2021.10.24

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　　　　　　　　　　 Lí Lâmhêng
　　　　　Tiongkok Kokbîntóng tsitê liubóeá tsèngtóng!
　　 Ū tsi̍t kóa pòaⁿtsheⁿse̍k bîntsú kokka ê gīhōe, saⁿputgō͘sî tio̍h ē ū thêngtō͘ bô kâng, tshutthâu sinkî ê pōle̍k sūkiāⁿ huatsing. Lán tī Tâioân íking khòaⁿ kah koànsì koànsì ah. Tshiūⁿkóng 2016 nî tshitgue̍h tsheit, Tiongkok Kokbîntóng putboán Hêngtsèngīⁿ" tsi̍t lē tsi̍t hiu" hongàn, káu tiám gōa ū saⁿtsa̍p miâ Tiongkok Kokbîntóng li̍púi pàtsiàm tsúse̍k tâi. Bîntsìntóng li̍púi tsū pī tōasiaⁿ kong, tī tâiá kha kah Tiongkok Kokbîntóng li̍púi tùi mē. Īⁿhōe tsi̍t tsákhí khang tsoán; tshiūⁿkóng 2017 nî tshitgue̍h tsa̍psaⁿ, ū li̍phuat úigoân hiòng Hêngtsèngīⁿ tn̂g Lîm Tsoân khian tsúikiû, Lîm Tsoân bô huattō͘ huatpiáu ūsoàn pòkò. Hōegī pīpik tsiāmthêng; tshiūⁿkóng 2017 nî tshitgue̍h tsa̍psì, li̍phuatīⁿ inūi lāi tsèng "tsêngtsiam kèe̍k" huatàn ê símhe̍k kah thongkòe, koh po̍khuat kiklia̍t tshiongtu̍t. M̄nā tī kokka tsòiko gīhōe tiāntn̂g phiaⁿ íá, khian tsúikiû, sīmtsì ū li̍púi hông phah tio̍h siong; inūi tsènghú ē ùi 2021 nî tsiaⁿgue̍h tsheit khí, íntsún tsìnkháu Hâm ū Ractopamine (萊克多巴胺) ê Bíkok tibah kah 30 kògue̍h ísiōng ê Bíkok gûbah. Tsa̍pitgue̍h jītshit, Tiongkok Kokbîntóng li̍púi ūitio̍h beh tsó͘tsí Hêngtsèngīⁿtiúⁿ So͘ Tsintshiong tī li̍phuatīⁿ tsìnhêng sitsèng pòkò. Ū Kokbîntóng li̍phuat úigoân hiòng So͘ Tsintshiong ê pīsûntâi khian ti paklāi, jîtshiáⁿ tī hōetiûⁿ tsètsō tshòim,nâ le̍k li̍púi piakhuat giâmtiōng kithé tshiongtu̍t, So͘ Tsintshiong tsòeāu tī hūnloān tiong kiatsok sitsèng pòkò.

　　 Ūitio̍h "3+11" hōe sitlé sūkiāⁿ loān saⁿ kang liáuāu, thiaⁿkóng Tiongkok Kokbîntóng li̍púi tsúnpī beh tī tsa̍pgue̍h tsheit thêtshut 195 àn tsinglia̍t pòkò sūhāng, lāṳông ū khansia̍p tio̍h "3+11", gīsū put kong, Tâitiān thiàu tiān kah khiàm tiān gītê, kokhông ūsoàn, ônglâi sikkhia kìmtsí tshutkháu kàu Tiongkok, koān tshī ha̍ppèng kiámthó, līhōaⁿ hongtiān koksánhòa thiàuphiò, puttsāi tsik tâuphiò, kaji̍p CPTPP. Ná tshiūⁿ tsintsiàⁿ beh khaisí tsìnhêng tsitsûn.

Tsa̍pgue̍h tsheit thàutsá tshit tiám, li̍phuatīⁿ gītiûⁿ tōamn̂g tsi̍tē khui, Tiongkok Kokbîntóng li̍púi tio̍h sūnlī tsìnji̍p li̍phuatīⁿ gītiûⁿ, tsi̍t tīn lâng khì tsē kuaⁿoânsik, kúiê lâng tsiàm tio̍h kuaⁿoân pīsûntâi, piàⁿsì hipsiōng tsoh kìliām, huaⁿhí kah tshiò haihai! Tsē tī kuaⁿoânsik ê Tiongkok Kokbîntóng li̍púi huaⁿhí kah itti̍t phah tohbīn. Kúiūi Tiongkok Kokbîntóng li̍púi khì kā kuaⁿoân pīsûntâi ián tò, ìsù ná tshiūⁿ sī kóng, goán íking bôkhólêng ū kihōe khiā tī kuaⁿoân pīsûntâi, mā bô ài hō͘ lín khiā tī tsia tshàutshèng. Ùi tsia lán ē tàng khòaⁿtshut Tiongkok Kokbîntóng tsitê liubóeá tsèngtóng li̍púi ê pitsêng. Siáⁿmi̍h pitsêng?

　　 Káugue̍h jīgō͘, Tiongkok Kokbîntóng soán tóngtsúse̍k, tâuphiò lu̍t iok 49%, tséngthé tâuphiò sò͘ iok 18 bān 8,000 phiò, tòngsoán ê Tsu Li̍plûn the̍h tio̍h 8 bān 5,000 phiò, titphiòlu̍t iok 45.78%, sǹg khílâi kantaⁿ 22.43% ê tóngoân soán i niāniā, sī Tiongkok Kokbîntóng tsúse̍k ti̍t soán ílâi thâu tsi̍tê titphiò bô kòe pòaⁿ ê. Tsiahni̍h bôtit tóngoân tsitshî, tsit khoán ê tóngtsúse̍k beh ná ū khólêng tī 2024 nî tsóngthóng tōasoán soán iâⁿ, tittio̍h tsèngkoân leh? Tiongkok Kokbîntóng tsiahê li̍phuat úigoân bêng tsai tsitê sèbīn bô kiù, simkuaⁿ té ê khó͘tshó͘ koh bô tē tháu, thàn tsitê kihōe ián tò kuaⁿoân pīsûntâi lâi tshut khùi, tsē tī kuaⁿoânsik bóng kòe giàn.

Tsit tsióng hêngûi oântsoân sī tsi̍tê liubóeá kiáⁿ tsèngtóng li̍púi ê piáuhiān, piai ah! (211008)

Pe̍h-ōe-jī-pán/白話字版

《 Le̍k-sik toán-phêng 》　　　　　　　　　　　 Lí Lâm-hêng
　　　　　Tiong-kok Kok-bîn-tóng tsit-ê liu-bóe-á tsèng-tóng!
　　 Ū tsi̍t kóa pòaⁿ-tsheⁿ-se̍k bîn-tsú kok-ka ê gī-hōe, saⁿ-put-gō͘-sî tio̍h ē ū thêng-tō͘ bô kâng, tshut-thâu sin-kî ê pō-le̍k sū-kiāⁿ huat-sing. Lán tī Tâi-oân í-king khòaⁿ kah koàn-sì koàn-sì ah. Tshiūⁿ-kóng 2016 nî tshit-gue̍h tshe-it, Tiong-kok Kok-bîn-tóng put-boán Hêng-tsèng-īⁿ" tsi̍t lē tsi̍t hiu" hong-àn, káu tiám gōa ū saⁿ-tsa̍p miâ Tiong-kok Kok-bîn-tóng li̍p-úi pà-tsiàm tsú-se̍k tâi. Bîn-tsìn-tóng li̍p-úi tsū pī tōa-siaⁿ kong, tī tâi-á kha kah Tiong-kok Kok-bîn-tóng li̍p-úi tùi mē. Īⁿ-hōe tsi̍t tsá-khí khang tsoán; tshiūⁿ-kóng 2017 nî tshit-gue̍h tsa̍p-saⁿ, ū li̍p-huat úi-goân hiòng Hêng-tsèng-īⁿ tn̂g Lîm Tsoân khian tsúi-kiû, Lîm Tsoân bô huat-tō͘ huat-piáu ū-soàn pò-kò. Hōe-gī pī-pik tsiām-thêng; tshiūⁿ-kóng 2017 nî tshit-gue̍h tsa̍p-sì, li̍p-huat-īⁿ in-ūi lāi tsèng "tsêng-tsiam kè-e̍k" huat-àn ê sím-he̍k kah thong-kòe, koh po̍k-huat kik-lia̍t tshiong-tu̍t. M̄-nā tī kok-ka tsòe-ko gī-hōe tiān-tn̂g phiaⁿ í-á, khian tsúi-kiû, sīm-tsì ū li̍p-úi hông phah tio̍h siong; in-ūi tsèng-hú ē ùi 2021 nî tsiaⁿ-gue̍h tshe-it khí, ín-tsún tsìn-kháu Hâm ū Ractopamine (萊克多巴胺) ê Bí-kok ti-bah kah 30 kò-gue̍h í-siōng ê Bí-kok gû-bah. Tsa̍p-it-gue̍h jī-tshit, Tiong-kok Kok-bîn-tóng li̍p-úi ūi-tio̍h beh tsó͘-tsí Hêng-tsèng-īⁿ-tiúⁿ So͘ Tsin-tshiong tī li̍p-huat-īⁿ tsìn-hêng si-tsèng pò-kò. Ū Kok-bîn-tóng li̍p-huat úi-goân hiòng So͘ Tsin-tshiong ê pī-sûn-tâi khian ti pak-lāi, jî-tshiáⁿ tī hōe-tiûⁿ tsè-tsō tshò-im,nâ le̍k li̍p-úi piak-huat giâm-tiōng ki-thé tshiong-tu̍t, So͘ Tsin-tshiong tsòe-āu tī hūn-loān tiong kiat-sok si-tsèng pò-kò.

　　 Ūi-tio̍h "3+11" hōe sit-lé sū-kiāⁿ loān saⁿ kang liáu-āu, thiaⁿ-kóng Tiong-kok Kok-bîn-tóng li̍p-úi tsún-pī beh tī tsa̍p-gue̍h tshe-it thê-tshut 195 àn tsing-lia̍t pò-kò sū-hāng, lāi-iông ū khan-sia̍p tio̍h "3+11", gī-sū put kong, Tâi-tiān thiàu tiān kah khiàm tiān gī-tê, kok-hông ū-soàn, ông-lâi sik-khia kìm-tsí tshut-kháu kàu Tiong-kok, koān tshī ha̍p-pèng kiám-thó, lī-hōaⁿ hong-tiān kok-sán-hòa thiàu-phiò, put-tsāi tsik tâu-phiò, ka-ji̍p CPTPP. Ná tshiūⁿ tsin-tsiàⁿ beh khai-sí tsìn-hêng tsit-sûn.

Tsa̍p-gue̍h tshe-it thàu-tsá tshit tiám, li̍p-huat-īⁿ gī-tiûⁿ tōa-mn̂g tsi̍t-ē khui, Tiong-kok Kok-bîn-tóng li̍p-úi tio̍h sūn-lī tsìn-ji̍p li̍p-huat-īⁿ gī-tiûⁿ, tsi̍t tīn lâng khì tsē kuaⁿ-oân-sik, kúi-ê lâng tsiàm tio̍h kuaⁿ-oân pī-sûn-tâi, piàⁿ-sì hip-siōng tsoh kì-liām, huaⁿ-hí kah tshiò hai-hai! Tsē tī kuaⁿ-oân-sik ê Tiong-kok Kok-bîn-tóng li̍p-úi huaⁿ-hí kah it-ti̍t phah toh-bīn. Kúi-ūi Tiong-kok Kok-bîn-tóng li̍p-úi khì kā kuaⁿ-oân pī-sûn-tâi ián tò, ì-sù ná tshiūⁿ sī kóng, goán í-king bô-khó-lêng ū ki-hōe khiā tī kuaⁿ-oân pī-sûn-tâi, mā bô ài hō͘ lín khiā tī tsia tshàu-tshèng. Ùi tsia lán ē tàng khòaⁿ-tshut Tiong-kok Kok-bîn-tóng tsit-ê liu-bóe-á tsèng-tóng li̍p-úi ê pi-tsêng. Siáⁿ-mi̍h pi-tsêng?

　　 Káu-gue̍h jī-gō͘, Tiong-kok Kok-bîn-tóng soán tóng-tsú-se̍k, tâu-phiò lu̍t iok 49%, tséng-thé tâu-phiò sò͘ iok 18 bān 8,000 phiò, tòng-soán ê Tsu Li̍p-lûn the̍h tio̍h 8 bān 5,000 phiò, tit-phiò-lu̍t iok 45.78%, sǹg khí-lâi kan-taⁿ 22.43% ê tóng-oân soán i niā-niā, sī Tiong-kok Kok-bîn-tóng tsú-se̍k ti̍t soán í-lâi thâu tsi̍t-ê tit-phiò bô kòe pòaⁿ ê. Tsiah-ni̍h bô-tit tóng-oân tsi-tshî, tsit khoán ê tóng-tsú-se̍k beh ná ū khó-lêng tī 2024 nî tsóng-thóng tōa-soán soán iâⁿ, tit-tio̍h tsèng-koân leh? Tiong-kok Kok-bîn-tóng tsiah-ê li̍p-huat úi-goân bêng tsai tsit-ê sè-bīn bô kiù, sim-kuaⁿ té ê khó͘-tshó͘ koh bô tē tháu, thàn tsit-ê ki-hōe ián tò kuaⁿ-oân pī-sûn-tâi lâi tshut khùi, tsē tī kuaⁿ-oân-sik bóng kòe giàn.

Tsit tsióng hêng-ûi oân-tsoân sī tsi̍t-ê liu-bóe-á kiáⁿ tsèng-tóng li̍p-úi ê piáu-hiān, pi-ai ah! (211008)


　　有一kóa半生熟民主國家ê議會，三不五時tio̍h會有程度無仝、齣頭新奇ê暴力事件發生。咱tī台灣已經看kah慣勢慣勢ah。像講2016年七月初一，中國國民黨不滿行政院「一例一休」方案，九點外有三十名中國國民黨立委霸占主席台。民進黨立委自備大聲公，tī台á腳kah中國國民黨立委對罵。院會一早起空轉；像講2017年七月十三，有立法委員向行政院長林全khian水球，林全無法度發表預算報告。會議被迫暫停；像講2017年七月十四，立法院因為內政「前瞻計劃」法案ê審核kah通過，koh爆發激烈衝突。M̄-nātī國家最高議會殿堂phiaⁿ椅á、khian水球，甚至有立委hông拍tio̍h傷；因為政府會ùi 2021年正月初一起，允准進口含有萊克多巴胺ê美國豬肉kah 30個月以上ê美國牛肉。十一月二七，中國國民黨立委為tio̍h beh阻止行政院長蘇貞昌tī立法院進行施政報告。有國民黨立法委員向蘇貞昌ê備詢台khian豬腹內，而且tī會場製造噪音，藍綠立委爆發嚴重肢體衝突，蘇貞昌最後tī混亂中結束施政報告。

　　為tio̍h「3+11」會失禮事件亂三工了後，聽講中國國民黨立委準備beh tī十月初一提出195案增列報告事項，內容有牽涉tio̍h「3+11」、議事不公、台電跳電kah欠電議題、國防預算、王梨釋迦禁止出口到中國、縣市合併檢討、離岸風電國產化跳票、不在籍投票、加入CPTPP。ná像真正beh開始進行質詢。

十月初一透早七點，立法院議場大門一下開，中國國民黨立委tio̍h順利進入立法院議場，一陣人去坐官員席，幾個人佔tio̍h官員備詢台，拼勢hip相作紀念，歡喜kah笑hai-hai！坐tī官員席ê中國國民黨立委歡喜kah一直拍桌面。幾位中國國民黨立委去kā官員備詢台ián倒，意思ná像是講，阮已經無可能有機會khiātī官員備詢台，mā無愛hō͘恁khiātītsia臭tshèng。Ùi tsia咱會tàng看出中國國民黨tsit-ê溜尾á政黨立委ê悲情。啥物悲情？

　　九月二五，中國國民黨選黨主席，投票率約49％，整體投票數約18萬8,000票、當選ê朱立倫the̍h tio̍h 8萬5,000票、得票率約45.78%，算起來kan-taⁿ22.43%ê黨員選伊niā-niā，是中國國民黨主席直選以來頭一個得票無過半ê。Tsiah-ni̍h無得黨員支持，tsit款ê黨主席beh ná有可能tī 2024年總統大選選贏、得tio̍h政權咧？中國國民黨tsiah-ê立法委員明知tsit-ê勢面無救，心肝底ê苦楚koh無地敨（tháu），趁tsit-ê 機會ián倒官員備詢台來出氣（khùi），坐tī官員席bóng過癮（kòe-giàn）。

Tsit種行為完全是一個溜尾á囝政黨立委ê表現，悲哀ah！ (211008)