《綠色短評》

 | | | 轉寄

習近平胡言亂語講台灣！

作者 李南衡, TsoânTâijī/全台字 by Tsng Hūiphêng 2022.11.06

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　　 Lí Lâmhêng

　　　　　　　　 習近平 ô͘giân loāngí kóng Tâioân!

Tsa̍pgue̍h tsa̍pla̍k, Tiongkok Kiōngsántóng tē jītsa̍p pái tsoân kok tāipiáu tāihōe tī Pakkiaⁿ jînbîn tāihōetn̂g tsèngsik khuibō͘, Τiongkiōng tsóngsukì 習近平 huatpiáu jītsa̍ptōa tsèngtī pòkò, i kóng Tiongkok beh kiâⁿ hiòng toh khì, ah sī i kuattēng beh tsoh bānnî éngkiú ê hôngtè, lóng sī intau ê tāitsì kah lán bô kuanhē, lán bô pitiàu tshap i. Tānsī i o͘pe̍h loān kóngtio̍h Tâioân ê pō͘hūn, lán tio̍h tsi̍ttiám tsi̍ttiám kā i tôaⁿ tò tńgkhì.

　　 習近平 kóng, "tsó͘kok oântsoân thóngit ittēng tio̍h si̍thiān". Sitlé, in Tiongkok lāuhòeá kok tsiah ū siáⁿmi̍h "tsó͘kok", in beh kah siáⁿ lâng khì thóngit, sī in tau ê tāitsì, kah lán Tâioân bô tītāi. Lán tshingtshun siàuliân ê Tâioân bô siáⁿmi̍h "tsó͘kok", lán kanta ū "bókok", lán nn̄gtshing saⁿpah bān lia̍p hantsîákiáⁿ bútshin ê miâ kiò Tâioân.

　　 習近平 kóng,"káikuat Tâioân būntê sī Tiongkoklâng kakī ê tāitsì, tio̍h iû Tiongkoklâng lâi kuattēng!" lán Tâioânlâng kòe bîntsú, tsūiû, ū jînkoân, ū tsungiâm ê singua̍h, ná ū siáⁿ būntê? "Tâioân būntê" sī in Tiongkok kóng ê. Tâioân tsún nāsī ū būntê, mā sī Tâioânlâng kakī ê tāitsì, lán Tâioânlâng tongjiân ē kakī káikuat, ná tio̍h lôhoân tshùpiⁿ ê Tiongkok lâi thâukhak thiàⁿ? 1949 nî tsa̍pgue̍h tsheit, Tionghôa Jînbîn Kiōnghôkok kiànkok ílâi kàu taⁿ, liân tsi̍t kang to m̄bat thóngtī kòe Tâioân, tsi̍t lâng tsi̍t ke tāi, kongmá sûi lâng tshāi. Tùi Tâioân lâi kóng, Tiongkok sī kah Tâioân oântsoân bô kuanhē ê gōakok. Ná ē kóng,"káikuat Tâioân būntê sī Tiongkoklâng kakī ê tāitsì" leh? 習近平 lâng hóhó, ná ē thâukhak hiah bô tshingtshó, ē kóng "Tâioân būntê tio̍h iû Tiongkoklâng lâi kuattēng" leh? Tse ná tshiūⁿkóng; Tiongkok būntê, tio̍h iû Bôngkó͘lâng lâi kuattēng; ah sī kóng, Phûtôgê būntê, tio̍h iû Spanish lâng lâi kuattēng, siáⁿ lâng thiaⁿtio̍h mā tsaiiáⁿ oântsoân bô tōlí. Tsit tsióng oântsoân bô tōlí, bô siôngsik ê ōe, 習近平 ná kóng ē tshut tshùi?

　　 習近平 kóng "kiankuat hoántùi Tâito̍k hunlia̍t hêngkèng, kiankuat hoántùi gōa pō͘ sèle̍k kansia̍p. "Tâioân tsūlâi m̄bat kah Tionghôa Jînbîn Kiōnghôkok tsòhóe· kòe, sī beh ántsóaⁿ "hunlia̍t" tshutkhì? kàu kináji̍t ûitsí, îit "gōa pō͘ sèle̍k kansia̍p" Tâioân, sī ùi Tiongkok lâi ê. Lán Tâioânlâng tongjiân kiankuat hoántùi.

　　 習近平 kóng "goán kiantshî ēng siōng tōa ê sêngì, tsīn siōng tōa ê ló͘le̍k tsingtshú hôpêng thóngit ê tsiânkéng, tānsī tsua̍ttùi bô sênglo̍k hòngkhì súiōng búle̍k, póliû tsháitshú ittshè pitiàu tshòsi ê soán hāng." Tse tio̍h nátshiūⁿ tsi̍tê lâng khòaⁿ ha̍pì tshùpiⁿ ê tshù, ài kah lâunōa. I tio̍h kā tshùpiⁿ kóng, lí tsit king tshù góa ittēng beh ài, góa kiantshî ēng siōng tōa ê sêngì, ē tsīn siōng tōa ê ló͘le̍k hóhóá kah lí kóng, tānsī tsua̍ttùi bô sênglo̍k bô beh giâ to giâ tshèng, ē póliû tsháitshú ittshè pitiàu ēng tshiúⁿ ēng thâi ēng phah ê soán hāng. Nā tsiàu Kitokkàu ( paukuat Thiantsúkàu, Kitokkàu, tang tsèngkàu), Isulânkàu (mā kiò tsoh hôikàu), Iôtáiahkàu kok tōa tsongkàu só͘ tsunsiú ê《 tsa̍pkài》, tētsa̍p kài kóng,"M̄thang tham lí ê tshùpiⁿ ê tshù; mā m̄thang tham lí ê tshùpiⁿ ê bó͘, lô͘po̍k, lúpī, gû, lî, íki̍p lí ê tshùpiⁿ ittshè só͘ū ê." ánne lán tio̍h tsaiiáⁿ, Tiongkok 習近平 tham i ê tshùpiⁿ ê Tâioân, sī ge̍k thiⁿ ê tsokhuat, thianlí putiông! (221021)

Tsù, 習近平 　 tshiáⁿ liām Hôagí


Pe̍h-ōe-jī-pán/白話字版


《 Le̍k-sik toán-phêng 》　　　 Lí Lâm-hêng

　　　　　　　　 習近平 ô͘-giân loān-gí kóng Tâi-oân!

Tsa̍p-gue̍h tsa̍p-la̍k, Tiong-kok Kiōng-sán-tóng tē jī-tsa̍p pái tsoân kok tāi-piáu tāi-hōe tī Pak-kiaⁿ jîn-bîn tāi-hōe-tn̂g tsèng-sik khui-bō͘, Τiong-kiōng tsóng-su-kì 習近平 huat-piáu jī-tsa̍p-tōa tsèng-tī pò-kò, i kóng Tiong-kok beh kiâⁿ hiòng toh khì, ah sī i kuat-tēng beh tsoh bān-nî éng-kiú ê hông-tè, lóng sī in-tau ê tāi-tsì kah lán bô kuan-hē, lán bô pit-iàu tshap i. Tān-sī i o͘-pe̍h loān kóng-tio̍h Tâi-oân ê pō͘-hūn, lán tio̍h tsi̍t-tiám tsi̍t-tiám kā i tôaⁿ tò tńg-khì.

　　 習近平 kóng, "tsó͘-kok oân-tsoân thóng-it it-tēng tio̍h si̍t-hiān". Sit-lé, in Tiong-kok lāu-hòe-á kok tsiah ū siáⁿ-mi̍h "tsó͘-kok", in beh kah siáⁿ lâng khì thóng-it, sī in tau ê tāi-tsì, kah lán Tâi-oân bô tī-tāi. Lán tshing-tshun siàu-liân ê Tâi-oân bô siáⁿ-mi̍h "tsó͘-kok", lán kan-ta ū "bó-kok", lán nn̄g-tshing saⁿ-pah bān lia̍p han-tsî-á-kiáⁿ bú-tshin ê miâ kiò Tâi-oân.

　　 習近平 kóng,"kái-kuat Tâi-oân būn-tê sī Tiong-kok-lâng ka-kī ê tāi-tsì, tio̍h iû Tiong-kok-lâng lâi kuat-tēng!" lán Tâi-oân-lâng kòe bîn-tsú, tsū-iû, ū jîn-koân, ū tsun-giâm ê sing-ua̍h, ná ū siáⁿ būn-tê? "Tâi-oân būn-tê" sī in Tiong-kok kóng ê. Tâi-oân tsún nā-sī ū būn-tê, mā sī Tâi-oân-lâng ka-kī ê tāi-tsì, lán Tâi-oân-lâng tong-jiân ē ka-kī kái-kuat, ná tio̍h lô-hoân tshù-piⁿ ê Tiong-kok lâi thâu-khak thiàⁿ? 1949 nî tsa̍p-gue̍h tshe-it, Tiong-hôa Jîn-bîn Kiōng-hô-kok kiàn-kok í-lâi kàu taⁿ, liân tsi̍t kang to m̄-bat thóng-tī kòe Tâi-oân, tsi̍t lâng tsi̍t ke tāi, kong-má sûi lâng tshāi. Tùi Tâi-oân lâi kóng, Tiong-kok sī kah Tâi-oân oân-tsoân bô kuan-hē ê gōa-kok. Ná ē kóng,"kái-kuat Tâi-oân būn-tê sī Tiong-kok-lâng ka-kī ê tāi-tsì" leh? 習近平 lâng hó-hó, ná ē thâu-khak hiah bô tshing-tshó, ē kóng "Tâi-oân būn-tê tio̍h iû Tiong-kok-lâng lâi kuat-tēng" leh? Tse ná tshiūⁿ-kóng; Tiong-kok būn-tê, tio̍h iû Bông-kó͘-lâng lâi kuat-tēng; ah sī kóng, Phû-tô-gê būn-tê, tio̍h iû Spanish lâng lâi kuat-tēng, siáⁿ lâng thiaⁿ-tio̍h mā tsai-iáⁿ oân-tsoân bô tō-lí. Tsit tsióng oân-tsoân bô tō-lí, bô siông-sik ê ōe, 習近平 ná kóng ē tshut tshùi?

　　 習近平 kóng "kian-kuat hoán-tùi Tâi-to̍k hun-lia̍t hêng-kèng, kian-kuat hoán-tùi gōa pō͘ sè-le̍k kan-sia̍p. " Tâi-oân tsū-lâi m̄-bat kah Tiong-hôa Jîn-bîn Kiōng-hô-kok tsò-hóe-· kòe, sī beh án-tsóaⁿ "hun-lia̍t" tshut-khì? kàu kin-á-ji̍t ûi-tsí, î-it "gōa pō͘ sè-le̍k kan-sia̍p" Tâi-oân, sī ùi Tiong-kok lâi ê. Lán Tâi-oân-lâng tong-jiân kian-kuat hoán-tùi.

　　 習近平 kóng "goán kian-tshî ēng siōng tōa ê sêng-ì, tsīn siōng tōa ê ló͘-le̍k tsing-tshú hô-pêng thóng-it ê tsiân-kéng, tān-sī tsua̍t-tùi bô sêng-lo̍k hòng-khì sú-iōng bú-le̍k, pó-liû tshái-tshú it-tshè pit-iàu tshò-si ê soán hāng." Tse tio̍h ná-tshiūⁿ tsi̍t-ê lâng khòaⁿ ha̍p-ì tshù-piⁿ ê tshù, ài kah lâu-nōa. I tio̍h kā tshù-piⁿ kóng, lí tsit king tshù góa it-tēng beh ài, góa kian-tshî ēng siōng tōa ê sêng-ì, ē tsīn siōng tōa ê ló͘-le̍k hó-hó-á kah lí kóng, tān-sī tsua̍t-tùi bô sêng-lo̍k bô beh giâ to giâ tshèng, ē pó-liû tshái-tshú it-tshè pit-iàu ēng tshiúⁿ ēng thâi ēng phah ê soán hāng. Nā tsiàu Ki-tok-kàu ( pau-kuat Thian-tsú-kàu, Ki-tok-kàu, tang tsèng-kàu), I-su-lân-kàu (mā kiò tsoh hôe-kàu), Iô-tá-iah-kàu kok tōa tsong-kàu só͘ tsun-siú ê《 tsa̍p-kài》, tē-tsa̍p kài kóng,"M̄-thang tham lí ê tshù-piⁿ ê tshù; mā m̄-thang tham lí ê tshù-piⁿ ê bó͘, lô͘-po̍k, lú-pī, gû, lî, í-ki̍p lí ê tshù-piⁿ it-tshè só͘-ū ê." án-ne lán tio̍h tsai-iáⁿ, Tiong-kok 習近平 tham i ê tshù-piⁿ ê Tâi-oân, sī ge̍k thiⁿ ê tsok-huat, thian-lí put-iông! (221021)

Tsù, 習近平 　 tshiáⁿ liām Hôa-gí



十月十六，中國共產黨第二十次全國代表大會tī北京人民大會堂正式開幕，中共總書記習近平發表二十大政治報告，伊講中國beh行向toh去，ah是伊決定beh作萬年永久ê皇帝，lóng是intauê代誌kah咱無關係，咱無必要插伊。但是伊烏白亂講tio̍h台灣ê部分，咱tio̍h一點一點kā伊彈倒轉去。

　　習近平講「祖國完全統一一定tio̍h實現」。失禮，in中國老歲á國tsiah有啥物「祖國」，in beh kah啥人去統一，是intauê代誌，kah咱台灣無值事（tī-tāi）。咱青春少年ê台灣無啥物「祖國」，咱kan-ta有「母國」，咱兩千三百萬粒蕃薯á kiáⁿ母親ê名叫台灣。

　　習近平講：「解決台灣問題是中國人家己ê代誌，tio̍h由中國人來決定！」咱台灣人過民主、自由、有人權、有尊嚴ê生活，ná有啥問題？「台灣問題」是in中國講ê。台灣準若是有問題，mā是台灣人家己ê代誌，咱台灣人當然ē家己解決，ná tio̍h勞煩厝邊ê中國來頭殼疼？1949年十月初一，中華人民共和國建國以來到taⁿ，連一工都m̄-bat統治過台灣，一人一家代，公媽隨人tshāi。對台灣來講，中國是kah台灣完全無關係ê外國。ná ē講：「解決台灣問題是中國人家己ê代誌」咧？習近平人好好，náē頭殼hiah無清楚，ē講「台灣問題tio̍h由中國人來決定」咧？Tsená像講；中國問題，tio̍h由蒙古人來決定；ah是講：葡萄牙問題，tio̍h由西班牙人來決定，啥人聽tio̍h mā知影完全無道理。Tsit種完全無道理、無常識ê話，習近平ná講ē出嘴？

　　習近平講「堅決反對台獨分裂行徑，堅決反對外部勢力干涉。」台灣自來m̄-bat kah中華人民共和國做夥過，是beh按怎「分裂」出去？到今á日為止，唯一「外部勢力干涉」台灣，是ùi中國來ê。咱台灣人當然堅決反對。

　　習近平講「阮堅持用上大ê誠意，盡上大ê努力爭取和平統一ê前景，但是絕對無承諾放棄使用武力，保留採取一切必要措施ê選項。」Tse tio̍h ná像一个人看合意厝邊ê厝，愛kah流涎（nōa）。伊tio̍h kā厝邊講，你tsit間厝我一定beh愛，我堅持用上大ê誠意，ē盡上大ê努力好好á kah你講，但是絕對無承諾無beh夯刀夯銃，ē保留採取一切必要用搶用刣用拍ê選項。若照基督教（包括天主教、基督教、東正教），伊斯蘭教（mā叫作回教），猶太教各大宗教所遵守ê《十戒》，第十戒講：「M̄-thang貪你ê厝邊ê厝；mā m̄-thang貪你ê厝邊ê某、奴僕、女婢、牛、驢，以及你ê厝邊一切所有ê。」án-ne咱tio̍h知影，中國習近平貪伊ê厝邊ê台灣，是逆天ê作法，天理不容！(221021)

註：習近平　請唸華語