《Lahjih寓言》

 | | | 轉寄

006-tshiám, 白頭khok-á來做siū

作者 蕭平治, 漢羅Ruby版處理：Lîm Tsùn-io̍k 2020.06.28


tshù(厝) āu(後) ê hue-hn̂g(花 園) ， ū(有) tsi̍t(一) tuì(對) pe̍h-thâu(白 頭) khok-á lâi(來) tsò(做) siū， khuàⁿ(看) in ang(翁) á-bó͘ tshut-tshut(出 出) ji̍p-ji̍p(入入) ， bô-îng(無 閒) tshih-tshih， kā(咬) tshiū(樹) á ki(枝) 、 ke-mo͘(雞 毛) 、 ah-mo͘(鴨 毛) á sī(是) tiū-tsháu(稻 草) leh khí-tsō(起 造) sin(新) tshù(厝) ， tsún-pī(準 備) beh seⁿ(生) thòaⁿ āu-tāi(後代) 。

tsú-lâng(主 人) tsiâⁿ ū(有) thiàⁿ-sim(疼 心) ，to̍h lī-iōng(利 用) in bô(無) tī-.leh ê sî(時) tsūn， kuáⁿ-kín(趕 緊) the̍h iûⁿ-môa(楊 麻) si(絲) 、 mî-se(棉紗) suàⁿ(線) kap pò͘-iù(布幼) á，kā in tàu tsò(做) siū， si̍t-tsāi(實 在) hō͘ lâng(人) tsiâⁿ kám-tōng(感 動) 。

Siáⁿ tsai(知) kuè(過) bô(無) nn̄g(兩) kang(工) ，hit tuì(對) pe̍h-thâu(白 頭) khok-á suah bô(無) koh tńg lâi(來) 。

㊣ gū - ì(寓意) ：Tú hó(好) ê kuan-sim(關 心) sī(是) thiàⁿ-sim(疼 心) ， kòe-tō͘(過 度) ê kuan-ài(關 愛) sī(是) jiáu-luān(擾 亂) 。

註解：
白頭khok-á：[Pycnonotus sinensis formosae白頭翁]
siū：[鳥巢]
無閒tshih-tshih：[忙得不得了]
生thòaⁿ：[生育繁殖。]
tsiâⁿ感動：[非常感動]
tú好：[剛好]
擾亂：[破壞、騷擾]