《綠色短評》

 | | | 轉寄

罷免高雄市議員黃捷，是一場笑話！

作者 李南衡, TsoânTâijī/全台字 by Tsng Hūiphêng 2021.02.14

Tsoânbîn Tâioânjī pán/全民台灣字版簡稱TsoânTâiJī



　　Hán fěn huatkhí, Tiongkok Kokbîntóng tsoânle̍k ūntsok, pābián Hōngsuaⁿ khu soántshut ê hiānsî bôtóngtsik Ko’hiông tshīgīoân N̂g Tsia̍p, jīgo̍eh tshela̍k tâuphiò, kiatkó sī tôngì phiò 55,261 phiò, 45.8%, bôtôngì phiò 65,392 phiò, 54.2%, N̂g Tsia̍p pābián àn bô sêngli̍p. Tsit tiûⁿ pābián ua̍htāng ùi khaisí liânsú itti̍t kàu tâuphiò kiatkó, tshiòōe bô tn̄g. Ēng "pòho̍k sèng ê pābián" lâi pābián tsi̍t ūi tsīntsit ê tshīgīoân, tio̍h sī tsi̍tê tshiòōe.

　　Siáⁿmi̍h sī "pòho̍k sèng ê pābián" ? Lán khòaⁿ " pā Tsia̍p" Tsútsiong tsi it ê Hán fěn hēngjîn ko giâ pābián N̂g Tsia̍p ê pâi’á téngbīn siá, M̄thang bē kìtit la̍kgo̍eh tshela̍k ê thíjio̍k. Ēbīn ū tsi̍t tōa tiuⁿ N̂g Tsia̍p hoán pe̍hba̍k ê siòngphìⁿ. La̍kgo̍eh tshela̍k sī Hân Kokjû tshītiúⁿ hông pābián tiāu ê ji̍ttsí, He sī siáⁿmi̍h thíjio̍k ê ji̍ttsí ? Ēbīn hit tiuⁿ N̂g Tsia̍p hoán pe̍hba̍k ê siòngphìⁿ, thêtshéⁿ lán 2019 nî gō͘go̍eh tshesaⁿ, Kohiông tshīgīhōe tsìnhêng nn̄g hōaⁿ siótso͘ tsuanàn pòkò ê sî, Hân Kokjû tshītiúⁿ jīnûi Kohiông tshī ū koân siatli̍p "Tsūiû kingtsè bō͘e̍k khu", Sîtāile̍kliōng tshīgīoân N̂g Tsia̍p mn̄g tshītiúⁿ, lí káⁿ tsaiiáⁿ siáⁿmi̍h kiò tsoh "Tsūiû kingtsè bō͘e̍k khu"? Kūthé lāṳông sī siáⁿ? Beh ántsóaⁿ siat? Hân tshītiúⁿ liânsòa saⁿ piàn ìn kóng,"Kohiông huat tōatsâi! " N̂g Tsia̍p tshīgīoân tongtiûⁿ hoán pe̍hba̍k. Ta̍kê tsinài khòaⁿ N̂g Tsia̍p gīoân ê tsitsûn kah i hoán pe̍hba̍k ê kiàⁿthâu. Hân Kokjû tshītiúⁿ ê siaⁿsè tsū ánne ná tsúipangsuaⁿ, tsi̍t kang pí tsi̍t kang khah thô͘, kuibóe hông pābián tiāu tshītiúⁿ. Só͘í Hán fěn hēngjîn ko bô ingkai kiò ta̍kê m̄thang bē kìtit la̍kgo̍eh tshela̍k, i ingkai kiò ta̍kê m̄thang bē kìtit gō͘go̍eh tshesaⁿ tsiah tio̍h.

　　 Tòngsoán ē ji̍t tsêng kongkò pābián N̂g Tsia̍p líiûsu, pā Tsia̍p thoânthé lia̍ttshut líiû tē gō͘ tiám sī "Ûihuat kàiji̍p Káng pō tsìnhêng bu̍ttsu bō͘tsi̍p, tùi Tiong thāitō͘ giâmtiōng siang piau" jīnûi i " bō͘tsi̍p bu̍ttsu pō͘hūn bênghián ûihoán kok’anhuat tē jīit tiâu". Tâioân ê kok’anhuat kantaⁿ ū tsa̍p tiâu niāniā, Hiangkáng ê kok’anhuat tsiah ū jīit tiâu. Pā Tsia̍p thoânthé ēng Tiongkok ê khùikháu, ēng Hiangkáng kok’anhuat lâi pābián N̂g Tsia̍p, m̄ sī hótshiò, sī khóò͘ⁿ!

Itgo̍eh jīsaⁿ Hōngsuaⁿ pā Tsia̍p iûhêng, Tiongkok Kokbîntóng tiongsiôngúi Sím Tìhūi tī iûhêng tiong, tōasiaⁿ huah "Tâitiong ka’iû!" hāi tsioktsē lâng tshiò kah tshùi ha̍p bē óa lâi.

　　 Tiongkok Kokbîntóng nátshiūⁿ tsia̍htio̍h Hân Kokjû ê tshùinōa, kóngōe itti̍t tshintshiūⁿ i "Kohiông huat tōatsâi" khikpôaⁿ thiàutsim , kiⁿî Tiongkok Kokbîntóng ti̍tti̍t thiàutsiam,"hoán Lâi (萊) ti". Pābián Kohiông tshīgīoân N̂g Tsia̍p tio̍h ti̍tti̍t thiàutsim,"hoán Lâi ti, pā N̂g Tsia̍p". Tshiò sílâng, Kohiông tshīgīoân kah Lâi ti ū siáⁿ kuanhē? In sīmtsì o͘pe̍h loāntôaⁿ kóng, pā N̂g Tsia̍p ē kòe tio̍h ē tsiongtsí Lâi ti tsìnkháu!

　　 Tiongkok Kokbîntóng tsúse̍k Kang Khésîn lo̍hkhì Kohiông tok kun pābián N̂g Tsia̍p ua̍htāng, kéngkò Bîntsìntóng bēsái piàⁿ tsoântóng ê la̍t, nā ánne tsò tio̍h sī kokka le̍kliōng kàiji̍p. Pā Tsia̍p ê tsêng tsi̍t àm, Kang Khésîn tsúse̍k kah tiôngsin ji̍p tóng ê Tiongkóng tángsūtiúⁿ Tiō Siáukhong ēng iáⁿphìⁿ ha̍p thé tōasiaⁿ huah thoânkiat pā Tsia̍p, pìsutiúⁿ Lí Khianliông tshōa tsa̍p kúi ūi li̍púi kàu hiāntiûⁿ tsō͘ tīn, tsoân tiûⁿ phàuhóe tsiâⁿ béng, tōasiaⁿ huah "pābián N̂g Tsia̍p, kàuhùn Bîntsìntóng".

Tsit piàn pābián N̂g Tsia̍p sī tsi̍t tiûⁿ tshiòōe, mā hō͘ lán khòaⁿtio̍h Hōngsuaⁿ lâng hoán pe̍hba̍k hō͘ Tiongkok Kokbîntóng khòaⁿ. Kéngkò Tiongkok Kokbîntóng, nā itti̍t ánne nāu tshiòōe, Tiongkok Kokbîntóng ē tò! 　(210206)
Tsù, hoán （péng） pe̍hba̍k

Pe̍h-ōe-jī-pán/白話字版



　　Hán fěn huat-khí, Tiong-kok Kok-bîn-tóng tsoân-le̍k ūn-tsok, pā-bián Hōng-suaⁿ khu soán-tshut ê hiān-sî bô tóng tsik Ko-hiông tshī gī-oân N̂g Tsia̍p, jī-go̍eh tshe-la̍k tâu-phiò, kiat-kó sī tông-ì phiò 55,261phiò, 45.8%, bô-tông-ì phiò 65,392 phiò, 54.2%, N̂g Tsia̍p pā-bián àn bô sêng-li̍p. Tsit tiûⁿ pā-bián ua̍h-tāng ùi khai-sí liân-sú it-ti̍t kàu tâu-phiò kiat-kó, tshiò-ōe bô tn̄g. Ēng "pò-ho̍k sèng ê pā-bián" lâi pā-bián tsi̍t ūi tsīn-tsit ê tshī gī-oân, tio̍h sī tsi̍t-ê tshiò-ōe.

　　Siáⁿ-mi̍h sī "pò-ho̍k sèng ê pā-bián" ? Lán khòaⁿ " pā Tsia̍p" Tsú-tsiong tsi it ê Hán fěn hēng-jîn ko giâ pā-bián N̂g Tsia̍p ê pâi-á téng-bīn siá, M̄-thang bē kì-tit la̍k-go̍eh tshe-la̍k ê thí-jio̍k. Ē-bīn ū tsi̍t tōa tiuⁿ N̂g Tsia̍p hoán pe̍h-ba̍k ê siòng-phìⁿ. La̍k-go̍eh tshe-la̍k sī Hân Kok-jû tshī-tiúⁿ hông pā-bián tiāu ê ji̍t-tsí, He sī siáⁿ-mi̍h thí-jio̍k ê ji̍t-tsí ? Ē-bīn hit tiuⁿ N̂g Tsia̍p hoán pe̍h-ba̍k ê siòng-phìⁿ, thê-tshéⁿ lán 2019 nî gō͘-go̍eh tshe-saⁿ, Ko-hiông tshī-gī-hōe tsìn-hêng nn̄g hōaⁿ sió-tso͘ tsuan-àn pò-kò ê sî, Hân Kok-jû tshī-tiúⁿ jīn-ûi Ko-hiông tshī ū koân siat-li̍p "Tsū-iû king-tsè bō͘-e̍k khu", Sî-tāi-le̍k-liōng tshī gī-oân N̂g Tsia̍p mn̄g tshī-tiúⁿ, lí káⁿ tsai-iáⁿ siáⁿ mi̍h kiò tsoh "Tsū-iû king-tsè bō͘-e̍k khu"? Kū-thé lāi-iông sī siáⁿ? Beh án-tsóaⁿ siat? Hân tshī-tiúⁿ liân-sòa saⁿ piàn ìn kóng,"Ko-hiông huat tōa-tsâi! " N̂g Tsia̍p tshī gī-oân tong-tiûⁿ hoán pe̍h-ba̍k. Ta̍k-ê tsin-ài khòaⁿ N̂g Tsia̍p gī-oân ê tsit-sûn kah i hoán pe̍h-ba̍k ê kiàⁿ-thâu. Hân Kok-jû tshī-tiúⁿ ê siaⁿ-sè tsū án-ne ná tsúi pang suaⁿ, tsi̍t kang pí tsi̍t kang khah thô͘, kui-bóe hông pā-bián tiāu tshī-tiúⁿ. Só͘-í Hán fěn hēng-jîn ko bô ing-kai kiò ta̍k-ê m̄-thang bē kì-tit la̍k-go̍eh tshe-la̍k, i ing-kai kiò ta̍k-ê m̄-thang bē kì-tit gō͘-go̍eh tshe-saⁿ tsiah tio̍h.

　　 Tòng-soán ē ji̍t tsêng kong-kò pā-bián N̂g Tsia̍p lí-iû-su, pā Tsia̍p thoân-thé lia̍t-tshut lí-iû tē gō͘ tiám sī "Ûi-huat kài-ji̍p Káng pō tsìn-hêng bu̍t-tsu bō͘-tsi̍p, tùi Tiong thāi-tō͘ giâm-tiōng siang piau" jīn-ûi i " bō͘-tsi̍p bu̍t-tsu pō͘-hūn bêng-hián ûi-hoán Kok-an-huat tē jī-it tiâu". Tâi-oân ê Kok- an-huat kan-taⁿ ū tsa̍p tiâu niā-niā, Hiang-káng ê kok-an-huat tsiah ū jī-it tiâu. Pā Tsia̍p thoân-thé ēng Tiong-kok ê khùi-kháu, ēng Hiang-káng kok-an -huat lâi pā-bián N̂g Tsia̍p, m̄ sī hó-tshiò, sī khó-ò͘ⁿ! It-go̍eh jī-saⁿ Hōng-suaⁿ pā tsia̍p iû-hêng, Tiong-kok Kok-bîn-tóng tiong-siông-úi Sím Tì-hūi tī iû-hêng tiong, tōa-siaⁿ huah "Tâi-tiong ka-iû!" hāi tsiok-tsē lâng tshiò kah tshùi ha̍p bē óa lâi.

　　 Tiong-kok Kok-bîn-tóng ná-tshiūⁿ tsia̍h-tio̍h Hân Kok-jû ê tshùi-nōa, kóng-ōe it-ti̍t tshin-tshiūⁿ i "Ko-hiông huat tōa-tsâi" khik-pôaⁿ thiàu-tsim , kin-nî Tiong-kok Kok-bîn-tóng ti̍t-ti̍t thiàu-tsiam,"hoán Lâi (萊) ti". Pā-bián Ko-hiông tshī-gī-oân N̂g Tsia̍p tio̍h ti̍t-ti̍t thiàu-tsim,"hoán lâi ti, pā N̂g Tsia̍p". Tshiò sí-lâng, Ko-hiông tshī-gī-oân kah Lâi ti ū siáⁿ kuan-hē? In sīm-tsì o͘-pe̍h loān-tôaⁿ kóng, pā N̂g Tsia̍p ē kòe tio̍h ē tsiong-tsí Lâi ti tsìn-kháu!

　　 Tiong-kok Kok-bîn-tóng tsú-se̍k Kang Khé-sîn lo̍h-khì Ko-hiông tok kun pā-bián N̂g Tsia̍p ua̍h-tāng, kéng-kò Bîn-tsìn-tóng bē-sái piàⁿ tsoân-tóng ê la̍t, nā án-ne tsò tio̍h sī kok-ka le̍k-liōng kài-ji̍p. Pā Tsia̍p ê tsêng tsi̍t àm, Kang Khé-sîn tsú-se̍k kah tiông-sin ji̍p tóng ê Tiong-kóng táng-sū-tiúⁿ Tiō Siáu-khong ēng iáⁿ-phìⁿ ha̍p thé tōa-siaⁿ huah thoân-kiat pā Tsia̍p, pì-su-tiúⁿ Lí Khian-liông tshōa tsa̍p kúi ūi li̍p-úi kàu hiān-tiûⁿ tsō͘ tīn, tsoân tiûⁿ phàu- hóe tsiâⁿ béng, tōa-siaⁿ huah "pā-bián N̂g Tsia̍p, kàu-hùn Bîn-tsìn-tóng".

Tsit piàn pā-bián N̂g Tsia̍p sī tsi̍t tiûⁿ tshiò-ōe, mā hō͘ lán khòaⁿ-tio̍h Hōng-suaⁿ lâng hoán pe̍h-ba̍k hō͘ Tiong-kok Kok-bîn-tóng khòaⁿ. Kéng-kò Tiong-kok Kok-bîn-tóng, nā it-ti̍t án-ne nāu tshiò-ōe, Tiong-kok Kok-bîn-tóng ē tò! 　(210206)
Tsù, hoán （péng） pe̍h-ba̍k

　　韓粉發起、中國國民黨全力運作，罷免鳳山區選出ê現時無黨籍高雄市員黃捷，二月初六投票，結果是同意票55,261票、45.8%，不同意票65,392票、54.2%，黃捷罷免案無成立。Tsit場罷免活動ùi開始連署一直到投票結果，笑話無斷。用「報復性ê罷免」來罷免一位盡職ê市議員，tio̍h是一个笑話。

　　Siáⁿ物是「報復性ê罷免」？咱看「罷捷」主將之一ê韓粉杏仁哥giâ罷免黃捷ê牌á頂面寫：M̄-thang bē記得六月初六ê恥辱。下面有一大張黃捷反白目ê相片。六月初六是韓國瑜市長hông罷免掉ê日子，He是siáⁿ物恥辱ê日子？下面hit張黃捷反白目ê相片，提醒咱2019年五月初三，高雄市議會進行兩岸小組專案報告ê時，韓國瑜市長認為高雄市有權設立「自由經濟貿易區」，時代力量市議員黃捷問市長，你敢知影siáⁿ物叫作「自由經濟貿易區」？具體內容是siáⁿ？Beh án怎設？韓市長連續三遍應講：「高雄發大財！」黃捷市議員當場反白目。Ta̍k个真愛看黃捷議員ê質詢kah伊反白目ê鏡頭。韓國瑜市長ê聲勢自按呢ná水崩山，一工比一工khah土，歸尾hông罷免掉市長。所以韓粉杏仁哥無應該叫ta̍k个m̄-thang bē記得六月初六，伊應該叫ta̍k个m̄-thang bē記得五月初三tsiah tio̍h。

　　中選會日前公告罷免黃捷理由書，罷捷團體列出理由第五點是「違法介入港暴進行物資募集，對中態度嚴重雙標」認為伊「募集物資部分明顥違反國安法第二一條」。台灣ê國安法kan-taⁿ有十條niā-niā，香港ê國安法才有二一條。罷捷團體用中國ê氣口、用香港國安法來罷免黃捷，m̄是好笑，是可惡！

一月二三鳳山罷捷遊行，中國國民黨中常委沈智慧tī遊行中，大聲喝「台中加油！」害足tsē人笑kah嘴合bē倚來。

　　中國國民黨ná像食tio̍h韓國瑜ê嘴nōa，講話一直親像伊「高雄發大財」曲盤跳針，今年中國國民黨直直跳針：「反萊豬」。罷免高雄市議員黃捷tio̍h直直跳針：「反萊豬，罷黃捷」。笑死人，高雄市議員kah萊豬有siáⁿ關係？In甚至烏白亂彈講：罷黃捷ē過tio̍h ē終止萊豬進口！

　　中國國民黨主席江啟臣落去高雄督軍罷免黃捷活動，警告民進黨bē-sái拼全黨ê力，若án-ne做tio̍h是國家力量介入。罷捷ê前一暗，江啟臣主席kah重新入黨ê中廣董事長趙少康用影片合體大聲喝團結罷捷，秘書長李乾龍tshōa十幾位立委到現場助陣，全場砲火誠猛，大聲喝「罷免黃捷、教訓民進黨」。

Tsit遍罷免黃捷是一場笑話，mā hō͘咱看tio̍h鳳山人反白目hō͘中國國民黨看。警告中國國民黨，若一直án-ne鬧笑話，中國國民黨ē倒！　(210206)

註：反（péng）白目