《綠色短評》

 | | | 轉寄

提升台美關係加真強ê《台灣政策法案》

作者 李南衡, TsoânTâijī/全台字 by Tsng Hūiphêng 2022.09.25

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

Thêsing TâiBí kuanhē ke tsin kiông ê《 Tâioân Tsèngtshik Huatàn 》

　　2022 nî jīgue̍h jīsì, Gôlô tsóngthóng Phûting tùi kehpiah kok 烏克蘭 ê tsânpō ji̍ptshim, ínkhí tsoân sèkài bîntsú kokka ê tōa tio̍hkiaⁿ kah hùnnō͘, tôngsî mā hō͘hóe sūtsêng tùi 烏克蘭 bô kàu kuansim kah bô kàu bêngkhak ê thāitō͘, tìsú ínkhí Gôlô thâulâng ê gō͘ phòaⁿ, tshutping phah 烏克蘭. Lūisū ê tsênghêng ū khólêng huatsing tī Tiongkok tùi Tâioân ê tshimlio̍k. Tiongkok tsit kúi nî kakiông kunsū kiànsiat, tsiamtùi Tâioân pō͘sū sin kisu̍t, sin búkhì, tse sī tùi kui ê Ìnthài tēkhu úntēng ê uihia̍p. Tsòikīn, Tiongkok tshaputto ta̍k kang phài kunki tsìnji̍p Tâioân ê Hôngkhong Sikpia̍tkhu kah Háikiap Tiongsòaⁿ, Tiongkok háikun tī konghái siōng tsìnhêng iánsi̍p, ìtô͘ appik kah khiónghat Tâioân. Thàn tsitmá iáu ū sîkan, Bíkok tio̍h kā tùi Tâioân ê tsèngtshik bêngkhak hòa, pangtsō͘ Tâioân tsètēng, si̍tsi tsi̍t tsióng sin ê, koh khah ū tshunkiu ê tsiànlio̍k.

　　 Inūi ánne, 2022 nî sìgue̍h tsa̍psì àm, Bíkok Liânpang Tshamgīīⁿ Gōakau Úigoânhōe tsúse̍k, Bîntsútóng tsik Menentetsù (Bob Menendez) kah Bíkok Liânpang Tshamgīīⁿ Ūsoàn Úigoânhōe Kiōnghôtóng tsik gīoân Kulahàm (Lindsey Graham) tshōa kokhōe tāipiáuthoân hóngbūn Tâioân, pàihōe Tshòa Ingbûn tsóngthóng. La̍kgue̍h tsa̍pla̍k liânmiâ thêtshut 《2022 nî Tâioân Tsèngtshik Cuatàn 》 tshóàn, lāṳông tsúiàu pun tsoh nn̄g tōa lūi, tēit tōa lūi sī tsúkoân siōngting, tshuitōng tsù Bí Tāipiáutshù ùi "Tāipak Kingtsè Bûnhòa Pānsū tshù " tsiàⁿmiâ tsoh "Tâioân Tāipiáutshù", tsísī Kokbūkhing thiatsiau kìmtsí Tâioân kuaⁿoân hóngbūn Bíkok. Tējī tōalūi sī kunsū kiônghòa, siutsèng 《 Tâioân Kuanhēhuat 》 Bíkok tùi Tâioân ê búkhì kiòngèng ùi "hônggūsik" khoktōa kàu "ētàng uiliap Jînbîn káihòngkun tshimlio̍k hêngûi iúlī ê búkhì." siūkoân sì nî lāi thêkiong 45 ik bíkim ê gōakok kunsū tsukim puahkhoán. Tsítēng Tâioân tsoh "tsúiàu ê hui Pakiok bêngkok". Tsitshî Tâioân tshamú koktsè tso͘tsit.

　　 Káugue̍h tshetshit, Bíkok Pe̍kkiong Kokan kò͘būn So͘ Lībān kóng, i ē kah kokhōe léngsiù thólūn 《 Tâioân Tsèngtshikhuat 》, i thánpe̍k kóng " pō͘hūn lāṳông hō͘ goán siókhóa hoânló". Kingkòe nn̄g piàn iânkî símtsa, káugue̍h tsa̍psì, Bíkok Tshamgīīⁿ Gōaúihōe thongkòe tsitê siū tsùba̍k ê "Tâioân Tsèngtshik Huatàn", sòa lo̍hkhì tio̍h tī mênî itgue̍h pún kài kokhōe kîmóa tsêng thongkòe Tshamgīīⁿ kah Tsiònggīīⁿ Īⁿhōe, tsiah ē tuikau Bíkok tsóngthóng tshiamsú āu singhāu. Káugue̍h tsa̍psì hōe āu, pún huatàn thêàn lâng kóng, thongkòe ê pánpún ū siókhóa siukái, paukuat tsù Bí tāipiáutshù káimiâ, Bíkok Tsāitâi Hia̍phōe (AIT) tshùtiúⁿ jīmbēng su Tshamīⁿ thongkòe pō͘hūn kái tsoh "kiàngī". Goân pánpún "gōakok kunsū iôngtsu" hongsik thêkiong Tâioân 4 nî 45 ik bíkim, sinpán katsù sī "bô siông" oântsō͘, tē 5 nî ke beh 20 ik bíkim, piàn tsoh 5 nî tsónggia̍h 65 ik bíkim. Goân pánpún kā tsítēng Tâioân tsoh "tsúiàu hui Pakiok bêngiú" tēūi, siukái tsoh "í hui Pakiok bêngiú tângténg thāigū".

　　Tsitê huatàn nā thang kòe, Tiongkok tsù Bí tāisài 秦剛 tsin siūkhì kóng, ū 《 Tâioân Tsèngtshik Huatàn 》tio̍h bô TiongBí kuanhē. Bíkok tsin gâu "pàngphùi an káusim", huatàn kiôngtiāu, jīmhô lāṳông lóng bēsái káisik tsoh kah Tâioân hueho̍k kuaⁿhong gōakau kuanhē, ásī káipiàn Bíkok tsènghú tùi Tâioân koktsè tēūi ê li̍ptiûⁿ.

Kámsiā Bíkok koh khah tshingtshó thoânta̍t tī kok hongbīn hia̍ptsō͘ Tâioân, thêsing TâiBí kuanhē ke tsin kiông.

Tsù, 烏克蘭　　 秦剛　　 tshiáⁿ liām Hôagí


Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng

Thê-sing Tâi-Bí kuan-hē ke tsin kiông ê《 Tâi-oân Tsèng-tshik Huat-àn 》

　　2022 nî jī-gue̍h jī-sì, Gô-lô tsóng-thóng Phû-ting tùi keh-piah kok 烏克蘭 ê tsân-pō ji̍p-tshim, ín-khí tsoân sè-kài bîn-tsú kok-ka ê tōa tio̍h-kiaⁿ kah hùn-nō͘, tông-sî mā hō͘-hóe sū-tsêng tùi 烏克蘭 bô kàu kuan-sim kah bô kàu bêng-khak ê thāi-tō͘, tì-sú ín-khí Gô-lô thâu-lâng ê gō͘ phòaⁿ, tshut-ping phah 烏克蘭. Lūi-sū ê tsêng-hêng ū khó-lêng huat-sing tī Tiong-kok tùi Tâi-oân ê tshim-lio̍k. Tiong-kok tsit kúi nî ka-kiông kun-sū kiàn-siat, tsiam-tùi Tâi-oân pō͘-sū sin ki-su̍t, sin bú-khì, tse sī tùi kui ê Ìn-thài tē-khu ún-tēng ê ui-hia̍p. Tsòe-kīn, Tiong-kok tsha-put-to ta̍k kang phài kun-ki tsìn-ji̍p Tâi-oân ê Hông-khong Sik-pia̍t-khu kah Hái-kiap Tiong-sòaⁿ, Tiong-kok hái-kun tī kong-hái siōng tsìn-hêng ián-si̍p, ì-tô͘ ap-pik kah khióng-hat Tâi-oân. Thàn tsit-má iáu ū sî-kan, Bí-kok tio̍h kā tùi Tâi-oân ê tsèng-tshik bêng-khak hòa, pang-tsō͘ Tâi-oân tsè-tēng, si̍t-si tsi̍t tsióng sin ê, koh khah ū tshun-kiu ê tsiàn-lio̍k.

　　 In-ūi án-ne, 2022 nî sì-gue̍h tsa̍p-sì àm, Bí-kok Liân-pang Tsham-gī-īⁿ Gōa-kau Úi-goân-hōe tsú-se̍k, Bîn-tsú-tóng tsik Me-nen-te-tsù (Bob Menendez) kah Bí-kok Liân-pang Tsham-gī-īⁿ Ū-soàn Úi-goân-hōe Kiōng-hô-tóng tsik gī-oân Kulahàm (Lindsey Graham) tshōa kok-hōe tāi-piáu-thoân hóng-būn Tâi-oân, pài-hōe Tshòa Ing-bûn tsóng-thóng. La̍k-gue̍h tsa̍p-la̍k liân-miâ thê-tshut 《2022 nî Tâi-oân Tsèng-tshik Cuat-àn 》 tshó-àn, lāi-iông tsú-iàu pun tsoh nn̄g tōa lūi, tē-it tōa lūi sī tsú-koân siōng-ting, tshui-tōng tsù Bí Tāi-piáu-tshù ùi "Tāi-pak King-tsè Bûn-hòa Pān-sū tshù " tsiàⁿ-miâ tsoh "Tâi-oân Tāi-piáu-tshù", tsí-sī Kok-bū-khing thiat-siau kìm-tsí Tâi-oân kuaⁿ-oân hóng-būn Bí-kok. Tē-jī tōa-lūi sī kun-sū kiông-hòa, siu-tsèng 《 Tâi-oân Kuan-hē-huat 》 Bí-kok tùi Tâi-oân ê bú-khì kiòng-èng ùi "hông-gū-sik" khok-tōa kàu "ē-tàng ui-liap Jîn-bîn kái-hòng-kun tshim-lio̍k hêng-ûi iú-lī ê bú-khì." siū-koân sì nî lāi thê-kiong 45 ik bí-kim ê gōa-kok kun-sū tsu-kim puah-khoán. Tsí-tēng Tâi-oân tsoh "tsú-iàu ê hui Pak-iok bêng-kok". Tsi-tshî Tâi-oân tsham-ú kok-tsè tso͘-tsit.

　　 Káu-gue̍h tshe-tshit, Bí-kok Pe̍k-kiong Kok-an kò͘-būn So͘ Lī-bān kóng, i ē kah kok-hōe léng-siù thó-lūn 《 Tâi-oân Tsèng-tshik-huat 》, i thán-pe̍k kóng " pō͘-hūn lāi-iông hō͘ goán sió-khóa hoân-ló". King-kòe nn̄g piàn iân-kî sím-tsa, káu-gue̍h tsa̍p-sì, Bí-kok Tsham-gī-īⁿ Gōa-úi-hōe thong-kòe tsit-ê siū tsù-ba̍k ê "Tâi-oân Tsèng-tshik Huat-àn", sòa lo̍h-khì tio̍h tī mê-nî it-gue̍h pún kài kok-hōe kî-móa tsêng thong-kòe Tsham-gī-īⁿ kah Tsiòng-gī-īⁿ Īⁿ-hōe, tsiah ē tue-kau Bí-kok tsóng-thóng tshiam-sú āu sing-hāu. Káu-gue̍h tsa̍p-sì hōe āu, pún huat-àn thê-àn lâng kóng, thong-kòe ê pán-pún ū sió-khóa siu-kái, pau-kuat tsù Bí tāi-piáu-tshù kái-miâ, Bí-kok Tsāi-tâi Hia̍p-hōe (AIT) tshù-tiúⁿ jīm-bēng su Tsham-īⁿ thong-kòe pō͘-hūn kái tsoh "kiàn-gī". Goân pán-pún "gōa-kok kun-sū iông-tsu" hong-sik thê-kiong Tâi-oân 4 nî 45 ik bí-kim, sin-pán ka-tsù sī "bô siông" oân-tsō͘, tē 5 nî ke beh 20 ik bí-kim, piàn tsoh 5 nî tsóng-gia̍h 65 ik bí-kim. Goân pán-pún kā tsí-tēng Tâi-oân tsoh "tsú-iàu hui Pak-iok bêng-iú" tē-ūi, siu-kái tsoh "í hui Pak-iok bêng-iú tâng-téng thāi-gū".

　　Tsit-ê huat-àn nā thang kòe, Tiong-kok tsù Bí tāi-sài 秦剛 tsin siū-khì kóng, ū 《 Tâi-oân Tsèng-tshik Huat-àn 》tio̍h bô Tiong-Bí kuan-hē. Bí-kok tsin gâu "pàng-phùi an káu-sim", huat-àn kiông-tiāu, jīm-hô lāi-iông lóng bē-sái kái-sik tsoh kah Tâi-oân hue-ho̍k kuaⁿ-hong gōa-kau kuan-hē, á-sī kái-piàn Bí-kok tsèng-hú tùi Tâi-oân kok-tsè tē-ūi ê li̍p-tiûⁿ.

Kám-siā Bí-kok koh khah tshing-tshó thoân-ta̍t tī kok hong-bīn hia̍p-tsō͘ Tâi-oân, thê-sing Tâi-Bí kuan-hē ke tsin kiông.

Tsù, 烏克蘭　　 秦剛　　 tshiáⁿ liām Hôa-gí




　　2022年二月二四，俄羅總統浮丁對隔壁國烏克蘭ê殘暴入侵，引起全世界民主國家ê大tio̍h驚kah憤怒，同時mā後悔事前對烏克蘭無夠關心kah無夠明確ê態度，致使引起俄羅頭人ê誤判，出兵拍烏克蘭。類似ê情形有可能發生tī中國對台灣ê侵略。中國tsit幾年加強軍事建設，針對台灣部署新技術、新武器，tse是對歸个印太地區穩定ê威脅。最近，中國差不多ta̍k工派軍機進入台灣ê防空識別區kah海峽中線，中國海軍tī公海上進行演習，意圖壓迫kah恐嚇台灣。趁tsit-má猶有時間，美國tio̍h kā對台灣ê政策明確化，幫助台灣制定、實施一種新ê、koh khah有tshunkiuê戰略。

　　因為按呢，2022年四月十四暗，美國聯邦參議院外交委員會主席、民主黨籍Me-nen-tetsù（Bob Menendez）kah美國聯邦參議院預算委員會共和黨籍議員Kulahàm-（Lindsey Graham）tshōa國會代表團訪問台灣，拜會蔡英文總統。六月十六聯名提出《2022年台灣政策法案》草案，內容主要分作兩大類：第一大類是主權象徵，推動駐美代表處ùi「台北經濟文化辦事處」正名作「台灣代表處」，指示國務卿撤銷禁止台灣官員訪問美國。第二大類是軍事強化，修正《台灣關係法》美國對台灣ê武器供應ùi「防禦式」擴大到「ētàng威懾人民解放軍侵略行為有利ê武器。」授權四年內提供45億美金ê外國軍事資金撥款。指定台灣作「主要ê非北約盟國」。支持台灣參與國際組織。

　　九月初七，美國白宮國安顧問蘇利萬講，伊ēkah國會領袖討論《台灣政策法》，伊坦白講「部分內容hō͘阮小khóa煩惱」。經過兩遍延期審查，九月十四，美國參議院外委會通過tsit-ê受矚目ê「台灣政策法案」，續落去tio̍h tī明年一月本屆國會期滿前通過參議院kah眾議院院會，tsiah ē遞交美國總統簽署後生效。九月十四會後，本法案提案人講，通過ê版本有小khóa修改，包括駐美代表處改名、美國在台協會（AIT）處長任命需參院通過部分改作「建議」。原版本「外國軍事融資」方式提供台灣4年45億美元，新版加註是「無償」援助，第5年加碼20億美元，變作5年總額65億美元。原版本kā指定台灣作「主要非北約盟友」地位，修改作「以非北約盟友同等待遇」。

　　Tsit-ê法案若通過，中國駐美大使秦剛真受氣講：有《台灣政策法案》tio̍h無中美關係。美國真gâu「放屁安狗心」，法案強調，任何內容lóng bē-sái解釋作kah台灣恢復官方外交關係，抑是改變美國政府對台灣國際地位ê立場。

感謝美國koh khah清楚傳達tī各方面協助台灣，提升台美關係加真強。

註：烏克蘭　　秦剛　　請唸華語