《綠色短評》

 | | | 轉寄

俄羅做賊，koh teh喝掠賊！

作者 李南衡, TsoânTâijī/全台字 by Tsng Hūiphêng 2022.06.05

Tsoânbîn Tâioânjī pán/全民台灣字版簡稱TsoânTâiJī

Le̍ksik toánphêng 》　　　 Lí Lâmhêng

　　　　　　　　 Gôlô tsòtsha̍t, koh teh huah lia̍htsha̍t!

　　 Gō͘gue̍h tsa̍psaⁿ, Gôlô gōakau pō͘tiúⁿ 拉夫羅夫（Lavrov） khì Tionga ê 塔吉克（Tajikistan） tshamka "To̍kli̍p Kokka Kokhia̍p "（CIS） hōegī, tī hōe āu ê kìtsiá hōe i khuiphàu tsí khòng "Aubêng" ū "tshimlio̍ksèng" koh "hótsiàn". Goânpún jīgue̍h jīsì Gôlô ji̍ptshim 烏克蘭ê líiû sī 烏克蘭 siūⁿ beh kaji̍p "Pak Tāiseiûⁿ Kongiok Tso͘tsit" kántshing " Pakiok（NATO）", tānsī tsiàntsing íāu, 烏克蘭 itti̍t kiôngtiāu in bôkhólêng tsiâⁿtsoh " Pakiok " ê sêngoân, tānsī iûgoân ē tōala̍t tshuitōng sintshiáⁿ kaji̍p "Aubêng". Kám sī ánne Gôlô gōakau pō͘tiúⁿ tsiah ē mē "Aubêng" tú siàu?

　　Ùi Gôlô gōakau pō͘tiúⁿ kóng tsiahê ōe, lán tio̍h tsaiiáⁿ i ô͘giân loāngí. "Autsiu Liânbêng", kántshing "Aubêng", sī Autsiu to kok kiōngtông kiànli̍p ê tsèngtī kah kingtsè liânbêng, ū 27 ê sêngoân kok. Siongsìn i goânpún beh mē ê sī " Pakiok", inūi " Pakiok" sī Autsiu kah Pakbí tsiu kokka ūi si̍tsi hôngōe ha̍ptsok só͘ kiànli̍p ê koktsè tso͘tsit, ū tōaliōng hu̍t búkhì kah siôngsiat pō͘tūi, sī sehong ê tiōngiàu kunsū le̍kliōng. " Pakiok" sêngoân kok ū 30 ê. Pakiok kunsū khaitsi tsiàm sèkài kokhông khaitsi ê 70% ísiōng.

　　 Lán lâi khòaⁿ tàuté sī siáⁿ lâng ū "tshimlio̍ksèng" koh "hó tsiàn" ? Jīgue̍h jīsì, Gôlô tshutping ji̍p tshim 烏克蘭, pàngtiau káutsa̍pla̍k tiámtsing, iā tsiūsī sìkang lāi oântsoân tsiàmniá 烏克蘭, phài ping phài tsiàntshia phài tsiànki phài tsiàntsûn tshimtsiàm kehpiah kok 烏克蘭ê léngthó͘, ánne kám bô sǹg sī ū "tshimlio̍ksèng" koh "hó tsiàn"?

　　 Tsiàntsing tú khaisí ê sî," Pakiok" kokka ēsái kóng sī tiāmtiāmá khòaⁿ, bô tsi̍tê kokka tshuntshiú tsioân, itti̍t khòaⁿ 烏克蘭 ko͘ kun hùntsiàn, Gôlô tāikun ji̍p tshim, khijîn thài sīm, "Pakiok" tsiah tsi̍tê tsi̍tê ūnsàng siōng sin siōng hó ê búkhì tsioân 烏克蘭, hō͘ 烏克蘭 jú phah jú ióng. Kàu kináji̍t ûitsí,"Pakiok" iáu bô phài tsi̍t ping tsi̍t tsut khì tsān 烏克蘭, só͘ū ê tsiànkó lóngtsóng sī 烏克蘭 tsoânthé kun bîn àikok ōikok ê ingióng piáuhiān. Hótshiò ê sī Gôlô suah koài "Aubêng" ū "tshimlio̍ksèng" koh "hó tsiàn".

　　 Kàu gō͘gue̍h tsa̍pkáu ûitsí, Gôlô kun íking tīnbông iok 2 bān 8,500 gōalâng, 烏克蘭 kun tshuihúi Gôlô kun 1,254 tâi tsiàntshia, 3,063 tâi tsngkahtshia, 595 mn̂g hóephàu hēthóng, 199 tâi tokoán hóetsìⁿtshia, 93 tso͘ hôngkhong hēthóng, 202 tsiah kunki, 1,167 tsiah ti̍tsingki , 2,157 tâi koksik tshialióng kah iûkoàntshia, 13 tâi lāmthéng, 455 tsiah bôjînki, 43 ê te̍ksû siatpī kah 103 lia̍p sûnhâng huitôaⁿ. Gôlô lio̍khái khongkun tsiahni̍h tshámtāng ê súnsit, kám sī Gôlô kun ūitio̍h póūi kakī ê kokka, puthēng tī Gôlô kénglāi hō͘ ū "tshimlio̍ksèng" koh "hó tsiàn" ê "Pakiok" kuntūi só͘ phah ê? Tongjiân m̄ sī!

Tse sī gō͘gue̍h tsa̍pkáu ēpo͘ 烏克蘭 kokhôngpō͘ kongpò͘ siōng sin ê tsiànkó thóngkè, 烏克蘭 kokhôngpō͘ kóng, tsūtsiông Gôlô jīgue̍h jīsì ji̍ptshim tsì gō͘gue̍h tsa̍pkáu thàutsá ûitsí, 烏克蘭 só͘ kongpò͘ siōng sin ê tsiànkó. Lāité khaksi̍t ū tsin tsē "Pakiok" kokka só͘ tsioân ê kok tsióng siōng sin ê búkhì, tānsī tsiànkó lóng sī 烏克蘭 ingióng ê kunbîn tsi̍t kiāⁿ tsi̍t kiāⁿ kiànli̍p ê. Tongjiân sī tsiok bô kántan.

Lán khòaⁿtio̍h Gôlô tsòtsha̍t, koh teh huah lia̍htsha̍t! 　　　　(220522)

Tsù, 塔吉克　　 烏克蘭　　 tshiáⁿ liām Hôagí


Pe̍h-ōe-jī-pán/白話字版

Le̍k-sik toán-phêng 》　　　 Lí Lâm-hêng

　　　　　　　　 Gô-lô tsò-tsha̍t, koh teh huah lia̍h-tsha̍t!

　　 Gō͘-gue̍h tsa̍p-saⁿ, Gô-lô gōa-kau pō͘-tiúⁿ 拉夫羅夫（Lavrov） khì Tiong-a ê 塔吉克（Tajikistan） tsham-ka "To̍k-li̍p Kok-ka Kok-hia̍p "（CIS） hōe-gī, tī hōe āu ê kì-tsiá hōe i khui-phàu tsí khòng "Au-bêng" ū "tshim-lio̍k-sèng" koh "hó-tsiàn". Goân-pún jī-gue̍h jī-sì Gô-lô ji̍p-tshim 烏克蘭ê lí-iû sī 烏克蘭 siūⁿ beh ka-ji̍p "Pak Tāi-se-iûⁿ Kong-iok Tso͘-tsit" kán-tshing " Pak-iok（NATO）", tān-sī tsiàn-tsing í-āu, 烏克蘭 it-ti̍t kiông-tiāu in bô-khó-lêng tsiâⁿ-tsoh " Pak-iok " ê sêng-oân, tān-sī iû-goân ē tōa-la̍t tshui-tōng sin-tshiáⁿ ka-ji̍p "Au-bêng". Kám sī án-ne Gô-lô gōa-kau pō͘-tiúⁿ tsiah ē mē "Au-bêng" tú siàu?

　　Ùi Gô-lô gōa-kau pō͘-tiúⁿ kóng tsiah-ê ōe, lán tio̍h tsai-iáⁿ i ô͘-giân loān-gí. "Au-tsiu Liân-bêng", kán-tshing "Au-bêng", sī Au-tsiu to kok kiōng-tông kiàn-li̍p ê tsèng-tī kah king-tsè liân-bêng, ū 27 ê sêng-oân kok. Siong-sìn i goân-pún beh mē ê sī " Pak-iok", in-ūi " Pak-iok" sī Au-tsiu kah Pak-bí tsiu kok-ka ūi si̍t-si hông-ōe ha̍p-tsok só͘ kiàn-li̍p ê kok-tsè tso͘-tsit, ū tōa-liōng hu̍t bú-khì kah siông-siat pō͘-tūi, sī se-hong ê tiōng-iàu kun-sū le̍k-liōng. " Pak-iok" sêng-oân kok ū 30 ê. Pak-iok kun-sū khai-tsi tsiàm sè-kài kok-hông khai-tsi ê 70% í-siōng.

　　 Lán lâi khòaⁿ tàu-té sī siáⁿ lâng ū "tshim-lio̍k-sèng" koh "hó- tsiàn" ? Jī-gue̍h jī-sì, Gô-lô tshut-ping ji̍p tshim 烏克蘭, pàng-tiau káu-tsa̍p-la̍k tiám-tsing, iā tsiū-sī sì-kang lāi oân-tsoân tsiàm-niá 烏克蘭, phài ping phài tsiàn-tshia phài tsiàn-ki phài tsiàn-tsûn tshim-tsiàm keh-piah kok 烏克蘭ê léng-thó͘, án-ne kám bô sǹg sī ū "tshim-lio̍k-sèng" koh "hó tsiàn"?

　　 Tsiàn-tsing tú khai-sí ê sî," Pak-iok" kok-ka ē-sái kóng sī tiām-tiām-á khòaⁿ, bô tsi̍t-ê kok-ka tshun-tshiú tsi-oân, it-ti̍t khòaⁿ 烏克蘭 ko͘ kun hùn-tsiàn, Gô-lô tāi-kun ji̍p tshim, khi-jîn thài sīm, "Pak-iok" tsiah tsi̍t-ê tsi̍t-ê ūn-sàng siōng sin siōng hó ê bú-khì tsi-oân 烏克蘭, hō͘ 烏克蘭 jú phah jú ióng. Kàu kin-á-ji̍t ûi-tsí,"Pak-iok" iáu bô phài tsi̍t ping tsi̍t tsut khì tsān 烏克蘭, só͘-ū ê tsiàn-kó lóng-tsóng sī 烏克蘭 tsoân-thé kun bîn ài-kok ōe-kok ê ing-ióng piáu-hiān. Hó-tshiò ê sī Gô-lô suah koài "Au-bêng" ū "tshim-lio̍k-sèng" koh "hó tsiàn".

　　 Kàu gō͘-gue̍h tsa̍p-káu ûi-tsí, Gô-lô kun í-king tīn-bông iok 2 bān 8,500 gōa-lâng, 烏克蘭 kun tshui-húi Gô-lô kun 1,254 tâi tsiàn-tshia, 3,063 tâi tsng-kah-tshia, 595 mn̂g hóe-phàu hē-thóng, 199 tâi to-koán hóe-tsìⁿ-tshia, 93 tso͘ hông-khong hē-thóng, 202 tsiah kun-ki, 1,167 tsiah ti̍t-sing-ki , 2,157 tâi kok-sik tshia-lióng kah iû-koàn-tshia, 13 tâi lām-théng, 455 tsiah bô-jîn-ki, 43 ê te̍k-sû siat-pī kah 103 lia̍p sûn-hâng hui-tôaⁿ. Gô-lô lio̍k-hái khong-kun tsiah-ni̍h tshám-tāng ê sún-sit, kám sī Gô-lô kun ūi-tio̍h pó-ūi ka-kī ê kok-ka, put-hēng tī Gô-lô kéng-lāi hō͘ ū "tshim-lio̍k-sèng" koh "hó tsiàn" ê "Pak-iok" kun-tūi só͘ phah ê? Tong-jiân m̄ sī!

Tse sī gō͘-gue̍h tsa̍p-káu ē-po͘ 烏克蘭 kok-hông-pō͘ kong-pò͘ siōng sin ê tsiàn-kó thóng-kè, 烏克蘭 kok-hông-pō͘ kóng, tsū-tsiông Gô-lô jī-gue̍h jī-sì ji̍p-tshim tsì gō͘-gue̍h tsa̍p-káu thàu-tsá ûi-tsí, 烏克蘭 só͘ kong-pò͘ siōng sin ê tsiàn-kó. Lāi-té khak-si̍t ū tsin tsē "Pak-iok" kok-ka só͘ tsi-oân ê kok tsióng siōng sin ê bú-khì, tān-sī tsiàn-kó lóng sī 烏克蘭 ing-ióng ê kun-bîn tsi̍t kiāⁿ tsi̍t kiāⁿ kiàn-li̍p ê. Tong-jiân sī tsiok bô kán-tan.

Lán khòaⁿ-tio̍h Gô-lô tsò-tsha̍t, koh teh huah lia̍h-tsha̍t! 　　　　(220522)

Tsù, 塔吉克　　 烏克蘭　　 tshiáⁿ liām Hôa-gí



　　五月十三，俄羅外交部長拉夫羅夫（Lavrov）去中亞ê塔吉克（Tajikistan）參加「獨立國家國協」（CIS）會議，tī會後ê記者會伊開砲指控「歐盟」有「侵略性」koh「好戰」。原本二月二四俄羅入侵烏克蘭ê理由是烏克蘭想beh加入「北大西洋公約組織」簡稱「北約（NATO）」，但是戰爭以後，烏克蘭一直強調in無可能成作「北約」ê成員，但是猶原會大力推動申請加入「歐盟」。Kám是án-ne俄羅外交部長才會罵「歐盟」tú數？

　　Ui俄羅外交部長講tsiah-ê話，咱tio̍h知影伊胡言亂語。「歐洲聯盟」，簡稱「歐盟」，是歐洲多國共同建立ê政治kah經tsē聯盟，有27个成員國。相信伊原本beh罵ê是「北約」，因為「北約」是歐洲kah北美洲國家為實施防衛合作所建立ê國際組織，有大量核武器kah常設部隊，是西方ê重要軍事力量。「北約」成員國有30个。北約軍事開支佔世界國防開支ê70%以上。

　　咱來看到底是啥人有「侵略性」koh「好戰」？二月二四，俄羅出兵入侵烏克蘭，放調九十六點鐘、也就是四工內完全佔領烏克蘭，派兵派戰車派戰機派戰船侵佔隔壁國烏克蘭ê領土，án-ne kám無算是有「侵略性」koh「好戰」？

　　戰爭tú開始ê時，「北約」國家會使講是tiāmtiāmá看，無一个國家伸手支援，一直看烏克蘭孤軍奮戰、俄羅大軍入侵、欺人太甚，「北約」才一个一个運送上新上好ê武器支援烏克蘭，hō͘烏克蘭愈拍愈勇。到今á日為止，「北約」猶無派一兵一卒去贊烏克蘭，所有ê戰果lóng總是烏克蘭全體軍民愛國衛國ê英勇表現。好笑ê是俄羅煞怪「歐盟」有「侵略性」koh「好戰」。

　　到五月十九為止，俄羅軍已經陣亡約2萬8,500外人，烏克蘭軍摧毀俄羅軍1,254台戰車、3,063台裝甲車、595門火砲系統、199台多管火箭車、93組防空系統、202隻軍機、1,167隻直升機、2,157台各式車輛kah油罐車、13台艦艇、455隻無人機、43个特殊設備kah 103粒巡弋飛彈。俄羅陸海空軍tsiahnih慘重ê損失，kám是俄羅軍為tio̍h保衛家己ê國家，不幸tī俄羅境內hō͘有「侵略性」koh「好戰」ê「北約」軍隊所拍ê？當然m̄是！

Tse是五月十九下晡烏克蘭國防部公布上新ê戰果統計，烏克蘭國防部講，自從俄羅二月二四入侵至五月十九透早為止，烏克蘭所公布上新ê戰果。內底確實有真tsē「北約」國家所支援ê各種上新ê武器，但是戰果lóng是烏克蘭英勇ê軍民一件一件建立ê。當然是足無簡單。

咱看tio̍h俄羅做賊，koh teh喝掠賊！　　　　(220522)

註：塔吉克　　烏克蘭　　請唸華語