《綠色短評》

 | | | 轉寄

中國軍機明明tio̍h是來亂ê！

作者 李南衡, TsoânTâijī/全台字 by Tsng Hūiphêng 2021.02.28

Tsoânbîn Tâioânjī pán/全民台灣字版簡稱TsoânTâiJī

Tiongkok kunki bêngbêng tio̍h sī lâi loān·ê!

Tiongkok kunki lâi jiáuloān lán kok ê hângkhong sikpia̍t khu íking tsiâⁿ tsoh ji̍tsiông singua̍h ê tsi̍tpō͘hūn, kòe nî tsêng nn̄g kang ê jīgue̍h tshikáu, tshetsa̍p Tiongkok kunki bô lâi jiáuloān. Ū lâng siūⁿkóng sī Tiongkok khongkun tsúnpī beh hóhó kòenî, bô gîgō͘ kūle̍k kòenî hit kang tiongtàu koh lâi loān, ū lâng iô thâu kóng :"tshùi kóng ”兩岸一家親 ”, khiok liân kòenî ji̍t to lâi loān, bô beh hō͘ lán ê khongkun kiānjî hóhó tsia̍h tsi̍t tǹg thoânîⁿpn̄g. Si̍ttsāi tsin khóò͘ⁿ !"Tiongkok kunki kòenî ji̍t tiongtàu tsa̍pjī tiám saⁿtsa̍psì hun tsìnji̍p lán kok ê ADIZ ( sai lâm khonge̍k) , koântō͘ 2,000 kongtshioh, lán khongkun tī khongtiong kàmkhòng jîtshiáⁿ kóngpò͘ kā in kóaⁿtsáu; kāng tsi̍tê sîkan, lēnggōa ū tsi̍t tâi Tiongkok khongkun 500 ūkéngki tī hôngkhong sikpia̍t khu gōa teh tsìnhêng kéngkài.

Kantaⁿ kūle̍k sintsiaⁿ hioh tsi̍t kang. Tshejī thàutsá káu tiám, tsi̍t tâi Tiongkok ūn 8 hoántsiâmki kah tsi̍t tâi ūn 8 kisu̍t tsingtshatki tio̍h tsìnji̍p lán sai lâm khonge̍k, koântō͘ 4,000 kongtshioh. Ū lâng khì kah tōasiaⁿ mē kóng, Tsia m̄ sī lín gōake, bián lâi tsòkheh! Koh ū lâng mē kóng, khuitshun tshejī tio̍h lâi jiáuloān pa̍t lâng, lín ē sue kui nî! tshesaⁿ tsákhí tsa̍pit tiám sìtsa̍p pun, Tiongkok kunki tsìnji̍p lán kok sai lâm khonge̍k, koântō͘ 2,100 kongtshioh, Tsit nn̄g kang, lán khongkun lóng ū tī khongtiong kàmkhòng jîtshiáⁿ kóngpò͘ kā in kóaⁿtsáu.

　　 Sintsiaⁿ tshesì, lán Tâioân lâng tī tsit kang ngiâ tsâisîn, lán ngiâ tsâisîn kah in Tiongkok khongkun siáⁿtītāi? Thàutsá káu tiám, Tiongkok tsi̍t tâi kunki Ūn̍ hoántsiâmki tio̍h tsìnji̍p lán kok sai lâm khonge̍k hôngkhong sikpia̍t khu. Lán tûliáu ēng hôngkhong huitôaⁿ tuitsong kàmkhòng ígōa, mā phài khongtiong sûnlô pingla̍t èngtùi, jîtshiáⁿ kóngpò͘ kā in kóaⁿtsáu kóng,"Tionghôa Bînkok khongkun kóngpò͘, tī Tâioân sai lâm khonge̍k koântō͘ 3,000 kongtshioh ê Τiongkiōng kunki tsùì! lí í tsìnji̍p goán khonge̍k, énghióng goán puehâng antsoân, sûisî hôetsóan līkhui!"

　　 Tshegō͘ kehkhui tsákhí, Tiongkok tsi̍t tâi "Ū8" hoántsiâmki ùi Tâioân háikiap tiong sòaⁿ ílâm tsìnji̍p lán kok hôngkhong sikpia̍t khu, khongkun ū phài khongtiong sûnlô pingla̍t èngtùi, jîtshiáⁿ ēng kóngpò͘ kā in kóaⁿtsáu.

Jīgue̍h tsa̍ptshit kūle̍k tshela̍k tsákhí, Tiongkok nn̄g tâi "Ū8" kisu̍t tsingtshatki tsìnji̍p lán kok sai lâm khonge̍k hôngkhong sikpia̍t khu. Jīgue̍h tsa̍ppeh ēpo͘, Tiongkok tsi̍t tâi" Ū8" kisu̍t tsingtshatki tsìnji̍p lán kok sai lâm khonge̍k hôngkhong sikpia̍t khu. Tsiàu koànlē, lán lóng ū phài kunki èngtùi, hôngkhong huitôaⁿ kàmkhòng, kóngpò͘ kah in kóaⁿtsáu.

　　 Kinkì Kokhôngpō͘ ê thóngkè, kūnî 2020 nî tsi̍t nî saⁿpah la̍ktsa̍pgō͘ kang, Tiongkok kunki tsiapsio̍k bô thêng lâi jiáuloān lán kok sai lâm khonge̍k, ū 380 gōa tâi pái; tshaputto ta̍k kang to̍h ū tsi̍t tâi Tiongkok kunki lâi pòtò. Kiⁿî itgue̍h saⁿtsa̍p it kang, Tiongkok kunki lâi loān lán sai lâm khonge̍k ū jītsa̍p tshit kang.

Lán tsaiiáⁿ, Tiongkok kunki sī tsìnji̍p lán kok ê sai lâm khonge̍k hôngkhong sikpia̍t khu, pēng m̄ sī léngkhong, Tiongkok kunki tongjiân mā tsaiiáⁿ, lán bētàng khui tshèng tāngbú , kantaⁿ ē tàng ēng kóaⁿ ê. Tshiūⁿkóng kūnî 2020 nî la̍kgue̍h jīsì pòaⁿmê, nn̄g tâi Gôlô hoántsiâmki IL38 pueji̍p Bíkok Alaska hôngkhong sikpia̍t khu, Bíkok mā sī kantaⁿ ē tàng kóaⁿkín tshut tāng F22 tsiàntàuki khì kā in kóaⁿtsáu niāniā.

　　 Tiongkok kunki itti̍t puelâi lán ê hôngkhong sikpia̍t khu, tongjiân m̄ sī lâi "kiâⁿtshun", sī lâi loān ê. （210219）
Tsù, 兩岸一家親　 tshiáⁿ liām Hôagí


Pe̍h-ōe-jī-pán/白話字版

Tiong-kok kun-ki bêng-bêng tio̍h sī lâi loān-·ê!

Tiong-kok kun-ki lâi jiáu-loān lán kok ê hâng-khong sik-pia̍t khu í-king tsiâⁿ tsoh ji̍t-siông sing-ua̍h ê tsi̍t-pō͘-hūn, kòe nî tsêng nn̄g kang ê jī-gue̍h tshe-káu, tshe-tsa̍p Tiong-kok kun-ki bô lâi jiáu-loān. Ū lâng siūⁿ-kóng sī Tiong-kok khong-kun tsún-pī beh hó-hó kòe-nî, bô gî-gō͘ kū-le̍k kòe-nî hit kang tiong-tàu koh lâi loān, ū lâng iô thâu kóng :"tshùi kóng ”兩岸一家親 ”, khiok liân kòe-nî ji̍t to lâi loān, bô beh hō͘ lán ê khong-kun kiān-jî hó-hó tsia̍h tsi̍t tǹg thoân-îⁿ-pn̄g. Si̍t-tsāi tsin khó-ò͘ⁿ !"Tiong-kok kun-ki kòe-nî ji̍t tiong-tàu tsa̍p-jī tiám saⁿ-tsa̍p-sì hun tsìn-ji̍p lán kok ê ADIZ ( sai lâm khong-e̍k) , koân-tō͘ 2,000 kong-tshioh, lán khong-kun tī khong-tiong kàm-khòng jî-tshiáⁿ kóng-pò͘ kā in kóaⁿ-tsáu; kāng tsi̍t-ê sî-kan, lēng-gōa ū tsi̍t tâi Tiong-kok khong-kun 500 ū-kéng-ki tī hông-khong sik-pia̍t khu gōa teh tsìn-hêng kéng-kài.

Kan-taⁿ kū-le̍k sin-tsiaⁿ hioh tsi̍t kang. Tshe-jī thàu-tsá káu tiám, tsi̍t tâi Tiong-kok ūn 8 hoán-tsiâm-ki kah tsi̍t tâi ūn 8 ki-su̍t tsing-tshat-ki tio̍h tsìn-ji̍p lán sai lâm khong-e̍k, koân-tō͘ 4,000 kong-tshioh. Ū lâng khì kah tōa-siaⁿ mē kóng, Tsia m̄ sī lín gōa-ke, bián lâi tsò-kheh! Koh ū lâng mē kóng, khui-tshun tshe-jī tio̍h lâi jiáu-loān pa̍t lâng, lín ē sue kui nî! tshe-saⁿ tsá-khí tsa̍p-it tiám sì-tsa̍p pun, Tiong-kok kun-ki tsìn-ji̍p lán kok sai lâm khong-e̍k, koân-tō͘ 2,100 kong-tshioh, Tsit nn̄g kang, lán khong-kun lóng ū tī khong-tiong kàm-khòng jî-tshiáⁿ kóng-pò͘ kā in kóaⁿ-tsáu.

　　 Sin-tsiaⁿ tshe-sì, lán Tâi-oân lâng tī tsit kang ngiâ tsâi-sîn, lán ngiâ tsâi-sîn kah in Tiong-kok khong-kun siáⁿtī-tāi? Thàu-tsá káu tiám, Tiong-kok tsi̍t tâi kun-ki Ūn-8 hoán-tsiâm-ki tio̍h tsìn-ji̍p lán kok sai lâm khong-e̍k hông-khong sik-pia̍t khu. Lán tû-liáu ēng hông-khong hui-tôaⁿ tui-tsong kàm-khòng í-gōa, mā phài khong-tiong sûn-lô ping-la̍t èng-tùi, jî-tshiáⁿ kóng-pò͘ kā in kóaⁿ-tsáu kóng,"Tiong-hôa Bîn-kok khong-kun kóng-pò͘, tī Tâi-oân sai lâm khong-e̍k koân-tō͘ 3,000 kong-tshioh ê Τiong-kiōng kun-ki tsù-ì! lí í tsìn-ji̍p goán khong-e̍k, éng-hióng goán pue-hâng an-tsoân, sûi-sî hôe-tsóan lī-khui!"

　　 Tshe-gō͘ keh-khui tsá-khí, Tiong-kok tsi̍t tâi "Ū-8" hoán-tsiâm-ki ùi Tâi-oân hái-kiap tiong sòaⁿ í-lâm tsìn-ji̍p lán kok hông-khong sik-pia̍t khu, khong-kun ū phài khong-tiong sûn-lô ping-la̍t èng-tùi, jî-tshiáⁿ ēng kóng-pò͘ kā in kóaⁿ-tsáu.

Jī-gue̍h tsa̍p-tshit kū-le̍k tshe-la̍k tsá-khí, Tiong-kok nn̄g tâi "Ū-8" ki-su̍t tsing-tshat-ki tsìn-ji̍p lán kok sai lâm khong-e̍k hông-khong sik-pia̍t khu. Jī-gue̍h tsa̍p-peh ē-po͘, Tiong-kok tsi̍t tâi" Ū-8" ki-su̍t tsing-tshat-ki tsìn-ji̍p lán kok sai lâm khong-e̍k hông-khong sik-pia̍t khu. Tsiàu koàn-lē, lán lóng ū phài kun-ki èng-tùi, hông-khong hui-tôaⁿ kàm-khòng, kóng-pò͘ kah in kóaⁿ-tsáu.

　　 Kin-kì Kok-hông-pō͘ ê thóng-kè, kū-nî 2020 nî tsi̍t nî saⁿ-pah la̍k-tsa̍p-gō͘ kang, Tiong-kok kun-ki tsiap-sio̍k bô thêng lâi jiáu-loān lán kok sai lâm khong-e̍k, ū 380 gōa tâi pái; tsha-put-to ta̍k kang to̍h ū tsi̍t tâi Tiong-kok kun-ki lâi pò-tò. Kin-nî it-gue̍h saⁿ-tsa̍p it kang, Tiong-kok kun-ki lâi loān lán sai lâm khong-e̍k ū jī-tsa̍p tshit kang.

Lán tsai-iáⁿ, Tiong-kok kun-ki sī tsìn-ji̍p lán kok ê sai lâm khong-e̍k hông-khong sik-pia̍t khu, pēng m̄ sī léng-khong, Tiong-kok kun-ki tong-jiân mā tsai-iáⁿ, lán bē-tàng khui tshèng tāng-bú , kan-taⁿ ē tàng ēng kóaⁿ ê. Tshiūⁿ-kóng kū-nî 2020 nî la̍k-gue̍h jī-sì pòaⁿ-mê, nn̄g tâi Gô-lô hoán-tsiâm-ki IL-38 pue-ji̍p Bí-kok Alaska hông-khong sik-pia̍t khu, Bí-kok mā sī kan-taⁿ ē tàng kóaⁿ-kín tshut tāng F-22 tsiàn-tàu-ki khì kā in kóaⁿ-tsáu niā-niā.

　　 Tiong-kok kun-ki it-ti̍t pue-lâi lán ê hông-khong sik-pia̍t khu, tong-jiân m̄ sī lâi "kiâⁿ-tshun", sī lâi loān ê. （210219）

Tsù, 兩岸一家親　 tshiáⁿ liām Hôa-gí


中國軍機來擾亂咱國ê航空識別區已經成作日常生活ê一部分，過年前兩工ê二月初九、初十中國軍機無來擾亂。有人想講是中國空軍準備beh好好過年，無疑誤舊曆過年hit工中晝koh來亂，有人搖頭講:「嘴講 ”兩岸一家親”，卻連過年日都來亂，無beh hō͘咱ê空軍健兒好好食一頓團圓飯。實在真可惡 !」中國軍機過年日中晝十二點三十四分進入咱國ê ADIZ（西南空域），懸度2,000公尺，咱空軍tī空中監控而且廣播kā in趕走；仝一個時間，另外有一台中國空軍500預警機tī防空識別區外teh進行警戒。 Kan-taⁿ舊曆新正歇一工。初二透早九點，一台中國運8反潛機kah一台運8技術偵察機tio̍h進入咱西南空域，懸度4,000公尺。有人氣kah大聲罵講：Tsia m̄是恁外家，免來做客！Koh有人罵講：開春初二tio̍h來擾亂別人，lín會衰歸年！初三早起十一點四十分，中國軍機進入咱國西南空域，懸度2,100公尺，Tsit兩工，咱空軍攏有tī空中監控而且廣播kā in趕走。

　　新正初四，咱台灣人tī tsit工迎財神，咱迎財神kah in中國空軍啥tī-tāi？透早九點，中國一台軍機運8反潛機tio̍h進入咱國西南空域防空識別區。咱除了用防空飛彈追蹤監控以外，mā派空中巡邏兵力應對、而且廣播kā in趕走講：「中華民國空軍廣播，tī台灣西南空域懸度3,000公尺ê中共軍機注意！你已進入阮空域，影響阮飛航安全，隨時迴轉離開！」

　　初五隔開早起，中國一台「運8」反潛機ùi台灣海峽中線以南進入咱國防空識別區，空軍有派空中巡邏兵力應對，而且用廣播kā in趕走。

二月十七舊曆初六早起，中國兩台「運8」技術偵察機進入咱國西南空域防空識別區。二月十八下晡，中國一台「運8」技術偵察機進入咱國西南空域防空識別區。照慣例，咱lóng有派軍機應對、防空飛彈監控、廣播kah in趕走。

　　根據國防部ê統計，舊年2020年一年三百六十五工，中國軍機接續無停來擾亂咱國西南空域，有380外台次；差不多逐工to̍h有一台中國軍機來報到。今年一月三十一工，中國軍機來亂咱西南空域有二十七工。

咱知影，中國軍機是進入咱國ê西南空域防空識別區，並m̄是領空，中國軍機當然mā知影，咱bē-tàng開銃動武，kan-taⁿ會tàng用趕ê。像講舊年2020年六月二四半暝，兩台俄羅反潛機IL-38飛入美國Alaska防空識別區，美國mā是kan-taⁿ會tàng趕緊出動F-22戰鬥機去kā in趕走niā-niā。

　　中國軍機一直飛來咱ê防空識別區，當然m̄是來「行春」，是來亂ê。 （210219）
註：兩岸一家親　　請唸華語