《綠色短評》

 | | | 轉寄

Tsit遍惡罷成功，台灣人náē-sái無覺醒！

作者 李南衡, TsoânTâijī/全台字 by Tsng Hūiphêng 2021.11.07

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

　　　 Tsit piàn ok pā sêngkong, Tâioânlâng ná ēsái bô kaktshéⁿ!

　　 Tsa̍pgue̍h jīsaⁿ, Tâitiong tējī soánkhu, iā tsiūsī Sualo̍k, O͘ji̍t, Tōatō͘, Liôngtséⁿ, Būhong gō͘ khu ê soánbîn kíhêng "pābián li̍púi Tân Pikî tâuphiò "gō͘ khu soánkí jînsò͘ sī 29 bān 4,976 lâng, pābián thongkòe ê hō͘tēng sī sìhun tsṳt, iā tsiūsī 7 bān 3,744 phiò, jîtshiáⁿ, tôngì phiò tio̍h pí put tôngì phiò khah tsē tsiah ū tsúnsǹg. Tsin lântit tâuphiò lu̍t tshiaukòe 51.72%. Kàu ēpo͘ tshit tiám só͘ tittio̍h ê kiatkó, tôngì phiò 7 bān 7,899 phiò, ū hāⁿ kòe pābián ê hō͘tēng, jîtshiáⁿ pí put tôngì phiò 7 bān 3,433 phiò ū khah tsē. Só͘í pābián thongkòe.

　　 Tsit piàn ê pābián ēsái kóng sī tsi̍t tiûⁿ tōa ap sè, kiông phah jio̍k, ok khi siān, oântsoân bô kongpêⁿ ê pābián. Tsi̍tê sèkài siōng tōa tóng, ū 9,500 bān ê tóngoân ê Tiongkok kiōngsántóng, kah Tâioân tēit tōa tsāṳá tóng, tī li̍phuatīⁿ ū 38 sik ê Tiongkok Kokbîntóng tàukhang, beh kā li̍phuatīⁿ siōng sè tóng, kantaⁿ ū tsi̍tê li̍phuat úigoân ê Tâioân Kitsìn li̍phuat úigoân Tân pikî pābián tiāu, kohtsài phòeha̍p tēhng sèle̍k tsin kiông ê Gânka bú tsit tshut pābián àn.

　　Tsit saⁿ hongbīn ū bô kāngkhoán ê siūⁿhuat kah phahsǹg. Káugue̍h jīla̍k, Tiongkok Kiōngsántóng Tsóngsukì Xíjìnpíng huat hō͘ Tsu Li̍plûn tòngsoán tóngtsúse̍k ê hōtiān, tûliáu kah íóng kāngkhoán, kiantshî "Kiújī kiōngsik", hoántùi "Tâito̍k" ê kiōngtông tsèngtī kitshó͘ siōng ê liôngsèng hō͘tōng, kakiông ha̍ptsok ígōa, kiⁿî kah éngnî bô kâng ê "sèngtsí" sī, "ūi kokka bô͘ thóngit". Xíjìnpíng kiaⁿ Tsu Li̍plûn bē kìtit, te̍kpia̍t tī Tsu Li̍plûn tsiūjīm tóngtsúse̍k hit kang, tī < Tiongiong tiānsītâi > iû Tiongkok Siākho īⁿ Tâioân giánkiùsó͘ hù giánkiùoân Tân Kùitshing hē tsítō kî, te̍kpia̍t thêtshéⁿ Tsu Li̍plûn ê sì ki tsìⁿ, ū tsi̍t ki sī pābián Tân Pikî, ū tsi̍t ki sī pābián Lîm Tshióngtsò, ū tsi̍t ki sī nîté ê sì tōa kongtâu, tēngūi tsoh "tókoh kongtâu", hō͘ hiāntsāi Bîntsìntóng tsiptsèng ê hêngtsèng thoântūi tsi̍tê kiôngle̍k ê táⁿkik.

Le̍ksú siōng tit phiò lu̍t siōng kē tòngsoán Tiongkok Kokbîntóng tsúse̍k ê Tsu Li̍plûn, kín beh tī pābián Tân pikî tsit àn li̍pui, koh khah iàukín sī, pābián ū tsiâⁿ koh ētàng hiòng pakkiaⁿ tshéngkong, kā tī li̍phuatīⁿ siōng kiantshî Tâioân to̍kli̍p ê Tâioân Kitsìn îit ê li̍púi pābián tiāu, tshiáⁿ kì liaulô tsi̍t tōa kong.

Gânka ê siūⁿhuat tsin kántan, khòaⁿ Tân pikî tsi̍t nî tsa̍p kò gue̍h tsò li̍phuat úigoân tsò liáu thài hó, tánthāi i tsi̍t jīm tsò liáu, āu tsi̍t jīm li̍púi oântsoân bián siūⁿ beh soán iâⁿ, thàn i tsi̍t jīm iáu bōe tsò oân, sòa kā pābián tiāu tio̍h ētàng ansim á khùn.

Tiongkok Kokbîntóng tio̍h tshut oklia̍t ê pō͘sò͘, bôkoán sī tsōiâu , buah o͘, súnhāi jînkeh, tshōe bô pābián ê líiû tio̍h tsètsō tsi̍t kóa "tsiàkháu", tsò tsi̍t tōatui khòaⁿpán siá "tsōetsōng". Só͘í lâng tsiah ē kóng tse sī tsi̍t tiûⁿ ê "ok pā". Tsit pō͘ nā ē thong, Tiongkok Kiōngsántóng bián ēng tsi̍t ping tsi̍t tsut, kantaⁿ hē tsi̍t tō tsi̍t tō ê "sèngtsí", Tâioân ê liaulô tio̍h ētàng kā Tâioân bú kah o͘thiⁿ àmtē, puttik anlêng.

　　 Tsit piàn ok pā sêngkong, Tâioânlâng ná ēsái bô kaktshéⁿ! 　　 (211023)

Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng

　　　 Tsit piàn ok pā sêng-kong, Tâi-oân-lâng ná ē-sái bô kak-tshéⁿ!

　　 Tsa̍p-gue̍h jī-saⁿ, Tâi-tiong tē-jī soán-khu, iā tsiū-sī Sua- lo̍k, O͘-ji̍t, Tōa-tō͘, Liông-tséⁿ, Bū-hong gō͘ khu ê soán-bîn kí-hêng "pā-bián li̍p-úi Tân Pik-î tâu-phiò "gō͘ khu soán-kí jîn-sò͘ sī 29 bān 4,976 lâng, pā-bián thong-kòe ê hō͘-tēng sī sì-hun tsi-it, iā tsiū-sī 7 bān 3,744 phiò, jî-tshiáⁿ, tông-ì phiò tio̍h pí put tông-ì phiòkhah tsē tsiah ū tsún-sǹg. Tsin lân-tit tâu-phiò lu̍t tshiau-kòe 51.72%. Kàu ē-po͘ tshit tiám só͘ tit-tio̍h ê kiat-kó, tông-ì phiò 7 bān 7,899 phiò, ū hāⁿ kòe pā-bián ê hō͘-tēng, jî-tshiáⁿ pí put tông-ì phiò 7 bān 3,433 phiò ū khah tsē. Só͘-í pā-bián thong-kòe.

　　 Tsit piàn ê pā-bián ē-sái kóng sī tsi̍t tiûⁿ tōa ap sè, kiông phah jio̍k, ok khi siān, oân-tsoân bô kong-pêⁿ ê pā-bián. Tsi̍t-ê sè-kài siōng tōa tóng, ū 9,500 bān ê tóng-oân ê Tiong-kok kiōng-sán-tóng, kah Tâi-oân tē-it tōa tsāi-iá tóng, tī li̍p-huat-īⁿ ū 38 sik ê Tiong-kok Kok-bîn-tóng tàu-khang, beh kā li̍p-huat-īⁿ siōng sè tóng, kan-taⁿ ū tsi̍t-ê li̍p-huat úi-goân ê Tâi-oân Ki-tsìn li̍p-huat úi-goân Tân pik-î pā-bián tiāu, koh-tsài phòe-ha̍p tē-hng sè-le̍k tsin kiông ê Gân--ka bú tsit tshut pā-bián àn.

　　Tsit saⁿ hong-bīn ū bô kāng-khoán ê siūⁿ-huat kah phah-sǹg. Káu-gue̍h jī-la̍k, Tiong-kok Kiōng-sán-tóng Tsóng-su-kì Xíjìnpíng huat hō͘ Tsu Li̍p-lûn tòng-soán tóng-tsú-se̍k ê hō-tiān, tû-liáu kah í-óng kāng-khoán, kian-tshî "Kiú-jī kiōng-sik", hoán-tùi "Tâi-to̍k" ê kiōng-tông tsèng-tī ki-tshó͘ siōng ê liông-sèng hō͘-tōng, ka-kiông ha̍p-tsok í-gōa, kin-nî kah éng-nî bô kâng ê "sèng-tsí" sī, "ūi kok-ka bô͘ thóng-it". Xíjìnpíng kiaⁿ Tsu Li̍p-lûn bē kì-tit, te̍k-pia̍t tī Tsu Li̍p-lûn tsiū-jīm tóng-tsú-se̍k hit kang, tī < Tiong-iong tiān-sī-tâi > iû Tiong-kok Siā-kho- īⁿ Tâi-oân gián-kiù-só͘ hù gián-kiù-oân Tân Kùi-tshing hē tsí-tō kî, te̍k-pia̍t thê-tshéⁿ Tsu Li̍p-lûn ê sì ki tsìⁿ, ū tsi̍t ki sī pā-bián Tân Pik-î, ū tsi̍t ki sī pā-bián Lîm Tshióng-tsò, ū tsi̍t ki sī nî-té ê sì tōa kong-tâu, tēng-ūi tsoh "tó-koh kong-tâu", hō͘ hiān-tsāi Bîn-tsìn-tóng tsip-tsèng ê hêng-tsèng thoân-tūi tsi̍t-ê kiông-le̍k ê táⁿ-kik.
Le̍k-sú siōng tit phiò lu̍t siōng kē tòng-soán Tiong-kok Kok-bîn-tóng tsú-se̍k ê Tsu Li̍p-lûn, kín beh tī pā-bián Tân pik-î tsit àn li̍p-ui, koh khah iàu-kín sī, pā-bián ū tsiâⁿ koh ē-tàng hiòng pak-kiaⁿ tshéng-kong, kā tī li̍p-huat-īⁿ siōng kian-tshî Tâi-oân to̍k-li̍p ê Tâi-oân Ki-tsìn î-it ê li̍p-úi pā-bián tiāu, tshiáⁿ kì liau-lô tsi̍t tōa kong.

Gân--ka ê siūⁿ-huat tsin kán-tan, khòaⁿ Tân pik-î tsi̍t nî tsa̍p kò gue̍h tsò li̍p-huat úi-goân tsò liáu thài hó, tán-thāi i tsi̍t jīm tsò liáu, āu tsi̍t jīm li̍p-úi oân-tsoân bián siūⁿ beh soán iâⁿ, thàn i tsi̍t jīm iáu bōe tsò oân, sòa kā pā-bián tiāu tio̍h ē-tàng an-sim á khùn.

Tiong-kok Kok-bîn-tóng tio̍h tshut ok-lia̍t ê pō͘-sò͘, bô-koán sī tsō-iâu , buah o͘, sún-hāi jîn-keh, tshōe bô pā-bián ê lí-iû tio̍h tsè-tsō tsi̍t kóa "tsià-kháu", tsò tsi̍t tōa-tui khòaⁿ-pán siá "tsōe-tsōng". Só͘-í lâng tsiah ē kóng tse sī tsi̍t tiûⁿ ê "ok pā". Tsit pō͘ nā ē thong, Tiong-kok Kiōng-sán-tóng bián ēng tsi̍t ping tsi̍t tsut, kan-taⁿ hē tsi̍t tō tsi̍t tō ê "sèng-tsí", Tâi-oân ê liau-lô tio̍h ē-tàng kā Tâi-oân bú kah o͘-thiⁿ àm-tē, put-tik an-lêng.

　　 Tsit piàn ok pā sêng-kong, Tâi-oân-lâng ná ē-sái bô kak-tshéⁿ! 　　 (211023)



　　十月二三，台中第二選區，也就是沙鹿、烏日、大肚、龍井、霧峰五區ê選民舉行「罷免立委陳柏惟（Tân pik-î）投票」五區選舉人數是29萬4,976人，罷免通過ê戶碇是四分之一，也就是7萬3,744票，而且，同意票tio̍h比不同意票khahtsē tsiah有準算。真難得投票率超過51.72%。到下晡七點所得tio̍hê結果，同意票7萬7,899票，有hāⁿ過罷免ê戶碇，而且比不同意票7萬3,433票有khahtsē。所以罷免通過。

　　Tsit遍ê罷免ē-sái講是一場大壓細、強phah弱、惡欺善，完全無公平ê罷免。一个世界siōng大黨、有9,500萬个黨員ê中國共產黨，kah台灣第一大在野黨、tī立法院有38席ê中國國民黨鬥khang，beh kā立法院siōng細黨、kan-taⁿ有一个立法委員ê台灣基進立法委員陳柏惟（Tân pik-î）罷免掉，koh再配合地方勢力真強ê顏家舞tsit齣罷免案。

　　Tsit三方面有無仝款ê想法kah phah算。九月二六，中國共產黨總書記習近平發hō͘朱立倫當選黨主席ê賀電，除了kah以往仝款：堅持「九二共識」、反對「台獨」ê共同政治基礎上ê良性互動，加強合作以外，今年kah永年無仝ê「聖旨」是：「為國家謀統一」。習近平驚朱立倫bē記得，特別tī朱立倫就任黨主席hit工，tī《中央電視台》由中國社科院台灣研究所副研究員陳桂清下指導棋，特別提醒朱立倫ê四支箭，有一支是罷免陳柏惟（Tân pik-î），有一支是罷免林昶佐，有一支是年底ê四大公投，定位作「倒閣公投」，hō͘現在民進黨執政ê行政團隊一个強力ê打擊。

歷史上得票率siōng低當選中國國民黨主席ê朱立倫，緊beh tī罷免陳柏惟（Tân pik-î）tsit案立威，koh khah要緊是，罷免有成koh ē-tàng向北京請功，kā tī立法院siōng堅持台灣獨立ê台灣基進唯一ê立委罷免掉，請記liau-lô一大功。

顏家ê想法真簡單，看陳柏惟（Tân pik-î）一年十個月做立法委員做了太好，等待伊一任做了，後一任立委完全免想beh選贏，趁伊一任猶未做完，sòa kā罷免掉tio̍hē-tàng安心á睏。

中國國民黨tio̍h出惡劣ê步數，無管是造謠、抹烏、損害人格，tshōe無罷免ê理由tio̍h製造一寡「藉口」，做一大堆看板寫「罪狀」。所以人tsiahē講tse是一場ê「惡罷」。Tsit步nāē通，中國共產黨免用一兵一卒，kan-taⁿ下一道一道ê「聖旨」，台灣ê liau-lô tio̍h ē-tàng kā台灣舞kah烏天暗地、不得安寧。

　　Tsit遍惡罷成功，台灣人ná ē-sái無覺醒！　　 (211023)

註1：習近平 請用華語唸 註2：陳柏惟（Tân pik-î）　請用華語唸，才koh唸台語發音 註3：嘍囉　liâu-lô