《綠色短評》

 | | | 轉寄

涉嫌詐領助理費，真正有志一同？

作者 李南衡, TsoânTâijī/全台字 by Tsng Hūiphêng 2021.03.07

Tsoânbîn Tâioânjī pán/全民台灣字版簡稱TsoânTâiJī

　　　 Sia̍phiâm tsàniá tsō͘lí hùi, tsintsiàⁿ iútsì ittông?

　　 Sintóng Tâipaktshī gīoân Phuaⁿ Hoâitsong kah i ê pānkongsik Tân tsújīm, sia̍phiâm tsàniá tsō͘lí hùi, kingkòe tn̂gkî tsingpān, kiⁿî itgue̍h jīla̍k iû Tsújīm kiámtshatkuaⁿ Tân Bênghong, kiámtshatkuaⁿ Lîm Sūsûn tsíhui Tâipaktshī Tiâutsatshù téng, tsiphêng tshiautshōe la̍kê só͘tsāi jîtshiáⁿ khàuah siongkuan tsèngkì, huathiān Phuaⁿ, Tân nn̄g lâng līiōng lângthâu tsàniá tsō͘lí hùi lâu tsò suēng, tsho͘pō͘ kó͘sǹg tsàniá kimgia̍h sintâipè 300 bān, sìn āu jīnûi nn̄g lâng ū ianbia̍t tsèngkì kah kautshoàn ê khólêng, nn̄g lâng siaⁿah kìm kìⁿ. Sūlîm Tēkiámsú tsítshut, Phuaⁿ Tân nn̄g lâng ùi 2008 nî kàu 2020 nî, tsêngāu ēng lângthâu tsàniá pó͘tsō͘ hùi. Tānsī tējī kang tshâitēng Phuaⁿ Hoâitsong 200 bān kaupó, Tân tsújīm 150 bān kaupó, nn̄g lâng hāntsè kutsū, tshutkéng tshut hái.

Siōng hótshiò ê sī pêⁿpêⁿ Sintóng ê tshīgīoân Lí Khènggoân, i jīnûi Phuaⁿ Hoâitsong tsò tāitsì únkiān pósiú, mā m̄sī thamtsâi ê lâng, jîtshiáⁿ i ū tsin tsē hùgia̍p siuji̍p, tsiàu siônglí lâi khòaⁿ i bē ūitio̍h tsi̍t kò gue̍h nn̄gbān gōa kho͘ khì hoānhuat, siôngtsêng ingkai ū suiàu koh lîtshing.

Lán ná ē kóng Lí Khènggoân tshīgīoân hótshiò, i káⁿ tsintsiàⁿ m̄tsaiiáⁿ "tsiàu siônglí lâi khòaⁿ", ài tsîⁿ ê lâng bô hun hógia̍h, sàntshiah. Siáng kóng hógia̍h lâng tio̍h bē tham sètiâu tsîⁿ, sàntshiah lâng khòaⁿtio̍h tsîⁿ tshiú ittēng tio̍h ē ngiau? Khah tshùbī ê sī, thamtsâi ê lâng tóngphài bô hun nâ le̍k o͘pe̍h, tētiám bô hun tang, sai, lâm, pak, kimgia̍h bô hun tōatiâu sètiâu. Lán kanta khòaⁿ tsòikīn tsin tsē sia̍phiâm tsàniá tsō͘lí hùi tsit hāng tio̍h tsiok tshingtshó.

　　 Kiⁿî it·gue̍h, Tiongkok Kokbîntóng Sinpaktshī gīoân Tsan Hoànka, hông khòngkò ùi 2016 nî khí tsàniá tsō͘lí hùi nn̄gpah gōa bān, Sinpak Tēhng Huatīⁿ huatkuaⁿ jīnûi Tsan Hoànka sia̍phoān Thamu tītsōe tiâulē kah hênghuat hō͘ kongbūoân tingtsài putsi̍t tsōehiâm, hoān tāngtsōe koh ū tshoàntsèng ê khólêng, tshâitēng kiah kìm kìⁿ. Phêⁿô͘ koān tsêng bîntsèngtshù tiúⁿ bôtóngtsik Tsiâⁿ Bānkǹg, hông khòngkò tamjīm nn̄g kài koāngīoân kîkan, sia̍phiâm ēng lângthâu pò tsō͘lí hùi kiōng 829 bān kho͘, hō͘ Phêⁿô͘ Tēīⁿ í Thamu tītsōe tiâulē phòaⁿ tshú tô͘hêng tsa̍pjī nî, Kohiông koân punīⁿ kiah móa saⁿ kògue̍h liáuāu, tshâitēng kohtsài iânah nn̄g kò gue̍h, i tio̍h tī lôngáking kòenî. Tiongkok Kokbîntóng Sintik koāngīoân Tân Phikûi hông khòngkò ùi 2012 nî kàu 2017 nî tsàniá tsō͘lí hùi 191 bān gōa, tāng phòaⁿ saⁿ nî la̍k kògue̍h. Bîntsìntóng Sinpaktshī la̍k liânpà gīoân Ko Bínhūi sia̍phiâm tsàniá tsō͘lí hùi hông khísò͘, Sinpak tēīⁿ ha̍pgītêng í 600 bān kho͘ kaupó, hāntsè tsūku, tshutkéng tshuthái. Tiongkok Kokbîntóng Tâilâm tshīgīoân Lí Tionggîm sia̍phiâm tsàniá tsō͘lí hùi hō͘ kiámhong tī 2020 nî tsa̍pjīgue̍h tshe tsingpān kaupó, tsa̍pjīgue̍h tiong, Tâilâm tshīgīhōe koh ū tsi̍t miâ Tiongkok Kokbîntóng gīoân Tshòa Io̍khui mā sia̍phiâm tsàniá tsō͘lí hùi í peh bān kho͘ kaupó. Tàutàu tsi̍tē 2020 nî Tâilâm tshīgīhōe íking ū gō͘ miâ hiānjīm gīoân kah tsi̍t miâ siàjīm gīoân, lóng tsóng la̍kê lâng inūi sia̍phiâm tsàniá tsō͘lí hùi hō͘ kiámtiàu tanūi tsingpān. Tiongkok Kokbîntóng Tâitang koān gīoân Lîm Uitsì sia̍phiâm tsàniá tsō͘lí hùi 56 bān kho͘, Tâitang tēkiámsú tsa̍pjīgue̍h té tsingkiat khísò͘, kā tsāiah ê Lîm Uitsì îsàng Tâitang tēhng huatīⁿ, huatkuaⁿ têngsím āu, tshâitēng í 80 bān kaupó, pēng hāntsè tsūku kah tēngkî hiòng phàitshutsó͘ pòtò.

Tâioân kok tsèngtóng tsin tsē ìkiàn bē ha̍p. Kîkoài, kanta tsàniá tsō͘lí hùi tsit hāng, iútsì ittông! (210226)


Pe̍h-ōe-jī-pán/白話字版


　　　Sia̍p-hiâm tsà-niá tsō͘-lí hùi, tsin-tsiàⁿ iú-tsì it-tông?

　　 Sin-tóng Tâi-pak-tshī gī-oân Phuaⁿ Hoâi-tsong kah i ê pān-kong-sik Tân tsú-jīm, sia̍p-hiâm tsà-niá tsō͘-lí hùi, king-kòe tn̂g-kî tsing-pān, kin-nî it-gue̍h jī-la̍k iû Tsú-jīm kiám-tshat-kuaⁿ Tân Bêng-hong, kiám-tshat-kuaⁿ Lîm Sū-sûn tsí-hui Tâi-pak-tshī Tiâu-tsa-tshù téng, tsip-hêng tshiau-tshōe la̍k-ê só͘-tsāi jî-tshiáⁿ khàu-ah siong-kuan tsèng-kì, huat-hiān Phuaⁿ, Tân nn̄g lâng lī-iōng lâng-thâu tsà-niá tsō͘-lí hùi lâu tsò su-ēng, tsho͘-pō͘ kó͘-sǹg tsà-niá kim-gia̍h sin-tâi-pè 300 bān, sìn āu jīn-ûi nn̄g lâng ū ian-bia̍t tsèng-kì kah kau-tshoàn ê khó-lêng, nn̄g lâng siaⁿ-ah kìm kìⁿ. Sū-lîm Tē-kiám-sú tsí-tshut, Phuaⁿ Tân nn̄g lâng ùi 2008 nî kàu 2020 nî, tsêng-āu ēng lâng-thâu tsà-niá pó͘-tsō͘ hùi. Tān-sī tē-jī kang tshâi-tēng Phuaⁿ Hoâi-tsong 200 bān kau-pó, Tân tsú-jīm 150 bān kau-pó, nn̄g lâng hān-tsè ku-tsū, tshut-kéng tshut hái.

Siōng hó-tshiò ê sī pêⁿ-pêⁿ Sin-tóng ê tshī-gī-oân Lí Khèng-goân, i jīn-ûi Phuaⁿ Hoâi-tsong tsò tāi-tsì ún-kiān pó-siú, mā m̄-sī tham-tsâi ê lâng, jî-tshiáⁿ i ū tsin tsē hù-gia̍p siu-ji̍p, tsiàu siông-lí lâi khòaⁿ i bē ūi-tio̍h tsi̍t kò gue̍h nn̄g-bān gōa kho͘ khì hoān-huat, siông-tsêng ing-kai ū su-iàu koh lî-tshing.

Lán ná ē kóng Lí Khèng-goân tshī-gī-oân hó-tshiò, i káⁿ tsin-tsiàⁿ m̄-tsai-iáⁿ "tsiàu siông-lí lâi khòaⁿ", ài tsîⁿ ê lâng bô hun hó-gia̍h, sàn-tshiah. Siáng kóng hó-gia̍h lâng tio̍h bē tham sè-tiâu tsîⁿ, sàn-tshiah lâng khòaⁿ-tio̍h tsîⁿ tshiú it-tēng tio̍h ē ngiau? Khah tshù-bī ê sī, tham-tsâi ê lâng tóng-phài bô hun nâ le̍k o͘-pe̍h, tē-tiám bô hun tang, sai, lâm, pak, kim-gia̍h bô hun tōa-tiâu sè-tiâu. Lán kan-ta khòaⁿ tsòe-kīn tsin tsē sia̍p-hiâm tsà-niá tsō͘-lí hùi tsit hāng tio̍h tsiok tshing-tshó.

　　 Kin-nî it-·gue̍h, Tiong-kok Kok-bîn-tóng Sin-pak-tshī gī-oân Tsan Hoàn-ka, hông khòng-kò ùi 2016 nî khí tsà-niá tsō͘-lí hùi nn̄g-pah gōa bān, Sin-pak Tē-hng Huat-īⁿ huat-kuaⁿ jīn-ûi Tsan Hoàn-ka sia̍p-hoān Tham-u tī-tsōe tiâu-lē kah hêng-huat hō͘ kong-bū-oân ting-tsài put-si̍t tsōe-hiâm, hoān tāng-tsōe koh ū tshoàn-tsèng ê khó-lêng, tshâi-tēng ki-ah kìm kìⁿ. Phêⁿ-ô͘ koān tsêng bîn-tsèng-tshù tiúⁿ bô-tóng-tsik Tsiâⁿ Bān-kǹg, hông khòng-kò tam-jīm nn̄g kài koān-gī-oân kî-kan, sia̍p-hiâm ēng lâng-thâu pò tsō͘-lí hùi kiōng 829 bān kho͘, hō͘ Phêⁿ-ô͘ Tē-īⁿ í Tham-u tī-tsōe tiâu-lē phòaⁿ tshú tô͘-hêng tsa̍p-jī nî, Ko-hiông koân pun-īⁿ ki-ah móa saⁿ kò-gue̍h liáu-āu, tshâi-tēng koh-tsài iân-ah nn̄g kò gue̍h, i tio̍h tī lông-á-king kòe-nî. Tiong-kok Kok-bîn-tóng Sin-tik koān-gī-oân Tân Phik-ûi hông khòng-kò ùi 2012 nî kàu 2017 nî tsà-niá tsō͘-lí hùi 191 bān gōa, tāng phòaⁿ saⁿ nî la̍k kò-gue̍h. Bîn-tsìn-tóng Sin-pak-tshī la̍k liân-pà gī-oân Ko Bín-hūi sia̍p-hiâm tsà-niá tsō͘-lí hùi hông khí-sò͘, Sin-pak tē-īⁿ ha̍p-gī-têng í 600 bān kho͘ kau-pó, hān-tsè tsū-ku, tshut-kéng tshut-hái. Tiong-kok Kok-bîn-tóng Tâi-lâm tshī-gī-oân Lí Tiong-gîm sia̍p-hiâm tsà-niá tsō͘-lí hùi hō͘ kiám-hong tī 2020 nî tsa̍p-jī-gue̍h tshe tsing-pān kau-pó, tsa̍p-jī-gue̍h tiong, Tâi-lâm tshī-gī-hōe koh ū tsi̍t miâ Tiong-kok Kok-bîn-tóng gī-oân Tshòa Io̍k-hui mā sia̍p-hiâm tsà-niá tsō͘-lí hùi í peh bān kho͘ kau-pó. Tàu-tàu tsi̍t-ē 2020 nî Tâi-lâm tshī-gī-hōe í-king ū gō͘ miâ hiān-jīm gī-oân kah tsi̍t miâ sià-jīm gī-oân, lóng tsóng la̍k-ê lâng in-ūi sia̍p-hiâm tsà-niá tsō͘-lí hùi hō͘ kiám-tiàu tan-ūi tsing-pān. Tiong-kok Kok-bîn-tóng Tâi-tang koān gī-oân Lîm Ui-tsì sia̍p-hiâm tsà-niá tsō͘-lí hùi 56 bān kho͘, Tâi-tang tē-kiám-sú tsa̍p-jī-gue̍h té tsing-kiat khí-sò͘, kā tsāi-ah ê Lîm Ui-tsì î-sàng Tâi-tang tē-hng huat-īⁿ, huat-kuaⁿ têng-sím āu, tshâi-tēng í 80 bān kau-pó, pēng hān-tsè tsū-ku kah tēng-kî hiòng phài-tshut-só͘ pò-tò.

Tâi-oân kok tsèng-tóng tsin tsē ì-kiàn bē ha̍p. Kî-koài, kan-ta tsà-niá tsō͘-lí hùi tsit hāng, iú-tsì it-tông! (210226)


　　　　涉嫌詐領助理費，真正有志一同？

　　新黨台北市議員潘懷宗kah伊ê辦公室陳主任，涉嫌詐領助理費，經過長期偵辦，今年一月二六由主任檢察官陳銘鋒、檢察官林士淳指揮台北市調查處等，執行搜揣六個所在而且扣押相關證據，發現潘、陳兩人利用人頭詐領助理費留做私用，初步估算詐領金額新台幣300萬，訊後認為兩人有湮滅證據kah勾串ê可能，兩人聲押禁見。士林地檢署指出，潘陳兩人ùi 2008年到2020年，前後用人頭詐領補助費。但是第二工裁定潘懷宗200萬交保、陳主任150萬交保，兩人限制居住、出境出海。

上好笑ê是平平新黨ê市議員李慶元，伊認為潘懷宗做代誌穩健保守、mā m̄是貪財ê人，而且伊有真濟副業收入，照常理來看伊bē為tio̍h一個月兩萬外kho͘ 去犯法，詳情應該有需要koh釐清。

咱那會講李慶元市議員好笑，伊敢真正m̄知影「照常理來看」，愛錢ê人無分好額、散赤。Siáng講好額人tio̍h bē貪細條錢，散赤人看tio̍h錢手一定tio̍h會ngiau？Khah趣味ê是，貪財ê人黨派無分藍綠烏白，地點無分東西南北，金額無分大條細條。咱kan-ta看最近真濟涉嫌詐領助理費tsit項tio̍h足清楚。

　　今年一月，中國國民黨新北市議員曾煥嘉，hông控告ùi 2016年起詐領助理費兩百外萬，新北地方法院法官認為曾煥嘉涉犯貪污治罪條例kah刑法hō͘公務員登載不實罪嫌，犯重罪koh有串證ê可能，裁定羈押禁見。澎湖縣前民政處長無黨籍成萬貫，hông控告擔任兩屆縣議員期間，涉嫌用人頭報助理費共829萬元，hō͘澎湖地院依貪污治罪條例判處徒刑十二年，高雄高分院羈押滿三個月了後，裁定koh再延押兩個月，伊tio̍htī廊仔間過年。中國國民黨新竹縣議員陳栢維hông控告ùi 2012年到2017年詐領助理費191萬外，重判三年六個月。民進黨新北市六連霸議員高敏慧涉嫌詐領助理費hông起訴，新北地院合議庭以600萬元交保，限制住居、出境出海。中國國民黨台南市議員李中岑涉嫌詐領助理費hō͘檢方tī 2020年十二月初偵辦交保，十二月中，台南市議會koh有一名中國國民黨議員蔡育輝mā涉嫌詐領助理費以八萬元交保。鬥鬥一下2020年台南市議會已經有五名現任議員kah一名卸任議員，lóng總六個人因為涉嫌詐領助理費hō͘檢調單位偵辦。中國國民黨台東縣議員林威志涉嫌詐領助理費56萬元，台東地檢署十二月底偵結起訴，kā在押ê林威志移送台東地方法院，法官庭審後，裁定以80萬交保，並限制住居kah定期向派出所報到。

台灣各政黨真濟意見bē合。奇怪，kan-ta詐領助理費tsit項，有志一同！ (210226)