《綠色短評》

 | | | 轉寄

聽孝呆講tsit款戇話！

作者 李南衡, TsoânTâijī/全台字 by Tsng Hūiphêng 2022.02.27

Tsoânbîn Tâioânjī pán/全民台灣字版簡稱TsoânTâiJī
《 Le̍ksik toánphêng 》 Lí Lâmhêng
Thiaⁿ hàutai kóng tsit khoán gōng ōe!

　　 Itgue̍h tsa̍pkáu, Tâipaktshī tsêng tshītiúⁿ, Tiongkok Kokbîntóng tsêng hùtsúse̍k 郝龍斌 tsiapsiū tiāntâi hóngbūn ê sî, tâmkhí 2022 nî Tâipak tshītiúⁿ soánkí, 郝龍斌 tsútiuⁿ Tiongkok Kokbîntóng ingkai "nâ pe̍h ha̍p", kah Tâioân Bîntsiòngtóng tī āu kài Tâipak tshītiúⁿ soán tsiàn tiong ha̍ptsok, nāsī bô, tsāṳátóng ū khólêng nn̄g tóng lóng tio̍hsiong koh lóng su, 2022 nî Tâipak tshītiúⁿ kantāⁿ "nâ pe̍h ha̍p" tsiah ū kihōe soán iâⁿ. Tāipak lâng tshiò kóng 郝龍斌 sī "hàutai " ūiáⁿ sī tsin ê m̄ sī ké ê. Tēit, ta̍kê lóng tsai, hiāntshúsî Tâipak tshītiúⁿ Kua Bûntiat sī Bîntsiòngtóng tsúse̍k, Bîntsiòngtóng tongjiân sī tongkim Tâipaktshī ê tsiptsèngtóng, siáⁿ lâng teh kah lí Tiongkok Kokbîntóng tsāṳátóng leh! tējī, i kóng"nâ pe̍h ha̍p "tsiah ū kihōe soán iâⁿ, tàuté i sī kóng siáⁿ lâng soán iâⁿ ? Nāsī kóng Tiongkok Kokbîntóng soán iâⁿ, lí kā Tâioân Bîntsiòngtóng kah ū khólêng tāipiáu Tâioân Bîntsiòngtóng tshutlâi kēng soán Tâipak tshītiúⁿ ê hiānjīm hùtshītiúⁿ N̂g Suansuan khǹg tī tóūi ? Nāsī kóng beh hō͘ Tâioân Bîntsiòngtóng soán iâⁿ, Tiongkok Kokbîntóng kah lâng "nâ pe̍h ha̍p" beh tshòngsiáⁿ ?

　　 Kìtsiá mn̄g Tâipak Tshītiúⁿ , Bîntsiòngtóng tsúse̍k Kua Bûntiat, tùi 郝龍斌ê kóngōe ū siáⁿ khòaⁿhuat ? Kua tsúse̍k sûisî kā khau siah kóng, góa khòaⁿ " nâ le̍k ha̍p" khah ha̍h. Kìtsiá mn̄g N̂g Suansuan tùi 郝龍斌 thêtshut "nâ pe̍h ha̍p" ê khòaⁿhuat, N̂g Suansuan bīnsik bô sóng tùi tsi̍t tōatui kìtsiá kóng,"kokūi tsò tāitsì hó boh, mài ta̍k kang tī hia kóng sóng ê."

　　 Tiongkok Kokbîntóng tsêng hùtsúse̍k 郝龍斌 huah kóng "nâ pe̍h ha̍p" Tiongkok Kokbîntóng kah Bîntsiòngtóng ha̍ptsok tsiah ē iâⁿ. Tùi tsittiám, tsutshim mûithé lâng Tshòa Si’phêng phênglūn kóng, ōaⁿ tsi̍tê hongsik lâi mn̄g, TsiúⁿBānan bô tútú pí hiānjīm hùtshītiúⁿ N̂g Suansuan khah iusè. Hō͘ lâng kámkak 郝龍斌 si̍ttsāi sī "thài láusi̍t, thài tansûn." Tshòa Si’phêng sī tsi̍t ūi tsiok ū siu’ióng ê Tâioânlâng, ē kóng lâng sī thài kó͘ì, tsin láusi̍t, thài tansûn, tsin tiâuti̍t. Bē tshintshiūⁿ góa tsit khoán lâng ē ti̍ttsiap mē lâng "hàutai","gûgōng".

　　 Tsi̍tê lâng nā lóng mài khuitshùi, bô lâng tsaiiáⁿ i jōa gōng. Tsintsiàⁿ ê hàutai kiaⁿlâng m̄tsaiiáⁿ i gōng, kāngkhoán ê gōng ōe ē kóng liáu kohtsài kóng.

　　 Jīgue̍h tshetsa̍p, Tiongkok Kokbîntóng tsêng hùtsúse̍k 郝龍斌tī tiāntâi kóngpò͘ tiong, phuephêng Tâioân Bîntsiòngtóng bo̍ktsêng ê si̍tle̍k sī "tsiâⁿ sū puttsiok pāi sū ūî ", jîāu khì Li̍phuatīⁿ tshamka Tiongkok Kokbîntóng thoân ê kongthiaⁿhōe sî, tsìn tsi̍tpō͘ piáusī, bîntiāu tsin tshingtshó hiánsī, Tsiúⁿ Bānan sī Tiongkok Kokbîntóng kah Tâioân Bîntsiòngtóng siōngkài kiông ê jînsoán. N̂g Suansuan hêngtsèng le̍kliān honghù, mā tsòkòe kúi jīm tshīgīoân, sī tsin kiông ê jînsoán, tānsī nā tsiàu hiāntsāi ê soánkí thàisè lâi khòaⁿ, N̂g Suansuan kah Tsiúⁿ Bānan iáu tsha tsi̍t tōa tshat.

　　郝龍斌ê ìsù sī ài "nâ pe̍h ha̍p", kìjiân beh ài lâng kah in ha̍p, ingkai kikiám kóng kúikùá hóthiaⁿ ōe m̄ tsiah tio̍h, ná ū tsitê sîtsūn kóng lâng Tâioân Bîntsiòngtóng ê si̍tla̍t sī "tsiâⁿ sū puttsiok pāi sū iúî", ūiáⁿ tsin pe̍hba̍k. Kóng "hàutai", lí khólêng thiaⁿ khah ū.

　　 Thiaⁿ hàutai kóng tsit khoán gōng ōe, thiaⁿ tsē lâng ē tònggōng khì! (220211)
Tsù, 郝龍斌　ēng Hôagí liām

Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng
Thiaⁿ hàu-tai kóng tsit khoán gōng ōe!

　　 It-gue̍h tsa̍p-káu, Tâi-pak-tshī tsêng tshī-tiúⁿ, Tiong-kok Kok-bîn-tóng tsêng hù-tsú-se̍k 郝龍斌 tsiap-siū tiān-tâi hóng-būn ê sî, tâm-khí 2022 nî Tâi-pak tshī-tiúⁿ soán-kí, 郝龍斌 tsú-tiuⁿ Tiong-kok Kok-bîn-tóng ing-kai "nâ pe̍h ha̍p", kah Tâi-oân Bîn-tsiòng-tóng tī āu kài Tâi-pak tshī-tiúⁿ soán tsiàn tiong ha̍p-tsok, nā-sī bô, tsāi-iá-tóng ū khó-lêng nn̄g tóng lóng tio̍h-siong koh lóng su, 2022 nî Tâi-pak tshī-tiúⁿ kan-tāⁿ "nâ pe̍h ha̍p" tsiah ū ki-hōe soán iâⁿ. Tāi-pak lâng tshiò kóng 郝龍斌 sī "hàu-tai " ū-iáⁿ sī tsin ê m̄ sī ké ê. Tē-it, ta̍k-ê lóng tsai, hiān-tshú-sî Tâi-pak tshī-tiúⁿ Kua Bûn-tiat sī Bîn-tsiòng-tóng tsú-se̍k, Bîn-tsiòng-tóng tong-jiân sī tong-kim Tâi-pak-tshī ê tsip-tsèng-tóng, siáⁿ lâng teh kah lí Tiong-kok Kok-bîn-tóng tsāi-iá-tóng leh! tē-jī, i kóng"nâ pe̍h ha̍p "tsiah ū ki-hōe soán iâⁿ, tàu-té i sī kóng siáⁿ lâng soán iâⁿ ? Nā-sī kóng Tiong-kok Kok-bîn-tóng soán iâⁿ, lí kā Tâi-oân Bîn-tsiòng-tóng kah ū khó-lêng tāi-piáu Tâi-oân Bîn-tsiòng-tóng tshut-lâi kēng- soán Tâi-pak tshī-tiúⁿ ê hiān-jīm hù-tshī-tiúⁿ N̂g Suan-suan khǹg tī tó-ūi ? Nā-sī kóng beh hō͘ Tâi-oân Bîn-tsiòng-tóng soán iâⁿ, Tiong-kok Kok-bîn-tóng kah lâng "nâ pe̍h ha̍p" beh tshòng-siáⁿ ?

　　 Kì-tsiá mn̄g Tâi-pak Tshī-tiúⁿ , Bîn-tsiòng-tóng tsú-se̍k Kua Bûn-tiat, tùi 郝龍斌ê kóng-ōe ū siáⁿ khòaⁿ-huat ? Kua tsú-se̍k sûi-sî kā khau siah kóng, góa khòaⁿ " nâ le̍k ha̍p" khah ha̍h. Kì-tsiá mn̄g N̂g Suan-suan tùi 郝龍斌 thê-tshut "nâ pe̍h ha̍p" ê khòaⁿ-huat, N̂g Suan-suan bīn-sik bô sóng tùi tsi̍t tōa-tui kì-tsiá kóng,"kok-ūi tsò tāi-tsì hó boh, mài ta̍k kang tī hia kóng sóng ê."

　　 Tiong-kok Kok-bîn-tóng tsêng hù-tsú-se̍k 郝龍斌 huah kóng "nâ pe̍h ha̍p" Tiong-kok Kok-bîn-tóng kah Bîn-tsiòng-tóng ha̍p-tsok tsiah ē iâⁿ. Tùi tsit-tiám, tsu-tshim mûi-thé lâng Tshòa Si-phêng phêng-lūn kóng, ōaⁿ tsi̍t-ê hong-sik lâi mn̄g, TsiúⁿBān-an bô tú-tú pí hiān-jīm hù-tshī-tiúⁿ N̂g Suan-suan khah iu-sè. Hō͘ lâng kám-kak 郝龍斌 si̍t-tsāi sī "thài láu-si̍t, thài tan-sûn." Tshòa Si-phêng sī tsi̍t ūi tsiok ū siu-ióng ê Tâi-oân-lâng, ē kóng lâng sī thài kó͘-ì, tsin láu-si̍t, thài tan-sûn, tsin tiâu-ti̍t. Bē tshin-tshiūⁿ góa tsit khoán lâng ē ti̍t-tsiap mē lâng "hàu-tai","gû-gōng".

　　 Tsi̍t-ê lâng nā lóng mài khui-tshùi, bô lâng tsai-iáⁿ i jōa gōng. Tsin-tsiàⁿ ê hàu-tai kiaⁿ-lâng m̄-tsai-iáⁿ i gōng, kāng-khoán ê gōng ōe ē kóng liáu koh-tsài kóng.

　　 Jī-gue̍h tshe-tsa̍p, Tiong-kok Kok-bîn-tóng tsêng hù-tsú-se̍k 郝龍斌tī tiān-tâi kóng-pò͘ tiong, phue-phêng Tâi-oân Bîn-tsiòng-tóng bo̍k-tsêng ê si̍t-le̍k sī "tsiâⁿ sū put-tsiok pāi sū ū-î ", jî-āu khì Li̍p-huat-īⁿ tsham-ka Tiong-kok Kok-bîn-tóng thoân ê kong-thiaⁿ-hōe sî, tsìn tsi̍t-pō͘ piáu-sī, bîn-tiāu tsin tshing-tshó hián-sī, Tsiúⁿ Bān-an sī Tiong-kok Kok-bîn-tóng kah Tâi-oân Bîn-tsiòng-tóng siōng-kài kiông ê jîn-soán. N̂g Suan-suan hêng-tsèng le̍k-liān hong-hù, mā tsò-kòe kúi jīm tshī-gī-oân, sī tsin kiông ê jîn-soán, tān-sī nā tsiàu hiān-tsāi ê soán-kí thài-sè lâi khòaⁿ, N̂g Suan-suan kah Tsiúⁿ Bān-an iáu tsha tsi̍t tōa tshat.

　　郝龍斌ê ì-sù sī ài "nâ pe̍h ha̍p", kì-jiân beh ài lâng kah in ha̍p, ing-kai ke-kiám kóng kúi-kù-á hó-thiaⁿ ōe m̄ tsiah tio̍h, ná ū tsit-ê sî-tsūn kóng lâng Tâi-oân Bîn-tsiòng-tóng ê si̍t-la̍t sī "tsiâⁿ sū put-tsiok pāi sū iú-î", ū-iáⁿ tsin pe̍h-ba̍k. Kóng "hàu-tai", lí khó-lêng thiaⁿ khah ū.

　　 Thiaⁿ hàu-tai kóng tsit khoán gōng ōe, thiaⁿ tsē lâng ē tòng-gōng khì! (220211)
Tsù, 郝龍斌　ēng Hôa-gí liām



　　一月十九，台北市前市長、中國國民黨前副主席郝龍斌接受電台訪問ê時，談起2022年台北市長選舉，郝龍斌主張中國國民黨應該「藍白合」，kah台灣民眾黨tī後屆台北市長選戰中合作，若是無，在野黨有可能兩黨lóngtio̍h傷kohlóng輸，2022年台北市長干單「藍白合（ha̍p）」才有機會選嬴。台北人笑講郝龍斌是「孝呆」有影是真ê m̄是假ê。第一，ta̍k个lóng知，現此時台北市長柯文哲是民眾黨主席，民眾黨當然是當今台北市ê執政黨，啥人teh kah你中國國民黨在野黨咧！第二，伊講「藍白合」才有機會選嬴，到底伊是講啥人選嬴？若是講中國國民黨選嬴，你kā台灣民眾黨kah有可能代表台灣民眾黨出來競選台北市長ê現任副市長黃珊珊囥tītó位？若是講beh hō͘台灣民眾黨選嬴，中國國民黨kah人「藍白合」beh創啥？

　　記者問台北市長、民眾黨主席柯文哲，對郝龍斌ê講話有啥看法？柯主席隨時kā刨（khau）削講：我看「藍綠合（ha̍p）」khah合（ha̍h）。記者問黃珊珊對郝龍斌提出「藍白合」ê看法，黃珊珊面色無爽對一大堆記者講：「各位做代誌好boh、màita̍k工tīhia講爽ê。」

　　中國國民黨前副主席郝龍斌喝講tio̍h「藍白合」中國國民黨kah民眾黨合作才會贏。對tsit點，資深媒體人蔡詩萍評論講，換一个方式來問，蔣萬安無tú-tú比現任副市長黃珊珊khah優勢。Hō͘人感覺郝龍斌實在是「太老實、太單純。」蔡詩萍是一位足有修養ê台灣人，會講人是太古意、真老實、太單純、真條直。Bē親像我tsit款人會直接罵人「孝呆」、「愚戇」。

　　一个人若lóng mài開嘴，無人知影伊jōa戇。真正ê孝呆驚人m̄知影伊戇，仝款ê戇話會講了koh再講。

　　二月初十，中國國民黨前副主席郝龍斌tī電台廣播中，批評台灣民眾黨目前ê實力是「成事不足敗事有餘」，而後去立法院參加中國國民黨團ê公聽會時，進一步表示：民調真清楚顯示，蔣萬安是中國國民黨kah台灣民眾黨上蓋強ê人選。黃珊珊行政歷練豐富，mā做過幾任市議員，是真強ê人選，但是若照現在ê選舉態勢來看，黃珊珊kah蔣萬安猶差一大節。

　　郝龍斌ê意思是愛「藍白合」，既然beh愛人kah in合，應該加減講幾句á好聽話m̄才tio̍h，那有tsit-ê時陣講人台灣民眾黨ê實力是「成事不足敗事有餘」，有影真白目。講「孝呆」，你可能聽khah有。

　　聽孝呆講tsit款戇話，聽tsē人會tòng戇去！ (220211)
註：郝龍斌　　用華語唸