《綠色短評》

 | | | 轉寄

中國ê「孔子學院」m̄-thang學！

作者 李南衡, TsoânTâijī/全台字 by Tsng Hūiphêng 2022.05.22

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

Tiongkok ê "Κhóngtsú ha̍kīⁿ" m̄thang o̍h!

Gō͘gue̍h tshejī, Tiongkok Kokbîntóng li̍púi Gô͘ Suhoâi tī li̍phuatīⁿ gōakau, kokhông úigoânhōe tsitsûn piáusī, m̄thang tshintshiūⁿ Ōehok pō͘tiúⁿ Tân Sîtiong pō͘tiúⁿ "逢中必反", Lāukiōng ê "Κhóngtsú ha̍kīⁿ" bú tsiah tsē nî, tongtsho͘ tsòtit hiah hó, ittēng ū i ê iutiám, lán tio̍h í te̍k ūi su, tio̍h o̍h "Κhóngtsú ha̍kīⁿ".

Tī Tâioân tsin tsē khòaⁿkhílâi khiáukhiáu ê lâng, inūi ū "Tiongkok sái khah phang" ê piànthài simlí, kóngōe khah ē tsingtsha khì. Tshiūⁿkóng tsit nn̄g nî, ū tsi̍t kóa lâng kiò lán tsènghú tio̍h tsháṳōng Tiongkok tsè e̍kbiâu. Hó tit lán tsènghú ū kiantshî, bô tshap in. Kináji̍t tsèngbêng, Tiongkok e̍kbiâu tùi Búhàn hìiām piàntséng ê Delta pēⁿto̍k bô hônghō͘la̍t, tùi Omicron piànī pēⁿto̍k koh Khah biánkóng, tsù saⁿ tse mā bô hāukó.

　　2004 nî, Tiongkok sêngli̍p "Κhóngtsú ha̍kīⁿ", iû Tiongkok Kàuio̍kpō͘ só͘ sio̍k ê kokka Hàngí Koktsè Thuikóng Léngtō Siótso͘ Pānkongsik koánlí, tsóngpō͘ siat tī Pakkiaⁿ, Tiongkok kénggōa ê "Κhóngtsú ha̍kīⁿ" lóng sī hunki kikò͘. Sī Tiongkok tsènghú ūitio̍h hiòng sèkài thuikóng Hàngí, tsingtsìn sèkài kokkok tùi Tiongkok ê liáukái só͘ siatli̍p ê kuaⁿhong kikò͘. Khòtêng hun sì tōa lūi, Siōngtsúiàu sī o̍h Hôagí, tējī lūi sī pauhâm Tiongkok tê bûnhòa, Hànjī iánpiàn kah Hànjī bûnhòa, tēsaⁿ lūi sī paukuat Tiongkok bûnha̍k, le̍ksú kah tiatha̍k, tēsì lūi sī paukuat siôngbū, gēsu̍t, suhuat, tsútsia̍h kah lúiû téng te̍ksik khòtêng. Tsa̍psì nî āu ê 2018 nî káugue̍h, tsoân sèkài ū 149 ê kokka ( tēkhu) kiànli̍p liáu 530 king "Κhóngtsú ha̍kīⁿ" kah 1,113 ê tiongsiáuha̍k Κhóngtsú khòtn̂g , Tionggōa tsuankiamtsit kàusu 4 bān 6,200 lâng, pôeióng o̍hoân tshiaukòe 900 bān lâng.

　　 Inūi tsin tsē kokka tamsim "Κhóngtsú ha̍kīⁿ" kansia̍p ha̍ksu̍t tsūiû, tsò kàntia̍p kah siutsi̍p tsêngpò ê kangtsok,"Κhóngtsú ha̍kīⁿ" kah Κhóngtsú ha̍ksuat bô kuanhē. Bôtshò! 2018 nî pehgue̍h, bat tsò kòe Tiongkok Kokbūīⁿ tsónglí kah Τiongkiōng Tiongiong Tsóngsukì 趙紫陽ê pìsu 鮑彤 kóng, hiāntsāi phó͘ki̍p tsoânkiû ê "Κhóngtsú ha̍kīⁿ", lóng sī teh thúnta̍h tsit ūi singtiat kah i ê ha̍ksuat. Tsiahê "Κhóngtsú ha̍kīⁿ" lóng kah Κhóngtsú bô kuanhē. In lóng sèⁿ Kiōng. Tsiàu 習近平 ê kónghuat in lóng sèⁿ Tóng.

　　2005 nî Tiongkok tī Sūitián Sutokhom tāiha̍k sêngli̍p Autsiu tēit king "Κhóngtsú ha̍kīⁿ", 2019 nî tsa̍pjīgue̍h, Sūitián kuaiⁿ tiāu tī 4 king tāiha̍k siat ê "Κhóngtsú ha̍kīⁿ", sī Autsiu tēitê oântsoân tûtiāu "Κhóngtsú ha̍kīⁿ" ê kokka. 2004 nî tsa̍pitgue̍h tsa̍ptshit, Bíkok Málílân tāiha̍k siatli̍p Pakbítsiu tēit king "Κhóngtsú ha̍kīⁿ", 2020 nî itgue̍h tsa̍ptshit kuaiⁿ tiāu. Tsit tiongkan tsi̍t king tāiha̍k tsi̍t king tāiha̍k siosòa siatli̍p "Κhóngtsú ha̍kīⁿ", bô lōa kú, tsi̍t king tsi̍t king kuaiⁿ tiāu. Goânpún ītēng 2020 nîté kuaiⁿ tiāu tsoân BÍ "Κhóngtsú ha̍kīⁿ".

　　 Sìgue̍h jīla̍k, kah Tiongkok itlia̍pit ê Pakisuthán, siōng tōa to͘tshī Khahlatshì huatsing tsi̍t kiāⁿ tsūsat sik tsàtôaⁿ kongkik,"Κhóngtsú ha̍kīⁿ īⁿtiúⁿ N̂g Kùipêⁿ, nn̄g miâ lāusu kah Pakisuthán suki hiānsí. Tsit kiāⁿ po̍ktsà àn huatsing tī Khahlatshì tāiha̍k "Κhóngtsú ha̍kīⁿ" hūkīn. Tsàtôaⁿkheh sī tsi̍t miâ saⁿtsa̍p hòe, nn̄gê gíná ê lāubú, i sī "Κhóngtsú ha̍kīⁿ" ê ha̍ksing, i mā tongtiûⁿ síbông.

　　 Siūⁿ "Tiongkok sái khah phang" ê lâng kóng ê ōe bē thiaⁿ tit, Tiongkok "Κhóngtsú ha̍kīⁿ" m̄thang o̍h! (220506)
Tsù,趙紫陽　鮑彤（ㄅㄠˋ ㄊㄨㄥˊ）習近平 tshiáⁿ liām Hôagí


Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng

Tiong-kok ê "Κhóng-tsú ha̍k-īⁿ" m̄-thang o̍h!

Gō͘-gue̍h tshe-jī, Tiong-kok Kok-bîn-tóng li̍p-úi Gô͘ Su-hoâi tī li̍p-huat-īⁿ gōa-kau, kok-hông úi-goân-hōe tsit-sûn piáu-sī, m̄-thang tshin-tshiūⁿ Ōe-hok pō͘-tiúⁿ Tân Sî-tiong pō͘-tiúⁿ "逢中必反", Lāu-kiōng ê "Κhóng-tsú ha̍k-īⁿ" bú tsiah tsē nî, tong-tsho͘ tsò-tit hiah hó, it-tēng ū i ê iu-tiám, lán tio̍h í te̍k ūi su, tio̍h o̍h "Κhóng-tsú ha̍k-īⁿ".

Tī Tâi-oân tsin tsē khòaⁿ--khí-lâi khiáu-khiáu ê lâng, in-ūi ū "Tiong-kok sái khah phang" ê piàn-thài sim-lí, kóng-ōe khah ē tsing-tsha khì. Tshiūⁿ-kóng tsit nn̄g nî, ū tsi̍t kóa lâng kiò lán tsèng-hú tio̍h tshái-iōng Tiong-kok tsè e̍k-biâu. Hó tit lán tsèng-hú ū kian-tshî, bô tshap in. Kin-á-ji̍t tsèng-bêng, Tiong-kok e̍k-biâu tùi Bú-hàn hì-iām piàn-tséng ê Delta pēⁿ-to̍k bô hông-hō͘-la̍t, tùi Omicron piàn-ī pēⁿ-to̍k koh Khah bián-kóng, tsù saⁿ tse mā bô hāu-kó.

　　2004 nî, Tiong-kok sêng-li̍p "Κhóng-tsú ha̍k-īⁿ", iû Tiong-kok Kàu-io̍k-pō͘ só͘ sio̍k ê kok-ka Hàn-gí Kok-tsè Thui-kóng Léng-tō Sió-tso͘ Pān-kong-sik koán-lí, tsóng-pō͘ siat tī Pak-kiaⁿ, Tiong-kok kéng-gōa ê "Κhóng-tsú ha̍k-īⁿ" lóng sī hun-ki ki-kò͘. Sī Tiong-kok tsèng-hú ūi-tio̍h hiòng sè-kài thui-kóng Hàn-gí, tsing-tsìn sè-kài kok-kok tùi Tiong-kok ê liáu-kái só͘ siat-li̍p ê kuaⁿ-hong ki-kò͘. Khò-têng hun sì tōa lūi, Siōng-tsú-iàu sī o̍h Hôa-gí, tē-jī lūi sī pau-hâm Tiong-kok tê bûn-hòa, Hàn-jī ián-piàn kah Hàn-jī bûn-hòa, tē-saⁿ lūi sī pau-kuat Tiong-kok bûn-ha̍k, le̍k-sú kah tiat-ha̍k, tē-sì lūi sī pau-kuat siông-bū, gē-su̍t, su-huat, tsú-tsia̍h kah lú-iû téng te̍k-sik khò-têng. Tsa̍p-sì nî āu ê 2018 nî káu-gue̍h, tsoân sè-kài ū 149 ê kok-ka ( tē-khu) kiàn-li̍p liáu 530 king "Κhóng-tsú ha̍k-īⁿ" kah 1,113 ê tiong-siáu-ha̍k Κhóng-tsú khò-tn̂g , Tiong-gōa tsuan-kiam-tsit kàu-su 4 bān 6,200 lâng, pôe-ióng o̍h-oân tshiau-kòe 900 bān lâng.

　　 In-ūi tsin tsē kok-ka tam-sim "Κhóng-tsú ha̍k-īⁿ" kan-sia̍p ha̍k-su̍t tsū-iû, tsò kàn-tia̍p kah siu-tsi̍p tsêng-pò ê kang-tsok,"Κhóng-tsú ha̍k-īⁿ" kah Κhóng-tsú ha̍k-suat bô kuan-hē. Bô-tshò! 2018 nî peh-gue̍h, bat tsò kòe Tiong-kok Kok-bū-īⁿ tsóng-lí kah Τiong-kiōng Tiong-iong Tsóng-su-kì 趙紫陽ê pì-su 鮑彤 kóng, hiān-tsāi phó͘-ki̍p tsoân-kiû ê "Κhóng-tsú ha̍k-īⁿ", lóng sī teh thún-ta̍h tsit ūi sing-tiat kah i ê ha̍k-suat. Tsiah-ê "Κhóng-tsú ha̍k-īⁿ" lóng kah Κhóng-tsú bô kuan-hē. In lóng sèⁿ Kiōng. Tsiàu 習近平 ê kóng-huat in lóng sèⁿ Tóng.

　　2005 nî Tiong-kok tī Sūi-tián Sutokhom tāi-ha̍k sêng-li̍p Au-tsiu tē-it king "Κhóng-tsú ha̍k-īⁿ", 2019 nî tsa̍p-jī-gue̍h, Sūi-tián kuaiⁿ tiāu tī 4 king tāi-ha̍k siat ê "Κhóng-tsú ha̍k-īⁿ", sī Au-tsiu tē-it-ê oân-tsoân tû-tiāu "Κhóng-tsú ha̍k-īⁿ" ê kok-ka. 2004 nî tsa̍p-it-gue̍h tsa̍p-tshit, Bí-kok Má-lí-lân tāi-ha̍k siat-li̍p Pak-bí-tsiu tē-it king "Κhóng-tsú ha̍k-īⁿ", 2020 nî it-gue̍h tsa̍p-tshit kuaiⁿ tiāu. Tsit tiong-kan tsi̍t king tāi-ha̍k tsi̍t king tāi-ha̍k sio-sòa siat-li̍p "Κhóng-tsú ha̍k-īⁿ", bô lōa kú, tsi̍t king tsi̍t king kuaiⁿ tiāu. Goân-pún ī-tēng 2020 nî-té kuaiⁿ tiāu tsoân BÍ "Κhóng-tsú ha̍k-īⁿ".

　　 Sì-gue̍h jī-la̍k, kah Tiong-kok it-lia̍p-it ê Pa-ki-su-thán, siōng tōa to͘-tshī Khah-la-tshì huat-sing tsi̍t kiāⁿ tsū-sat sik tsà-tôaⁿ kong-kik,"Κhóng-tsú ha̍k-īⁿ īⁿ-tiúⁿ N̂g Kùi-pêⁿ, nn̄g miâ lāu-su kah Pa-ki-su-thán su-ki hiān-sí. Tsit kiāⁿ po̍k-tsà àn huat-sing tī Khah-la-tshì tāi-ha̍k "Κhóng-tsú ha̍k-īⁿ" hū-kīn. Tsà-tôaⁿ-kheh sī tsi̍t miâ saⁿ-tsa̍p hòe, nn̄g-ê gín-á ê lāu-bú, i sī "Κhóng-tsú ha̍k-īⁿ" ê ha̍k-sing, i mā tong-tiûⁿ sí-bông.

　　 Siūⁿ "Tiong-kok sái khah phang" ê lâng kóng ê ōe bē thiaⁿ tit, Tiong-kok "Κhóng-tsú ha̍k-īⁿ" m̄-thang o̍h! (220506)
Tsù,趙紫陽　鮑彤（ㄅㄠˋ ㄊㄨㄥˊ）習近平 tshiáⁿ liām Hôa-gí



五月初二，中國國民黨立委吳斯懷tī立法院外交、國防委員會質詢表示，m̄-thang親像衛福部長陳時中「逢中必反」，老共ê「孔子學院」舞tsiahtsē年，當初做得hiah好，一定有伊ê優點，咱tio̍h以敵為師，tio̍h學「孔子學院」。

Tī台灣真tsē看起來巧巧ê人，因為有「中國屎khah芳」ê變態心理，講話khah會精差去。像講tsit兩年，有一kóa人叫咱政府tio̍h採用中國製疫苗。好得咱政府有堅持、無tshap in。今á日證明，中國疫苗對武漢肺炎變種ê Delta病毒無防護力，對Omicron變異病毒koh Khah免講，注三劑mā無效果。

　　2004年，中國成立「孔子學院」，由中國教育部所屬ê國家漢語國際推廣領導小組辦公室管理，總部設tī北京，中國境外ê「孔子學院」lóng是分支機構。是中國政府為tio̍h向世界推廣漢語、增進世界各國對中國ê瞭解所設立ê官方機構。課程分四大類，上主要是學華語，第二類是包含中國茶文化、漢字演變kah漢字文化，第三類是包括中國文學、歷史kah哲學，第四類是包括商務、藝術、書法、煮食kah旅遊等特色課程。十四年後ê2018年九月，全世界有149個國家（地區）建立了530間「孔子學院」kah 1,113個中小學孔子課堂，中外專兼職教師4萬6,200人，培養學員超過900萬人。

　　因為真tsē國家擔心「孔子學院」干涉學術自由，做間諜kah收集情報ê工作，「孔子學院」kah孔子學說無關係。無錯！2018年八月，bat做過中國國務院總理kah中共中央總書記趙紫陽ê秘書鮑彤講：現在普及全球ê「孔子學院」，lóng是teh thún踏這位先哲kah伊ê學說。Tsiah-ê「孔子學院」lóng kah孔子無關係。In lóng姓共。照習近平ê講法in lóng姓黨。

　　2005年中國tī瑞典Sutokhom大學成立歐洲第一間「孔子學院」，2019年十二月，瑞典關掉tī4間大學設ê「孔子學院」，是歐洲第一個完全除掉「孔子學院」ê國家。2004年十一月十七，美國馬里蘭大學設立北美洲第一間「孔子學院」，2020年一月十七關掉。Tsit中間一間大學一間大學相續設立「孔子學院」，無lōa久，一間一間關掉。原本預定2020年底關掉全美「孔子學院」。

　　四月二六，kah中國一粒一ê巴基斯坦，上大都市卡拉刺發生一件自殺式炸彈攻擊，「孔子學院」院長黃桂平、兩名老師kah巴基斯坦司機現死。Tsit件爆炸案發生tī卡拉刺大學「孔子學院」附近。炸彈客是一名三十歲、兩個gín-á ê老母，伊是「孔子學院」ê學生，伊mā當場死亡。

　　想「中國屎khah芳」ê人講ê話bē聽得，中國「孔子學院」m̄-thang學！ (220506)
註：趙紫陽　　鮑彤（ㄅㄠˋ ㄊㄨㄥˊ）　　習近平　　請唸華語