《綠色短評》

 | | | 轉寄

「漢奸」是siáⁿ-mi̍h碗糕？

作者 李南衡, TsoânTâijī/全台字 by Tsng Hūiphêng 2022.01.16

Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》　　　　　　　　 Lí Lâmhêng

　　　　　　　　　”漢奸”sī siáⁿmi̍h óaⁿko?


Tsa̍pjīgue̍h tsa̍ppeh, Sùtāi Kongtâu kiatkó Tiongkok Kokbîntóng lóng su, tóng lāi tio̍h ū lâng khaisí teh "tshōe tsiànhoān". Kóng sī kǹgthi̍h Hânhún, tsutshim imga̍k lâng Lâu Katshiong kuiê lâng pang·khì, tōasiaⁿ mē kóng,"Hâu Iúgî m̄ sī poāntô͘, siáⁿmi̍h tsiah sī poāntô͘? " phàuhong Tsu Li̍plûn" tshōa tsi̍t kûn Hànkan, siáng ē tòe lí tsò tsiàniú?" i ho͘io̍k ūitio̍h sulī bô kò͘ tóngkok ê Hâu Iúgî kah Lô͘ Siùiàn tio̍h ka khaitû tiāu, koh tiám miâ Kokim Sò͘mûi, Kang Khésîn hunpia̍t soán Sinpaktshī kah Tâitiong tshītiúⁿ. I kóng "2024 sī Tionghôa Bînkok kah Tâioân to̍kli̍p tsòeāu ê kuattsiàn", i ho͘io̍k Kueh Tâibêng tángsūtiúⁿ, tshutbé thè goán kái simgoān. "Kokbîntóng nā beh ài hôpêng thóngit, tio̍h sing hō͘ Tâioân siàuliânlâng tsaiiáⁿ kakī sī tó tsi̍t kok ê lâng".

Tâioân lâng íking tsin kú bô thiaⁿtio̍h “漢奸” tsitê mēlâng ê gísû. Ē kìtit tsoh gíná ê sîtsūn, ta̍k kang tio̍h ài tshiùⁿ tsi̍t siú "hoán Kiōng khòng Gô kua", "打倒俄寇，反共產反共產；消滅朱毛，殺漢奸殺漢奸." gíná lâng tsaiiáⁿ siáⁿmi̍h “漢奸” leh ? Tōahàn liáuāu khì tshōe tsuliāu tsiah tsaiiáⁿ, oh! goânlâi tī gō͘tshing nî iukiú le̍ksú lāité, “漢奸” sǹg sī tsi̍tê tsin iùkhí ê miâsû, Boáná phah ji̍pkuan thóngtī kuiê tongsî ê Tiongkok, kiànli̍p Tōatshing Tèkok liáuāu, Boántshing thóngtītsiá tsútiuⁿ kakī kah Hànjîn līhāi siothong; mā sī ū Hànjîn jīnûi Boántshing ê līik tio̍h sī Hànjîn ê līik, tìsú ū tsin tsē lâng kā Boán Hàn khòaⁿ tsoh itthé. Kiànnā ûipōe in ê līik ê lâng lóng kiò tsoh “漢奸”, ìsù sī thong te̍kjîn ê lâng. TōaTshing Tèkok thóngtī Tiongkok 276 nî (1636—1912), iûgoân ū tsin tsē tshintshiūⁿ Sun Tiongsan tsit khoán lâng, jīnûi Boáná kah Hànjîn pēng m̄sī itthé, só͘í i kikbēng ê tsongtsí ū tsi̍t tiâu sī "驅逐韃虜", 韃虜 goânpún sī tsí Tiongkok tāilio̍k pakhong Bôngkó͘, Lútsin téng iûbo̍k bîntso̍k, tongjiân m̄sī Hàn bîntso̍k ê lâng.

　　 Tiong Ji̍t tsiàntsing tiong, óa Ji̍tpún tshimlio̍ktsiá á·sī óa Ji̍tpún lâng só͘ hûtshî ê só͘ūi "Gūi tsèngkoân" ê lâng, tsèngkì tshionghun ê, lóngtsóng tshingho͘ tsoh “漢奸”, khiòngtsiàn sènglī liáuāu, hiahê “漢奸” lóng tio̍h siū símphòaⁿ tēngtsōe.

　　 Tsiúⁿ Κàitsio̍h kah Tiongkok Kokbîntóng tsènghú hō͘ Tiongkok Kiōngsántóng phah kah tsáulō͘ lâi Tâioân, tongjiân tùi tongsî tī Mâu Te̍ktong, Tsu Tik léngtōhā ê Tiongkok Kiōngsántóng hūn kàu ji̍pkut; tùi tī āupiah sáisú kah tsioân ê So͘liân kiōngsántóng mē tsoh sī "俄寇","寇"sī tsha̍tá thó͘húi. Thiaⁿkóng goán gíná sîtāi só͘ tshiùⁿ ê hitsiú "hoán kiōng khòng Gô kua"kuasû sī Tsiúⁿ Κàitsio̍h siá ê, lán ētàng líkái i ná ē mē lâng “漢奸”.

　　 Hiāntshúsî tī Tiongkok, káutsa̍pit hòe ê Tsu Tiongkun lúsū, sī tsi̍t ūi tsin siū tsunkèng ê kongkiōng tìsik hūntsú, i bat tamjīm kòe Tiongkok Siāhōe Khoha̍k īⁿ Bíkok Giánkiùsó͘ só͘tiúⁿ. I kóng, tùi bô kâng khoán ìkiàn ê lâng to̍h mē i sī “漢奸”,”漢奸” tsitê sû suah piàn tsoh "kok mē", kā “漢奸” tsitê sû ke tī ìkiàn kah góa bô kâng ê lâng sintsiūⁿ, mā sī "Tiongkok te̍ksik", jîtshiáⁿ sī hiāntsāi ê "Tiongkok te̍ksik". Ánne, lán tio̍h tsaiiáⁿ goânlâi Lâu Katshiong lī lán Tâioân jōani̍h hn̄g.

　　 Kináji̍t tī Tâioân, ū kúiê lâng kuansim,”漢奸” sī siáⁿmi̍h óaⁿko? 　　(211231)
Tsù,"漢奸" 俄寇hoán Kiōng khòng Gô kuakhik ê kuasû tshiáⁿ liām Hôagí

Pe̍h-ōe-jī-pán/白話字版

《 Le̍k-sik toán-phêng 》　　　　　　　　 Lí Lâm-hêng
　　　　　　　　　”漢奸”sī siáⁿ-mi̍h óaⁿ-ko?

Tsa̍p-jī-gue̍h tsa̍p-peh, Sù-tāi Kong-tâu kiat-kó Tiong-kok Kok-bîn-tóng lóng su, tóng lāi tio̍h ū lâng khai-sí teh "tshōe tsiàn-hoān". Kóng sī kǹg-thi̍h Hân-hún, tsu-tshim im-ga̍k lâng Lâu Ka-tshiong kui-ê lâng pang-·khì, tōa-siaⁿ mē kóng,"Hâu Iú-gî m̄ sī poān-tô͘, siáⁿ-mi̍h tsiah sī poān-tô͘? " phàu-hong Tsu Li̍p-lûn" tshōa tsi̍t kûn Hàn-kan, siáng ē tòe lí tsò tsiàn-iú?" i ho͘-io̍k ūi-tio̍h su-lī bô kò͘ tóng-kok ê Hâu Iú-gî kah Lô͘ Siù-iàn tio̍h ka khai-tû tiāu, koh tiám miâ Ko-kim Sò͘-mûi, Kang Khé-sîn hun-pia̍t soán Sin-pak-tshī kah Tâi-tiong tshī-tiúⁿ. I kóng "2024 sī Tiong-hôa Bîn-kok kah Tâi-oân to̍k-li̍p tsòe-āu ê kuat-tsiàn", i ho͘-io̍k Kueh Tâi-bêng táng-sū-tiúⁿ, tshut-bé thè goán kái sim-goān. "Kok-bîn-tóng nā beh ài hô-pêng thóng-it, tio̍h sing hō͘ Tâi-oân siàu-liân-lâng tsai-iáⁿ ka-kī sī tó tsi̍t kok ê lâng".

Tâi-oân lâng í-king tsin kú bô thiaⁿ-tio̍h “漢奸” tsit-ê mē-lâng ê gí-sû. Ē kì-tit tsoh gín-á ê sî-tsūn, ta̍k kang tio̍h ài tshiùⁿ tsi̍t siú "hoán Kiōng khòng Gô kua", "打倒俄寇，反共產反共產；消滅朱毛，殺漢奸殺漢奸." gín-á lâng tsai-iáⁿ siáⁿ-mi̍h “漢奸” leh ? Tōa-hàn liáu-āu khì tshōe tsu-liāu tsiah tsai-iáⁿ, oh! goân-lâi tī gō͘-tshing nî iu-kiú le̍k-sú lāi-té, “漢奸” sǹg sī tsi̍t-ê tsin iù-khí ê miâ-sû, Boán-á phah ji̍p-kuan thóng-tī kui-ê tong-sî ê Tiong-kok, kiàn-li̍p Tōa-tshing Tè-kok liáu-āu, Boán-tshing thóng-tī-tsiá tsú-tiuⁿ ka-kī kah Hàn-jîn lī-hāi sio-thong; mā sī ū Hàn-jîn jīn-ûi Boán-tshing ê lī-ik tio̍h sī Hàn-jîn ê lī-ik, tì-sú ū tsin tsē lâng kā Boán Hàn khòaⁿ tsoh it-thé. Kiàn-nā ûi-pōe in ê lī-ik ê lâng lóng kiò tsoh “漢奸”, ì-sù sī thong te̍k-jîn ê lâng. Tōa-Tshing Tè-kok thóng-tī Tiong-kok 276 nî (1636—-1912), iû-goân ū tsin tsē tshin-tshiūⁿ Sun Tiong-san tsit khoán lâng, jīn-ûi Boán-á kah Hàn-jîn pēng m̄-sī it-thé, só͘-í i kik-bēng ê tsong-tsí ū tsi̍t tiâu sī "驅逐韃虜", 韃虜 goân-pún sī tsí Tiong-kok tāi-lio̍k pak-hong Bông-kó͘, Lú-tsin téng iû-bo̍k bîn-tso̍k, tong-jiân m̄-sī Hàn bîn-tso̍k ê lâng.

　　 Tiong Ji̍t tsiàn-tsing tiong, óa Ji̍t-pún tshim-lio̍k-tsiá á-·sī óa Ji̍t-pún lâng só͘ hû-tshî ê só͘-ūi "Gūi tsèng-koân" ê lâng, tsèng-kì tshiong-hun ê, lóng-tsóng tshing-ho͘ tsoh “漢奸”, khiòng-tsiàn sèng-lī liáu-āu, hiah-ê “漢奸” lóng tio̍h siū sím-phòaⁿ tēng-tsōe.

　　 Tsiúⁿ Κài-tsio̍h kah Tiong-kok Kok-bîn-tóng tsèng-hú hō͘ Tiong-kok Kiōng-sán-tóng phah kah tsáu-lō͘ lâi Tâi-oân, tong-jiân tùi tong-sî tī Mâu Te̍k-tong, Tsu Tik léng-tō-hā ê Tiong-kok Kiōng-sán-tóng hūn kàu ji̍p-kut; tùi tī āu-piah sái-sú kah tsi-oân ê So͘-liân kiōng-sán-tóng mē tsoh sī "俄寇","寇"sī tsha̍t-á thó͘-húi. Thiaⁿ-kóng goán gín-á sî-tāi só͘ tshiùⁿ ê hit-siú "hoán kiōng khòng Gô kua"kua-sû sī Tsiúⁿ Κài-tsio̍h siá ê, lán ē-tàng lí-kái i ná ē mē lâng “漢奸”.

　　 Hiān-tshú-sî tī Tiong-kok, káu-tsa̍p-it hòe ê Tsu Tiong-kun lú-sū, sī tsi̍t ūi tsin siū tsun-kèng ê kong-kiōng tì-sik hūn-tsú, i bat tam-jīm kòe Tiong-kok Siā-hōe Kho-ha̍k īⁿ Bí-kok Gián-kiù-só͘ só͘-tiúⁿ. I kóng, tùi bô kâng- khoán ì-kiàn ê lâng to̍h mē i sī “漢奸”,”漢奸” tsit-ê sû suah piàn tsoh "kok mē", kā “漢奸” tsit-ê sû ke tī ì-kiàn kah góa bô kâng ê lâng sin-tsiūⁿ, mā sī "Tiong-kok te̍k-sik", jî-tshiáⁿ sī hiān-tsāi ê "Tiong-kok te̍k-sik". Án-ne, lán tio̍h tsai-iáⁿ goân-lâi Lâu Ka-tshiong lī lán Tâi-oân jōa-ni̍h hn̄g.

　　 Kin-á-ji̍t tī Tâi-oân, ū kúi-ê lâng kuan-sim,”漢奸” sī siáⁿ-mi̍h óaⁿ-ko? 　　(211231)
Tsù,"漢奸" 俄寇hoán Kiōng khòng Gô kua-khik ê kua-sû tshiáⁿ liām Hôa-gí



十二月十八，四大公投結果中國國民黨lóng輸，黨內tio̍h有人開始teh 「tshōe戰犯」。講是鋼鐵韓粉、資深音樂人劉家昌歸个人崩去、大聲罵講，「侯友宜m̄是叛徒，siáⁿ-mi̍h才是叛徒？」砲轟朱立倫「tshōa一群漢奸，siángē跟你做戰友？」伊呼籲為tio̍h私利無顧黨國ê侯友宜kah盧秀燕tio̍h ka開除掉，koh點名高金素梅、江啓臣分別選新北市kah台中市長。伊講「2024是中華民國kah台灣獨立最後ê決戰」，伊呼籲郭台銘董事長，出馬替阮解心願。「國民黨若beh愛和平統一，tio̍h先hō͘台灣少年人知影家己是tó一國ê人」。

台灣人已經真久無聽tio̍h「漢奸」tsit-ê罵人ê語詞。Ē記得作gín-áê時陣，逐工tio̍h愛唱一首「反共抗俄歌」：「打倒俄寇，反共產反共產；消滅朱毛，殺漢奸殺漢奸。」gín-á人知影siáⁿ-mi̍h「漢奸」咧？大漢了後去tshōe資料才知影，oh！原來tī五千年悠久歷史內底，「漢奸」算是一个真幼齒ê名詞，滿á拍入關統治歸个當時ê中國，建立大清帝國了後，滿清統治者主張家己kah漢人利害相通；mā是有漢人認為滿清ê利益tio̍h是漢人ê利益，致使有真tsē人kā滿漢看作一體。見若違背in ê利益ê人lóng叫作「漢奸」，意思是通敵人ê人。大清帝國統治中國276年（1636—-1912），猶原有真tsē親像孫中山tsit款人，認為滿á kah漢人並m̄是一體，所以伊革命ê宗旨有一條是「驅逐韃虜」，韃虜原本是指中國大陸北方蒙古、女真等遊牧民族，當然m̄是漢民族ê人。

　　中日戰爭中，倚日本侵略者á是倚日本人所扶持ê所謂「偽政權」ê人，證據充分ê，lóng總稱呼作「漢奸」，抗戰勝利了後，hiah-ê「漢奸」lóng tio̍h受審判定罪。

　　蔣介石kah中國國民黨政府hō͘中國共產黨拍kah走路來台灣，當然對當時tī毛澤東、朱德領導下ê中國共產黨恨到入骨；對tī後壁唆使kah支援ê蘇聯共產黨罵作是「俄寇」，「寇」是賊á土匪。聽講阮gín-á時代所唱ê hit首「反共抗俄歌」歌詞是蔣介石寫ê，咱ētàng理解伊那ē罵人「漢奸」。

　　現此時tī中國，九十一歲ê資中筠（kun）女士，是一位真受尊敬ê公共智識分子，伊bat擔任過中國社會科學院美國研究所所長。伊講：對無仝款意見ê人to̍h罵伊是「漢奸」，「漢奸」tsit-ê 詞煞變作「國罵」，kā「漢奸」tsit-ê 詞加tī意見kah我無仝ê人身上，mā是「中國特色」、而且是現在ê「中國特色」。Án-ne，咱tio̍h知影原來劉家昌離咱台灣jōa-ni̍h遠。

　　今á日tī台灣，有幾个人關心：「漢奸」是siáⁿ-mi̍h碗糕？　　(211231)
註：「漢奸」　　俄寇　　反共抗俄歌曲ê歌詞　　請唸華語