《綠色短評》

 | | | 轉寄

中國無人機實在是皮tsiūⁿ，欠拍！

作者 李南衡, TsoânTâijī/全台字 by Tsng Hūiphêng 2022.09.18

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　 Lí Lâmhêng

　　　　　　 Tiongkok bôlângki si̍ttsāi sī phôetsiūⁿ, khiàm phah!

Pehgue̍h tshejī, Bíkok Liânpang Tsiònggīīⁿ gītiúⁿ Phelosi (Nancy Pelosi) sūnlī tshōa thoân hóngbūn Tâioân, Tiongkok tsó͘tòng bô hāu, kiànsiàu tńg siūkhì, ùi pehgue̍h tshesì tiongtàu kàu tshetshit tiongtàu, tī Tâioân sìkho͘ûi la̍kê háie̍k tsìnhêng huitôaⁿ si̍ttôaⁿ iánsi̍p liáuāu, tī Tiongkok kok háihōaⁿ si̍tsi si̍t tôaⁿ iánsi̍p. Tsit tiongkan, Tiongkok khaisí ēng bôlângki jiáuloān Κimmn̂g Lia̍ttó, pehgue̍h tshetshit àm thâu tsi̍ttsiah Tiongkok bôlângki puelâi Κimmn̂g jiáuloān, tējī àm koh puelâi tsi̍t tsiah. Pehgue̍h tshikáu àm tsi̍t tsiah bôlângki puelâi Tsio̍htiāⁿtó, pehgue̍h tsa̍pla̍k ēpo͘ tsi̍t tsiah puelâi Jītáⁿ, kokkun ēng tsio̍hthâu kā khian, bôlângki ū hip tio̍h tsitê kiàⁿthâu, tī Tiongkok ê bānglō͘ itti̍t pòtshut. Pehgue̍h jītshit, tsi̍t tsiah bôlângki puelâi Lia̍tsū, pehgue̍h jīkáu ēpo͘, tsi̍t tsiah bôlângki puelâi Saisū. Tiongkok bôlângki puelâi Κimmn̂g Lia̍ttó nátshiūⁿ teh kiâⁿ tsàukha.

　 Pehgue̍h jīkáu. Tiongkok gōakaupō͘ kìtsiáhōe, ū kìtsiá mn̄g khí Tiongkok bôlângki pue khì Κimmn̂g hipsiōng tsit kiāⁿ tāitsì, Tiongkok gōakau pō͘ huatgiânjîn Tiō Li̍pkian kóng,"Tiongkok ê bôlângki tī Tiongkok ê niáthó͘ téng thâu pue tsi̍tē, ū siáⁿmi̍h ta̍ttit tōakiaⁿsiókoài? " kâng tsi̍t ji̍t, Tâipak tshītiúⁿ Kua Bûntiat kóng " góa bē sitkhùi kah ēng tsio̍hthâu khian bôlângki, tsá tio̍h giâ tshèng kā phahlo̍hlâi." lâng mn̄g kóng, nāsī lí tsò tsóngthóng kám ē kā Kiōngki phah lo̍hlâi? Kua Bûntiat ìn kóng :,"góa ē bē m̄tsai, tānsī 小英 khaktēng bô huattō͘."

Pehgue̍h saⁿtsa̍p ēpo͘, Tshòa Ingbûn tsóngthóng sītō háikun 146 Kàmtūi liáuāu tì sû, tsítshut kīnlâi Tiongkok Káihòngkun kunián liáuāu ēng bôlângki tshimjiáu téng "phúsik tētài" tshiongtu̍t ê tshiúhuat, i ho͘io̍k ta̍kê "tikkun jú tshiàngtù, lán tio̍h jú léngtsēng. Lán bē hō͘ tùihōaⁿ ū puttong ê tsiàkháu lâi tsètsō tshiongtu̍t, lán bē thiaukhí tsiàntuan, lán tsūngó͘ khiktsè, tānsī pēng m̄ sī piáusī lán bē hoántsè." i íking hālēng Kokhôngpō͘, tī siktòng ê sîtsūn tsháitshú pitiàu jîtshiáⁿ kiông koh ūla̍t ê hoántsè tshòsi, siúhō͘ kokka niákhong ê antsoân.

Pehgue̍h saⁿtsa̍p ēpo͘ gō͘ tiám 59 hun, tsi̍t tsiah Tiongkok bôlângki puelâi Jītáⁿ, kokkun kéngkò bô hāu, khui tshèng kā phah bô phah tio̍h. Tse sī "Patpehsaⁿ Phàutsiàn" 1979 nî tsiaⁿgue̍h tsheit tsèngsik thênghóe 43 nî āu, Κimmn̂g kokkun phah ê tēit tshèng, ínkhí koktsè kuansim. Tējī kang Tiongkok bānglō͘ ū pòtshut tsitê ōebīn, koh ke pò tshut tsi̍tê Tiongkok tsohsitlâng the̍h tsi̍t tè tshânthô͘ kā bôlângki khianlo̍hlâi ê ōebīn, teh tshiò Tâioân kunjîn ê tsúitsún tio̍h sī ánne nānīa. Káugue̍h tsheit tiongtàu tsa̍pjī tiám 3 hun, tsi̍t tsiah Tiongkok bôlângki puelâi Κimmn̂g Saisū, kokkun sīkéng khulī bô hāu liáuāu khui tshèng kā phah lo̍h hái. Tiongkok Koktâipān huatgiânjîn Tsu Hōngliân kóng,"Bîntsìntóng tsiá kihōe tshátsoh, tsètsō kíntiuⁿ khìhun, sing koân nn̄g hōaⁿ tùili̍p tùikhòng, tsintsiàⁿ līking hótshiò."

　　 Káugue̍h tshejī sinbûn, kokkun íking kā 40 ki bôlângki kanjiáutshèng sàng kàu gōató, nńg ê ngē ê tsiànhuat tsòhóe lâi, sing phah bôlângki, kanjiáutshèng phòhoāi i ê GPS hēthóng, nátshiūⁿgíná sîtāi khòaⁿ kuaáhì bútiûⁿ ê "tēngsinhuat", tiám lo̍hkhì, tùihong tiāmtiām bē tíntāng, lán tsiah khòaⁿ beh ántsóaⁿ kā tshúlí. Tsóngkóng tsi̍t kù tio̍h sī hō͘ Tiongkok bôlângki ū lâi tio̍h bô tńgkhì, tsīnliōng hō͘ Tsu Hōngliân kèsio̍k tshiò, tshiò bē suah.

　　 Tiongkok bôlângki si̍ttsāi sī phôetsiūⁿ, khiàm phah! (220909)

Tsù, 小英 tshiáⁿ tha̍k Hôagí


Pe̍h-ōe-jī-pán/白話字版

《 Le̍k-sik toán-phêng 》　 Lí Lâm-hêng

　　　　　　 Tiong-kok bô-lâng-ki si̍t-tsāi sī phôe tsiūⁿ, khiàm phah!

Peh-gue̍h tshe-jī, Bí-kok Liân-pang Tsiòng-gī-īⁿ gī-tiúⁿ Phe-lo-si (Nancy Pelosi) sūn-lī tshōa thoân hóng-būn Tâi-oân, Tiong-kok tsó͘-tòng bô hāu, kiàn-siàu tńg siū-khì, ùi peh-gue̍h tshe-sì tiong-tàu kàu tshe-tshit tiong-tàu, tī Tâi-oân sì-kho͘-ûi la̍k-ê hái-e̍k tsìn-hêng hui-tôaⁿ si̍t-tôaⁿ ián-si̍p liáu-āu, tī Tiong-kok kok hái-hōaⁿ si̍t-si si̍t tôaⁿ ián-si̍p. Tsit tiong-kan, Tiong-kok khai-sí ēng bô-lâng-ki jiáu-loān Κim-mn̂g Lia̍t-tó, peh-gue̍h tshe-tshit àm thâu tsi̍t-tsiah Tiong-kok bô-lâng-ki pue-lâi Κim-mn̂g jiáu-loān, tē-jī àm koh pue-lâi tsi̍t tsiah. Peh-gue̍h tshe-káu àm tsi̍t tsiah bô-lâng-ki pue-lâi Tsio̍h-tiāⁿ-tó, peh-gue̍h tsa̍p-la̍k ē-po͘ tsi̍t tsiah pue-lâi Jī-táⁿ, kok-kun ēng tsio̍h-thâu kā khian, bô-lâng-ki ū hip tio̍h tsit-ê kiàⁿ-thâu, tī Tiong-kok ê bāng-lō͘ it-ti̍t pò-tshut. Peh-gue̍h jī-tshit, tsi̍t tsiah bô-lâng-ki pue-lâi Lia̍t-sū, peh-gue̍h jī-káu ē-po͘, tsi̍t tsiah bô-lâng-ki pue-lâi Sai-sū. Tiong-kok bô-lâng-ki pue-lâi Κim-mn̂g Lia̍t-tó ná-tshiūⁿ teh kiâⁿ tsàu-kha.

　 Peh-gue̍h jī-káu. Tiong-kok gōa-kau-pō͘ kì-tsiá-hōe, ū kì-tsiá mn̄g khí Tiong-kok bô-lâng-ki pue khì Κim-mn̂g hip-siōng tsit kiāⁿ tāi-tsì, Tiong-kok gōa-kau pō͘ huat-giân-jîn Tiō Li̍p-kian kóng,"Tiong-kok ê bô-lâng-ki tī Tiong-kok ê niá-thó͘ téng thâu pue-- tsi̍t-ē, ū siáⁿ-mi̍h ta̍t-tit tōa-kiaⁿ-sió-koài? " kâng tsi̍t ji̍t, Tâi-pak tshī-tiúⁿ Kua Bûn-tiat kóng " góa bē sit-khùi kah ēng tsio̍h-thâu khian bô-lâng-ki, tsá tio̍h giâ tshèng kā phah--lo̍h-lâi." lâng mn̄g kóng, nā-sī lí tsò tsóng-thóng kám ē kā Kiōng-ki phah-- lo̍h-lâi? Kua Bûn-tiat ìn kóng :,"góa ē bē m̄-tsai, tān-sī 小英 khak-tēng bô huat-tō͘."

Peh-gue̍h saⁿ-tsa̍p ē-po͘, Tshòa Ing-bûn tsóng-thóng sī-tō hái-kun 146 Kàm-tūi liáu-āu tì sû, tsí-tshut kīn-lâi Tiong-kok Kái-hòng-kun kun-ián liáu-āu ēng bô-lâng-ki tshim-jiáu téng "phú-sik tē-tài" tshiong-tu̍t ê tshiú-huat, i ho͘-io̍k ta̍k-ê "tik-kun jú tshiàng-tù, lán tio̍h jú léng-tsēng. Lán bē hō͘ tùi-hōaⁿ ū put-tong ê tsià-kháu lâi tsè-tsō tshiong-tu̍t, lán bē thiau-khí tsiàn-tuan, lán tsū-ngó͘ khik-tsè, tān-sī pēng m̄ sī piáu-sī lán bē hoán-tsè." i í-king hā-lēng Kok-hông-pō͘, tī sik-tòng ê sî-tsūn tshái-tshú pit-iàu jî-tshiáⁿ kiông koh ū-la̍t ê hoán-tsè tshò-si, siú-hō͘ kok-ka niá-khong ê an-tsoân.

Peh-gue̍h saⁿ-tsa̍p ē-po͘ gō͘ tiám 59 hun, tsi̍t tsiah Tiong-kok bô-lâng-ki pue-lâi Jī-táⁿ, kok-kun kéng-kò bô hāu, khui tshèng kā phah bô phah tio̍h. Tse sī "Pat-peh-saⁿ Phàu-tsiàn" 1979 nî tsiaⁿ-gue̍h tshe-it tsèng-sik thêng-hóe 43 nî āu, Κim-mn̂g kok-kun phah ê tē-it tshèng, ín-khí kok-tsè kuan-sim. Tē-jī kang Tiong-kok bāng-lō͘ ū pò-tshut tsit-ê ōe-bīn, koh ke pò- tshut tsi̍t-ê Tiong-kok tsoh-sit-lâng the̍h tsi̍t tè tshân-thô͘ kā bô-lâng-ki khian--lo̍h-lâi ê ōe-bīn, teh tshiò Tâi-oân kun-jîn ê tsúi-tsún tio̍h sī án-ne nā-nīa. Káu-gue̍h tshe-it tiong-tàu tsa̍p-jī tiám 3 hun, tsi̍t tsiah Tiong-kok bô-lâng-ki pue-lâi Κim-mn̂g Sai-sū, kok-kun sī-kéng khu-lī bô hāu liáu-āu khui tshèng kā phah lo̍h hái. Tiong-kok Kok-tâi-pān huat-giân-jîn Tsu Hōng-liân kóng,"Bîn-tsìn-tóng tsiá ki-hōe tshá-tsoh, tsè-tsō kín-tiuⁿ khì-hun, sing koân nn̄g hōaⁿ tùi-li̍p tùi-khòng, tsin-tsiàⁿ lī-king hó-tshiò."

　　 Káu-gue̍h tshe-jī sin-bûn, kok-kun í-king kā 40 ki bô-lâng-ki kan-jiáu-tshèng sàng kàu gōa-tó, nńg-- ê ngē-- ê tsiàn-huat tsò-hóe lâi, sing phah bô-lâng-ki, kan-jiáu-tshèng phò-hoāi i ê GPS hē-thóng, ná-tshiūⁿgín-á sî-tāi khòaⁿ kua-á-hì bú-tiûⁿ ê "tēng-sin-huat", tiám-- lo̍h-khì, tùi-hong tiām-tiām bē tín-tāng, lán tsiah khòaⁿ beh án-tsóaⁿ kā tshú-lí. Tsóng-kóng tsi̍t kù tio̍h sī hō͘ Tiong-kok bô-lâng-ki ū lâi tio̍h bô tńg-khì, tsīn-liōng hō͘ Tsu Hōng-liân kè-sio̍k tshiò, tshiò bē suah.

　　 Tiong-kok bô-lâng-ki si̍t-tsāi sī phôe-tsiūⁿ, khiàm phah! (220909)

Tsù, 小英 tshiáⁿ tha̍k Hôa-gí



八月初二，美國聯邦眾議院議長Phe-lo-si（Nancy Pelosi）順利tshōa團訪問台灣，中國阻擋無效，見笑轉受氣，ùi八月初四中晝到初七中晝，tī台灣四箍圍六個海域進行飛彈實彈演習了後，tī中國各海岸實施實彈演習。Tsit中間，中國開始用無人機擾亂金門列島：八月初七暗頭一隻中國無人機飛來金門擾亂，第二暗koh飛來一隻。八月初九暗一隻無人機飛來石碇島，八月十六下晡一隻飛來二膽，國軍用石頭kā khian，無人機有hip tio̍h tsit-ê鏡頭，tī中國ê網路一直播出。八月二七，一隻無人機飛來烈嶼，八月二九下晡，一隻無人機飛來獅嶼。中國無人機飛來金門列島ná-tshiūⁿteh行灶腳。

　 八月二九。中國外交部記者會，有記者問起中國無人機飛去金門hip相tsit件tāi-tsì，中國外交部發言人趙立堅講，「中國ê無人機tī中國ê領土頂頭飛飛一下，有啥物值得大驚小怪？」仝一日，台北市長柯文哲講「我bē失氣（sit-khùi）kah用石頭khian無人機，早tio̍h giâ銃kā拍落來。」人問講，若是你做總統kámēkā共機拍落來？柯文哲應講:：「我ēbē m̄知，但是小英確定無法度。」

八月三十下晡，蔡英文總統視導海軍146艦隊了後致詞，指出近來中國解放軍軍演了後用無人機侵擾等「phú色地帶」衝突ê手法，伊呼籲ta̍k-ê「敵軍lútshiàng-tù，咱tio̍h愈冷靜。咱bē hō͘對岸有不當ê藉口來製造衝突，咱bē挑起戰端，咱自我克制，但是並m̄是表示咱bē反制。」伊已經下令國防部，tī適當ê時陣採取必要而且強koh有力ê反制措施，守護國家領空ê安全。

八月三十下晡五點59分，一隻中國無人機飛來二膽，國軍警告無效，開銃kā拍無拍tio̍h。Tse是「八二三砲戰」1979年正月初一正式停火43年後，金門國軍拍ê第一銃，引起國際關心。第二工中國網路有播出tsit-ê畫面，koh加播出一個中國作穯人the̍h一塊田塗kā無人機khian落來ê畫面，teh笑台灣軍人ê水準tio̍h是án-ne nā-nīa。九月初一中晝十二點3分，一隻中國無人機飛來金門獅嶼，國軍示警驅離無效了後開銃kā拍落海。中國國台辦發言人朱鳳蓮講：「民進黨藉機會炒作，製造緊張氣氛，升koân兩岸對立對抗，真正離經好笑。」

　　九月初二新聞，國軍已經kā 40支無人機干擾銃送到外島，軟ê硬ê戰法做夥來：先拍無人機，干擾銃破壞伊êGPS系統，ná-tshiūⁿgín-á時代看歌仔戲武場ê「定身法」，點落去、對方tiām-tiām bē振動，咱才看beh按怎kā處理。總講一句tio̍h是hō͘中國無人機有來tio̍h無轉去，盡量hō͘朱鳳蓮繼續笑、笑bē suah。

　　中國無人機實在是皮tsiūⁿ，欠拍！　　　(220909)

註：小英　　請讀華語