《綠色短評》

 | | | 轉寄

方芳tsit款ê無人情狗！

作者 李南衡, TsoânTâijī/全台字 by Tsng Hūiphêng 2022.02.06

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

方芳 tsit khoán ê bô jîntsêng káu!


2021 nî tsa̍pjīgue̍h jīla̍k sinbûn pòtō, tsutshim gējîn 方芳 kòikhì tī Tâioân mā sǹg sī tsonggē kài ê ittsé. Kúi kang tsêng i tī siākûn téngbīn huaⁿhí pò hō͘ ta̍kê tsaiiáⁿ tsi̍tê hó siausit, tio̍h sī i íking niá tio̍h Tiongkokkongbîn sinhūntsèng, ínkhí bāngiú jia̍tlia̍t thólūn. Tsi̍tê Tâioân lâng huaⁿhí beh tsò Bíkoklâng, Tikkoklâng á·sī Ji̍tpúnlâng, sī i soánte̍k ê tsūiû. I nā sūnlī the̍h tio̍h i só͘ ìài hit kok ê sinhūntsèng á·sī le̍kkhah tsi lūi ê bûnkiāⁿ, lán suijiân kah i bô se̍ksāi mā thè i huaⁿhí.. Sinbûn pòtō kóng, 方芳 tsin huaⁿhí hō͘ ta̍kê khòaⁿ i ê Tiongkok kongbîn sinhūntsèng, thàulō͘ i sī tī tsa̍pitgue̍h jīsaⁿ sinpò, tsa̍pjīgue̍h jīsì niá tio̍h sinhūntsèng, jîtshiáⁿ suankò kóng, Ùi tsitmá khí, góa kah ta̍kê kāngkhoán, mā sī ū Tiongkok kongbîn sinhūntsèng ê lâng ah! ū Tâioân bāngiú tōasiaⁿ huah kóng, 方芳 kìjiân the̍h tio̍h Tiongkok kongbîn sinhūntsèng, ingkai kā Tâioân ê kiānpókhah tsián tiāu bē sái koh tńglâi Tâioân khòaⁿ pēⁿ hióngsiū kiānpó. 方芳 ìn kóng, bô lâng ū khoânlī iaukiû góa tsián tiāu Tâioân kiānpókhah! 方芳 kóngōe ná ē hiah tōasiaⁿ leh? Ū ba̍ktsiu khah lāi ê bāngiú khòaⁿtshut 方芳 the̍h hō͘ lâng khòaⁿ hit tiuⁿ m̄ sī "Tionghôa Jînbîn Kiōnghôkok kubîn sinhūntsèng", kántshing "Tiongkok kongbîn sinhūntsèng", sī kah 黃安in hit tsióng lâng kāngkhoán the̍h ê sī "Tionghôa Jînbîn Kiōnghôkok Tâioân kubîn kutsūtsèng", kántshing "Tâipau kutsūtsèng", putkoánsî iáu ētàng tńglâi Tâioân súiōng kiānpó khah khòaⁿpēⁿ. 方芳 nā tsintsiàⁿ beh the̍h tio̍h "Tiongkok kongbîn sinhūntsèng", tio̍h ài tshintshiūⁿ lēnggōa tsi̍t ūi gējîn Tshingpahhūi ánne, sing hòngkhì Tâioân koktsik, tsiah ētàng the̍h tio̍h "Tiongkok kongbîn sinhūntsèng", tshintshiūⁿ 方芳 ánne bô sitkhì Tâioân koktsik, tongjiân iáu ētàng tńglâi Tâioân hiáng ēng kiānpókhah.

Kiⁿî tsi̍tgue̍htshe, 方芳 tsiapsiū Tiongkok Tiongng Tiānsītâi ,”《 Khòaⁿ Tâihái 》tsiatbo̍k tsútshîjîn hóngbūn, i kóng, Tâioân sī góa tī hia tshutsì singtióng ê só͘tsāi, kóng tùi hit tè tsúithô͘ bô kámtsêng sī bô hū tsikjīm, sī phiànlâng·ê. Tâioân iáu ū tsin tsē thiàⁿsioh góa ê pêngiú. Thiaⁿ·khí·lâi nátshiūⁿ tùi Tâioân iáu ū tsin tshim ê kámtsêng. Phiàn· lâng·ê! I kóngtio̍h Tâioân ê sî, i kóng sinûi Tiongkok kongbîn, beh kóng tsi̍t kù ōe, lán koánkà gíná ê honghuat, gíná nā kóng tōlí, tio̍h ēsái ka thiaⁿ, gíná nā bô kóng tōlí, ūsîtsūn tsintsiàⁿ tio̍h kā siàn nn̄gē tshùiphóe, i tsiah ē tsaiiáⁿ līhāi. Só͘í góa tsintsiàⁿ huisiông kîthāi khòaⁿtio̍h Nn̄ghōaⁿ thóngit hit tsi̍t kang. 　　方芳 káⁿ m̄tsaiiáⁿ, Tiongkok nā tshuttshiú siàn Tâioân nn̄gē tshùiphóe , ū khólêng sī hiòng Tâioân phah kúi lia̍p huitôaⁿ, mā ū khólêng tsiànki lâi Tâioân khongsi̍p kúi piàn, tshùthe̍h kahn̂g húihoāi, jînbîn tshám sí siūsiong. Tshèngtsí bô seⁿ ba̍ktsiu, m̄nā方芳 thóià ê Tâioânlâng siū hāi, tsin ū khólêng tsà sí tsi̍t kóa方芳 tshùi·ni̍h só͘ kóng ê "tsin tsē thiàⁿsioh góa ê pêngiú"; suijiân tī Tâioân kah方芳 kāngkhoán jīntông kakī sī "Tiongkoklâng" ê kàu kiⁿî tsiah tshun 2.8% niāniā, mā iáu ū la̍ktsa̍psìbān sìtshinggōa lâng. Ittēng ē ū lâng sí tī tsiànhóe tiong. 方芳 ê liôngsim íking khì hō͘ Tiongkok káu kākhì ah!

　　 Káu mā sī ū pahpahtsióng, ū tiongsim ê káu, ū bôlūn siáⁿlâng the̍h mi̍hkiāⁿ hō͘ tsia̍h tio̍h ē iô bóe ê káu, mā ū khì kā tshī i tōatsiah ê tsúlâng hit tsióng bô jîntsêng káu, 方芳 sǹg sī tsit tsióng "ok khián"! (220121)
Tsù, 黃安 方芳 　tshiáⁿ liām Hôagí


Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng

方芳 tsit khoán ê bô jîn-tsêng káu!

2021 nî tsa̍p-jī-gue̍h jī-la̍k sin-bûn pò-tō, tsu-tshim gē-jîn 方芳 kòe-khì tī Tâi-oân mā sǹg sī tsong-gē kài ê it-tsé. Kúi kang tsêng i tī siā-kûn téng-bīn huaⁿ-hí pò hō͘ ta̍k-ê tsai-iáⁿ tsi̍t-ê hó siau-sit, tio̍h sī i í-king niá tio̍h Tiong-kok-kong-bîn sin-hūn-tsèng, ín-khí bāng-iú jia̍t-lia̍t thó-lūn. Tsi̍t-ê Tâi-oân lâng huaⁿ-hí beh tsò Bí-kok-lâng, Tik-kok-lâng á-·sī Ji̍t-pún-lâng, sī i soán-te̍k ê tsū-iû. I nā sūn-lī the̍h tio̍h i só͘ ì-ài hit kok ê sin-hūn-tsèng á-·sī le̍k-khah tsi lūi ê bûn-kiāⁿ, lán sui-jiân kah i bô se̍k-sāi mā thè i huaⁿ-hí.
Sin-bûn pò-tō kóng, 方芳 tsin huaⁿ-hí hō͘ ta̍k-ê khòaⁿ i ê Tiong-kok kong-bîn sin-hūn-tsèng, thàu-lō͘ i sī tī tsa̍p-it-gue̍h jī-saⁿ sin-pò, tsa̍p-jī-gue̍h jī-sì niá tio̍h sin-hūn-tsèng, jî-tshiáⁿ suan-kò kóng, Ùi tsit-má khí, góa kah ta̍k-ê kāng-khoán, mā sī ū Tiong-kok kong-bîn sin-hūn-tsèng ê lâng ah! ū Tâi-oân bāng-iú tōa-siaⁿ huah kóng, 方芳 kì-jiân the̍h tio̍h Tiong-kok kong-bîn sin-hūn-tsèng, ing-kai kā Tâi-oân ê kiān-pó-khah tsián tiāu bē sái koh tńg-lâi Tâi-oân khòaⁿ pēⁿ hióng-siū kiān-pó. 方芳 ìn kóng, bô lâng ū khoân-lī iau-kiû góa tsián tiāu Tâi-oân kiān-pó-khah! 方芳 kóng-ōe ná ē hiah tōa-siaⁿ leh? Ū ba̍k-tsiu khah lāi ê bāng-iú khòaⁿ-tshut 方芳 the̍h hō͘ lâng khòaⁿ hit tiuⁿ m̄ sī "Tiong-hôa Jîn-bîn Kiōng-hô-kok ku-bîn sin-hūn-tsèng", kán-tshing "Tiong-kok kong-bîn sin-hūn-tsèng", sī kah 黃安in hit tsióng lâng kāng-khoán the̍h ê sī "Tiong-hôa Jîn-bîn Kiōng-hô-kok Tâi-oân ku-bîn ku-tsū-tsèng", kán-tshing "Tâi-pau ku-tsū-tsèng", put-koán-sî iáu ē-tàng tńg-lâi Tâi-oân sú-iōng kiān-pó khah khòaⁿ-pēⁿ. 方芳 nā tsin-tsiàⁿ beh the̍h tio̍h "Tiong-kok kong-bîn sin-hūn-tsèng", tio̍h ài tshin-tshiūⁿ lēng-gōa tsi̍t ūi gē-jîn Tshing-pah-hūi án-ne, sing hòng-khì Tâi-oân kok-tsik, tsiah ē-tàng the̍h tio̍h "Tiong-kok kong-bîn sin-hūn-tsèng", tshin-tshiūⁿ 方芳 án-ne bô sit-khì Tâi-oân kok-tsik, tong-jiân iáu ē-tàng tńg-lâi Tâi-oân hiáng ēng kiān-pó-khah.

Kin-nî tsi̍t-gue̍h-tshe, 方芳 tsiap-siū Tiong-kok Tiong-ng Tiān-sī-tâi ,”《 Khòaⁿ Tâi-hái 》tsiat-bo̍k tsú-tshî-jîn hóng-būn, i kóng, Tâi-oân sī góa tī hia tshut-sì sing-tióng ê só͘-tsāi, kóng tùi hit tè tsúi-thô͘ bô kám-tsêng sī bô hū tsik-jīm, sī phiàn-lâng·ê. Tâi-oân iáu ū tsin tsē thiàⁿ-sioh góa ê pêng-iú. Thiaⁿ·khí·lâi ná-tshiūⁿ tùi Tâi-oân iáu ū tsin tshim ê kám-tsêng. Phiàn· lâng·ê! I kóng-tio̍h Tâi-oân ê sî, i kóng sin-ûi Tiong-kok kong-bîn, beh kóng tsi̍t kù ōe, lán koán-kà gín-á ê hong-huat, gín-á nā kóng tō-lí, tio̍h ē-sái ka thiaⁿ, gín-á nā bô kóng tō-lí, ū-sî-tsūn tsin-tsiàⁿ tio̍h kā siàn nn̄g-ē tshùi-phóe, i tsiah ē tsai-iáⁿ lī-hāi. Só͘-í góa tsin-tsiàⁿ hui-siông kî-thāi khòaⁿ-tio̍h Nn̄g-hōaⁿ thóng-it hit tsi̍t kang.

　　方芳 káⁿ m̄-tsai-iáⁿ, Tiong-kok nā tshut-tshiú siàn Tâi-oân nn̄g-ē tshùi-phóe , ū khó-lêng sī hiòng Tâi-oân phah kúi lia̍p hui-tôaⁿ, mā ū khó-lêng tsiàn-ki lâi Tâi-oân khong-si̍p kúi piàn, tshù-the̍h ka-hn̂g húi-hoāi, jîn-bîn tshám sí siū-siong. Tshèng-tsí bô seⁿ ba̍k-tsiu, m̄-nā方芳 thó-ià ê Tâi-oân-lâng siū hāi, tsin ū khó-lêng tsà sí tsi̍t kóa方芳 tshùi·ni̍h só͘ kóng ê "tsin tsē thiàⁿ-sioh góa ê pêng-iú"; sui-jiân tī Tâi-oân kah方芳 kāng-khoán jīn-tông ka-kī sī "Tiong-kok-lâng" ê kàu kin-nî tsiah tshun 2.8% niā-niā, mā iáu ū la̍k-tsa̍p-sì-bān sì-tshing-gōa lâng. It-tēng ē ū lâng sí tī tsiàn-hóe tiong. 方芳 ê liông-sim í-king khì hō͘ Tiong-kok káu kā-khì ah!

　　 Káu mā sī ū pah-pah-tsióng, ū tiong-sim ê káu, ū bô-lūn siáⁿ-lâng the̍h mi̍h-kiāⁿ hō͘ tsia̍h tio̍h ē iô bóe ê káu, mā ū khì kā tshī i tōa-tsiah ê tsú-lâng hit tsióng bô jîn-tsêng káu, 方芳 sǹg sī tsit tsióng "ok khián"! (220121)

Tsù, 黃安 方芳 　tshiáⁿ liām Hôa-gí


2021年十二月二六新聞報導，資深藝人方芳過去tī台灣mā算是綜藝界ê一姊。幾工前伊tī社群頂面歡喜報hō͘ta̍k个知影一個好消息,，tio̍h是伊已經領tio̍h中國公民身分證，引起網友熱烈討論。一個台灣人歡喜beh做美國人、德國人á是日本人，是伊選擇ê自由。伊若順利the̍h tio̍h伊所意愛hit國ê身分證á是綠卡之類ê文件，咱雖然kah伊無熟似mā替伊歡喜.。

新聞報導講，方芳真歡喜hō͘ta̍k个看伊ê中國公民身分證，透露伊是tī十一月二三申報，十二月二四領tio̍h身分證，而且宣告講：Ùi tsit-má起，我kahta̍k个仝款，mā是有中國公民身分證ê人ah！有台灣網友大聲喝講，方芳既然the̍h tio̍h中國公民身分證，應該kā台灣ê健保卡剪掉bē使koh轉來台灣看病享受健保。方芳應講，無人有權利要求我剪掉台灣健保卡！方芳講話ná ēhiah大聲咧？有目睭khah利ê網友看出方芳the̍h hō͘人看hit張m̄是「中華人民共和國居民身份證」、簡稱「中國公民身份證」，是kah黃安in hit種人仝款the̍h ê是「中華人民共和國台灣居民居住證」、簡稱「台胞居住證」，不管時猶ē-tàng轉來台灣使用健保卡看病。方芳若真正beh the̍h tio̍h「中國公民身份證」，tio̍h愛親像另外一位藝人千百惠án-ne，先放棄台灣國籍，才ē-tàng the̍h tio̍h「中國公民身份證」，親像方芳án-ne無失去台灣國籍，當然猶ētàng轉來台灣享用健保卡。

今年一月初，方芳接受中國中央電視台《看台海》節目主持人訪問，伊講，台灣是我tīhia出世生長ê所在，講對hit塊水土無感情是無負責任、是騙人ê。台灣猶有真tsē疼惜我ê朋友。聽起來ná像對台灣猶有真深ê感情。騙人ê！伊講tio̍h台灣ê時，伊講身為中國公民，beh講一句話，咱管教gín-á ê方法，gín-á若講道理，tio̍hē-sáika聽，gín-á若無講道理，有時陣真正tio̍h kā煽兩下嘴phóe，伊才ē知影厲害。所以我真正非常期待看tio̍h兩岸統一hit一工。

　　方芳敢m̄知影，中國若出手搧台灣兩下嘴phóe，有可能是向台灣拍幾粒飛彈、mā有可能戰機來台灣空襲幾遍，厝宅家園毀壞，人民慘死受傷。銃子無生目睭，m̄-nā方芳討厭ê台灣人受害，真有可能炸死一kóa方芳嘴裡所講ê「真tsē疼惜我ê朋友」；雖然tī台灣kah方芳仝款認同家己是「中國人」ê到今年才tshun 2.8% niā-niā，mā猶有六十四萬四千外人。一定ē有人死tī戰火中。方芳ê良心已經去hō͘中國狗咬去ah！

　　狗mā是有百百種，有忠心ê狗、有無論啥人the̍h物件hō͘食tio̍hē搖尾ê狗，mā有去咬飼伊大隻ê主人hit種無人情狗，方芳算是tsit種「惡犬」！ (220121)
註：黃安 方芳　　請唸華語