《綠色短評》

 | | | 轉寄

叛亂團體beh ná有啥物外交部發言人？

作者 李南衡, TsoânTâijī/全台字 by Tsng Hūiphêng 2022.02.20

Tsoânbîn Tâioânjī pán/全民台灣字版簡稱TsoânTâiJī
《 Le̍ksik toánphêng 》 Lí Lâmhêng
Poānloān thoânthé beh ná ū siáⁿmi̍h gōakaupō͘ huatgiânjîn?

　　 Itgue̍h jīpeh, hùtsóngthóng Lōa Tshingtik tshamka 宏都拉斯tsóngthóng tsiūtsit tiánlé ê sî, kah Bíkok hùtsóngthóng賀錦麗ū hō͘siong tshéngan kóng kúikùōe, āulâi 賀錦麗 tshiūⁿtâi tìsû ê sî, mā te̍kpia̍t hiòng Lōa Tshingtik tìì, jîtshiáⁿ tsí Lōa Tshingtik sī kah i "tùiténg" ê Tâioân kuaⁿoân, ìsù sī kóng kāngkhoán sī hùtsóngthóng.

　　 Itgue̍h jīkáu, Tiongkok gōakaupō͘ huatgiânjîn Tiō Li̍pkian mē kóng,"Tâioân tsíputkò sī Tiongkok ê tsi̍tê séng, beh ná ū siáⁿmi̍h ' hùtsóngthóng 』!" Koh kóng Tionghong itkoàn hoántùi BíTâi tsìnhêng jīmhô hêngsik ê kuaⁿhong ónglâi, Lōa Tshingtik kakī kóng sī būsi̍t ê Tâito̍k kangtsoktsiá, ū kúi piàn huatpiáu Tâito̍k giânlūn, Bíhong ingkai khaksiú tsi̍tê Tiongkok goântsik kah TiongBí saⁿê liânha̍p kongpò ê kuitēng, giâmsiok tùithāi Tionghong li̍ptiûⁿ kah kuaiⁿtshiat, bētàng hiòng Tâito̍k sèle̍k huattshut jīmhô tshògō͘ ê sìnhō.

　　 Itgue̍h saⁿtsa̍p àm, Lio̍kúihōe giâmtsiàⁿ singbêng, Lōa hùtsóngthóng tshōa thoân tshamka 宏都拉斯 tsóngthóng tsiūtsit tiánlé, tāipiáu lán tsènghú kah jînbîn tùi sin tsènghú kiantēng ê tsitshî, mā kah iúpang kah Bíkok téng iúhó kokka tsiàⁿ, hù goânsiú, te̍ksàithoân tāipiáu kauliû; Tionghôa Bînkok sī tsúkoân kokka, Tâioân tsūlâi m̄ sī Tionghôa Jînbîn Kiōnghôkok ê tsi̍tpō͘hūn, ná sī siáⁿmi̍h in ê tsi̍t séng?

　　 Itgue̍h saⁿtsa̍p àm, Tiongkok Kokbîntóng Bûnthôaⁿhōe tsúúi Lêng Tô thàukòe sinbûnkó piáusī, Tionghôa Bînkok sī tsi̍tê tsúkoân to̍kli̍p ê kokka, Tionghôa Bînkok tsū tshòngkiàn ílâi, tio̍h siat ū tsóngthóng tsitbū; ikū "Tionghôa Bînkok hiànhuat" soánkí sánsing ê tsóngthóng, hùtsóngthóng, koânuisèng kah ha̍phuatsèng bô iôngín Tāilio̍k tongkio̍k tshah tshùi.

　　Khah khósioh ê sī, bôkoán sī Lio̍kúihōe á·sī Tiongkok Kokbîntóng, lóng sī ēng sinsū ê khùikháu teh tùi thó͘húi kóngōe, nátshiūⁿ bángá tèng gûkak —bē tsiūⁿ mā bē thiàⁿ, si̍ttsāi sī bôtsháikang.

　　 Itgue̍h saⁿtsa̍p, tsèngtī phênglūnka 黃暐瀚tī bīntsheh kóng, i ētàng líkái, khiā tī Tiongkok ê li̍ptiûⁿ ūi siáⁿmi̍h m̄ sêngjīn Tâioân sī tsi̍tê kokka. Tānsī Tâioân ê tsèngtī jînbu̍t, nāsī bô tùi Tiō Li̍pkian ê huatgiân khònggī hoántùi, iáu koh beh tshamsoán Tionghôa Bînkok ê kongtsit tshòng siáⁿ? khólêng sī góa ba̍ktsiu tshùhtshuh, bô khòaⁿtio̍h Tiongkok Kokbîntóng ê tsèngtī jînbu̍t tùi Tiō Li̍pkian ê bújio̍k ū tsi̍ttiámá hoánèng. Tsêng tsi̍ttsāmá ta̍kê teh tâmlūn Tsiúⁿ Kingkok, siatsú tsitmá ê tsóngthóng sī Tsiúⁿ Kingkok, i ê hùtsóngthóng hông ánne bújio̍k, Tsiúⁿ Kingkok ē ántsóaⁿ kóng leh? Ē kìtit 2003 nî Tâioân beh tshamka WHA, ū kìtsiá mn̄g kóng "lín káⁿ bô thiaⁿtio̍h Tâioân 2,300 bān jînbîn ê suiàu?" Tiongkok tōakuaⁿ 沙祖康kóng,"誰理你們", tsū ánne liáuāu Tiongkok tōakuaⁿ bôlūn kóng siáⁿmi̍h ōe, Tâioânlâng tsá tio̍h si̍pkoàn bē siūkhì ah.

　　 黃暐瀚kóng, nā kóng Lōa Tshingtik m̄ sī hùtsóngthóng. Ánne Gô͘ Tungī mā m̄sī, Siau Bāntiông, Lī Siùliân, Liân Tsiàn, Lí Goântshok, Lí Tinghui lóngtsóng m̄sī. Siatsú nn̄g hōaⁿ iûgoân beh ánne hō͘siong diss ( ìsù sī "bô tsuntiōng"), lán tsit pêng sī m̄sī mā ingkai hôe in tsi̍t kù, "Tāilio̍k tsíputkò sī tsi̍tê poānloān thoânthé, beh ná ū siáⁿmi̍h gōakaupō͘ huatgiânjîn leh?"

Tsitkù ōe khaksi̍t mn̄g liáu sông koh ū la̍t. Tsiâⁿ tsàn! 　　(220204)
Tsù,宏都拉斯　賀錦麗　黃暐瀚 沙祖康 "誰理你們" tshiáⁿ ēng Hôagí liām

Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng
Poān-loān thoân-thé beh ná ū siáⁿ-mi̍h gōa-kau-pō͘ huat-giân-jîn?

　　 It-gue̍h jī-peh, hù-tsóng-thóng Lōa Tshing-tik tsham-ka 宏都拉斯tsóng-thóng tsiū-tsit tián-lé ê sî, kah Bí-kok hù-tsóng-thóng賀錦麗ū hō͘-siong tshéng-an kóng kúi-kù-ōe, āu-lâi 賀錦麗 tshiūⁿ-tâi tì-sû ê sî, mā te̍k-pia̍t hiòng Lōa Tshing-tik tì-ì, jî-tshiáⁿ tsí Lōa Tshing-tik sī kah i "tùi-téng" ê Tâi-oân kuaⁿ-oân, ì-sù sī kóng kāng-khoán sī hù-tsóng-thóng.

　　 It-gue̍h jī-káu, Tiong-kok gōa-kau-pō͘ huat-giân-jîn Tiō Li̍p-kian mē kóng,"Tâi-oân tsí-put-kò sī Tiong-kok ê tsi̍t-ê séng, beh ná ū siáⁿ-mi̍h ' hù-tsóng-thóng 』!" Koh kóng Tiong-hong it-koàn hoán-tùi Bí-Tâi tsìn-hêng jīm-hô hêng-sik ê kuaⁿ-hong óng-lâi, Lōa Tshing-tik ka-kī kóng sī bū-si̍t ê Tâi-to̍k kang-tsok-tsiá, ū kúi piàn huat-piáu Tâi-to̍k giân-lūn, Bí-hong ing-kai khak-siú tsi̍t-ê Tiong-kok goân-tsik kah Tiong-Bí saⁿ-ê liân-ha̍p kong-pò ê kui-tēng, giâm-siok tùi-thāi Tiong-hong li̍p-tiûⁿ kah kuaiⁿ-tshiat, bē-tàng hiòng Tâi-to̍k sè-le̍k huat-tshut jīm-hô tshò-gō͘ ê sìn-hō.

　　 It-gue̍h saⁿ-tsa̍p àm, Lio̍k-úi-hōe giâm-tsiàⁿ sing-bêng, Lōa hù-tsóng-thóng tshōa thoân tsham-ka 宏都拉斯 tsóng-thóng tsiū-tsit tián-lé, tāi-piáu lán tsèng-hú kah jîn-bîn tùi sin tsèng-hú kian-tēng ê tsi-tshî, mā kah iú-pang kah Bí-kok téng iú-hó kok-ka tsiàⁿ, hù goân-siú, te̍k-sài-thoân tāi-piáu kau-liû; Tiong-hôa Bîn-kok sī tsú-koân kok-ka, Tâi-oân tsū-lâi m̄ sī Tiong-hôa Jîn-bîn Kiōng-hô-kok ê tsi̍t-pō͘-hūn, ná sī siáⁿ-mi̍h in ê tsi̍t séng?

　　 It-gue̍h saⁿ-tsa̍p àm, Tiong-kok Kok-bîn-tóng Bûn-thôaⁿ-hōe tsú-úi Lêng Tô thàu-kòe sin-bûn-kó piáu-sī, Tiong-hôa Bîn-kok sī tsi̍t-ê tsú-koân to̍k-li̍p ê kok-ka, Tiong-hôa Bîn-kok tsū tshòng-kiàn í-lâi, tio̍h siat ū tsóng-thóng tsit-bū; i-kū "Tiong-hôa Bîn-kok hiàn-huat" soán-kí sán-sing ê tsóng-thóng, hù-tsóng-thóng, koân-ui-sèng kah ha̍p-huat-sèng bô iông-ín Tāi-lio̍k tong-kio̍k tshah- tshùi.

　　Khah khó-sioh ê sī, bô-koán sī Lio̍k-úi-hōe á-·sī Tiong-kok Kok-bîn-tóng, lóng sī ēng sin-sū ê khùi-kháu teh tùi thó͘-húi kóng-ōe, ná-tshiūⁿ báng-á tèng gû-kak —bē tsiūⁿ mā bē thiàⁿ, si̍t-tsāi sī bô-tshái-kang.

　　 It-gue̍h saⁿ-tsa̍p, tsèng-tī phêng-lūn-ka 黃暐瀚tī bīn-tsheh kóng, i ē-tàng lí-kái, khiā tī Tiong-kok ê li̍p-tiûⁿ ūi siáⁿ-mi̍h m̄ sêng-jīn Tâi-oân sī tsi̍t-ê kok-ka. Tān-sī Tâi-oân ê tsèng-tī jîn-bu̍t, nā-sī bô tùi Tiō Li̍p-kian ê huat-giân khòng-gī hoán-tùi, iáu koh beh tsham-soán Tiong-hôa Bîn-kok ê kong-tsit tshòng siáⁿ? khó-lêng sī góa ba̍k-tsiu tshùh-tshuh, bô khòaⁿ-tio̍h Tiong-kok Kok-bîn-tóng ê tsèng-tī jîn-bu̍t tùi Tiō Li̍p-kian ê bú-jio̍k ū tsi̍t-tiám-á hoán-èng. Tsêng tsi̍t-tsām-á ta̍k-ê teh tâm-lūn Tsiúⁿ King-kok, siat-sú tsit-má ê tsóng-thóng sī Tsiúⁿ King-kok, i ê hù-tsóng-thóng hông án-ne bú-jio̍k, Tsiúⁿ King-kok ē án-tsóaⁿ kóng leh? Ē kì-tit 2003 nî Tâi-oân beh tsham-ka WHA, ū kì-tsiá mn̄g kóng "lín káⁿ bô thiaⁿ-tio̍h Tâi-oân 2,300 bān jîn-bîn ê su-iàu?" Tiong-kok tōa-kuaⁿ 沙祖康kóng,"誰理你們", tsū án-ne liáu-āu Tiong-kok tōa-kuaⁿ bô-lūn kóng siáⁿ-mi̍h ōe, Tâi-oân-lâng tsá tio̍h si̍p-koàn bē siū-khì ah.

　　 黃暐瀚kóng, nā kóng Lōa Tshing-tik m̄ sī hù-tsóng-thóng. Án-ne Gô͘ Tun-gī mā m̄-sī, Siau Bān-tiông, Lī Siù-liân, Liân Tsiàn, Lí Goân-tshok, Lí Ting-hui lóng-tsóng m̄-sī. Siat-sú nn̄g hōaⁿ iû-goân beh án-ne hō͘-siong diss ( ì-sù sī "bô tsun-tiōng"), lán tsit pêng sī m̄-sī mā ing-kai hôe in tsi̍t kù, "Tāi-lio̍k tsí-put-kò sī tsi̍t-ê poān-loān thoân-thé, beh ná ū siáⁿ-mi̍h gōa-kau-pō͘ huat-giân-jîn leh?"

Tsit-kù ōe khak-si̍t mn̄g liáu sông koh ū la̍t. Tsiâⁿ tsàn! 　　(220204)
Tsù,宏都拉斯　賀錦麗　黃暐瀚 沙祖康 "誰理你們" tshiáⁿ ēng Hôa-gí liām


　　一月二八，副總統賴清德參加宏都拉斯總統就職典禮ê時，kah美國副總統賀錦麗有互相請安講幾句話，後來賀錦麗上台致詞ê時，mā特別向賴清德致意，而且指賴清德是kah伊「對等」ê台灣官員，意思是講仝款是副總統。

　　一月二九，中國外交部發言人趙立堅罵講：「台灣只不過是中國ê一个省，beh那有啥物『副總統』！」Koh講中方一貫反對美台進行任何形式ê官方往來，賴清德家己講是務實ê台獨工作者，有幾遍發表台獨言論，美方應該khak守一个中國原則kah中美三个聯合公報ê規定，嚴肅對待中方立場kah關切，bē-tàng向台獨勢力發出任何錯誤ê信號。

　　一月三十暗，陸委會嚴正聲明，賴副總統tshōa團參加宏都拉斯總統就職典禮，代表咱政府kah人民對新政府堅定ê支持，mā kah友邦kah美國等友好國家正、副元首、特使團代表交流；中華民國是主權國家，台灣自來m̄是中華人民共和國ê一部分、那是啥物inê一省？

　　一月三十暗，中國國民黨文傳會主委凌濤透過新聞稿表示，中華民國是一个主權獨立ê國家，中華民國自創建以來，tio̍h 設有總統職務；依據「中華民國憲法」選舉產生ê總統、副總統，權威性kah合法性無容允大陸當局插嘴。

　　Khah可惜ê是，無管是陸委會á是中國國民黨，lóng是用紳士ê氣口teh對土匪講話，ná像蠓á叮牛角—bē tsiūⁿ mā bē疼，實在是無彩工。

　　一月三十，政治評論家黃暐瀚tī面冊講：伊ētàng理解，khiā tī中國ê立場為啥物m̄承認台灣是一个國家。但是台灣ê政治人物，若是無對趙立堅ê發言抗議反對，猶koh beh參選中華民國ê公職創啥？可能是我目睭tshùh-tshuh，無看tio̍h中國國民黨ê政治人物對趙立堅ê侮辱有一點á反應。前一站á ta̍k个teh談論蔣經國，設使tsit-máê總統是蔣經國，伊ê副總統hôngán-ne侮辱，蔣經國ē按怎講咧？Ē記得2003年台灣beh參加WHA，有記者問講「恁敢無聽tio̍h台灣2,300萬人民ê需要？」中國大官沙祖康講：「誰理你們」，自án-ne了後中國大官無論講啥物話，台灣人早tio̍h習慣bē受氣ah。

　　黃暐瀚講，若講賴清德m̄是副總統。Án-ne吳敦義mā m̄是，蕭萬長、呂秀蓮、連戰、李元簇、李登輝lóng總m̄是。設使兩岸猶原beh án-ne互相diss（意思是「無尊重」），咱tsit旁是m̄是mā應該回in一句：「大陸只不過是一个叛亂團體，beh ná有啥物外交部發言人咧？」

Tsit句話確實問了sông koh有力。誠讚！　　(220204)
註：宏都拉斯　賀錦麗　黃暐瀚　沙祖康講：「誰理你們」　　請用華語唸