《綠色短評》

 | | | 轉寄

無知，koh-beh罵人，實在可惡！

作者 李南衡, TsoânTâijī/全台字 by Tsng Hūiphêng 2022.09.04

Tsoânbîn Tâioânjī pán/全民台灣字版簡稱TsoânTâiJī

《 Le̍ksik Toánphêng 》　　 Lí Lâmhêng

　　　　 Bûti, kohbeh mē lâng, si̍ttsāi khóò͘ !

　 Pehgue̍h jīit, Tiongkok Kokbîntóng Tâipak tshīgīoân 徐巧芯 ittsài phàuhong Bîntsìntóng Tâipak tshītiúⁿ tshamsoánjîn, Tsiân Ōehokpō͘tiúⁿ Tân Sîtiong pō͘tiúⁿ bô kongpò͘ e̍kbiâu tsháikáng lāṳông. I tī bīntsheh téngbīn piáusī, tsêng kúi kang tsiah kóng Tân Sîtiong pō͘tiúⁿ ê "kongkhai thàubêng" sī tsi̍tê tshiòōe, bô kúi kang tio̍h piak tshut i ê e̍kbiâu tsháikáng kèkeh kèngjiân lia̍t tsoh "kibi̍t" tio̍h hongtsûn 30 nî, kàu kái bi̍t ê sî Tân Sîtiong pō͘tiúⁿ íking beh 100 hòe ah. 徐巧芯 gīoân kóng Ji̍tpún tsènghú Tsâibūséng kiⁿî sìgue̍h tio̍h íking kongpò͘, e̍kbiâu tsháikáng kah paukuat phòesàng kàu tsoân kéng téng hùṳōng, pêngkin tsi̍t tse iok sintâipè 622 kho͘, io̍h tshiúⁿ, tsóng hùṳōng lóng tsa̍phun tshingtshó, jîtshiáⁿ Hônghái tshòngpānjîn Kueh Tâibêng tsháikáng BⁿT mā ū kangkhai kèkeh, kaⁿā Tân Sîtiong pō͘tiúⁿ kóng póbi̍t 30 nî.

Tâipaktshī hù tshītiúⁿ, tsit piàn Tâipak tshītiúⁿ tsham soánjîn N̂g Sansan mā jīnûi, tûliáu Ji̍tpún kongkhai ígōa, Hônghái tshòngpānjîn Kueh Tâibêng mā kóng kòe ēng jōatsē tsîⁿ, Tâipaktshī tsènghú kūnî pianlia̍t 28 ik beh bé e̍kbiâu tsháikáng ūsoàn mā ū sûnkè, hiánsī kètsîⁿ pēng m̄ sī kibi̍t, tshiàng Bîntsìntóng Tâipak tshītiúⁿ tshamsoánjîn Tân Sîtiong pō͘tiúⁿ "ēng jōatsē tsîⁿ kā jînbîn kóng kám tsiahni̍h khùnlân?"

Hông kingthé sī tsit piàn Tâipak tshītiúⁿ tēsì ūi tshamsoánjîn, sin kiam Bîntsiòngtóng tsúse̍k ê Tâipak tshītiúⁿ Kua Bûntiat, tī Kohiông tsiapsiū hóngbūn ê sî tōatōa khausé Tân Sîtiong pō͘tiúⁿ kóng "bé hiah tsē e̍kbiâu, tshiamiok íāu tio̍h bēsái kongkhai, kám ū siáⁿmi̍h bē kìⁿ tit tsèng ê tāitsì?"

　　 Puehgue̍h jīit, tsiamtùi Tâipak tshīgīoân徐巧芯ê tsitgî, Tân Sîtiong pō͘tiúⁿ kóng "gīoân phuephêng tio̍h ài kinkì sūsi̍t", tsoân sèkài m̄ sī kaⁿā Ji̍tpún tsi̍tê kokka, Tâioân, Ji̍tpún kongpò͘ ê sī kāngkhoán, ēng jōatsē tsîⁿ, tsìn jōatsē e̍kbiâu téng, pauhâm ūnhùi, lénglēng tshngtû ê bu̍tliû khaisiau téng. Tân Sîtiong pō͘tiúⁿ tsiap lo̍hkhì kóng, tsátsêng tī Li̍phuatīⁿ, Símkè tanūi lóng ū pòkò kui pit e̍kbiâu tsháikáng ê khaisiau,Hônghái mā sī kui pit, bē sái kóngtshut tankè, ittēng tio̍h siámkhui.

　　 Kóng paukuat Kua Bûntiat isu tsāilāi in tsiahê lâng bûti, sī in m̄tsai iáⁿ io̍hphín kah e̍kbiâu tankè sī huisiông giâmkeh ê sionggia̍p pìbi̍t. Tsènghú kaⁿā ē siá kóng lóng tsóng khai jōatsē tsîⁿ, tsua̍ttùi bē sái kóngtshut tamkè.

Bîntsìntóng Tâipaktshī gīoân tshamsoánjîn「口譯哥」Tiō îsiông piáusī, Pílīsî tī 2020 nî tsa̍pjīgue̍h tsa̍ppeh kongkhai e̍kbiâu kèkeh ínkhí tsinggī, tsâitsèng pō͘tiúⁿ Te Pulikhoh(De Bleiker) lúsū bô tsùì tī “Twitter” huat bûn siátshut Aubêng bé ê kok tsióng e̍kbiâu ê tankè liáuāu, huathiān m̄tio̍h sûisî santiāu kín hōe sitlé, tānsī BⁿT téng io̍htshiúⁿ iûgoân m̄ pàng i suah, mē kah tshàuthâu. Inūi ánne sī ûihoán siongbū ha̍piok ê hêngûi, sīmtsì "khólêng ē sionghāi tio̍h kakī ê tsènghú". Tiō îsiông kiôngtiāu, kongkhai tsènghú tsháikáng ha̍piok sī lísióng, tānsī tī hiānsi̍t sèkài biānlîm sionggia̍p kibi̍t ê sî, tsènghú éngoán kā jînbîn kiānkhong kǹg tī tēit ūi, sī hū tsikjīm tsènghú ingkai tsò ê. Beh kongkhai e̍kbiâu tankè tsin kántan, tānsī tsènghú sìniōng ē oântsoân phah pháiⁿ, beh koh bé e̍kbiâu khióngkiaⁿ ū khùnlân,

　　Ánne, lán tio̍h tsaiiáⁿ, bûti, kohbeh mē lâng, si̍ttsāi khóò͘ ! 　(220826)

Tsù, 徐巧芯 「口譯哥」趙怡翔 tshiáⁿ liām Hôagí i ê sèⁿmiâ ke liām tsi̍t piàn Tâigí hō͘ i tshutmiâ.


Pe̍h-ōe-jī-pán/白話字版

《 Le̍k-sik Toán-phêng 》　　 Lí Lâm-hêng

　　　　 Bû-ti, koh-beh mē lâng, si̍t-tsāi khó-ò͘ !

　 Peh-gue̍h jī-it, Tiong-kok Kok-bîn-tóng Tâi-pak tshī-gī-oân 徐巧芯 it-tsài phàu-hong Bîn-tsìn-tóng Tâi-pak tshī-tiúⁿ tsham-soán-jîn, Tsiân Ōe-hok-pō͘-tiúⁿ Tân Sî-tiong pō͘-tiúⁿ bô kong-pò͘ e̍k-biâu tshái-káng lāi-iông. I tī bīn-tsheh téng-bīn piáu-sī, tsêng kúi kang tsiah kóng Tân Sî-tiong pō͘-tiúⁿ ê "kong-khai thàu-bêng" sī tsi̍t-ê tshiò-ōe, bô kúi kang tio̍h piak tshut i ê e̍k-biâu tshái-káng kè-keh kèng-jiân lia̍t tsoh "ki-bi̍t" tio̍h hong-tsûn 30 nî, kàu kái bi̍t ê sî Tân Sî-tiong pō͘-tiúⁿ í-king beh 100 hòe ah. 徐巧芯 gī-oân kóng Ji̍t-pún tsèng-hú Tsâi-bū-séng kin-nî sì-gue̍h tio̍h í-king kong-pò͘, e̍k-biâu tshái-káng kah pau-kuat phòe-sàng kàu tsoân kéng téng hùi-iōng, pêng-kin tsi̍t tse iok sin-tâi-pè 622 kho͘, io̍h tshiúⁿ, tsóng hùi-iōng lóng tsa̍p-hun tshing-tshó, jî-tshiáⁿ Hông-hái tshòng-pān-jîn Kueh Tâi-bêng tshái-káng BⁿT mā ū kang-khai kè-keh, kan-nā Tân Sî-tiong pō͘-tiúⁿ kóng pó-bi̍t 30 nî.

Tâi-pak-tshī hù tshī-tiúⁿ, tsit piàn Tâi-pak tshī-tiúⁿ tsham- soán-jîn N̂g San-san mā jīn-ûi, tû-liáu Ji̍t-pún kong-khai í-gōa, Hông-hái tshòng-pān-jîn Kueh Tâi-bêng mā kóng kòe ēng jōa-tsē tsîⁿ, Tâi-pak-tshī tsèng-hú kū-nî pian-lia̍t 28 ik beh bé e̍k-biâu tshái-káng ū-soàn mā ū sûn-kè, hián-sī kè-tsîⁿ pēng m̄ sī ki-bi̍t, tshiàng Bîn-tsìn-tóng Tâi-pak tshī-tiúⁿ tsham-soán-jîn Tân Sî-tiong pō͘-tiúⁿ "ēng jōa-tsē tsîⁿ kā jîn-bîn kóng kám tsiah-ni̍h khùn-lân?"

Hông king-thé sī tsit piàn Tâi-pak tshī-tiúⁿ tē-sì ūi tsham-soán-jîn, sin kiam Bîn-tsiòng-tóng tsú-se̍k ê Tâi-pak tshī-tiúⁿ Kua Bûn-tiat, tī Ko-hiông tsiap-siū hóng-būn ê sî tōa-tōa khau-sé Tân Sî-tiong pō͘-tiúⁿ kóng "bé hiah tsē e̍k-biâu, tshiam-iok í-āu tio̍h bē-sái kong-khai, kám ū siáⁿ-mi̍h bē kìⁿ tit tsèng ê tāi-tsì?"

　　 Pueh-gue̍h jī-it, tsiam-tùi Tâi-pak tshī-gī-oân徐巧芯ê tsit-gî, Tân Sî-tiong pō͘-tiúⁿ kóng "gī-oân phue-phêng tio̍h ài kin-kì sū-si̍t", tsoân sè-kài m̄ sī kan-nā Ji̍t-pún tsi̍t-ê kok-ka, Tâi-oân, Ji̍t-pún kong-pò͘ ê sī kāng-khoán, ēng jōa-tsē tsîⁿ, tsìn jōa-tsē e̍k-biâu téng, pau-hâm ūn-hùi, léng-lēng tshng-tû ê bu̍t-liû khai-siau téng. Tân Sî-tiong pō͘-tiúⁿ tsiap lo̍h-khì kóng, tsá-tsêng tī Li̍p-huat-īⁿ, Sím-kè tan-ūi lóng ū pò-kò kui pit e̍k-biâu tshái-káng ê khai-siau,Hông-hái mā sī kui pit, bē sái kóng-tshut tan-kè, it-tēng tio̍h siám-khui.

　　 Kóng pau-kuat Kua Bûn-tiat i-su tsāi-lāi in tsiah-ê lâng bû-ti, sī in m̄-tsai iáⁿ io̍h-phín kah e̍k-biâu tan-kè sī hui-siông giâm-keh ê siong-gia̍p pì-bi̍t. Tsèng-hú kan-nā ē siá kóng lóng tsóng khai jōa-tsē tsîⁿ, tsua̍t-tùi bē sái kóng-tshut tam-kè.

Bîn-tsìn-tóng Tâi-pak-tshī gī-oân tsham-soán-jîn「口譯哥」Tiō î-siông piáu-sī, Pí-lī-sî tī 2020 nî tsa̍p-jī-gue̍h tsa̍p-peh kong-khai e̍k-biâu kè-keh ín-khí tsing-gī, tsâi-tsèng pō͘-tiúⁿ Te Pulikhoh(De Bleiker) lú-sū bô tsù-ì tī “Twitter” huat bûn siá-tshut Au-bêng bé ê kok tsióng e̍k-biâu ê tan-kè liáu-āu, huat-hiān m̄-tio̍h sûi-sî san-tiāu kín hōe sit-lé, tān-sī BⁿT téng io̍h-tshiúⁿ iû-goân m̄ pàng i suah, mē kah tshàu-thâu. In-ūi án-ne sī ûi-hoán siong-bū ha̍p-iok ê hêng-ûi, sīm-tsì "khó-lêng ē siong-hāi tio̍h ka-kī ê tsèng-hú". Tiō î-siông kiông-tiāu, kong-khai tsèng-hú tshái-káng ha̍p-iok sī lí-sióng, tān-sī tī hiān-si̍t sè-kài biān-lîm siong-gia̍p ki-bi̍t ê sî, tsèng-hú éng-oán kā jîn-bîn kiān-khong kǹg tī tē-it ūi, sī hū tsik-jīm tsèng-hú ing-kai tsò ê. Beh kong-khai e̍k-biâu tan-kè tsin kán-tan, tān-sī tsèng-hú sìn-iōng ē oân-tsoân phah pháiⁿ, beh koh bé e̍k-biâu khióng-kiaⁿ ū khùn-lân,

　　Án-ne, lán tio̍h tsai-iáⁿ, bû-ti, koh-beh mē lâng, si̍t-tsāi khó-ò͘ ! 　(220826)

Tsù, 徐巧芯 「口譯哥」趙怡翔 tshiáⁿ liām Hôa-gí i ê sèⁿ-miâ ke liām tsi̍t piàn Tâi-gí hō͘ i tshut-miâ.




　　八月二一，中國國民黨台北市議員徐巧芯一再砲轟民進黨台北市長參選人、前衛福部長陳時中無公佈疫苗採購內容。伊tī面冊頂面表示，前幾工才講陳時中ê「公開透明」是一個笑話，無幾工tio̍h piak出伊ê疫苗採購價格竟然列作「機密」tio̍h封存30年，到解密ê時陳時中已經beh 100歲ah。徐巧芯議員講日本政府財務省今年四月tio̍h已經公布，疫苗採購kah包括配送到全境等費用，平均一劑約新台幣622元，藥廠、總費用lóng十分清楚，而且鴻海創辦人郭台銘採購BⁿT mā有公開價格，kan-nā陳時中講保密30年。

台北市副市長、tsit遍台北市長參選人黃珊珊mā認為，除了日本公開以外，鴻海創辦人郭台銘mā講過用jōa-tsē錢，台北市政府舊年編列28億beh買疫苗採購預算mā有詢價，顯示價錢並m̄是機密，唱民進黨台北市長參選人陳時中「用jōa-tsē錢kā人民講kám有tsiah-ni̍h困難？」

Hông供体（king-thé）是tsit遍台北市長第四位參選人、身兼民眾黨主席ê台北市長柯文哲，tī高雄接受訪問ê時大大khau-sé陳時中講「買hiahtsē疫苗，簽約以後tio̍h bē-sái公開，kám有啥物bē見得眾ê代誌？」

　　八月二一，針對台北市議員徐巧芯ê質疑，陳時中講「議員批評tio̍h愛根據事實」，全世界m̄是kan-nā日本一個國家，台灣、日本公布ê是仝款，用jōatsē錢、進jōatsē疫苗等，包含運費、冷鏈倉儲ê物流開銷等。陳時中接落去講，早前tī立法院、審計單位lóng有報告kui筆疫苗採購ê開銷，鴻海mā是kui筆，bē sái講出單價、一定tio̍h閃開。

　　講包括柯文哲醫師在內in tsiah-ê人無知，是in m̄知影藥品kah疫苗單價是非常嚴格ê商業秘密。政府kan-nāēsiá講lóng總開jōatsē錢，絕對bē sái講出單價。

民進黨台北市議員參選人「口譯哥」趙怡翔Tiō Yî-siông表示，比利時tī 2020年十二月十八公開疫苗價格引起爭議，財政部長Te Pulikhoh（De Bleiker）女士無注意tī“Twitter”發文寫出歐盟買ê各種疫苗ê單價了後，發現m̄-tio̍h隨時刪掉緊會失禮，但是輝瑞（BⁿT）等藥廠猶原m̄放伊suah、罵kah臭頭。因為án-ne是違反商務合約ê行為，甚至「可能ē傷害tio̍h家己ê政府」。趙怡翔Tiō Yî-siông強調，公開政府採購合約是理想，但是tī現實世界面臨商業機密ê時，政府永遠kā人民健康kǹgtī第一位，是負責任政府應該做ê。Beh公開疫苗單價真簡單，但是政府信用ē完全拍pháiⁿ，beh koh買疫苗恐驚有困難。

　　Án-ne，咱tio̍h知影，無知，koh-beh罵人，實在可惡！　(220826)

註：徐巧芯　　「口譯哥」趙怡翔　　請唸華語　　伊ê姓名　加唸一遍台語 　　Hō͘伊出名。