《綠色短評》

 | | | 轉寄

台北市議會tsit條預算「凍」（tòng）了tsiâⁿ讚！

作者 李南衡, TsoânTâijī/全台字 by Tsng Hūiphêng 2022.02.13

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　　　　 Lí Lâmhêng

　　　 Tâipak tshīgīhōe tsit tiâu ūsoàn tòng liáu tsiâⁿ tsàn!

Tâipak tshīgīhōe símgī Kua Bûntiat tshītiúⁿ jīm kî tsòeāu tsi̍t nî nîtō͘ tsóng ūsoàn àn, kingkòe la̍k kang tsèngtóng tshamsiông liáuāu, itgue̍h jīsì kiatsok; kîtiong siōngkài ū tsinggī ê "siang siâⁿ lūn tôaⁿ" ūsoàn, Bîntsìntóng siūⁿ kóng kīnlâi Tsiná kunki, kunkàm itti̍t lâi jiáuloān Tâioân, só͘í thêtshut "m̄koh tsheh", iaukiû "siang siâⁿ lūn tôaⁿ" kípān tsêng, Tsiná kunki, kunkàm nā kèsio̍k lâi jiáuloān Tâioân, tsit tiâu ūsoàn tio̍h bē hō͘ tāngiōng, ìkiàn mā ū tittio̍h Tsiná Kokbîntóng, Sintóng tóngthoân ê tôngì, ta̍tsêng kuatgī.

　　 Kinkì Kokhôngpō͘ huatpò͘ ê "tsiksî kunsū tōngthài" tsusìn, itgue̍h jīsaⁿ, Tsiná phài tshut 39 tsiah pái kunki tsìnji̍p lán kok Sailâm Khonge̍k Hông khang Sikpa̍tkhu, itgue̍h jīsì koh phài tshut 13 tsiah pái kunki lâi jiáuloān, nn̄g kang tàu khílâi, jiáuloān Tâioân ê Tsiná kunki ū 52 tsiah pái. Khíūtshúlí, tsintsiàⁿ lóng bô i huat?
　　 Tâipaktshī tsènghú kiⁿîtō͘ ūsoàn, hòetshut pīⁿlia̍t 1,745.32 ik, hòe ji̍p sī 1,719.97 ik, itgue̍h tsa̍ptshit gīhōe khaisí tsìnji̍p tsèngtóng tshamsiông; "siâⁿtshī lūntôaⁿ" siongkuan hùṳōng iok 140 bān, Bîntsìntóngthoân kah Siābîntóng gīoân Miâu Phokngálóng tsútiuⁿ tsoânpō͘ santû, Tsiná Kokbîntóng kah Sintóng khinghiòng póliû, tshamsiông bô kiatkó, goânpún tio̍h beh tsìnji̍p piáukuat, m̄koh gītiúⁿ Tân Gímsiông tshâisī "kok thè tsi̍t pō͘ " kèsio̍k tshamsiông, itgue̍h jīsì tsiah tittio̍h kiōngsik.

Bîntsìntóngthoân tsóngtiàu Niû Bûnkiat kóng,"siang siâⁿ lūntôaⁿ" kípān hiah tsē nî, kòikhì lóng m̄bat santû kòe tsi̍tkak gîn ê ūsoàn, m̄koh tsòikīn nîgōa, Tsiná kunki itti̍t lâi jiáuloān Tâioân, só͘í Bîntsìntóngthoân tsútiuⁿ tsit tiâu ūsoàn tsoânpō͘ santû, siang siâⁿ bián siáⁿ kauliû. M̄koh Nâiâⁿ iûgoân siūⁿkóng ingkai khóliōng tséngthé nn̄g hōaⁿ ê khìhun, tsiah ē thêtshut tsit ê "tānsu" tsoh piáuthài. Tsiná Kokbîntóngthoân sukìtiúⁿ Ông Hingî tsítshut, tóngthoân tsitshî póliû "siâⁿtshī lūntôaⁿ" ūsoàn, m̄koh Bîntsìntóng thêtshut tsòikīn Tsiná kunki jiáuloān Tâioân phòhāi nn̄g hōaⁿ khìhun, khaksi̍t hō͘ Tâioân jînbîn kuankám tsin bái, só͘í tôngì tsit ê "tānsu". Bîntsìntóng kah Siābîntóng gīoân kiantshî, nā bô tī "tānsu" lāité tsùbêng Tsiná kunki, kunkàm, bô huattō͘ tsintsiàⁿ ta̍ttio̍h bêngkhak piáuthài ê ìgī, tsòeāu mā ū tittio̍h Tsiná Kokbîntóng kah Sintóng ê tôngì. Putkò gīhōe iûgoân tsitshî kípān, îtshî siâⁿtshī kauliû, kípān ê sîki kau hō͘ Tâipaktshīhú kuattēng, gīhōe bô pitiàu tùi tsit hāng pōesu. Sintóng tiàutsi̍pjîn Phuaⁿ Hoâitsong kóng, i kòjîn tsútiuⁿ nāsī kàusî nn̄g hōaⁿ khìhun ū khah hó tio̍h kípān, nā bôhó tio̍h ētàng tshúsiau.

Ithiòng tsútiuⁿ "nn̄g hōaⁿ tsi̍tketshin"ê Tâipak tshītiúⁿ Kua Bûntiat tio̍h ài khì siūⁿ pānhuat, khòaⁿ i sī m̄ sī ū huattō͘ khì kah Tsiná iúkuan tanūi kóngkóng leh, Tsiná kunki, kunkàm hioh tsi̍ttsāmá mài lâi loān, hō͘ i ū ūsoàn lâi pān "siang siâⁿ lūntôaⁿ". Tán góa pān liáu, lín beh ántsóaⁿ jiáuloān tio̍h kah góa Kua Bûntiat tshītiúⁿ bô kuanhē. Tsiná nā tsintsiàⁿ ū hō͘ Kua tshītiúⁿ bīntsú, ánne piáusī Kua tshītiúⁿ ūkàu la̍t. Nāsī Kua tshītiúⁿ liân tse to̍h kóng bē kiâⁿ, beh kah lâng kóng siáⁿ mi̍h "tsi̍tketshin" leh?

Só͘í lán kóng, Tâipak tshīgīhōe tsit tiâu ūsoàn tòng liáu tsiâⁿ tsàn! 　　(220128)


Pe̍h-ōe-jī-pán/白話字版



《 Le̍k-sik toán-phêng 》　　　　　 Lí Lâm-hêng

　　　 Tâi-pak tshī-gī-hōe tsit tiâu ū-soàn tòng liáu tsiâⁿ tsàn!

Tâi-pak tshī-gī-hōe sím-gī Kua Bûn-tiat tshī-tiúⁿ jīm kî tsòe-āu tsi̍t nî nî-tō͘ tsóng ū-soàn àn, king-kòe la̍k kang tsèng-tóng tsham-siông liáu-āu, it-gue̍h jī-sì kiat-sok; kî-tiong siōng-kài ū tsing-gī ê "siang siâⁿ lūn tôaⁿ" ū-soàn, Bîn-tsìn-tóng siūⁿ kóng kīn-lâi Tsi-ná kun-ki, kun-kàm it-ti̍t lâi jiáu-loān Tâi-oân, só͘-í thê-tshut "m̄-koh tsheh", iau-kiû "siang siâⁿ lūn tôaⁿ" kí-pān tsêng, Tsi-ná kun-ki, kun-kàm nā kè-sio̍k lâi jiáu-loān Tâi-oân, tsit tiâu ū-soàn tio̍h bē hō͘ tāng-iōng, ì-kiàn mā ū tit-tio̍h Tsi-ná Kok-bîn-tóng, Sin-tóng tóng-thoân ê tông-ì, ta̍t-sêng kuat-gī.

　　 Kin-kì Kok-hông-pō͘ huat-pò͘ ê "tsik-sî kun-sū tōng-thài" tsu-sìn, it-gue̍h jī-saⁿ, Tsi-ná phài tshut 39 tsiah pái kun-ki tsìn-ji̍p lán kok Sai-lâm Khong-e̍k Hông khang Sik-pa̍t-khu, it-gue̍h jī-sì koh phài tshut 13 tsiah pái kun-ki lâi jiáu-loān, nn̄g kang tàu khí-lâi, jiáu-loān Tâi-oân ê Tsi-ná kun-ki ū 52 tsiah pái. Khí-ū-tshú-lí, tsin-tsiàⁿ lóng bô i huat?

　　 Tâi-pak-tshī tsèng-hú kin-nî-tō͘ ū-soàn, hòe-tshut pīⁿ-lia̍t 1,745.32 ik, hòe -ji̍p sī 1,719.97 ik, it-gue̍h tsa̍p-tshit gī-hōe khai-sí tsìn-ji̍p tsèng-tóng tsham-siông; "siâⁿ-tshī lūn-tôaⁿ" siong-kuan hùi-iōng iok 140 bān, Bîn-tsìn-tóng-thoân kah Siā-bîn-tóng gī-oân Miâu Phok-ngálóng tsú-tiuⁿ tsoân-pō͘ san-tû, Tsi-ná Kok-bîn-tóng kah Sin-tóng khing-hiòng pó-liû, tsham-siông bô kiat-kó, goân-pún tio̍h beh tsìn-ji̍p piáu-kuat, m̄-koh gī-tiúⁿ Tân Gím-siông tshâi-sī "kok thè tsi̍t pō͘ " kè-sio̍k tsham-siông, it-gue̍h jī-sì tsiah tit-tio̍h kiōng-sik.

Bîn-tsìn-tóng-thoân tsóng-tiàu Niû Bûn-kiat kóng,"siang siâⁿ lūn-tôaⁿ" kí-pān hiah tsē nî, kòe-khì lóng m̄-bat san-tû kòe tsi̍t-kak gîn ê ū-soàn, m̄-koh tsòe-kīn nî-gōa, Tsi-ná kun-ki it-ti̍t lâi jiáu-loān Tâi-oân, só͘-í Bîn-tsìn-tóng-thoân tsú-tiuⁿ tsit tiâu ū-soàn tsoân-pō͘ san-tû, siang siâⁿ bián siáⁿ kau-liû. M̄-koh Nâ-iâⁿ iû-goân siūⁿ-kóng ing-kai khó-liōng tséng-thé nn̄g hōaⁿ ê khì-hun, tsiah ē thê-tshut tsit- ê "tān-su" tsoh piáu-thài. Tsi-ná Kok-bîn-tóng-thoân su-kì-tiúⁿ Ông Hin-gî tsí-tshut, tóng-thoân tsi-tshî pó-liû "siâⁿ-tshī lūn-tôaⁿ" ū-soàn, m̄-koh Bîn-tsìn-tóng thê-tshut tsòe-kīn Tsi-ná kun-ki jiáu-loān Tâi-oân phò-hāi nn̄g hōaⁿ khì-hun, khak-si̍t hō͘ Tâi-oân jîn-bîn kuan-kám tsin bái, só͘-í tông-ì tsit- ê "tān-su". Bîn-tsìn-tóng kah Siā-bîn-tóng gī-oân kian-tshî, nā bô tī "tān-su" lāi-té tsù-bêng Tsi-ná kun-ki, kun-kàm, bô huat-tō͘ tsin-tsiàⁿ ta̍t-tio̍h bêng-khak piáu-thài ê ì-gī, tsòe-āu mā ū tit-tio̍h Tsi-ná Kok-bîn-tóng kah Sin-tóng ê tông-ì. Put-kò gī-hōe iû-goân tsi-tshî kí-pān, î-tshî siâⁿ-tshī kau-liû, kí-pān ê sî-ki kau hō͘ Tâi-pak-tshī-hú kuat-tēng, gī-hōe bô pit-iàu tùi tsit hāng pōe-su. Sin-tóng tiàu-tsi̍p-jîn Phuaⁿ Hoâi-tsong kóng, i kò-jîn tsú-tiuⁿ nā-sī kàu-sî nn̄g hōaⁿ khì-hun ū khah hó tio̍h kí-pān, nā bô-hó tio̍h ē-tàng tshú-siau.

It-hiòng tsú-tiuⁿ "nn̄g hōaⁿ tsi̍t-ke-tshin"ê Tâi-pak tshī-tiúⁿ Kua Bûn-tiat tio̍h ài khì siūⁿ pān-huat, khòaⁿ i sī m̄ sī ū huat-tō͘ khì kah Tsi-ná iú-kuan tan-ūi kóng-kóng leh, Tsi-ná kun-ki, kun-kàm hioh tsi̍t-tsām-á mài lâi loān, hō͘ i ū ū-soàn lâi pān "siang siâⁿ lūn-tôaⁿ". Tán góa pān liáu, lín beh án-tsóaⁿ jiáu-loān tio̍h kah góa Kua Bûn-tiat tshī-tiúⁿ bô kuan-hē. Tsi-ná nā tsin-tsiàⁿ ū hō͘ Kua tshī-tiúⁿ bīn-tsú, án-ne piáu-sī Kua tshī-tiúⁿ ū-kàu la̍t. Nā-sī Kua tshī-tiúⁿ liân tse to̍h kóng bē kiâⁿ, beh kah lâng kóng siáⁿ mi̍h "tsi̍t-ke-tshin" leh?

Só͘-í lán kóng, Tâi-pak tshī-gī-hōe tsit tiâu ū-soàn tòng liáu tsiâⁿ tsàn! 　　(220128)




台北市議會審議柯文哲市長任期最後一年ê年度總預算案，經過六工政黨協商了後，一月二四結束；其中siōng-kài有爭議ê「雙城論壇」預算，民進黨認為近來中國軍機、軍艦一直來擾亂台灣，所以提出「但書」，要求「雙城論壇」舉辦前，中國軍機、軍艦若繼續來擾亂台灣，tsit條預算tio̍h bē使動用，意見mā有得tio̍h中國國民黨、新黨黨團ê同意，達成決議。

　　根據國防部發布ê「即時軍事動態」資訊，一月二三，中國派出39隻次軍機進入咱國西南空域防空識別區，一月二四koh派出13隻次軍機來擾亂，兩工鬥起來，擾亂台灣ê中國軍機有52隻次。Khí有此理，真正lóng無伊法？

　　台北市政府今年度預算，歲出編列1,745.32億、歲入是1,719.97億，一月十七議會開始進入政黨協商；「城市論壇」相關費用約140萬，民進黨團kah社民黨議員苗博雅lóng主張全部刪除，中國國民黨kah新黨傾向保留，協商無結果、原本tio̍h beh進入表決，但是議長陳錦祥裁示「各退一步」繼續協商，一月二四才取得共識。

民進黨團總召梁文傑講，「雙城論壇」舉辦hiah tsē年，過去lóng m̄-bat刪除過一角銀ê預算，但是最近年外，中國軍機一直來擾亂台灣，所以民進黨團主張tsit條預算全部刪除，雙城免siáⁿ交流。但是藍營猶原認為應該考量整體兩岸ê氣氛，才ē提出tsit-ê「但書」作表態。中國國民黨團書記長王欣儀指出，黨團支持保留「城市論壇」預算，但是民進黨提出最近中國軍機擾亂台灣破壞兩岸氛圍，確實hō͘台灣民眾觀感真bái，所以同意tsit-ê「但書」。民進黨kah社民黨議員堅持，若無tī「但書」內底註明中國軍機、軍艦，無法度真正達到明確表態ê意義，最後mā有得tio̍h中國國民黨kah新黨ê同意。不過議會猶原支持舉辦、維持城市交流，舉辦時機交hō͘台北市府決定，議會無必要對tsit項背書。新黨召集人潘懷宗講，伊個人主張若是到時兩岸氛圍有khah好tio̍h舉辦，若無好tio̍hētàng取消。

一向主張「兩岸一家親」ê台北市長柯文哲tio̍h愛去想辦法，看伊是m̄是有法度去kah中國有關單位講講咧，中國軍機、軍艦歇一站á mài來亂，hō͘伊有預算來辦「雙城論壇」。等我辦了，恁beh按怎擾亂tio̍h kah我柯文哲市長無關係。中國若真正有hō͘柯市長面子，án-ne表示柯市長有夠力。若是柯市長連tse to̍h講bē行，beh kah人講siáⁿ物「一家親」咧？

所以咱講，台北市議會tsit條預算tòng了tsiâⁿ讚！　　(220128)