《Lahjih寓言》

 | | | 轉寄

209-tsiam, 牛蜂

作者 蕭平治, 漢羅Ruby版處理：Lîm Tsùn-io̍k 2020.03.01





gû-phang(牛 蜂) ho͘ⁿ-ho͘ⁿ kiò(叫) ，iāⁿ-iāⁿ pue(飛) ， bô(無) lâng(人) tshiáⁿ(請) ，ka-kī pue(飛) lâi(來) gû(牛) sing-khu(身 軀) ， bián(免) kheh-khì(客 氣) ，kā ui lo̍h-.khì(落去) to̍h sī(是) ； gû(牛) sī(是) hó(好) sìng-tē(性 地) ，bē kham-tit(堪 得) huân(煩) ， bué-liu(尾溜) tòng-tsò(當 做) báng-sut-á it-ti̍t(一直) sut， gû-phang(牛 蜂) to̍h sī(是) bē-giàn tsáu(走) ，kan-taⁿ sóa uī(位) kè-sio̍k(繼 續) tìng(釘) ，suh hueh(血) bián-tsîⁿ(免 錢) tsia̍h(食) kàu(到) pá(飽) 。

gû-hiaⁿ(牛 兄) tshut-siaⁿ(出 聲) ：「 kuáⁿ-kín(趕 緊) pue(飛) khì(去) pa̍t-uī(別位) thó-tsia̍h(討 食) ，tsia sī(是) tsin(真) guî-hiám(危 險) ， tán(等) tsi̍t-.ē(一下) tshī-gû(飼 牛) gín-á nā(若) lâi(來) ，lín sī(是) ē bô(無) miā(命) 。」

gû-phang(牛 蜂) m̄ siàn-siàⁿ：「 gû-hiaⁿ(牛 兄) tsiah tuā(大) phiāng，kā lí(你) thiu(抽) tsi̍t-sut(一 屑) á hueh(血) ，ná-tio̍h tsiah kè-kàu(計較) 。」

gû-hiaⁿ(牛 兄) hó(好) sìng-tē(性 地) ：「 sûi-tsāi(隨 在) lí(你) tìng(釘) ， sûi-tsāi(隨 在) lí(你) khip(吸) ， sī(是) bô(無) iàu-kín(要 緊) ， huân-ló(煩 惱) è sī(是) liâm-piⁿ lín ē tsi̍t(一) tsiah(隻) tsi̍t(一) tsiah(隻) sí(死) khiàu-khiàu(翹 翹) 。」

tsóng-.sī(總 是) ， gû-phang(牛 蜂) uī(為) tio̍h suh hueh(血) ， bô(無) kò͘(顧) it-tshè(一 切) ， tshī-gû(飼 牛) gín-á lâi(來) ， tsi̍t(一) ki(支) hô͘-sîn(胡 蠅) ho̍p-á it-ti̍t(一直) pia̍k-pia̍k háu(哮) ， tsáu(走) bô(無) lī(離) ê lóng liàn lo̍h(落) thô͘(土) kha sí(死) khiàu-khiàu(翹 翹) 。

㊣ khé-sī(啟示) ： lâng(人) uī(為) tsâi(財) sí(死) ， tsiáu(鳥) uī(為) tsia̍h(食) bông(亡) 。 gû-phang(牛 蜂) uī(為) tio̍h suh hueh(血) bô(無) miā(命) 。

註解：
牛蜂（gû-phang）：[牛虻]
iāⁿ-iāⁿ飛（iāⁿ-iāⁿ-pue）：[胡亂飛揚]
ui落去（ui lo̍h-.khì）：[螫下去]
báng-sut-á：[用來驅除蚊蠅的用具，狀似拂塵]
bē-giàn（袂癮）：[不願意]
sóa位（sóa-ūi）：[移位]
m̄ siàn-siàⁿ：[就是不相信]
大phiāng（tōa phiāng）：[大塊頭。形容人的身材高大]
ná-tio̍h（哪tio̍h）：[何必]
liâm-piⁿ（連鞭）：[馬上、等一下]
胡蠅ho̍p-á（hô͘-sîn ho̍p-á）：[蒼蠅拍]
liàn落土kha（輾lo̍h thô͘-kha）：[滾下地上]