《綠色短評》

 | | | 轉寄

出兵保護台灣，拜登總統是表明決心！

作者 李南衡, TsoânTâijī/全台字 by Tsng Hūiphêng 2022.06.12

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　 Lí Lâmhêng

　 Tshutping póhō͘ Tâioân,拜登tsóngthóng sī piáubêng kuatsim!

　　 Bíkok tsóngthóng拜登 tsiūjīm ílâi, thâutsi̍tpiàn lâi Atsiu hóngbūn. Gō͘gue̍h jīsaⁿ,拜登tsóngthóng kah Ji̍tpún 岸田文雄（Kishida Fumio）siúsiòng tī liânha̍p kìtsiáhōe téngbīn, sianghong lóng têngsin Tâioân antsoân ê tiōngiàusèng. Ū tsi̍t ūi kìtsiá mn̄g拜登tsóngthóng,"siatsú Tiongkok ji̍ptshim Tâioân, lí goānì ūi póhō͘ Tâioân kàiji̍p kunsū hêngtōng bò͘?" 拜登 tsóngthóng ti̍tpeh ìn kóng,"sī." Tsit ūi kìtsiá koh tui mn̄g,"lí goānì?" 拜登 tsóngthóng ìn kóng,"Tse sī goán tsòkòe ê sênglo̍k."

　　拜登tsóngthóng pēng bô tùi tsiahê ōe ū tsò siáⁿmi̍h suatbêng a̍h sī têngtshing. I tsitê singbêng hō͘ tsi̍tkóa tī kìtsiáhōe hiāntiûⁿ ê Bíkok kuaⁿoân tio̍hkiaⁿ, in bô siūⁿtio̍h tsóngthóng ē piáuta̍t tshut tsiahni̍h ti̍ttsiap tsiahni̍h pe̍h ê kuatsim. Bíkok ithiòng kéngkò Tiongkok m̄thang tùi Tâioân tāngbú, tānsī siatsú nā huatsing tsit tsióng tsōnghóng ê sî, thêngtō͘ siōng ē ū gōa tōa oântsō͘ Tâioân, Bíkok khólêng sī ūitio̍h tsiànlio̍k ê bo̍ktik, ithiòng lóng sī hâmhâm hô͘hô͘, bôngbū bô tshing ê thāitō͘.

Pe̍hkiong kiantshî kóng拜登 tsóngthóng pēng bô phah phòa tn̂gkî ílâi ê tsèngtshik. Tse pēng m̄sī拜登 tsóngthóng thâutsi̍t piàn àmsī Bíkok beh ūi Tâioân lâi tsiàn, tānsī i téng piàn huatpiáu lūisū giânlūn ê sî, mûithé lóng kā khòaⁿtsoh sī tiánhêng ê拜登 sik "kháu gō͘". Tsit piàn mûithé ingkai tsin tshingtshó i sī kóng tsinê. I tī Tangkiaⁿ kiôngtiāu kóng, tùi Tâioân ê ji̍ptshim, ná tshiūⁿ 烏克蘭 tsiàntsing ê tsailān —— i goānì tsháitshú koh khah tsē ê tshòsi lâi tsó͘tsí tsit tiûⁿ tsailān ê huatsing. I hit tongsî hō͘ Gôlô tsóngthóng 浮丁siuⁿtsē líiû khì hoâigî Bíkok tùi 烏克蘭ê tsitshî la̍tthâu. Só͘í i tsit piàn ài tùi Tiongkok Xíjìnpíng tsúse̍k kóng tshingtshó.

　　 Bíkok kah Tiongkok tī "tsi̍tê Tiongkok" téngbīn ū jīnti siōng ê tsingtsha. Bíkok Kokbūīⁿ huatgiânjîn 普萊斯（Ned Price）tī Twitter téngbīnsiōng hoánpo̍k Tiongkok kóng,"Tionghôa Jînbîn Kiōnghôkok kèsio̍k kongkhai tshògō͘ biâusu̍t Bíkok ê tsèngtshik. Bíkok pēng bô tôngì Tionghôa Jînbîn Kiōnghôkok ê tsi̍tê Tiongkok goântsik. Goán kútn̂g ílâi bô hun tóngphài itti̍t piàⁿsì tī Tâioân Kuanhēhuat, saⁿê liânha̍p kongpò kah la̍k hāng pótsèng tsíín ēbīn ê tsi̍tê Tiongkok tsèngtshik."Sêngjīn" tsi̍tê Tiongkok" sī kah Tiongkok kiànli̍p gōakau kuanhē ê kitshó͘. Tī tsitê tsèngtshik ēbīn, Bíkok sêngjīn Tiongkok, kah Tiongkok kiànkau jîtshiáⁿ tn̄gtsoán liáu kah Tâioân ê tsèngsik gōakau kuanhē. Tiongkok tsènghú kakī só͘ kóng ê "tsi̍tê Tiongkok" goântsik sī, Tâioân sī Tiongkok putkhó hunkuah ê tsi̍tpō͘hūn, kuibóe tio̍h kah Tiongkok tāilio̍k thóngit. Tānsī Bíkok piáusī tsi̍tê Tiongkok tsèngtshik pēng m̄ sī tùi pakkiaⁿ li̍ptiûⁿ ê jīnkhó, sūsi̍t siōng, tsokûi tsèngtshik ê tsi̍tpō͘hūn, Washington kah Tâioân itti̍t ū pótshî "liônghó ê hui kuaⁿhong" kuanhē, paukuat kèsio̍k hiòng Tâioân tshutsiū búkhì, pangtsō͘ Tâioân thêsing tsūōe lêngle̍k.

"Tâioân Kuanhēhuat" pēng bô iaukiû Bíkok tī Tâioân siū kongkik ê sî tio̍h kàiji̍p Tâioân ê hôngōe, kantāⁿ kuitēng Bíkok ìn hiòng Tâioân thêkiong tsūōe ê búkhì. Paukuat 特朗普 tsāilāi ê le̍kjīm Bíkok tsóngthóng lóng bat àmsī Bíkok ē ūi Tâioân lâi tsiàn, tānsī lóng thiau kang hâmhô͘ bô ài kóng tshingtshó.

Tsit piàn Bíkok拜登 tsóngthóng ti̍t kóng bêng kóng ē tshut ping póhō͘ Tâioân, sī piáubêng kuatsim. (220527)


Tsù,拜登　烏克蘭　普萊斯　特朗普　 tshiáⁿ liām Hôagí


Pe̍h-ōe-jī-pán/白話字版

《 Le̍k-sik toán-phêng 》　　 Lí Lâm-hêng

　 Tshut-ping pó-hō͘ Tâi-oân,拜登tsóng-thóng sī piáu-bêng kuat-sim!

　　 Bí-kok tsóng-thóng拜登 tsiū-jīm í-lâi, thâu-tsi̍t-piàn lâi A-tsiu hóng-būn. Gō͘-gue̍h jī-saⁿ,拜登tsóng-thóng kah Ji̍t-pún 岸田文雄（Kishida Fumio）siú-siòng tī liân-ha̍p kì-tsiá-hōe téng-bīn, siang-hong lóng têng-sin Tâi-oân an-tsoân ê tiōng-iàu-sèng. Ū tsi̍t ūi kì-tsiá mn̄g拜登tsóng-thóng,"siat-sú Tiong-kok ji̍p-tshim Tâi-oân, lí goān-ì ūi pó-hō͘ Tâi-oân kài-ji̍p kun-sū hêng-tōng bò͘?" 拜登 tsóng-thóng ti̍t-peh ìn kóng,"sī." Tsit ūi kì-tsiá koh tui mn̄g,"lí goān-ì?" 拜登 tsóng-thóng ìn kóng,"Tse sī goán tsò-kòe ê sêng-lo̍k."

　　拜登tsóng-thóng pēng bô tùi tsiah-ê ōe ū tsò siáⁿ-mi̍h suat-bêng a̍h sī têng-tshing. I tsit-ê sing-bêng hō͘ tsi̍t-kóa tī kì-tsiá-hōe hiān-tiûⁿ ê Bí-kok kuaⁿ-oân tio̍h-kiaⁿ, in bô siūⁿ-tio̍h tsóng-thóng ē piáu-ta̍t tshut tsiah-ni̍h ti̍t-tsiap tsiah-ni̍h pe̍h ê kuat-sim. Bí-kok it-hiòng kéng-kò Tiong-kok m̄-thang tùi Tâi-oân tāng-bú, tān-sī siat-sú nā huat-sing tsit tsióng tsōng-hóng ê sî, thêng-tō͘ siōng ē ū gōa tōa oân-tsō͘ Tâi-oân, Bí-kok khó-lêng sī ūi-tio̍h tsiàn-lio̍k ê bo̍k-tik, it-hiòng lóng sī hâm-hâm hô͘-hô͘, bông-bū bô tshing ê thāi-tō͘.

Pe̍h-kiong kian-tshî kóng拜登 tsóng-thóng pēng bô phah phòa tn̂g-kî í-lâi ê tsèng-tshik. Tse pēng m̄-sī拜登 tsóng-thóng thâu-tsi̍t piàn àm-sī Bí-kok beh ūi Tâi-oân lâi tsiàn, tān-sī i téng piàn huat-piáu lūi-sū giân-lūn ê sî, mûi-thé lóng kā khòaⁿ-tsoh sī tián-hêng ê拜登 sik "kháu gō͘". Tsit piàn mûi-thé ing-kai tsin tshing-tshó i sī kóng tsin-ê. I tī Tang-kiaⁿ kiông-tiāu kóng, tùi Tâi-oân ê ji̍p-tshim, ná tshiūⁿ 烏克蘭 tsiàn-tsing ê tsai-lān —— i goān-ì tshái-tshú koh khah tsē ê tshò-si lâi tsó͘-tsí tsit tiûⁿ tsai-lān ê huat-sing. I hit tong-sî hō͘ Gô-lô tsóng-thóng 浮丁siuⁿ-tsē lí-iû khì hoâi-gî Bí-kok tùi 烏克蘭ê tsi-tshî la̍t-thâu. Só͘-í i tsit piàn ài tùi Tiong-kok Xíjìnpíng tsú-se̍k kóng tshing-tshó.

　　 Bí-kok kah Tiong-kok tī "tsi̍t-ê Tiong-kok" téng-bīn ū jīn-ti siōng ê tsing-tsha. Bí-kok Kok-bū-īⁿ huat-giân-jîn 普萊斯（Ned Price）tī Twitter téng-bīn-siōng hoán-po̍k Tiong-kok kóng,"Tiong-hôa Jîn-bîn Kiōng-hô-kok kè-sio̍k kong-khai tshò-gō͘ biâu-su̍t Bí-kok ê tsèng-tshik. Bí-kok pēng bô tông-ì Tiong-hôa Jîn-bîn Kiōng-hô-kok ê tsi̍t-ê Tiong-kok goân-tsik. Goán kú-tn̂g í-lâi bô hun tóng-phài it-ti̍t piàⁿ-sì tī Tâi-oân Kuan-hē-huat, saⁿ-ê liân-ha̍p kong-pò kah la̍k hāng pó-tsèng tsí-ín ē-bīn ê tsi̍t-ê Tiong-kok tsèng-tshik."Sêng-jīn" tsi̍t-ê Tiong-kok" sī kah Tiong-kok kiàn-li̍p gōa-kau kuan-hē ê ki-tshó͘. Tī tsit-ê tsèng-tshik ē-bīn, Bí-kok sêng-jīn Tiong-kok, kah Tiong-kok kiàn-kau jî-tshiáⁿ tn̄g-tsoán liáu kah Tâi-oân ê tsèng-sik gōa-kau kuan-hē. Tiong-kok tsèng-hú ka-kī só͘ kóng ê "tsi̍t-ê Tiong-kok" goân-tsik sī, Tâi-oân sī Tiong-kok put-khó hun-kuah ê tsi̍t-pō͘-hūn, kui-bóe tio̍h kah Tiong-kok tāi-lio̍k thóng-it. Tān-sī Bí-kok piáu-sī tsi̍t-ê Tiong-kok tsèng-tshik pēng m̄ sī tùi pak-kiaⁿ li̍p-tiûⁿ ê jīn-khó, sū-si̍t siōng, tsok-ûi tsèng-tshik ê tsi̍t-pō͘-hūn, Washington kah Tâi-oân it-ti̍t ū pó-tshî "liông-hó ê hui kuaⁿ-hong" kuan-hē, pau-kuat kè-sio̍k hiòng Tâi-oân tshut-siū bú-khì, pang-tsō͘ Tâi-oân thê-sing tsū-ōe lêng-le̍k.

"Tâi-oân Kuan-hē-huat" pēng bô iau-kiû Bí-kok tī Tâi-oân siū kong-kik ê sî tio̍h kài-ji̍p Tâi-oân ê hông-ōe, kan-tāⁿ kui-tēng Bí-kok ìn hiòng Tâi-oân thê-kiong tsū-ōe ê bú-khì. Pau-kuat 特朗普 tsāi-lāi ê le̍k-jīm Bí-kok tsóng-thóng lóng bat àm-sī Bí-kok ē ūi Tâi-oân lâi tsiàn, tān-sī lóng thiau kang hâm-hô͘ bô ài kóng tshing-tshó.

Tsit piàn Bí-kok拜登 tsóng-thóng ti̍t kóng bêng kóng ē tshut ping pó-hō͘ Tâi-oân, sī piáu-bêng kuat-sim. (220527)


Tsù,拜登　烏克蘭　普萊斯　特朗普　 tshiáⁿ liām Hôa-gí


　　美國總統拜登就任以來，頭一遍來亞洲訪問。五月二三，拜登總統kah日本岸田文雄（Kishida Fumio）首相tī聯合記者會頂面，雙方lóng重申台灣安全ê重要性。有一位記者問拜登總統，「設使中國入侵台灣，你願意為保護台灣介入軍事行動嗎？」拜登總統直剖應講：「是。」Tsit位記者koh追問：「你願意？」拜登總統應講：「Tse是阮做過ê承諾。」

　　拜登總統並無對tsiah-ê話有做啥物說明a̍h是澄清。伊tsit-ê聲明hō͘一寡tī記者會現場ê美國官員tio̍h驚，in無想tio̍h總統會表達出tsiahni̍h直接tsiahni̍h白ê決心。美國一向警告中國m̄-thang對台灣動武，但是設使若發生tsit種狀況ê時，程度上會有gōa大援助台灣，美國可能是為tio̍h戰略ê目的，一向lóng是含含糊糊、濛霧無清ê態度。

白宫堅持講拜登總統並無打破長期以來ê政策。Tse並m̄是拜登總統頭一遍暗示美國beh為台灣來戰，但是伊頂遍發表類似言論ê時，媒體lóng kā看作是典型ê拜登式「口誤」。Tsit遍媒體應該真清楚伊是講真ê。他tī東京强调講，對台灣ê入侵，那像烏克蘭戰爭ê災難——伊願意採取koh khah tsē ê措施來阻止tsit場災難ê發生。伊hit當時hō͘俄羅總統浮丁siuⁿtsē理由去懷疑美國對烏克蘭ê支持力頭。所以伊tsit遍愛對中國習近平主席講清楚。

　　美國kah中國tī「一個中國」頂面有認知上ê增差。美國國務院發言人普萊斯（Ned Price）tīTwitter頂面上反駁中國講：「中華人民共和國繼續公開錯誤描述美國ê政策。美國並無同意中華人民共和國ê一個中國原則。阮久長以來無分黨派一直拼勢tī台灣關係法、三個聯合公報kah六項保證指引下面ê一個中國政策。」承認「一個中國」是kah中國建立外交關係ê基礎。Tītsit-ê政策下面，美國承認中國、kah中國建交而且斷絶了kah台灣ê正式外交關係。中國政府家己所講ê「一個中國」原則是，台灣是中國不可分割ê一部分，歸尾tio̍h kah中國大陸統一。但是美國表示一個中國政策並m̄是對北京立場ê認可，事實上，作為政策ê一部分，華盛頓kah台灣一直有保持「良好ê非官方」關係，包括繼續向台灣出售武器，幫助台灣提升自衛能力。

「台灣關係法」並無要求美國tī台灣受攻擊ê時tio̍h介入台灣ê防衛，干單規定美國應向台灣提供自衛ê武器。包括特朗普在内ê歷任美國總統lóng bat 暗示美國會為台灣來戰，但是lóng thiau工含糊無愛講清楚。

Tsit遍美國拜登總統直講明講會出兵保護台灣，是表明決心。 (220527)


註：拜登　　烏克蘭　　普萊斯　　特朗普　　　請唸華語