《《平民ê基督傳》》

 | | | 轉寄

Tē Jī koàn Ki-tok lâi ê sî 「Tē jī tsiuⁿ Tshù-lí Kàng-tàn」 第二卷 基督來ê時「第二章 處女降誕」（4/4）

作者 Tâi-e̍k:Ko Tik-tsiong, Siu-tèng: Tsng Hūi-phêng&Lîm Tsùn-io̍k 2021.04.25

Taⁿ tsòe-āu lán ài lâi kóng-khí, bô pó-siú tsit-ê kà-sī tī lán Ki-tok-tô͘ ê sìn-gióng ê lāi-bīn, sī bōe ēng-tit ê lí-iû. Ū Ki-tok-tô͘, khiok sī ke̍k sió sò͘ bat teh iau-kiû kóng, lán tio̍h tùi lán ê Sìn-king lâi san-tû tsit kù,"i tùi Sèng Sîn ê koân-lêng tâu-thai, tùi tsāi-sik-lí Mâ-lí-ah tshut-sì" ê ōe khí-lâi, ǹg-bāng ē-thang hō͘ hiah-ê tsiâⁿ-si̍t teh giâu-gî ê lâng khah pêng-an.

Lūn-khí lâng ài giâu-gî i ê tshù-lí Kàng-tàn ê sū, khiok m̄-sī kīn-tāi sin-sin ê tāi-tsì. C hit-khoán giâu-gî sǹg sī tsū tsá-tsá siat-li̍p kàu-hōe ê sî, to̍h í-king ū lah. Tshin-tshiūⁿ tsū tsá-tsá to̍h í-king ū tsi̍t-ê īⁿ-tuan tsiá, kiò-tsò Khé-lín-sah-suh(Cerin thus), to̍h sī Iô-ha-neh só͘ teh kong-kik ê, i sī í-king ū teh giâu-gî tsit-tiám. Í-āu tī ta̍k sî-tāi mā sī siông-siông ū khòaⁿ-kìⁿ hit-khoán lâng tī-·leh. Hiān-kim tsū-jiân mā sī ū nò͘! Put-kò tī tsit tiong-kan ū tsi̍t hāng tsing-tsha tī-·leh. Tsá-tsêng lóng sī kàu-hōe gōa ê lâng, lóng sī hiah-ê bô sìn Ki-tok sī sîn ê lâng, tī teh giâu-gî sio-tsèⁿ i ê tshù-lí Kàng-tàn ê sū-si̍t. Só͘-í Ki-tok ê sîn-sèng kah i ê tshù-lí Kàng-tàn ê sū-si̍t, in lóng sī sio-liân tsò-hóe teh sio-tsèⁿ. In nā m̄ sī pêⁿ-pêⁿ tsiap-la̍p, to̍h sī pêⁿ-pêⁿ kī-tsua̍t. Tsóng-·sī hiān-kim sī khah ài hun-khui lâi siūⁿ. Ū ê lâng tsi̍t bīn sī ū sìn Ki-tok sī sîn, ia̍h tsi̍t bīn sī tsú-tshiòng tshù-lí Kàng-tàn ê sū, sī tio̍h pàng-hē teh, khòaⁿ-tsò sī bē-tàng kái-kuat ê būn-tê.

Tsit-khoán tshin-tshiat ê kè-bô͘, tsuan-tsuan sī ūi-tio̍h thiàⁿ-thàng hoâi-gî tsiá tsiah lâi siūⁿ ê, sī ǹg-bāng Ki-tok-tô͘ ê sîn-king hō͘ lâng khah khoài thang sìn. Kî-si̍t tse sī bōe ē ê sū. Ki-tok-tô͘ ê Sìn-king sī kuat-toàn bē-tàng tshòng hō͘ i khah iông-ī sìn. In-ūi Ki-tok-tô͘ só͘ sìn ê, to̍h sī tsoân ú-tiū king tsòe tē-it thang tsheⁿ-kiaⁿ, ûi-lân sìn ê sū, to̍h sī sìn kóng, Siōng-tè ū tsiâⁿ-tsò lâng! tō ū tsiâⁿ jio̍k-thé!

Lán ài lán ê Sìn-king, hō͘ lâng khah khoài thang sìn! Bē lah! Lán só͘ khòa-lū ê, sī hit-khoán tshin-tshiat ê kè-bô͘, m̄-sī ē hō͘ lâng khah khoài sìn lán ê Sìn-king, hoán-tńg sī ē hō͘ lâng tú-tio̍h koh-khah oh-tit ê būn-tê. In-ūi nā án-ne, āu-lâi tik- khak beh ū tsē-tsē su-sióng-ka koh gī-lūn kóng, án-tsóaⁿ Siōng-tè ē tsiâⁿ-tsò lâng? Hoān-nā ū tshim-tîm ê su-sióng-ka tiāⁿ-tio̍h sī ē tú-tio̍h tsit tsióng ê būn-tê, iā suah ài tshut-la̍t tshì-khòaⁿ ē-thang kái-kuat bōe. Tshin-tshiūⁿ kó͘-tsá ū tsi̍t-ê īⁿ-tuan tsiá, sī m̄ jīn tshù-lí Kàng-tàn ê sū, iā i ū tsīn só͘-ē ê khùi-la̍t lâi tshì-khòaⁿ, siūⁿ kóng,"Τī thiⁿ-·ni̍h ê Ki-tok, tī kai-sat Thê-pí-liû ê tsa̍p-gō͘ nî, ū tùi hit-ê koân-koân ê só͘-tsāi lo̍h-lâi, kā pún-sin kah hit sî óa saⁿ-tsa̍p hòe ê tē-·ni̍h ê I-é-su kiat-liân tsiâⁿ-tsò it-thé."tshin-tshiūⁿ tsit khoán ê siat-sióng, beh lâi pó͘-tshiong tshù-lí Kàng-tàn ê sū, lán siūⁿ siáⁿ khoán? Tse sī in tsòe siān ê só͘ tsò, í-gōa ū tsē-tsē īⁿ-tuan tsiá ū tshut-la̍t teh tshì-khòaⁿ, Tsóng-·sī bô ū khah hó ê kái-sueh. Tshì siūⁿ, kám iáu ū siáⁿ-mi̍h khah hó ê huat-tō͘ thang lâi kiàn-tsèng hō͘ lâng tsi̍t bīn ē-thang sìn Ki-tok ê hòa-sin, iā koh tsi̍t bīn ē-thang hui jīn i ê tshù-lí Kàng-tàn ê sū-si̍t. Tshin-tshiūⁿ án-ne, lán teh kóng khí ài kā Sìn-king tshòng hō͘ iông-ī thang sìn, tse kî-si̍t sī-bô ì-gī ê ōe.

Lán ū thiaⁿ-kìⁿ lâng teh kóng, sui-jiân I-é-su si̍t-tsāi sī Iô-sé-huh kah Mâ-lí-ah lâi seⁿ ê kiáⁿ, ēng án-ne, Siōng-tè mā sī ē-thang lâi oân-sêng i ê hòa-sin ê sū-gia̍p. Tsún-tsò ū-iáⁿ lâi kóng, tsāi Siōng-tè khiok sī bû-só͘ put-lêng. Tsóng-·sī tsit-ê tshù-lí Kàng-tàn ê sū-si̍t, to ū lâng teh tsò-tsèng, án-tsóaⁿ lán kóng bōe? Tsāi Siōng-tè tse mā sī iông-ī, thang ēng án-ne lâi oân-sêng i ê hòa-sin ê sū-gia̍p. Tsóng-·sī tsāi lán tse kám sī pêⁿ-pêⁿ iông-ī thang sìn ê sū? Góa teh kî-koài, án-tsóaⁿ lán ài ka-kī thui-tshik Siōng-tè ê ì-sù? Ia̍h án-tsóaⁿ bô beh tsiap-la̍p kàu-hōe í-ki̍p sèng-tsheh só͘ tsú-tiuⁿ Siōng-tè só͘-ū tsò ê sū? Tshin-tshiūⁿ só-sî ê hû-ha̍p tī só ê khoán-sit, i ê tshù-lí Kàng-tàn sī ū hû-ha̍p tī i ê hòa-sin ê sū-si̍t, án-tsóaⁿ lán m̄ sìn?

It-tēng m̄-thang! kî-si̍t tsit nn̄g-ê kàu-lí, i ê tsûn-bông tiāⁿ-tio̍h sī sio kiat-liân. Lán ū king-giām tio̍h tsē-tsē ê sū-si̍t, lóng sī piáu-sī án-ne. Ín tsi̍t-ê lē lâi kóng, Tik-kok ū tsi̍t ūi sîn-ha̍k -ka, i ū kà-sī ha̍k-sing, tsi̍t bīn sìn hòa-sin ê tō-lí, ia̍h koh tsi̍t bīn hui jīn tshù-lí Kàng-tàn ê sū-si̍t. Tsóng-·sī kiat-kio̍k hiah-ê ha̍k-sing, nā m̄ sī pêⁿ-pêⁿ pó-siú tsit nn̄g tiâu ê tō-lí, to̍h sī pêⁿ-pêⁿ pàng-sak. Tsi̍t pêng ê lâng sī ná tsìn-ji̍p tī tshim ê só͘-tsāi, lâi liáu-kái Ki-tok sī sîn, sim-lāi tit-tio̍h tōa ê tshui-pik lâi pó-siú i ê tshù-lí Kàng-tàn ê sū-si̍t. Κoh tsi̍t pêng ê lâng sī pêⁿ-pêⁿ kī-tsua̍t tsit nn̄g tiâu ê tō-lí, suah tsiâⁿ-tsò tsi̍t-ê î-it sîn lūn-tsiá (Unitanian).

Tse sī tsē-tsē king-giām, só͘-ū tsí-sī lán tsai ê kiat-lūn. Nn̄g tiâu ê tō-lí, sī kiâⁿ siāng tiâu ê ūn-miā. Só͘-í lâng nā ài kiàn-siat hit-khoán tsiat-thiong ê sìn-gióng, khǹg tsiat-thiong ê thāi-tō͘, beh lâi su-siúⁿ Ki-tok-kàu, sī hoán-tńg hō͘ i piàn-tsò bô la̍t ê tsong-kàu, koh iā sī put-tsí bô thò-tòng ê huat-tō͘.

Tsit sî ài lán m̄-bián koh gī-lūn kuan-hē lán ê Tsú ê ha̍k-suat, tshiáⁿ tsò-hóe lâi siūⁿ, lán só͘ thiàⁿ ê Tsú ê jîn-keh. Tshiáⁿ lán ēng kî-ī kah kèng-ùi ê liām-thâu lâi siūⁿ i ê hòa-sin ê ò-biāu ê tō-lí, to̍h sī kóng, tō ū tsiâⁿ jio̍k-thé! Siōng-tè ū tsiâⁿ-tsò lâng! Hit-ê bat àⁿ lo̍h-lâi thiàⁿ lán, iā lán iû-goân ū thiàⁿ i ê, to̍h sī Ki-tok, sī Siōng-tè ê éng-oán ê sèng kiáⁿ, sī tùi kó͘-tsá í-lâi pún ū ê, tsia̍p-tsia̍p tshut-hiān. Tshì siūⁿ, tsū tsá só͘ king-giām ê Kiù-tsú tàn, ta̍k-pái nā siūⁿ-tio̍h Ki-tok ū tshut-sì lâi tsò eⁿ-á, hit sî tī hit-ê tan-sûn ê sìn-gióng ê lāi-tiong, kám m̄ sī ū khoài-lo̍k kah pêng-an tī-teh? kòe-khì bô ū khòaⁿ-kìⁿ siáⁿ-mi̍h, tī tsiong-lâi mā sī bô ū siáⁿ-mi̍h ē-thang khí-lâi iô-tsuah tsit-ê sū-si̍t. Nn̄g tshing nî kú, kàu-hōe só͘ kiàn-tsèng ê, iū-koh kàu-hōe éng-oán só͘ beh sòa tsiap-lâi kiàn-tsèng ê, to̍h sī kóng,"góa sìn I to̍k-seⁿ ê kiáⁿ, lán ê Tsú I-é-su Ki-tok. I tùi Sèng Sîn ê koân-lêng tâu-thai, tùi tsāi-sik-lí Mâ-lí-ah tshut-sì."

Taⁿ最後咱ài來講起，無保守tsit-ê教示tī咱基督徒ê信仰ê內面，是bōe用得ê理由。有基督徒，卻是極小數bat teh要求講，咱tio̍h tùi咱ê信經來刪除tsit句，「伊tùi聖神ê權能投胎，tùi在室女馬利亞出世」ê話起來，ǹg望ē-thang hō͘ hiah-ê 成實teh僥疑ê人khah平安。

論起人ài僥疑伊ê處女降誕ê事，卻m̄是近代新新ê tāi-tsì。Tsit款僥疑算是自早早設立教會ê時，to̍h已經有lah。親像自早早to̍h已經有一个異端者，叫做Khé-lín-sah-suh(Cerin thus)，to̍h是約翰所teh攻擊ê，伊是已經有teh僥疑tsit點。以後tī ta̍k時代mā是常常有看見hit款人tī-·leh。現今自然mā是有nò͘！不過tī tsit中間有一項精差tī-·leh。早前lóng是教會外ê人，lóng是hiah-ê無信基督是神ê人，tī teh僥疑sio-tsèⁿ伊ê處女降誕ê事實。所以基督ê神聖kah伊ê處女降誕ê事實，in lóng是相連做伙teh sio-tsèⁿ。In若m̄是平平接納，to̍h是平平拒絕。總是現今是khah ài分開來想。有ê人一面是有信基督是神，亦一面是主倡處女降誕ê事，是tio̍h放下teh，看做是bē-tàng解決ê問題。

Tsit款親切ê計謀，專專是為tio̍h疼痛懷疑者tsiah來想ê，是ǹg望基督徒ê神經hō͘人khah快thang信。其實這是bōe會ê事。基督徒ê信經是決斷bē-tàng tshòng hō͘伊khah容易信。因為基督徒所信ê，to̍h是全宇宙間最第一thang生驚，為難信ê事，to̍h是信講，上帝有成做人！道有成肉體！

咱ài咱ê信經，hō͘人khah快thang信！Bē lah!咱所掛慮ê，是hit款親切ê計謀，m̄是ē hō͘人khah快信咱ê信經，反轉是ē hō͘人tú-tio̍h koh-khah oh得ê問題。因為若án-ne，後來的確beh有tsē-tsē思想家koh議論講，án怎上帝會成做人?凡若有深沈ê思想家tiāⁿ-tio̍h是ē tú-tio̍h tsit種ê問題，也suah ài出力試看ē-thang解決bōe。親像古早有一个異端者，是m̄認處女降誕ê事，也伊有盡所會ê氣力來試看，想講：「Τī天裡ê基督，tī該撒Thê-pí-liû ê十五年，有tùi hit-ê高高ê所在落來，kā本身kah hit時óa三十歲ê地裡ê耶穌結連成做一體。」親像tsit款ê設想，beh來補充處女降誕ê事，咱想啥款?這是in最善ê所做，以外有tsē-tsē異端者有出力teh試看，總是無有khah好ê解說。試想，kám iáu有啥物khah好ê法度thang來見證hō͘人一面ē-thang信基督ê化身，也koh一面ē-thang非認伊ê處女降誕ê事實。親像án-ne，咱teh講起ài kā信經tshòng hō͘容易thang信，這其實是無意義ê話。

咱有聽見人teh講，雖然耶穌實在是約瑟kah馬利亞來生ê kiáⁿ，用án-ne，上帝mā是ē-thang來完成伊ê化身ê事業。準做有影來講，在上帝卻是無所不能。總是tsit-ê處女降誕ê事實，to有人teh做證， án怎咱講bōe?在上帝這mā是容易，thang用án-ne來完成伊ê化身ê事業。總是在咱這kám是平平容易thang信ê事?我teh奇怪，án怎咱ài ka-kī推測上帝ê意思?亦án怎無beh接納教會以及聖冊所主張上帝所有做ê事?親像鎖匙ê符合tī鎖ê款式，伊ê處女降誕是有符合tī伊ê化身ê事實，án怎咱m̄信?

一定m̄-thang!其實tsit兩个教理，伊ê存亡tiāⁿ-tio̍h是相結連。咱有經驗tio̍h tsē-tsē ê事實，lóng是表示án-ne。引一个例來講，德國有一位神學家，伊有教示學生，一面信化身ê道理，亦koh一面非認處女降誕ê事實。總是結局hiah-ê學生，若m̄是平平保守tsit兩條ê道理，to̍h是平平放sak。一pêng ê人是ná進入tī深ê所在，來了解基督是神，心內得tio̍h大ê催逼來保守伊ê處女降誕ê事實。Κoh一pêng ê人是平平拒絕tsit兩條ê道理，suah成做一个唯一神論者(Unitanian)。

這是tsē-tsē經驗，所有指示咱知ê結論。兩條ê道理，是行siāng條ê運命。所以人若ài建設hit款折衷(tsiat-thiong)ê信仰，khǹg折衷ê態度，beh來思想基督教，是反轉hō͘伊變做無力ê宗教，koh也是不止無妥當ê法度。

Tsit時 ài咱m̄免koh議論關係咱ê主ê學說，請做伙來想，咱所疼ê主ê人格。請咱用奇異kah敬畏ê念頭來想伊ê化身ê奧妙ê道理，to̍h是講，道有成肉體！上帝有成做人！Hit-ê bat àⁿ落來疼咱，也咱猶原有疼伊ê，to̍h是基督，是上帝ê永遠ê聖kiáⁿ，是tùi古早以來本有ê，tsia̍p-tsia̍p出現。試想，自早所經驗ê救主誕，ta̍k-pái若想tio̍h基督有出世來做嬰á，hit時tī hit-ê單純ê信仰ê內中，kám m̄是有快樂kah平安tī-teh ?過去無有看見啥物，tī將來mā是無有啥物ē-thang起來搖tsuah tsit-ê事實。兩千年久，教會所見證ê，又koh教會永遠所beh續接來見證ê，to̍h是講：「我信伊獨生ê kiáⁿ，咱ê主耶穌基督。伊tùi聖神ê權能投胎，tùi在室女馬利亞出世。」