《綠色短評》

 | | | 轉寄

台灣音樂家鮑恆毅ê風骨！

作者 李南衡, TsoânTâijī/全台字 by Tsng Hūiphêng 2022.07.31

Tsoânbîn Tâioânjī pán/全民台灣字版簡稱TsoânTâiJī

《 Le̍ksik Toánphêng 》 Lí Lâmhêng


Tâioân imga̍k ka Pau Hênggē ê hongkut!

Tshitgue̍h tshetshit àm sinbûn pòtō, kiⁿî Tikkok kah Tiongkok khèngtsiok kiànkau 50 tsiunî, kok só͘tsāi lio̍ksio̍k ē kípān tsi̍tkóa kìliām imga̍khōe, Tâioân lú AU tsíhui ka Pau Hênggē tsòikīn ū tsiap tio̍h iauiok i tsi̍t tiûⁿ "Tiong Tik kiànkau tsiunî kìliām imga̍khōe" ê tsíhui, iautshiáⁿ tanūi kóng kiphiò tòasiok tsoân pau, koh thiaⁿkóng iántshut siālé tsiâⁿ tōa pau. Pau Hênggē kóng,"góa tongjiân tsin kámsiā in ū siūⁿtio̍h góa. Tsit kiāⁿ tāitsì Tiongkok ê li̍ptiûⁿ tongjiân jīnûi Tâioân ' kāngkhoán’ sikha̍p khèngtsiok, tānsī góa sī Tâioân lâng, góa siūⁿ góa bô sikha̍p." Pau Hênggē kóng,"suijiân tsit piàn iántshut ê kokka Tikkok sī góa siōng siūⁿ beh tsingtshú ê só͘tsāi, tānsī tiantò sī góa tse itsing kītsua̍t kòe siōng kín, kītsua̍t liáu siōng assari ê tsi̍t piàn iauiok. Siūⁿ kàu tsia, góa kámsiā ha̍kgia̍p tsòeāu tsi̍t nî pòaⁿ, góa ê kokka Tâioân/ Tionghôa Bînkok Kàuio̍kpō͘ liûha̍k tsióngha̍kkim kā góa ê tsaipôe. "Só͘í Pau Hênggē sûisî tsin khehkhì kā kītsua̍t, jîtshiáⁿ tsiâⁿ ū hongtō͘ kā iauiok kàisiāu hō͘ i ê lēnggōa tsi̍t ūi Tiongkok pêngiú. I kóng,"Tsitsìlâng nāsī ū kihōe kiàntsèng tio̍h Tâi Tik kiànkau, tsúnkóng bô jīmhô pòsiúⁿ, mā huaⁿhí beh khì tàu puaⁿ íá, tàu giâ phó͘kè, ē tàng hōnghiàn kakī siósió ê khùila̍t."

　　 Kiⁿî saⁿtsa̍p hòe ê Pau Hênggē sī phêⁿô͘ lâng,Máking kotiong pitgia̍p liáu khó ji̍p Kokli̍p Tāipak Kàuio̍k Tāiha̍k imga̍khē, 2014 nî pitgia̍p, 2016 nî khì Austria Ûṳāla̍p Kokli̍p Imga̍k kah Piáuián Gēsu̍t Tāiha̍k kongtha̍k koánhiânga̍k tsíhui kah ha̍p tshiùⁿ tsíhui siang se̍ksū. Ū tittio̍h kai tāiha̍k koánhiânga̍k tsíhui tsòiko iántsàu bûnpêng, bat tī Ûṳāla̍p Jînbîn Kuakio̍kīⁿ téng Kio̍kīⁿ tamjīm tsō͘lí tsíhui. 2019 nî tsa̍pjīgue̍h tsa̍pgō͘, tī Pholân tshamka tē 8 kài "Towards Polyphony" koktsè ha̍ptshiùⁿ tsíhui tōasài, i tsi̍t hētshiú tittio̍h thâutsióng, Siōnghó Monteverdi Tshuansiktsióng, Siōnghó Hiāntāi Imga̍k Tshuansiktsióng íki̍p Siōnghó Pholân Tsokphín Tshuansiktsióng téng kúi hāng tōatsióng. Suijiân i koktsik tsùbêng "Tâioân/Austria", tānsī tsúpān tanūi kuaⁿhong bīntsheh tah tô͘ piausī "Tâioân lâi ê Pau Hênggē". Hit nî saⁿgue̍h i tī Slovenia ê Aegis Carminis Koktsè Ha̍ptshiùⁿ Tsíhui Tōasài tittio̍h tē 2 miâ, Siōnghó Slovenia Tsokphín Tshuansik tsióng, kâng nî tshitgue̍h, i tī Romania tittio̍h tē 2 kài Butsarest Imga̍k Ha̍kīⁿ Koktsè Tsíhui Tōasài Te̍kpia̍t tsióng. 2019 nî ēsái kóng sī Pau Hênggē tōa hongsiu ê tsi̍t nî. 2021 nî saⁿgue̍h tsa̍pit tsì tsa̍psì, siū iautshiáⁿ khì Slovenia tamjīm Koktsè Tshingliân Imga̍ktseh kah sái sū tsùtseh kángsu.

　　Pau Hênggē suijiân kheh ku háigōa, tānsī i bô kā kò͘hiong Tâioân pàng bē kìtit. Kūnî (2021) tsa̍pitgue̍h jītsa̍p, Pau Hênggē í Khehsik Tsíhui sinhūn kah Tāipak Siklāi Ha̍ptshiùⁿthoân, tī Kokka Iántsàuthiaⁿ kiōngtông oânsêng 《 Si kah Kua ê Tongtāi Hôehiáng 》Imga̍khōe, tse sī iû tshit pō͘ í tongtāi Tâioân sijîn sitsoh phó͘khik ê tongtāi ha̍ptshiùⁿ tsokphín. Kiⁿî pehgue̍h jīpeh tsì saⁿtsa̍p it, Pau Hênggē ē tī Kohiông Ūibúiâⁿ Kokka Gēsu̍t Bûnhòa Tiongsim Imga̍kthiaⁿ, kah Tāipak Siklāi Ha̍ptshiùⁿthoân piáuián 《 Huathiān ‧ American》 imga̍khōe.

Tâioân ē tàng ū Pau Hênggē tsiahni̍h kia̍ttshut, tsiahni̍h ū hongkut ê imga̍kka, lán Tâioân lâng si̍ttsāi tsin huaⁿhí! 　　(220722)


Pe̍h-ōe-jī-pán/白話字版


《 Le̍k-sik Toán-phêng 》 Lí Lâm-hêng


Tâi-oân im-ga̍k -ka Pau Hêng-gē ê hong-kut!

Tshit-gue̍h tshe-tshit àm sin-bûn pò-tō, kin-nî Tik-kok kah Tiong-kok khèng-tsiok kiàn-kau 50 tsiu-nî, kok só͘-tsāi lio̍k-sio̍k ē kí-pān tsi̍t-kóa kì-liām im-ga̍k-hōe, Tâi-oân lú AU tsí-hui -ka Pau Hêng-gē tsòe-kīn ū tsiap tio̍h iau-iok i tsi̍t tiûⁿ "Tiong Tik kiàn-kau tsiu-nî kì-liām im-ga̍k-hōe" ê tsí-hui, iau-tshiáⁿ tan-ūi kóng ki-phiò tòa-siok tsoân pau, koh thiaⁿ-kóng ián-tshut siā-lé tsiâⁿ tōa pau. Pau Hêng-gē kóng,"góa tong-jiân tsin kám-siā in ū siūⁿ-tio̍h góa. Tsit kiāⁿ tāi-tsì Tiong-kok ê li̍p-tiûⁿ tong-jiân jīn-ûi Tâi-oân ' kāng-khoán’ sik-ha̍p khèng-tsiok, tān-sī góa sī Tâi-oân lâng, góa siūⁿ góa bô sik-ha̍p." Pau Hêng-gē kóng,"sui-jiân tsit piàn ián-tshut ê kok-ka Tik-kok sī góa siōng siūⁿ beh tsing-tshú ê só͘-tsāi, tān-sī tian-tò sī góa tse it-sing kī-tsua̍t kòe siōng kín, kī-tsua̍t liáu siōng assari ê tsi̍t piàn iau-iok. Siūⁿ kàu tsia, góa kám-siā ha̍k-gia̍p tsòe-āu tsi̍t nî pòaⁿ, góa ê kok-ka Tâi-oân/ Tiong-hôa Bîn-kok Kàu-io̍k-pō͘ liû-ha̍k tsióng-ha̍k-kim kā góa ê tsai-pôe. "Só͘-í Pau Hêng-gē sûi-sî tsin kheh-khì kā kī-tsua̍t, jî-tshiáⁿ tsiâⁿ ū hong-tō͘ kā iau-iok kài-siāu hō͘ i ê lēng-gōa tsi̍t ūi Tiong-kok pêng-iú. I kóng,"Tsit-sì-lâng nā-sī ū ki-hōe kiàn-tsèng tio̍h Tâi Tik kiàn-kau, tsún-kóng bô jīm-hô pò-siúⁿ, mā huaⁿ-hí beh khì tàu puaⁿ í-á, tàu giâ phó͘-kè, ē tàng hōng-hiàn ka-kī sió-sió ê khùi-la̍t."

　　 Kin-nî saⁿ-tsa̍p hòe ê Pau Hêng-gē sī phêⁿ-ô͘ lâng,Má-king ko-tiong pit-gia̍p liáu khó ji̍p Kok-li̍p Tāi-pak Kàu-io̍k Tāi-ha̍k im-ga̍k-hē, 2014 nî pit-gia̍p, 2016 nî khì Austria Ûi-iā-la̍p Kok-li̍p Im-ga̍k kah Piáu-ián Gē-su̍t Tāi-ha̍k kong-tha̍k koán-hiân-ga̍k tsí-hui kah ha̍p tshiùⁿ tsí-hui siang se̍k-sū. Ū tit-tio̍h kai tāi-ha̍k koán-hiân-ga̍k tsí-hui tsòe-ko ián-tsàu bûn-pêng, bat tī Ûi-iā-la̍p Jîn-bîn Kua-kio̍k-īⁿ téng Kio̍k-īⁿ tam-jīm tsō͘-lí tsí-hui. 2019 nî tsa̍p-jī-gue̍h tsa̍p-gō͘, tī Pho-lân tsham-ka tē 8 kài "Towards Polyphony" kok-tsè ha̍p-tshiùⁿ tsí-hui tōa-sài, i tsi̍t hē-tshiú tit-tio̍h thâu-tsióng, Siōng-hó Monteverdi Tshuan-sik-tsióng, Siōng-hó Hiān-tāi Im-ga̍k Tshuan-sik-tsióng í-ki̍p Siōng-hó Pho-lân Tsok-phín Tshuan-sik-tsióng téng kúi hāng tōa-tsióng. Sui-jiân i kok-tsik tsù-bêng "Tâi-oân/Austria", tān-sī tsú-pān tan-ūi kuaⁿ-hong bīn-tsheh tah tô͘ piau-sī "Tâi-oân lâi ê Pau Hêng-gē". Hit nî saⁿ-gue̍h i tī Slovenia ê Aegis Carminis Kok-tsè Ha̍p-tshiùⁿ Tsí-hui Tōa-sài tit-tio̍h tē 2 miâ, Siōng-hó Slovenia Tsok-phín Tshuan-sik- tsióng, kâng nî tshit-gue̍h, i tī Romania tit-tio̍h tē 2 kài Butsarest Im-ga̍k Ha̍k-īⁿ Kok-tsè Tsí-hui Tōa-sài Te̍k-pia̍t- tsióng. 2019 nî ē-sái kóng sī Pau Hêng-gē tōa hong-siu ê tsi̍t nî. 2021 nî saⁿ-gue̍h tsa̍p-it tsì tsa̍p-sì, siū iau-tshiáⁿ khì Slovenia tam-jīm Kok-tsè Tshing-liân Im-ga̍k-tseh kah sái- sū tsù-tseh káng-su.

　　Pau Hêng-gē sui-jiân kheh ku hái-gōa, tān-sī i bô kā kò͘-hiong Tâi-oân pàng bē kì-tit. Kū-nî (2021) tsa̍p-it-gue̍h jī-tsa̍p, Pau Hêng-gē í Kheh-sik Tsí-hui sin-hūn kah Tāi-pak Sik-lāi Ha̍p-tshiùⁿ-thoân, tī Kok-ka Ián-tsàu-thiaⁿ kiōng-tông oân-sêng 《 Si kah Kua ê Tong-tāi Hôe-hiáng 》Im-ga̍k-hōe, tse sī iû tshit pō͘ í tong-tāi Tâi-oân si-jîn si-tsoh phó͘-khik ê tong-tāi ha̍p-tshiùⁿ tsok-phín. Kin-nî peh-gue̍h jī-peh tsì saⁿ-tsa̍p it, Pau Hêng-gē ē tī Ko-hiông Ūi-bú-iâⁿ Kok-ka Gē-su̍t Bûn-hòa Tiong-sim Im-ga̍k-thiaⁿ, kah Tāi-pak Sik-lāi Ha̍p-tshiùⁿ-thoân piáu-ián 《 Huat-hiān ‧ American》 im-ga̍k-hōe.

Tâi-oân ē tàng ū Pau Hêng-gē tsiah-ni̍h kia̍t-tshut, tsiah-ni̍h ū hong-kut ê im-ga̍k-ka, lán Tâi-oân lâng si̍t-tsāi tsin huaⁿ-hí! 　　(220722)



七月初七暗新聞報導，今年德國kah中國慶祝建交50週年，各所在陸續會舉辦一寡紀念音樂會，台灣旅歐指揮家鮑恆毅最近有接tio̍h邀約伊一場「中德建交週年紀念音樂會」ê指揮，邀請單位講機票住宿（tòa-siok）全包，koh聽講演出謝禮tsiâⁿ大包。鮑恆毅講：「我當然真感謝in有想tio̍h我。Tsit件tāi-tsì中國ê立場當然認為台灣『仝款』適合慶祝，但是我是台灣人，我想我不適合。」鮑恆毅講，「雖然tsit遍演出ê國家德國是我上想beh爭取ê所在，但是顚倒是我tse一生拒絕過上緊、拒絕了上assari（阿沙力）ê一遍邀約。想到tsia，我感謝學業最後一年半，我ê國家台灣／中華民國教育部留學獎學金kā我ê栽培。」所以鮑恆毅隨時真客氣kā拒絕，而且tsiâⁿ有風度kā邀約介紹hō͘伊ê另外一位中國朋友。伊講，「Tsit世人若是有機會見證tio̍h台德建交，準講無任何報償，mā 歡喜beh去鬥搬椅á、鬥夯譜架，會tàng奉獻家己小小ê氣力。」

　　今年三十歲ê鮑恆毅是澎湖人，馬公（Má-king）高中畢業了考入國立台北教育大學音樂系，2014年畢業，2016年去奧地利維也納國立音樂kah表演藝術大學攻讀管絃樂指揮kah合唱指揮雙碩士。有得tio̍h該大學管絃樂指揮最高演奏文憑，bat tī維也納人民歌劇院等劇院擔任助理指揮。2019年十二月十五，tī波蘭參加第8屆「Towards Polyphony」國際合唱指揮大賽，伊一下手得tio̍h頭獎、最佳蒙台威爾第詮釋獎、最佳現代音樂詮釋獎以及最佳波蘭作品詮釋獎等幾項大獎。雖然伊國籍註明「台灣∕奧地利」，但是主辦單位官方面冊貼圖標示「台灣來ê鮑恆毅」。Hit年三月伊tīSlovenia ê Aegis carminis國際合唱指揮大賽得tio̍h第2名、最佳Slovenia作品詮釋獎，仝年七月，伊tīRomania得tio̍h第2屆布加勒斯特（Butsarest）音樂學院國際指揮大賽特別獎。2019年ē-sái講是鮑恆毅大豐收ê一年。2021年三月十一至十四，受邀請去Slovenia擔任國際青年音樂節kah賽事駐節講師。

　　鮑恆毅雖然客居海外，但是伊無kā故鄉台灣放bē記得。舊年（2021）十一月二十，鮑恆毅以客席指揮身分kah台北室內合唱團，tī國家演奏廳共同完成《詩kah歌ê當代迴響》音樂會，tse是由七部以當代台灣詩人詩作譜曲ê當代合唱作品。今年八月二八至三十一，鮑恆毅會tī高雄衛武營國家藝術文化中心音樂廳，kah台北室內合唱團表演《發現‧亞美利堅》音樂會。

台灣會tàng有鮑恆毅tsiah-nih傑出、tsiah-nih有風骨ê音樂家，咱台灣人實在真歡喜！　　(220722)