《綠色短評》

 | | | 轉寄

國、共兩黨kám一定tio̍h配合kah tsiah-ni̍h bā？

作者 李南衡, TsoânTâijī/全台字 by Tsng Hūiphêng 2021.11.14

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　　　　　　　　　　 Lí Lâmhêng
　　　　　　 Kok, Kiōng nn̄g tóng kám ittēng tio̍h phòeha̍p kah tsiahni̍h bā?

　　 Tsa̍pgue̍h jītsa̍p, Autsiu gīhōe í aptòsèng phiò sò͘ thongkòe "Aubêng,Tâioân tsèngtī kuanhē kah ha̍ptsok" pòkò, kâng tsi̍t kang, lán gōakau pō͘tiúⁿ Ngô͘ Tsiausiat suanpò͘ ītēng āu lépài ē khì hóngbūn Autsiu, Ngô͘ Tsiausiat tī li̍phuatīⁿ kiôngtiāu,"Tâioân kah Autsiu kauóng ê sin sîtāi íking lâi lo̍h". Tùi Ngô͘ pō͘tiúⁿ beh khì Autsiu hóngbūn tsit kiāⁿ tāitsì, Tiongkok gōakau pō͘ huatgiânjîn Ong Bûnpin tī lēhêng kìtsiáhōe tsítshut kóng, tng teh bi̍ttshiat kuansim tsùì iúkuan jînoân "tshoàn hóng" ê tōnghiòng, ē tsháitshú tsèngtong kah pitiàu tshòsi, kiantēng hānōe kokka tsúkoân kah léngthó͘ oântséng, jīmhô lâng to bētàng tùi tsit hāng tāitsì sim tsûn hoànsióng.

Tsa̍pgue̍h jīit, gōakaupō͘ huatgiânjîn Au Kangan suatbêng kóng, Ngô͘ Tsiausiat pō͘tiúⁿ ìn Slovak "Tsoânkiû antsoân tìkhò͘" iautshiáⁿ, ē tī tsa̍pgue̍h jīla̍k tshutse̍k kai tìkhò͘ thâutsi̍t piàn kípān ê Tâioân lūntôaⁿ huatpiáu tsuantê iánkáng, tsútê sī "e̍ktsêng tsi āu, jūnsèng kah tsoânkiû kingtsè ha̍ptsok". Jîāu ē tsoán óng Czets hóngbūn, tsiapsiū Czets tshamgītiúⁿ Miloš Vystrčil panhuat tshamgīīⁿ "koktsè kùipin tsióng hāng" gîntsit tsióngtsiong. Hóngbūn kîkan Ngô͘ pō͘tiúⁿ mā iúì hiòng beh pàihóng Praha tshītiúⁿ Zdeněk Hřib, lēnggōa tshamka iû Czets kokka khoha̍k īⁿ kah Czets tìkhò͘ " káisik Tiongkok " ha̍p pān ê giánthóhōe.

Tsa̍pgue̍h jīsì àmsî, gōakau pō͘tiúⁿ Ngô͘ Tsiausiat tsē huiki tsiânóng Autsiu, Ngô͘ pō͘tiúⁿ tshuthuat tsêng tī Twitter huat bûn piáusī, ùi in nn̄g kok Thiangôjiông kikbēng kàu lán kok Iápikha̍p Ha̍kūn, Tâioân, Czets kah Slovakia kín bi̍t sioliân, kāngkhoán khatbōng tsūiû, jînkoân kah huat tī." Góa tsin ênghēng ētàng hóngbūn tsit nn̄g kok, jîtshiáⁿ kah in ha̍ptsok hō͘ sèkài koh khah hó. Thoânkiat hō͘ lán tsiâⁿtsoh putkhó tsó͘tòng ê liôngsiān le̍kliōng!"

Tsa̍pgue̍h jīla̍k tsákhí, tī Tiongkok gōakau pō͘ lēhêng kìtsiáhōe tiong, Tiongkok gōakaupō͘ huatgiânjîn Tiō Li̍pkian piáusī, Ngô͘ Tsiausiat sī tiánhêng ê "Tâito̍k hunlia̍t hūntsú", sìtshù "tshoàn hóng" ê tsinsi̍t bo̍ktik sī "kó͘tshue Tâito̍k hunlia̍t tsútiuⁿ, tsètsō ittiong ittâi késiōng", lī king phòhoāi "Tiongkok kah kiànkaukok ê kuanhē", Tiongkok tùi "iúkuan kokka théngsēng Tâito̍k hunlia̍t hūntsú" piáusī "kiankuat hoántùi", iaukiû iúkuan kokka "khoksiú tsi̍tê Tiongkok goântsik", bē sái thêkiong ua̍htāng pêⁿtâi hō͘ Tâito̍k hunlia̍t hūntsú. Tiō Li̍pkian kóng, tsiàⁿ kò Tâioân tongkio̍k khìtô͘ "gia̍p iûⁿ tsūtiōng" bú "Tâito̍k" tsùtiāⁿ sī sílō͘ tsi̍t tiâu. Tiongkok hānōe kokka tsúkoân kah léngthó͘ oântséng ê kuatsim kiantēng putî, ē tsháitshú ittshè pitiàu tshòsi kiankuat hún tshùi jīmhô "Tâito̍k" tô͘bô͘.

　　　 Gōakau pō͘tiúⁿ Ngô͘ Tsiausiat tng teh Slovakia, Czets hóngbūn, suijiân ū tshéngkà, tānsī tī li̍phuatīⁿ gōakau kah kokhông úigoânhōe bô tsoh hóngbūn tsuanàn pòkò. Úigoânhōe tiàuúi , Tiongkok Kokbîntóng li̍púi Tân Ísìn huisiông putboán, tī bīntsheh huatbûn phuephêng Ngô͘ pō͘tiúⁿ tshutse̍k lu̍t kē, kinpún biáusī kokhōe, Ngô͘ pō͘tiúⁿ tsi̍t kang bô lâi gōaúihōe , i tio̍h puikat gōakaupō͘ ūsoàn símtsa.

Pí pō͘tūi pantiúⁿ ê "tsi̍tê bēnglēng tsi̍tê tōngtsok" koh khah līhāi, Tiongkok kiōngsántóng "hngh" tsi̍tsiaⁿ, Tâioân ê Tiongkok Kokbîntóng tio̍h piàⁿsì beh siulí gōakau pō͘tiúⁿ Ngô͘ Tsiausiat. Pàithok leh, Kok Kiōng nn̄g tóng kám ittēng tio̍h phòeha̍p kah tsiahni̍h bā? (211029)

Pe̍h-ōe-jī-pán/白話字版

《 Le̍k-sik toán-phêng 》　　　　　　　　　　　 Lí Lâm-hêng
　　　　　　 Kok, Kiōng nn̄g tóng kám it-tēng tio̍h phòe-ha̍p kah tsiah-ni̍h bā?

　　 Tsa̍p-gue̍h jī-tsa̍p, Au-tsiu gī-hōe í ap-tò-sèng phiò sò͘ thong-kòe "Au-bêng,Tâi-oân tsèng-tī kuan-hē kah ha̍p-tsok" pò-kò, kâng tsi̍t kang, lán gōa-kau pō͘-tiúⁿ Ngô͘ Tsiau-siat suan-pò͘ ī-tēng āu lé-pài ē khì hóng-būn Au-tsiu, Ngô͘ Tsiau-siat tī li̍p-huat-īⁿ kiông-tiāu,"Tâi-oân kah Au-tsiu kau-óng ê sin sî-tāi í-king lâi lo̍h". Tùi Ngô͘ pō͘-tiúⁿ beh khì Au-tsiu hóng-būn tsit kiāⁿ tāi-tsì, Tiong-kok gōa-kau pō͘ huat-giân-jîn Ong Bûn-pin tī lē-hêng kì-tsiá-hōe tsí-tshut kóng, tng teh bi̍t-tshiat kuan-sim tsù-ì iú-kuan jîn-oân "tshoàn hóng" ê tōng-hiòng, ē tshái-tshú tsèng-tong kah pit-iàu tshò-si, kian-tēng hān-ōe kok-ka tsú-koân kah léng-thó͘ oân-tséng, jīm-hô lâng to bē-tàng tùi tsit hāng tāi-tsì sim tsûn hoàn-sióng.

Tsa̍p-gue̍h jī-it, gōa-kau-pō͘ huat-giân-jîn Au Kang-an suat-bêng kóng, Ngô͘ Tsiau-siat pō͘-tiúⁿ ìn Slovak "Tsoân-kiû an-tsoân tì-khò͘" iau-tshiáⁿ, ē tī tsa̍p-gue̍h jī-la̍k tshut-se̍k kai tì-khò͘ thâu-tsi̍t piàn kí-pān ê Tâi-oân lūn-tôaⁿ huat-piáu tsuan-tê ián-káng, tsú-tê sī "e̍k-tsêng tsi āu, jūn-sèng kah tsoân-kiû king-tsè ha̍p-tsok". Jî-āu ē tsoán óng Czets hóng-būn, tsiap-siū Czets tsham-gī-tiúⁿ Miloš Vystrčil pan-huat tsham-gī-īⁿ "kok-tsè kùi-pin tsióng hāng" gîn-tsit tsióng-tsiong. Hóng-būn kî-kan Ngô͘ pō͘-tiúⁿ mā iú-ì hiòng beh pài-hóng Praha tshī-tiúⁿ Zdeněk Hřib, lēng-gōa tsham-ka iû Czets kok-ka kho-ha̍k īⁿ kah Czets tì-khò͘ " kái-sik Tiong-kok " ha̍p pān ê gián-thó-hōe.

Tsa̍p-gue̍h jī-sì àm-sî, gōa-kau pō͘-tiúⁿ Ngô͘ Tsiau-siat tsē hui-ki tsiân-óng Au-tsiu, Ngô͘ pō͘-tiúⁿ tshut-huat tsêng tī Twitter huat bûn piáu-sī, ùi in nn̄g kok Thian-gô-jiông kik-bēng kàu lán kok Iá-pik-ha̍p Ha̍k-ūn, Tâi-oân, Czets kah Slovakia kín bi̍t sio-liân, kāng-khoán khat-bōng tsū-iû, jîn-koân kah huat- tī." Góa tsin êng-hēng ē-tàng hóng-būn tsit nn̄g kok, jî-tshiáⁿ kah in ha̍p-tsok hō͘ sè-kài koh khah hó. Thoân-kiat hō͘ lán tsiâⁿ-tsoh put-khó tsó͘-tòng ê liông-siān le̍k-liōng!"

Tsa̍p-gue̍h jī-la̍k tsá-khí, tī Tiong-kok gōa-kau pō͘ lē-hêng kì-tsiá-hōe tiong, Tiong-kok gōa-kau-pō͘ huat-giân-jîn Tiō Li̍p-kian piáu-sī, Ngô͘ Tsiau-siat sī tián-hêng ê "Tâi-to̍k hun-lia̍t hūn-tsú", sì-tshù "tshoàn hóng" ê tsin-si̍t bo̍k-tik sī "kó͘-tshue Tâi-to̍k hun-lia̍t tsú-tiuⁿ, tsè-tsō it-tiong it-tâi ké-siōng", lī king phò-hoāi "Tiong-kok kah kiàn-kau-kok ê kuan-hē", Tiong-kok tùi "iú-kuan kok-ka théng-sēng Tâi-to̍k hun-lia̍t hūn-tsú" piáu-sī "kian-kuat hoán-tùi", iau-kiû iú-kuan kok-ka "khok-siú tsi̍t-ê Tiong-kok goân-tsik", bē sái thê-kiong ua̍h-tāng pêⁿ-tâi hō͘ Tâi-to̍k hun-lia̍t hūn-tsú. Tiō Li̍p-kian kóng, tsiàⁿ kò Tâi-oân tong-kio̍k khì-tô͘ "gia̍p iûⁿ tsū-tiōng" bú "Tâi-to̍k" tsù-tiāⁿ sī sí-lō͘ tsi̍t tiâu. Tiong-kok hān-ōe kok-ka tsú-koân kah léng-thó͘ oân-tséng ê kuat-sim kian-tēng put-î, ē tshái-tshú it-tshè pit-iàu tshò-si kian-kuat hún tshùi jīm-hô "Tâi-to̍k" tô͘-bô͘.

　　　 Gōa-kau pō͘-tiúⁿ Ngô͘ Tsiau-siat tng teh Slovakia, Czets hóng-būn, sui-jiân ū tshéng-kà, tān-sī tī li̍p-huat-īⁿ gōa-kau kah kok-hông úi-goân-hōe bô tsoh hóng-būn tsuan-àn pò-kò. Úi-goân-hōe tiàu-úi , Tiong-kok Kok-bîn-tóng li̍p-úi Tân Í-sìn hui-siông put-boán, tī bīn-tsheh huat-bûn phue-phêng Ngô͘ pō͘-tiúⁿ tshut-se̍k lu̍t kē, kin-pún biáu-sī kok-hōe, Ngô͘ pō͘-tiúⁿ tsi̍t kang bô lâi gōa-úi-hōe , i tio̍h pue-kat gōa-kau-pō͘ ū-soàn sím-tsa.

Pí pō͘-tūi pan-tiúⁿ ê "tsi̍t-ê bēng-lēng tsi̍t-ê tōng-tsok" koh khah lī-hāi, Tiong-kok kiōng-sán-tóng "hngh" tsi̍t-siaⁿ, Tâi-oân ê Tiong-kok Kok-bîn-tóng tio̍h piàⁿ-sì beh siu-lí gōa-kau pō͘-tiúⁿ Ngô͘ Tsiau-siat. Pài-thok leh, Kok Kiōng nn̄g tóng kám it-tēng tio̍h phòe-ha̍p kah tsiah-ni̍h bā? (211029)



　　十月二十，歐洲議會以壓倒性票數通過「歐盟─台灣政治關係kah合作」報告，仝一工，咱外交部長吳釗燮宣布預定後禮拜會去訪問歐洲，吳釗燮tī立法院強調，「台灣kah歐洲交往ê新時代已經來lo̍h」。對吳部長beh去歐洲訪問tsit件tāi-tsì，中國外交部發言人汪文斌tī例行記者會指出講，tng teh密切關心注意有關人員「竄訪」ê動向，ē採取正當kah必要措施，堅定捍衛國家主權kah領土完整，任何人to bē-tàng對tsit項tāi-tsì心存幻想。

十月二一，外交部發言人歐江安說明講，吳釗燮部長應斯洛伐克（Slovak）「全球安全智庫」邀請，ētī十月二六出席該智庫頭一遍舉辦ê台灣論壇發表專題演講，主題是「疫情之後：韌性kah全球經濟合作」。而後ē轉往捷克訪問，接受捷克參議長韋德持頒發參議院「國際貴賓獎項」銀質獎章。訪問期間吳部長mā有意向beh拜訪布拉格市長賀吉普，另外參加由捷克國家科學院kah捷克智庫「解析中國」合辦ê研討會。

十月二四暗時，外交部長吳釗燮坐飛機前往歐洲，吳部長出發前tīTwitter發文表示，ùi in兩國天鵝絨革命到咱國野百合學運，台灣、捷克kah斯洛伐克緊密相連，仝款渴望自由、人權kah法治。「我真榮幸ētàng訪問tsit兩國，而且kah in合作hō͘世界koh khah好。團結hō͘咱成作不可阻擋ê良善力量！」

十月二六早起，tī中國外交部例行記者會中，中國外交部發言人趙立堅表示，吳釗燮是典型ê「台獨分裂分子」，四處「竄訪」ê真實目的是「鼓吹台獨分裂主張，製造一中一台假象」，離間破壞「中國kah建交國ê關係」，中國對「有關國家théng-sēng台獨分裂分子」表示「堅決反對」，要求有關國家「恪守一個中國原則」，bē使提供活動平台hō͘台獨分裂分子。趙立堅講，正告台灣當局企圖「挾洋自重」舞「台獨」注定是死路一條。中國捍衛國家主權kah領土完整ê決心堅定不移，ē採取一切必要措施堅決粉碎任何「台獨」圖謀。

　　　外交部長吳釗燮tng teh斯洛伐克、捷克訪問，雖然有請假，但是tī立法院外交kah國防委員會無作訪問專案報告。委員會召委、中國國民黨立委陳以信非常不滿，tī面冊發文批評吳部長出席率低，根本藐視國會，吳部長一工無來外委會，伊tio̍h杯葛外交部預算審查。

比部隊班長ê「一個命令一個動作」koh khah利害，中國共產黨「哼」一聲，台灣ê中國國民黨tio̍h拼勢beh修理外交部長吳釗燮。拜託咧，國共兩黨kám一定tio̍h配合kah tsiahni̍h bā？ (211029)