《綠色短評》

 | | | 轉寄

四大公投過了，ta̍k个tio̍h koh加油

作者 李南衡, TsoânTâijī/全台字 by Tsng Hūiphêng 2022.01.02

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng
Sìtōa kongtâu kòeliáu, ta̍kê tio̍h koh kaiû!

Tsa̍pjīgue̍h tsa̍ppeh kíhêng tsoânkok Sìtōa kongtâu, ēpo͘ sìtiám khaisí khuiphiò, kèphiò liáu Tiongsoánhōe suanpò͘ Sìtōa kongtâu tâuphiò lu̍t tī 41.08% tsì 41.09% tsi kan, inūi sìê àn ê soánphiò sī hunkhui niá ê, tìsú tâuphiò lu̍t tsiah ē ū siókhóa bô kâng."Têngkhé hu̍tsì àn" ê tôngì phiò sī 380 bān 4,755 phiò, put tôngì phiò sī 426 bān 2,451 phiò;"Hoán Lâiti tsìnkháu àn " ê tôngì phiò sī 393 bān 6,554 phiò, put tôngì phiò sī 413 bān 1,203 phiò;"Kongtâu pa̍k tāisoán àn" ê tôngì phiò sī 395 bān 1,882 phiò, put tôngì phiò sī 412 bān 038 phiò; " Saⁿtsiap tshian kiàn àn" ê tôngì phiò sī 390 bān 1,171 phiò, put tôngì phiò sī 416 bān 3,464 phiò. Sìê àn ê put tôngì phiòlóng ū tshiaukòe 400 bān phiò.

　　 Tsiàu "Kongtâuhuat" kuitēng, kongbîn tâuphiò àn tâuphiò kiatkó, iúhāu tôngì phiòsò͘ tio̍h pí put tôngì phiò khah tsē, jîtshiáⁿ iúhāu tôngì phiò ta̍tkàu tâuphiòkoân lâng tsónggia̍h sìhun tsṳt ísiōng, tsiah ū thongkòe; iúhāu tôngì phiò nā bô pí put tôngì phiò khah tsē, á·sī iúhāu tôngì phiò sò͘ puttsiok tsêng hāng kuitēng sò͘gia̍h tsiá, lóng bô thongkòe. Tsit piàn kongtâu ê tsóng tâuphiòkoân jînsò͘ sī 1,982 bān 5,468 lâng ê sìhun tsṳt, ia̍h tio̍h sī 495 bān 6,367 lâng, ia̍h tio̍h sī kóng kok kongtâu àn ê tôngì phiò, tio̍h ta̍tkàu 495 bān 6367phiò, jîtshiáⁿ koh pí put tôngì phiò khah tsē, kongtâu àn tsiah sǹg thongkòe. Só͘í tsit piàn sìê kongtâu àn lóng put tsiâⁿ àn.

　　 Tsoân tâi 22 koāntshī,"sì àn tsoân tôngì" ê koāntshī 12 ê, Tâipaktshī, Thôhn̂g tshī, Kelâng tshī, Sintik tshī, Sin tik koān, Biâule̍k koān, Lâmtâu koān, Hualiân koān, Tâitang koān, Phêⁿô͘ koān, Κimmn̂g koān, Liânkang koān,"sì àn put tôngì" ê koāntshī 8 ê, Tâilâm tshī, Kohiông tshī, Tsionghòa koān, Hûnlîm koān, Kagī tshī, Kagī koān, Pîntong koān, Gîlân koān; Sinpak tshī sī " Têngkhé hu̍tsì " put tôngì," Hoán Lâiti tsìnkháu","Kongtâu pa̍k tāisoán"," Saⁿtsiap tshiankiàn " tôngì; Tâitiong tshī sī " Kongtâu pa̍k tāisoán " tôngì," Têngkhé hu̍tsì "," Hoán Lâiti tsìnkháu"," Saⁿtsiap tshiankiàn àn " put tôngì. Suijiân "sì àn tsoân tôngì" koāntshī pí "sì àn put tôngì" koāntshī khah tsē, tānsī "sì àn tsoân tôngì" tsiàⁿ hoán nn̄ghong phiòsò͘ tshakū bô tōa, tānsī "sì àn put tôngì" koāntshī, pauhâm Tâilâm tshī, Kohiông tshī téng koāntshī put tôngì phiòsò͘ pí tôngì phiòsò͘ ke tsin tsē, tsòeāu Sìtōa kongtâu kiatkó tsiah ē tsoânsò͘ hó͘kuat. Tsintsiàⁿ sī hókatsài!

　　 Tsa̍ppeh àm kongtâu ū kiatkó liáuāu, Tshòa Ingbûn tsóngthóng tī Tsóngthónghú tiàukhui kìtsiáhōe hiòng koklâng suatbêng. Tsóngthóng kiôngtiāu, tsit piàn kongtâu bô siáng su siáng iâⁿ ê būntê, tsíū kokka bīlâi beh ántsóaⁿ kiâⁿ ê būntê; Tshòa tsóngthóng kóng, tsit piàn kongtâu ê kòethêng thoânta̍t "Tâioân jînbîn hibāng kiâⁿ hiòng sèkài, goānì tsikke̍k tshamú koktsè" tán sìê bêngkhak ê sìnsit. Tshòa tsóngthóng kóng, kongtâu mā sī jînbîn thoânta̍t tùi tsènghú sitsèng bô kâng khoán ê ìkiàn. Bîntsú goânpún tio̍h sī ū bô kâng siūⁿhuat, tsèngtshik kuiōe ingkai tio̍h thiaⁿtshú bô kâng ê ìkiàn. Únkiān sitsèng sī lán itkoàn ê goântsik, kok tsióng siūⁿhuat lóng tio̍h la̍p ji̍p tsèngtshik pêngko͘. Paukuat háitsháuta póio̍k, si̍tan pékuan,"tsua̍ttùi bē khiàm kin kiám niú".

　　 Sìtōa kongtâu kiatkó suijiân bô sū kòeliáu, Tâioân jînbîn kah Bîntsìntóng tsènghú lóng tio̍h koh kaiû! (211212)


Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng
Sì-tōa kong-tâu kòe-liáu, ta̍k-ê tio̍h koh ka-iû!

Tsa̍p-jī-gue̍h tsa̍p-peh kí-hêng tsoân-kok Sì-tōa kong-tâu, ē-po͘ sì-tiám khai-sí khui-phiò, kè-phiò liáu Tiong-soán-hōe suan-pò͘ Sì-tōa kong-tâu tâu-phiò lu̍t tī 41.08% tsì 41.09% tsi kan, in-ūi sì-ê àn ê soán-phiò sī hun-khui niá ê, tì-sú tâu-phiò lu̍t tsiah ē ū sió-khóa bô kâng."Têng-khé hu̍t-sì àn" ê tông-ì phiò sī 380 bān 4,755 phiò, put tông-ì phiò sī 426 bān 2,451 phiò;"Hoán Lâi-ti tsìn-kháu àn " ê tông-ì phiò sī 393 bān 6,554 phiò, put tông-ì phiò sī 413 bān 1,203 phiò;"Kong-tâu pa̍k tāi-soán àn" ê tông-ì phiò sī 395 bān 1,882 phiò, put tông-ì phiò sī 412 bān 038 phiò; " Saⁿ-tsiap tshian- kiàn àn" ê tông-ì phiò sī 390 bān 1,171 phiò, put tông-ì phiò sī 416 bān 3,464 phiò. Sì-ê àn ê put tông-ì phiòlóng ū tshiau-kòe 400 bān phiò.

　　 Tsiàu "Kong-tâu-huat" kui-tēng, kong-bîn tâu-phiò àn tâu-phiò kiat-kó, iú-hāu tông-ì phiò-sò͘ tio̍h pí put tông-ì phiò khah tsē, jî-tshiáⁿ iú-hāu tông-ì phiò ta̍t-kàu tâu-phiò-koân lâng tsóng-gia̍h sì-hun tsi-it í-siōng, tsiah ū thong-kòe; iú-hāu tông-ì phiò nā bô pí put tông-ì phiò khah tsē, á-·sī iú-hāu tông-ì phiò sò͘ put-tsiok tsêng hāng kui-tēng sò͘-gia̍h tsiá, lóng bô thong-kòe. Tsit piàn kong-tâu ê tsóng tâu-phiò-koân jîn-sò͘ sī 1,982 bān 5,468 lâng ê sì-hun tsi-it, ia̍h tio̍h sī 495 bān 6,367 lâng, ia̍h tio̍h sī kóng kok kong-tâu àn ê tông-ì phiò, tio̍h ta̍t-kàu 495 bān 6367phiò, jî-tshiáⁿ koh pí put tông-ì phiò khah tsē, kong-tâu àn tsiah sǹg thong-kòe. Só͘-í tsit piàn sì-ê kong-tâu àn lóng put tsiâⁿ àn.

　　 Tsoân tâi 22 koān-tshī,"sì àn tsoân tông-ì" ê koān-tshī 12 ê, Tâi-pak-tshī, Thô-hn̂g tshī, Ke-lâng tshī, Sin-tik tshī, Sin tik koān, Biâu-le̍k koān, Lâm-tâu koān, Hua-liân koān, Tâi-tang koān, Phêⁿ-ô͘ koān, Κim-mn̂g koān, Liân-kang koān,"sì àn put tông-ì" ê koān-tshī 8 ê, Tâi-lâm tshī, Ko-hiông tshī, Tsiong-hòa koān, Hûn-lîm koān, Ka-gī tshī, Ka-gī koān, Pîn-tong koān, Gî-lân koān; Sin-pak tshī sī " Têng-khé hu̍t-sì " put tông-ì," Hoán Lâi-ti tsìn-kháu","Kong-tâu pa̍k tāi-soán"," Saⁿ-tsiap tshian-kiàn " tông-ì; Tâi-tiong tshī sī " Kong-tâu pa̍k tāi-soán " tông-ì," Têng-khé hu̍t-sì "," Hoán Lâi-ti tsìn-kháu"," Saⁿ-tsiap tshian-kiàn àn " put tông-ì. Sui-jiân "sì àn tsoân tông-ì" koān-tshī pí "sì àn put tông-ì" koān-tshī khah tsē, tān-sī "sì àn tsoân tông-ì" tsiàⁿ hoán nn̄g-hong phiò-sò͘ tsha-kū bô tōa, tān-sī "sì àn put tông-ì" koān-tshī, pau-hâm Tâi-lâm tshī, Ko-hiông tshī téng koān-tshī put tông-ì phiò-sò͘ pí tông-ì phiò-sò͘ ke tsin tsē, tsòe-āu Sì-tōa kong-tâu kiat-kó tsiah ē tsoân-sò͘ hó͘-kuat. Tsin-tsiàⁿ sī hó-ka-tsài!

　　 Tsa̍p-peh àm kong-tâu ū kiat-kó liáu-āu, Tshòa Ing-bûn tsóng-thóng tī Tsóng-thóng-hú tiàu-khui kì-tsiá-hōe hiòng kok-lâng suat-bêng. Tsóng-thóng kiông-tiāu, tsit piàn kong-tâu bô siáng su siáng iâⁿ ê būn-tê, tsí-ū kok-ka bī-lâi beh án-tsóaⁿ kiâⁿ ê būn-tê; Tshòa tsóng-thóng kóng, tsit piàn kong-tâu ê kòe-thêng thoân-ta̍t "Tâi-oân jîn-bîn hi-bāng kiâⁿ hiòng sè-kài, goān-ì tsik-ke̍k tsham-ú kok-tsè" tán sì-ê bêng-khak ê sìn-sit. Tshòa tsóng-thóng kóng, kong-tâu mā sī jîn-bîn thoân-ta̍t tùi tsèng-hú si-tsèng bô kâng khoán ê ì-kiàn. Bîn-tsú goân-pún tio̍h sī ū bô kâng siūⁿ-huat, tsèng-tshik kui-ōe ing-kai tio̍h thiaⁿ-tshú bô kâng ê ì-kiàn. Ún-kiān si-tsèng sī lán it-koàn ê goân-tsik, kok tsióng siūⁿ-huat lóng tio̍h la̍p ji̍p tsèng-tshik pêng-ko͘. Pau-kuat hái-tsháu-ta pó-io̍k, si̍t-an pé-kuan,"tsua̍t-tùi bē khiàm kin kiám niú".

　　 Sì-tōa kong-tâu kiat-kó sui-jiân bô sū kòe-liáu, Tâi-oân jîn-bîn kah Bîn-tsìn-tóng tsèng-hú lóng tio̍h koh ka-iû! (211212)

十二月十八舉行全國四大公投，下晡四點開始開票，計票了中選會宣佈四大公投投票率tī41.08%至41.09%之間，因為四個案ê選票是分開領ê，致使投票率才會有小khóa無仝。「重啟核四案」ê同意票是380萬4,755票，不同意票是426萬2,451票；「反萊豬進口案」ê同意票是393萬6,554票，不同意票是413萬1,203票；「公投綁大選案」ê同意票是395萬1,882票，不同意票是412萬038票；「三接遷建案」ê同意票是390萬1,171票，不同意票是416萬3,464票。四個案ê不同意票lóng有超過400萬票。

　　照「公投法」規定，公民投票案投票結果，有效同意票數tio̍h比不同意票khahtsē，而且有效同意票達到投票權人總額四分之一以上，才有通過；有效同意票若無比不同意票khahtsē，á是有效同意票數不足前項規定數額者，lóng無通過。Tsit遍公投ê總投票權人數是1,982萬5,468人ê四分之一，亦tio̍h 是495萬6,367人，亦tio̍h是講各公投案ê同意票，tio̍h達到495萬6367票，而且koh比不同意票khahtsē，公投案才算通過。所以tsit遍四個公投案lóng不成案。

　　全台22縣市，「四案全同意」ê縣市12個：台北市、桃園市、基隆市、新竹市、新竹縣、苗栗縣、南投縣、花蓮縣、台東縣、澎湖縣、金門縣、連江縣、「四案不同意」ê縣市8個：台南市、高雄市、彰化縣、雲林縣、嘉義市、嘉義縣、屏東縣、宜蘭縣；新北市是「重啟核四」不同意，「反萊豬進口」、「公投綁大選」、「三接遷離」同意；台中市是「公投綁大選」同意，「重啟核四」、「反萊豬進口」、「三接遷離」不同意。雖然「四案全同意」縣市比「四案都不同意」縣市khahtsē，但是「四案全同意」正反兩方票數差距無大，但是「四案不同意」縣市，包含台南市、高雄市等縣市不同意票數比同意票數加真tsē，最後四大公投結果才會全數否決。真正是好佳哉！

　　十八暗公投有結果了後，蔡英文總統tī總統府召開記者會向國人說明。總統強調，tsit遍公投無siáng輸siáng贏ê問題，只有國家未來beh按怎行ê問題；蔡總統講，tsit遍公投ê過程傳達「台灣人民希望行向世界，願意積極參與國際」等四個明確ê訊息。蔡總統講，公投mā是人民傳達對政府施政無仝款ê意見。民主原本tio̍h是有無仝想法，政策規劃應該tio̍h聽取無仝ê意見。穩健施政是咱一貫ê原則，各種想法lóng tio̍h納入政策評估。包括海草礁保育、食安把關，「絕對bē欠斤減兩」。

　　四大公投結果雖然無事過了，台灣人民kah民進黨政府lóng tio̍h koh加油！ (211212)