《《平民ê基督傳》》

 | | | 轉寄

Tēsaⁿ koàn Tēla̍k tsiuⁿ Nîkotémô͘ 第三卷 第六章 Nî-ko-té-mô͘

作者 Tâi e̍k:Ko Tiktsiong,Siutēng Lîm Tsùnio̍k & Tsng Hūiphêng 2024.05.19





Tēla̍k tsiuⁿ Nîkotémô͘

Lán thang sióngsiōng tī hit àm, Êlúsalem̀ siâⁿ úntàng ū tōa iôtsuah, tōa siū kámtōng tsiah tio̍h. Inūi tsitê siàuliân ê siansiⁿ, ū tī hiahê tùi ta̍k só͘tsāi tsūtsi̍p lâi ê tsèng Iûthàilâng ê bīntsêng, lâi siotsèⁿ, lêngjio̍k kàuhōe íki̍p kokbîn ê thâulâng ê koânsè, sòa kongjiân lâi kongkik, kóng in sī hō͘ kàuhōe piàntsò tsi̍t tsióng ê tsha̍t siū! tshì siūⁿ, nā ū tshintshiūⁿ tsit khoán ê lâng lâi kongkik lán ê kàmtokhōe! Á sī tī lán ê gīhōe ê tiongkan, ū tsi̍tê tsèng lâng só͘ tsunkèng ê sèng tsiá hiántshut tsi̍tê koânui tsiá ê siūkhì ê bīnmāu, tùi gōabīn tōa hua̍h ti̍tti̍t ji̍plâi. Tī Siōngtè kah tsènggī ê miâ, lâi suanthoân âukiò kóng, lín tsiahê gīoân lóng sī līiōng kong tse tīteh tô͘bô͘ sukí ê līik, lán siūⁿ siáⁿ khoán? lán kám bô phahsǹg hitê siâⁿ·ni̍h ê lâng beh ūitio̍h ánne, lâi tāmpo̍h iôtsuah ?

Khaksi̍t, hit àm tī Êlúsalem̀, kike hō͘hō͘ tīteh tsia̍h àm pn̄g ê sî, iā tī kelō͘·ni̍h, tītsia tīhia ū kiat kui tóng, lóng sī teh kóng khí tsitê siàuliân, kîī ê sianti lâng íki̍p I tī sèngtiān só͘ kiâⁿ hitê ōe hō͘ lâng tsheⁿkiaⁿ ê tāitsì. Tī Êlúsalem̀ hiahê teh ūi kìsêng tso͘tsit ê lâng, simlāi ū phō hoánkhòng kah phuephêng ê thāitō͘, Tsóng·sī liân tī Huatlīsài lâng ê tiongkan hiahê khah tshim siūⁿ·ê, khòaⁿkìⁿ I só͘ kiâⁿ ê sū, simlāi mā sī siū tōa ê kámkik. Putkoán siáⁿ khoán, I sī tsi̍tê sèngtsiá, sī tsi̍tê ióngkám ê tsènggī ê tsiànsū. Hit sî úntàng ū tsin tsē lâng tāike sèsè siaⁿ teh kóng, I tik khak m̄ sī kantaⁿ tsi̍tê pêngsiông ê lâng niāniā. Hit sî úntàng tùi pak pêng ū tsin tsē Galílaiah ê lâng sòa tòa tsióngtsióng kîī ê hongsiaⁿ lo̍hlâi lâm pêng. Lán iā thang liāusióng, Iôhaneh íki̍p i ê siàuliân ê tângphōaⁿ, úntàng íking ū kóngkhí kiâⁿsélé Iôhaneh ū ántsóaⁿ lâi kiàntsèng Iésu ê sū. Inūi hit sî tsèng lâng lóng sī sìniōng kiâⁿsélé Iôhaneh só͘ kiàntsèng ê ōe.

Hoānsè Iôhaneh in tāike íking ū kóngkhí, Tsóng·sī tsiàu khah tōabīn in sībô kóng tsiah tio̍h, iā khah tōabīn Iésu ū tsó͘tsí in. Inūi in nā kóngkhí I só͘ kiâⁿ ê sînjiah, lâng tiāⁿtio̍h ài lūnkhí I ê tāitsì, iā khióngkiaⁿ hoántńg ē tsó͘tòng tio̍h I só͘ beh tsò ê kang, lâi kantaⁿ tsūtsi̍p tsētsē bô líkái ê lâng tiàm tī I ê sin piⁿ. Inūi Êlúsalem̀ ê jînbîn, sībô kohiūⁿ Galílaiah ê jînbîn, in khiok sī ū teh siūⁿ kóng, Siōngtèkok sī tsènggī ê kok, Tsóng·sī kîsi̍t in tēit kuansim·ê, sī teh siūⁿ kóng, in ê kok beh tsiâⁿtsò Isulael ê êngkng, iā hit sî Iéhobah púnsin beh tsò in ê ông, Mesíiah beh tsò in ê tsítō tsiá, tsò bānkoânlêng ê Siōngtè ê tāipiáu lâi tsénglí tēbīn tsiūⁿ ittshè ê koânpèng.

Itpuaⁿ ê Iûthàilâng to lóng sī khǹg tshintshiūⁿ tsit khoán ê ìkiàn, só͘í I nā khéng kah in tôngì, beh lâi tsūtsi̍p kui tōatīn ê lâng, jia̍tsim lâi tsò I ê khatshiú, tī I ê sin piⁿ lâi ênghián in ê kok, tse úntàng sībô ohtit ê sū, Tsóng·sī tsit tsióng sū sī put ha̍p, bô kuanhē tī I ê tsinsi̍t kèōe. I tsinsi̍t ê kèōe sī beh thêko jînlūi lêngsèng ê singua̍h sūgia̍p. Só͘í tsiàu khòaⁿ I sī bênghián ài únba̍t I púnsin, bô ài hiánjiân tī Êlúsalem̀, iā sī ū tsó͘tsí ittshè sio̍k tī sî bōikàu ê ta̍k ténghō ê miâsiaⁿ.

Tsóng·sī tsèng lâng tiāⁿtio̍h ài susiúⁿ I ê tāitsì, tī ta̍k kaikip to ū tsin tsē lâng teh susiúⁿ I, Iôhaneh ū kéngsoán tsi̍tê tùhiān ê lē lâi tsísī lán tsaiiáⁿ hit sî ê tsêng kéng.

"Ū tsi̍tê Huatlīsài lâng, miâ Nikotémô͘, sī Iûthàilâng ê kuaⁿ."Tsitê Nikotémô͘ ū tshimtshim teh siūⁿ i só͘ kiâⁿ ê sū, suijiân i ê tângphōaⁿ lóng sī teh hoánkhòng Iésu, Tsóng·sī i khòaⁿkìⁿ tsitê ióngkám ê siàuliân ê sianti lâng só͘ tsò ê sū, simlāi tōatōa siū kámtōng. I tī simlāi tsin kîkoài teh sàmsu Iésu ê sū, i ài tsaiiáⁿ I ê tāitsì. Tsiàu khòaⁿ i sī tsi̍tê sêngsi̍t jia̍tsêng ê lâng, khósioh i sī ū khah siótáⁿ, khah pósiú ê kàutô͘; tsit khoán ê lâng tī ta̍k sîtāi to lóng sī bô khoàikhoài lâi piáusī i ê ìsù. Só͘í i ū tī Pôaⁿkòetseh gue̍h àmmê, tshēng tn̂gtn̂g ê gōathò, àmtiong kakī tsi̍t lâng thautsáu tshutkhì kiâⁿ tī kelō͘ ê ū tshiūìm àmàm ê só͘tsāi, siūⁿ beh tshōe Iésu, to̍h kiâⁿ kàu tsi̍t ūi, to̍h sī tōabīn Iésu ê ha̍ksing Iôhaneh ū kah I tsòhóe tiàm ê só͘tsāi.

Lán thang sióngsiōng Iôhaneh ū ànnāi tsitê tshutmiâ ê lângkheh, tsiūⁿkhì tī i kah i ê siansiⁿ só͘ tiàm hitê m̄ tsiâⁿ mi̍h ê lâuténg, ia̍h i ū tsē tīhia tsùì lâi thiaⁿ, sòa kìtit i tī ū tsi̍t ji̍t só͘ beh tùi sèkài lâi kiàntsèng ê sū. Lán teh siūⁿ Iôhaneh nā ēthang kohkhah gâu kìtit tsit tsàn sū sī tsin hó, tse kám sī bô kèngkhiân ê só͘tsāi? inūi i tsíū kì tété kúikù ōe, beh lâi tsò lán ê lō͘ēng. Só͘í lán tio̍h tsimtsiok lâi siūⁿ sèngtsheh só͘ kì ê ígōa ê ìsù, sòa tsiàu lán só͘ ē·ê, lâi tsingpó͘ lo̍hkhì tsiah hó.

Lán thang liāusióng Nikotémô͘ sī himbō͘ ài thiaⁿ Iésu kánglūn I só͘ beh kiànsiat ê ôngkok; iā iûgoân thang siūⁿ, I sī ū khǹg itpuaⁿ ê Iûthàilâng ê Siōngtèkok ê kuanliām tī·leh. I sī bô kohiūⁿ kîî ê lâng, iûgoân ū teh thènghāu Isulael tēbīn tsiūⁿ ê ôngkok, beh tittio̍h êngkng, tshiongsēng; iā teh siūⁿ, tsūjiân ta̍kê Isulael lâng, tùi tshutsì to̍h sī tsiâⁿtsò hitê ôngkok ê tsi̍toân. I sī ū tōatōa teh kîthāi Iésu beh tsiâⁿtsò hitê só͘ ioksok ê Mesíiah. I sī tsi̍tê lāutōalâng, koh ū tshongbêng; iā tī tsongkàu kài mā sī tsi̍tê koânui tsiá, só͘í hoānsè i ū khǹg tshintshiat ê ìsù, teh ǹgbāng i só͘ khó͘khǹg ê ōe íki̍p i ê kámhòa, ūkàu gia̍h ē khamtit thang hō͘ tsákhí hiahni̍h piàⁿmiā, lâi tshutthâu tsitê siàuliân ê jia̍tsimka huaⁿhí tsiapla̍p. Iā bián giâugî, i úntàng ū teh siūⁿ, siatsú Iésu nāsī beh kiànsiat tshintshiūⁿ i só͘ teh liāu bāng ê ôngkok, i sī ē tsiâⁿtsò tsi̍tê tôngtsì ê lâng, iā puttsí ū la̍t thang pangtsō͘ i.

Tshintshiūⁿ ánne, Nikotémô͘ ū hiántshut i ēthang pangtsō͘ i hō͘ i thang siū I ê untsêng ê thāitō͘, iā Iésu tikkhak sī ū ēng tiāmtsēng, koh ū uigiâm ê ōe lâi tsikpī i, hō͘ i tsiksî khiampi tsiah tio̍h. Só͘í i tsiah ū ēng hitkhoán tshimtshim tsunkèng ê thāitō͘, lâi tshingho͘ tsitê siàuliân ê tsngkhalâng kóng,"La̍hbí, goán tsai lí tsò siansiⁿ, sī tùi Siōngtè lâi·ê, inūi nā m̄ sī Siōngtè kah Lí tī·leh, to̍h bô lâng ē kiâⁿ Lí só͘ kiâⁿ tsiahê sîn jiah."

Lán lóng bô thiaⁿkìⁿ Nikotémô͘ ū sòatsiap koh kóngkhí siáⁿmi̍h tāitsì, lán tsíū thang thuitshik jîí, inūi Iésu hutjiânkan ū tsó͘tsí Nikotémô͘ ê ōe, iā kahná tshintshiūⁿ ū liáukái tī i ê thâunáu lāi só͘ teh gîbūn ê būntê; sòa lâi ìntap i kóng,"góa si̍tsi̍t kā lí kóng, lâng nā bô têngthâuseⁿ, to̍h bōeē khòaⁿkìⁿ Siōngtè kok."

Lán thang phahsǹg, Iésu ū kohkhah siôngsè lâi suatbêng I ê ìsù, kóng,"La̍hbí, lí só͘ siūⁿ·ê, lūn Siōngtè kok ê ìsù sī tsoânjiân tshògō͘ lah. Lí iáubōe koh kóng ê tsìntsêng, tshiáⁿ iôngín góa lâi tsísī lí sìtsiàⁿ ê kiànkái. Lūn góa só͘ kiànsiat ê ôngkok, lóng bô ū hitkhoán tsèngtī íki̍p tē tsiūⁿ ê koânsè kah te̍kkoân ê ìsù tī·leh. Góa ê ôngkok to̍h sī hitkhoán ū sêngsi̍t sim ê lâng ê kok; iā bôlūn tapo͘, á·sī tsabó͘, hoānnā tī simté, ū tsûn úitāi ê lísióng, tiongsi̍t hângho̍k Siōngtè ê lâng, to̍h sī góa ê ôngkok ê tsi̍toân. Só͘í m̄ sī kantaⁿ tio̍h tshutsì tsò Iûthàilâng, mā m̄ sī ū Iûthàilâng ê te̍kkoân to̍h ēthang tsiâⁿtsò góa ê ôngkok ê tsi̍toân. Lâng bô hun siáⁿ lâng, he̍ksī Iûthài á·sī gōapang, nāsī bô têngthâuseⁿ, bô tùi téngbīn, tùi Siōngtè ê sîn lâi seⁿ, to̍h bōeē ji̍p tī hitê sêngsi̍t sim ê ôngkok."

Lán úntàng beh kîkoài, ántsóaⁿ tsit tsióng ê tōlí ū hiahni̍h bêloān tsitê tshimtîm ê tsongkàuka La̍hbí, Nikotémô͘ ê sim leh? lūn têngthâuseⁿ ê tōlí, tsāi Iûthàilâng to m̄ sī hihán ê ōe. In bat teh phahsǹg gōapang lâng nā lâi tsiapla̍p Iûthàikàu, sī khòaⁿtsò têngthâuseⁿ ê ìsù. Κiámtshái i ē jûloān kàu ánne, sī ūitio̍h i ū thiaⁿtio̍h Iésu kóng, ta̍k lâng liân Iûthàilâng to lóng tio̍h têngthâuseⁿ; iáukoh tsiàu La̍hbí ê ōe sī kóng, ta̍kê Isulael lâng tsūjiân sī lóng beh ū hūn tī hitê tsionglâi ê sèkài. Iésu só͘ kóng ê ōe, tikkhak sī ū bênghián khah kohiūⁿ tī i só͘ teh siūⁿ ê ìsù. Tùi ánne i tsiah kóng,"góa lóng bētàng liáukái, lâng to íking lāu, ántsóaⁿ ē têngthâuseⁿ? kám ē koh ji̍p lāubú ê paktó͘ lāi lâi seⁿ?"

Nikotémô͘ ū mn̄g kóng, ántsóaⁿ? Iáukoh Iésu lóng bô suatbêng hitê "ántsóaⁿ." i sī ū ēng lâng ê kinggiām lâi tshuipik i, hō͘ i kakī lâi phòaⁿtoàn hitê tāitsì kóng,"jio̍kthé kah sînlêng, á·sī tsūjiân lâng ua̍h tī tsit sèkan kah sînlêng ê lâng, simkuaⁿ tsuan ǹg Siōngtè, hitê tsingtsha lí tsai. Tùi jio̍kthé seⁿ·ê, sī jio̍kthé; tùi sîn seⁿ ê, sī sîn. Lâng ē seⁿtshut hitkhoán sînlêng ê liāmthâu, kosiōng ê lísióng ê io̍kbōng, m̄ sī tshut tùi bôìtiong, á·sī tsūjiân só͘ ē·ê. Hit khoán sū tiāⁿtio̍h sī tùi Siōngtè ê sîn tsiah ēthang sêngtsiū i. Nāsī beh lâi lūnkhí hitê "ántsóaⁿ", lán tsíū sī thang kóng ánne niāniā, tsitê īsiōng sī pôaⁿkòe lán só͘ ē liáukái ê sū lah. Inūi Sèng Sîn ê kámhòa sī tshintshiūⁿ hong, tsūiû tsūtsāi, sī tsīntsāi òbiāu ê sū. Tsit sî lí thiaⁿkìⁿ hong teh tshue, tī gōabīn ê tshiūtsâng, Iáukoh lí m̄ tsai i tùi tó ūi lâi, iā beh tùi tó ūi khì. Kiànnā tùi Sèng Sîn seⁿ·ê, ia̍h sī ánne. Góa ê kok to̍h sī tùi Sèng Sîn têngthâuseⁿ·ê, tùi Siōngtè ê sîn só͘ seⁿ ê lâng ê kok."

Hitê lāu La̍hbí thiaⁿliáu mā lóng bōe hiáutit siáⁿmi̍h, sòa kantaⁿ mn̄g I kóng,"ántsóaⁿ ē ánne ah?"

"Lí tsò Isulael ê siansiⁿ, iā m̄ tsai tse? góa kóng, lâng tio̍h suiàu Siōngtè ê sîn ê kámtōng, tsiah ē tsiâⁿtsò sînlêng ê lâng. Tsitê tansûn ê sūsi̍t, lí siōngtshiáⁿ to thiaⁿ bōe hiáutit leh; góa nā kā lí kóng, sio̍k tī thiⁿténg ê khah tshimò ê sū, lín thài beh sìn? inūi tsíū góa tsiah ēthang kā lín kóng hitê sū. Bô lâng bat tsiūⁿthiⁿ lâi bat hitê sū, tsíū tī thiⁿ·ni̍h ê Jîntsú, tùi thiⁿ kànglo̍h·ê niāniā. Lí iáubōe liáukái góa íki̍p góa ê kok ê ítsêng, iáu ū tsin tsē thang tsheⁿkiaⁿ ê sūsi̍t, lí tio̍h ài bat. Góa m̄ sī tsiàu lín só͘ teh siūⁿ ê khoán, ài beh lâi tsē kunông ê gio̍ktsō, lâi hiántshut Siōngtè ê koânpèng, sī beh lâi sêngsiū hitkhoán kiànsiàu ê si̍pjīkè, lâi hiántshut Siōngtè ū ántsóaⁿ hising I púnsin lâi thiàⁿ sèkan lâng. Κoh tshintshiūⁿ Mô͘se kíkhí tsôa tī khòngiá kiù Isulael, Jîntsú ia̍h tikkhak tio̍h ánne siū kíkhí."

Tshiáⁿ sióngsiōng tsitê lāu La̍hbí tsimtsiok thiaⁿliáu i ê tsingsîn tsōngthāi sī siáⁿ khoán. Tsitê khiā tī Nikotémô͘ ê bīntsêng ê Iésu sī tsi̍tê bô miâ siaⁿ siàuliân ê tsngkhalâng; i bô sêngsiū siáⁿmi̍h ha̍khāu ê kàuio̍k; mā sī bô siū kàuhōe ê jīnkhó, iáukoh tī bô ìsik ê tiongkan, i ū tittio̍h I ê tēūi, lâi tsiâⁿtsò Nikotémô͘ ê sītōa; koh tùi i kiàntsèng púnsin sī tùi thiⁿténg lo̍hlâi·ê, ū tsaiiáⁿ Siōngtè ê kèōe, sòa kiàntsèng I sī beh lâi tsiâⁿtsò sèkan ê tsin kng, éngoán ê ua̍hmiā ê goânthâu. Khaksi̍t, I nā m̄ sī tsitê bāngsióngka, to̍h sī tī I ê lāibīn tiāⁿtio̍h sī ū hitkhoán sînsèng ê iàusò͘ tī·leh.

In tī sio biānhōe ê tiongkan só͘ kóng ê ōe, tsiàu lán só͘ ēthang tsaiiáⁿ·ê, tāikhài sī tshintshiūⁿ téngbīn ê khoánsit. In ê tâmlūn sī ántsóaⁿ kiatkio̍k, lán lóng m̄ tsai, inūi tsiàu sèngtsheh só͘ kì hitê kiatbóe ê ōe sī kóng, hō͘ kiànnā sìn ê lâng tiàm tī i ū éngua̍h, m̄koh tsit kù bêngbêng sī Iôhaneh só͘ tsùkái ê ōe. Tsitê tōa La̍hbí thiaⁿliáu m̄tsai sī ū liáukái I ê ìsù, á·sī thiaⁿliáu iubūn to̍h khì, lán mā sī lóng m̄ tsai. Lán sī tsin ài tsaiiáⁿ hitê kiatkio̍k, inūi Nikotémô͘ suijiân sī ū khah sòejī, khah siótáⁿ ê lâng, iáukoh sī tsi̍tê sêngsi̍t teh tsáutshōe tsinlí ê lâng, só͘í lūn i ê sū sī puttsí ē giú lán ê sim. Hitê kiatkio̍k, bôlūn sī siáⁿ khoán, tùi hit sî khí, i ê sim úntàng sībô bē kìtit Iésu tsiah tio̍h. Tsitê tāitsì liáuāu, lán ū koh thiaⁿtio̍h i ê miâ nn̄g pái. Ia̍h ta̍kpái i lóng sī ū ūi Iésu. Ia̍h ta̍kpái mā sī ū hiántshut i ê siótáⁿ ê sèngtsit. Tshintshiūⁿ bat ū tsi̍t pái, jînbîn tsènglâng ê thâulâng tehbeh kongjiân lâi títe̍k Iésu ê sî, i ū ēng bô kàu jōa hunbêng ê thāitō͘ lâi ūi I kóng,"bô thiaⁿ lâng ê piānkái, lán ê lu̍thuat kám ū tēng siáⁿmi̍h lâng ê tsōe?"Koh ū tsi̍t pái Iésu hō͘ lâng tèngsí, iā Alēmáthài ê Iôséhuh beh lâi bâitsòng i ê sinsi ê sî, tī sèngtsheh ū kìtsài kóng,"koh ū Nikotémô͘, khíthâu bat mêsî tsiūkīn Iésu·ê" ia̍h lâi, ū tòa bu̍tio̍h tshiau tîmhiuⁿ. Tse sī i tsòeāu só͘ ēthang thè tsitê siàuliân ê pêngiú só͘ tsò ê sū; i tsit sî suijiân khòaⁿkìⁿ Iésu siū lâng hāisí, tsitê sūsi̍t bêngbêng sī teh piáubêng Iésu ê sitpāi, iáukoh Iésu sī i só͘ tsunkèng ê tsi̍tê pêngiú, só͘í tsiah the̍h hiahni̍h kùitiōng ê mi̍h lâi beh buah Iésu ê sinsi.

Tshintshiūⁿ ánne, lán tùi tsit sî khí sībô koh ū khòaⁿkìⁿ Nikotémô͘ ê tshutthâu. Tsóng·sī lán tikkhak bētàng tsū ánne lâi suahkhì, ōaⁿ lâi kóng pa̍t mi̍h ê sū; lán tiāⁿtio̍h tio̍h thêng sùnkan tītsia koh lâi tsòhóe siūⁿ i só͘ teh bêloān ê būntê.

Lūn hitê būntê tsìtsió lán sī ēthang ánne siūⁿ, lán tùi jînlūi tsìnhòa ê sūsi̍t, ū tittio̍h tsitê kàuhùn tī·leh. Siōngtè tùi lán jînlūi sī ū tsûn tsi̍tê oántāi ê kèōe tī·leh, Siōngtè ū hō͘ hitkhoán khah hāténg ê siūtsōbu̍t tsiāmtsiām tsìnhòa kàu tsiâⁿtsò khah kosiōng ê tsûntsāi tsiá, to̍h sī tsiâⁿtsò tsi̍tê tsūjiân ê lâng; tshintshiūⁿ ánne, i ū hō͘ tsūjiân lâng tsìnhòa kàu tsiâⁿtsò kohkhah kosiōng ê tsûntsāi tsiá, to̍h sī tsiâⁿtsò sînlêng ê lâng, to̍h sī hitkhoán kah Siōngtè ū sio kiatliân ê lâng. Tsūjiân lâng sī ēthang tsìnhòa kàu tsiâⁿtsò sînlêng ê lâng, tshintshiūⁿ niûá, ēthang tsìnhòa kàu tsiâⁿtsò bóetia̍p kāngkhoán. Iáukoh m̄ sī kóng, ta̍k tsiah niûá lóng ū tsìnhòa kàu tsiâⁿtsò bóetia̍p; iā ta̍kê lâng mā m̄ sī kóng lóng ū tsìnhòa kàu tsiâⁿtsò sînlêng ê lâng. Lâng lóng ē, Tsóng·sī bô lóng ánne. Iésu ū kóng, tsūjiân lâng nāsī beh tittio̍h tsiâⁿtsò sînlêng ê lâng, tik khak tio̍h ài kah Siōngtè ū jînkehtik ê liânlo̍k tī·leh. I ê ua̍hmiā tikkhak tio̍h hō͘ Siōngtè ê Sèng Sîn tshiongmóa lâi tittio̍h ua̍hkhì. Tsūjiân lâng hoānsè sī ē tsiâⁿtsò ua̍hkhì, tsūjiân lâng hoānsè sī ōe tsiâⁿtsò iusiù ê lâng, tshintshiūⁿ niûá ē tsiâⁿtsò iuliông ê niûá kāngkhoán. Iáukoh hitkhoán siōng iuliông niûá mā bōe ēngtit kóng, sī bóetia̍p . I sī iáu ū sitlo̍h i ê tsinsi̍t ê thianhūn. Tshintshiūⁿ ánne, hitkhoán siōng iusiù ê tsūjiân lâng, mā iáubōe ēngtit kóng, sī sînlêng ê lâng. I iáu ū suiàu Siōngtè ê sîn thang lâi tittio̍h ua̍hmiā ê liânlo̍k.

Kiâⁿsélé Iôhaneh kàu ū thêngtō͘ sī íking ū kàsī tsit tiâu ê tōlí, i kóng,"góa tsí ū sī ēthang tsúnpī lín ê sim, ēng tsúi kā lín kiâⁿsélé, hō͘ lín hóikái niāniā. Tsóng·sī to̍kto̍k hitê lō͘bóe góa lâi·ê, tsiah ēthang hō͘ lín tittio̍h sînlêng ê ua̍hmiā, to̍kto̍k I tsiah ē ēng tsúi kah Sèng Sîn kā lín sé."

Hoānsè lán tiongkan, ū ê lâng sī tshintshiūⁿ Nikotémô͘, khòaⁿ tse sī kahná tsún tsin ohtit ê ōe. Tsóng·sī Iésu to íking ū hiahni̍h tshutla̍t lâi kiàntsèng, lán kám m̄ sī tio̍h tsimtsiok lâi siūⁿ tsiah hó? lán tiongkan tsētsē lâng sī kantaⁿ boántsiok hitkhoán ū kòe káiliông ê niûá, hitkhoán tuantsong, hó bô͘iūⁿ ê tsūjiân lâng jîí. Kîsi̍t Siōngtè ê sîn, tùi lán ū khǹg oántāi ê ǹgbāng tī·leh. I tsit sî putsî to teh thènghāu lán. Sèng Sîn sī tshintshiūⁿ lán ta̍k sî só͘ teh ho͘khip ê khongkhì kāngkhoán, tsūiû tsūtsāi ūnhêng tī lán ê sin piⁿ. Lán bētàng kóngkhí i tùi tóūi lâi, iā tùi tóūi khì. Lán sī lóng bētàng kóng siáⁿ khoán, iáukoh tse sī ū móamóa ê ǹgbāng ê susiúⁿ. Lán thang sìn, Siōngtè ê Sîn, I ê tsūiû ê ūnhêng, tikkhak m̄ sī kantaⁿ kàihān tī lán ê kàuhōe lāi, kantaⁿhiahê ū te̍kkoân ê tsèng sèngtô͘ tsiah ū thang tittio̍h I ê tshiongmóa niāniā.

Siatsú lán nā ū thiaⁿkìⁿ, ū siáⁿmi̍h bô siū kàuio̍k ê pō͘ping, tióngtōa tī pháiⁿ ê katêng, lâi o̍h lâng kóng tsētsē ê pháiⁿōe, iā lóng bōeē hiáu kîtó, Tsóng·sī i ê pêngiú tāike tsin thiàⁿthàng i, inūi i tsò lâng sī tsoânjiân bô kò͘ tio̍h kakī, iā i ê tsòeāu, sī tshintshiūⁿ Kitok ê khoán, ū thè pa̍t lâng lâi sí. Lán tùi khòaⁿkìⁿ tsit tsióng sūsi̍t, puttikput tio̍h siūⁿ kóng, hoānnā sio̍k tī hitkhoán hó, koh oântsoân ê hêngûi, lóng sī tshut tùi téngbīn lâi·ê; lán puttikput tio̍h siūⁿ kóng, tse sī tùi Iésu só͘ kóng khí, hitê Siōngtè sînpì ê ê Sèng Sîn hong ê só͘ kámhòa·ê, inūi "lán m̄ tsai i tùi tóūi lâi, tùi tóūi khì."



第六章 Nî-ko-té-mô͘


咱thang想像tī hit暗，耶路撒冷城穩當有大搖tsuah，大受感動tsiah tio̍h。因為tsit-ê少年ê先生，有tī hiah-ê tùi ta̍k所在聚集來ê眾偤太人ê面前，來sio-tsèⁿ，凌辱教會以及國民ê頭人ê權勢，續公然來攻擊，講in是hō͘教會變做一種ê賊siū！試想，若有親像tsit款ê人來攻擊咱ê監督會！Á是tī咱ê議會ê中間，有一个眾人所尊敬ê聖者顯出一个權威者ê受氣ê面貌，tùi外面大hua̍h直直入來。Tī上帝kah正義ê名，來宣傳喉叫講，lín tsiah-ê議員lóng是利用公職tī-teh圖謀私己ê利益，咱想啥款？咱kám無phah算hit-ê城裡ê人beh為tio̍h án-ne，來淡薄搖tsuah ?

確實，hit暗tī耶路撒冷，家家戶戶tī-teh食暗飯ê時，也tī街路裡，tī-tsia tī-hia有結kui黨，lóng是teh講起tsit-ê少年，奇異ê先知人以及伊tī聖殿所行hit-ê話hō͘人生驚ê tāi-tsì。Tī耶路撒冷hiah-ê teh為既成ê組織ê人，心內有抱反抗kah批評ê態度，總是連tī法利賽人ê中間hiah-ê khah深想-·ê，看見伊所行ê事，心內mā是受大ê感激。不管啥款，伊是一个聖者，是一个勇敢ê正義ê戰士。Hit時穩當有真tsē人大家細細聲teh講，伊的確m̄是kan-taⁿ一个平常ê人niā-niā。Hit時穩當tùi北pêng有真tsē加利利ê人續帶種種奇異ê風聲落來南pêng。咱也thang料想，約翰以及伊ê 少年ê同伴，穩當已經有講起行洗禮約翰有án怎來見證耶穌ê事。因為hit時眾人lóng是信用行洗禮約翰所見證ê話。

Hoān-sè約翰in大家已經有講起，總是照khah大面in是無講tsiah tio̍h，也khah大面耶穌有阻止in。因為in若講起伊所行ê神蹟，人tiāⁿ-tio̍h ài論起伊ê tāi-tsì，也恐驚反轉會阻擋tio̍h伊所beh做ê工，來kan-taⁿ聚集tsē-tsē無理解ê人tiàm tī伊ê 身邊。因為耶路撒冷ê人民，是無koh樣加利利ê人民，in卻是有teh想講，上帝國是正義ê國，總是其實in第一關心-·ê，是teh想講，in ê國beh成做以色列ê榮光，也hit時耶和華本身beh做in ê王，彌賽亞beh做in ê指導者，做萬權能ê上帝ê代表來整理地面上一切ê權柄。

一般ê偤太人to lóng是khǹg親像tsit款ê意見，所以伊若肯kah in同意，beh來聚集kui大陣ê人，熱心來做伊ê腳手，tī伊ê 身邊來榮顯in ê國，這穩當是無oh得ê事，總是tsit種事是不合，無關係tī伊ê 真實計畫。伊真實ê計畫是beh提高人類靈性ê生活事業。所以照看伊是明顯ài穩密伊本身，無ài顯然tī耶路撒冷，也是有阻止一切屬tī時未到ê ta̍k等號ê名聲。

總是眾人tiāⁿ-tio̍h ài思想伊ê tāi-tsì，tī ta̍k階級to有真tsē人teh思想伊，約翰有揀選一个著現ê例來指示咱知影hit時ê情景。

「有一个法利賽人，名尼哥底謀，是偤太人ê官。」Tsit-ê尼哥底謀有深深teh想伊所行ê事，雖然伊ê 同伴lóng是teh反抗耶穌，總是伊看見tsit-ê勇敢ê少年ê先知人所做ê事，心內大大受感動。伊tī心內真奇怪teh三思耶穌ê事，伊ài知影伊ê tāi-tsì。照看伊是一个誠實熱誠ê人，可惜伊是有khah小膽，khah保守ê教徒；tsit款ê人tī ta̍k時代to lóng是無快快來表示伊ê 意思。所以伊有tī Pôaⁿ過節月暗暝，穿長長ê外套，暗中ka-kī一人偷走出去行tī街路ê有樹蔭暗暗ê所在，想beh tshōe耶穌，to̍h行到一位，to̍h是大面耶穌ê學生約翰有kah伊做伙 tiàm ê所在。

咱thang想像約翰有àn-nāi tsit-ê出名ê人客，上去tī伊kah伊ê 先生所tiàm hit-ê m̄成物ê樓頂，亦伊有坐tī-hia注意來聽，續記得伊tī有一日所beh對世界來見證ê事。咱teh想約翰若ē-thang koh-khah gâu記得tsit層事是真好，這kám是無敬虔ê所在?因為伊只有記短短幾句話，beh來做咱ê路用。所以咱tio̍h tsim-tsiok來想聖冊所記ê以外ê意思，續照咱所ē-·ê，來增補落去tsiah好。

咱thang料想尼哥底謀是欣慕ài聽耶穌講論伊所beh建設ê王國；也猶原thang想，伊是有khǹg一般ê偤太人ê上帝ê國ê觀念tī-·leh。伊是無koh樣其餘ê人，猶原有teh thèng候以色列地面上ê王國，beh得tio̍h榮光、昌盛；也teh想，自然ta̍k-ê以色列人，tùi出世to̍h是成做hit-ê王國ê一員。伊是有大大teh期待耶穌beh成做hit-ê所約束ê彌賽亞。伊是一个老大人，koh有聰明；也tī宗教界mā是一个權威者，所以hoān-sè伊有khǹg親切ê意思，teh ǹg望伊所苦勸ê話以及伊ê 感化，有夠額會堪得thang hō͘早起hiah-ni̍h拚命，來出頭tsit-ê少年ê熱心家歡喜接納。也免僥疑，伊穩當有teh想，設使耶穌若是beh建設親像伊所teh料望ê王國，伊是ē成做一个同志ê人，也不止有力thang幫助伊。

親像án-ne，尼哥底謀有顯出伊ē-thang幫助伊hō͘伊thang受伊ê恩情ê態度，也耶穌的確是有用恬靜，koh有威嚴ê話來責備伊，hō͘伊即時謙卑tsiah tio̍h。所以伊tsiah有用hit款深深尊敬ê態度，來稱呼tsit-ê少年ê庄腳人講：「拉比，阮知你做先生，是tùi上帝來-·ê，因為若m̄是上帝kah你tī-·leh，to̍h無人ē行你所行tsiah-ê神蹟。」

咱lóng無聽見尼哥底謀有續接koh講起啥物tāi-tsì，咱只有thang推測而已，因為耶穌忽然間有阻止尼哥底謀ê話，也kah-ná親像有了解tī伊ê 頭腦內所teh疑問ê問題；續來應答伊講：「我實實kā你講，人若無重頭生，to̍h bōe-ē看見上帝國。」

咱thang phah算，耶穌有koh-khah詳細來說明伊ê 意思，講：「拉比，你所想-·ê，論上帝國ê意思是全然錯誤lah。你iáu未koh講ê 進前，請容允我來指示你四正ê見解。論我所建設ê王國，lóng無有hit款政治以及地上ê權勢kah特權ê意思tī-·leh。我ê王國to̍h是hit款有誠實心ê人ê國；也無論ta-po͘，á是tsa-bó͘，凡若tī心底，有存偉大ê理想，忠實降服上帝ê人，to̍h是我ê王國ê一員。所以m̄是kan-taⁿ tio̍h出世做偤太人，mā m̄是有偤太人ê特權to̍h ē-thang成做我ê王國ê一員。人無分啥人，或是偤太á是外邦，若是無重頭生，無tùi頂面，tùi上帝ê神來生，to̍h bōe-ē入tī hit-ê誠實心ê王國。」

咱穩當beh奇怪，án怎tsit種ê道理有hiah-ni̍h迷亂tsit-ê深沈ê宗教家拉比，尼哥底謀ê心leh？論重頭生ê道理，在偤太人to m̄是稀罕ê話。In bat teh phah算外邦人若來接納偤太教，是看做重頭生ê意思。Κiám-tshái伊ē jû亂到án-ne，是為tio̍h伊有聽tio̍h耶穌講，ta̍k人連偤太人to lóng tio̍h重頭生；iáu-koh照拉比ê話是講，ta̍k-ê以色列人自然是lóng beh有份tī hit-ê將來ê世界。耶穌所講ê話，的確是有明顯khah koh樣tī伊所teh想ê意思。Tùi án-ne伊tsiah講：「我lóng bē-tàng了解，人to已經老，án怎會重頭生？kám ē koh入老母ê腹肚內來生?」

尼哥底謀有問講，án怎？Iáu-koh耶穌lóng無說明hit-ê「án怎。」伊是有用人ê經驗來催逼伊，hō͘伊ka-kī來判斷hit-ê tāi-tsì講：「肉體kah神靈，á是自然人活tī tsit世間kah神靈ê人，心肝專ǹg上帝，hit-ê精差你知。Tùi肉體生ê，是肉體；tùi神生ê，是神。人ē生出hit款神靈ê念頭，高尚ê理想ê慾望，m̄是出tùi無意中，á是自然所ē-·ê。Hit款事tiāⁿ-tio̍h是tùi上帝ê神tsiah ē-thang成就伊。若是beh來論起hit-ê「án怎」，咱只有是thang講án-ne niā-niā，tsit-ê異象是pôaⁿ過咱所ē了解ê事lah。因為聖神ê感化是親像風，自由自在，是盡在奧妙ê事。Tsit時你聽見風teh吹，tī外面ê樹叢，Iáu-koh你m̄ 知伊tùi tó位來，也beh tùi tó位去。見若tùi聖神生-·ê，亦是án-ne。我ê國to̍h是tùi聖神重頭生-·ê，tùi上帝ê神所生ê人ê國。」

Hit-ê老拉比聽了mā lóng bōe曉得啥物，續kan-taⁿ問伊講：「án怎ē án-ne ah?」

「你做以色列ê先生，也m̄ 知這?我講，人tio̍h需要上帝ê神ê感動，tsiah ē成做神靈ê人。Tsit-ê單純ê事實，你尚且to聽bōe曉得leh；我若kā你講，屬tī天頂ê khah深奧ê事，lín thài beh信？因為只有我tsiah ē-thang kā lín講hit-ê事。無人bat tsiūⁿ天來bat hit-ê事，只有tī天裡ê人子，tùi天降落-·ê niā-niā。你iáu未了解我以及我ê國ê以前，iáu有真tsē thang生驚ê事實，你tio̍h ài bat。我m̄是照lín所teh想ê款，ài beh來坐君王ê玉座，來顯出上帝ê權柄，是beh來承受hit款見笑ê十字架，來顯出上帝有án怎犧牲伊本身來疼世間人。Κoh親像摩西舉起蛇tī曠野救以色列，人子亦的確tio̍h án-ne受舉起。」

請想像tsit-ê老拉比tsim-tsiok聽了伊ê 精神狀態是啥款。Tsit-ê khiā tī尼哥底謀ê面前ê耶穌是一个無名聲少年ê庄腳人；伊無承受啥物學校ê教育；mā是無受教會ê認可，iáu-koh tī無意識ê中間，伊有得tio̍h伊ê 地位，來成做尼哥底謀ê序大；koh tùi伊見證本身是tùi天頂落來-·ê，有知影上帝ê計畫，續見證伊是beh來成做世間ê真光，永遠ê活命ê源頭。確實，伊若m̄是tsit-ê夢想家，to̍h是tī伊ê 內面tiāⁿ-tio̍h是有hit款神聖ê要素tī-·leh。

In tī相面會ê中間所講ê話，照咱所ē-thang知影-·ê，大概是親像頂面ê款式。In ê談論是án怎結局，咱lóng m̄ 知，因為照聖冊所記hit-ê結尾ê話是講，hō͘見若信ê人tiàm tī伊有永活，m̄-koh tsit句明明是約翰所註解ê話。Tsit-ê大拉比聽了m̄知是有了解伊ê意思，á是聽了憂悶to̍h去，咱mā是lóng m̄ 知。咱是真ài知影hit-ê結局，因為尼哥底謀雖然是有khah sòe-jī，khah小膽ê人，iáu-koh是一个誠實teh走tshōe真理ê人，所以論伊ê 事是不止ē giú咱ê心。Hit-ê結局，無論是啥款，tùi hit時起，伊ê心穩當是無bē記得耶穌tsiah tio̍h。Tsit-ê tāi-tsì了後，咱有koh聽tio̍h伊ê 名兩pái。亦ta̍k-pái伊lóng是有為耶穌。亦ta̍k-pái mā是有顯出伊ê小膽ê性質。親像bat有一pái，人民眾人ê頭人teh-beh公然來抵敵耶穌ê時，伊有用無到jōa分明ê態度來為伊講：「無聽人ê 辯解，咱ê律法kám有定啥物人ê罪?」Koh有一pái耶穌hō͘人釘死，也A-lē-má-thài ê約瑟beh來埋葬伊ê身屍ê 時，tī聖冊有記載講：「koh有尼哥底謀，起頭bat暝時就近耶穌-·ê」亦來，有帶沒藥tshiau沈香。這是伊最後所ē-thang替tsit-ê少年ê朋友所做ê事；伊tsit時雖然看見耶穌受人害死，tsit-ê事實明明是teh表明耶穌ê失敗，iáu-koh耶穌是伊所尊敬ê一个朋友，所以tsiah the̍h hiah-ni̍h貴重ê物來beh抹耶穌ê身屍。

親像án-ne，咱tùi tsit時起是無koh有看見尼哥底謀ê出頭。總是咱的確bē-tàng自án-ne來suah去，換來講別物ê事；咱tiāⁿ-tio̍h tio̍h停瞬間tī-tsia koh來做伙想伊所teh迷亂ê問題。

論hit-ê問題至少咱是ē-thang án-ne想，咱tùi人類進化ê事實，有得tio̍h tsit-ê教訓tī-·leh。上帝tùi咱人類是有存一个遠大ê計畫tī-·leh，上帝有hō͘ hit款khah下等ê受造物漸漸進化到成做khah高尚ê存在者，to̍h是成做一个自然ê人；親像án-ne，伊有hō͘自然人進化到成做koh-khah高尚ê存在者，to̍h是成做神靈ê人，to̍h是hit款kah上帝有相結連ê人。自然人是ē-thang進化到成做神靈ê人，親像娘á，ē-thang進化到成做尾蝶仝款。Iáu-koh m̄是講，ta̍k隻娘á lóng有進化到成做尾蝶；也ta̍k-ê人mā m̄是講lóng有進化到成做神靈ê人。人lóng ē，總是無lóng án-ne。耶穌有講，自然人若是beh得tio̍h成做神靈ê人，的確tio̍h ài kah上帝有人格的ê聯絡tī-·leh。伊ê 活命的確tio̍h hō͘上帝ê聖神充滿來得tio̍h活氣。自然人hoān-sè是ē成做活氣，自然人hoān-sè是ōe成做優秀ê人，親像娘á會成做優良ê娘á仝款。Iáu-koh hit款上優良娘á mā bōe用得講，是尾蝶。伊是iáu有失落伊ê 真實ê天分。親像án-ne，hit款上優秀ê自然人，mā iáu未用得講，是神靈ê人。伊iáu有需要上帝ê神thang來得tio̍h活命ê聯絡。

行洗禮約翰到有程度是已經有教示tsit條ê道理，伊講：「我只有是ē-thang準備lín ê心，用水kā lín行洗禮，hō͘ lín悔改niā-niā。總是獨獨hit-ê路尾我來-·ê，tsiah ē-thang hō͘ lín得tio̍h神靈ê活命，獨獨伊tsiah ē用水kah聖神kā lín洗。」

Hoān-sè咱中間，有ê人是親像尼哥底謀，看這是kah-ná準真oh得ê話。總是耶穌to已經有hiah-ni̍h出力來見證，咱kám m̄是tio̍h tsim-tsiok來想tsiah好?咱中間tsē-tsē人是kan-taⁿ滿足hit款有過改良ê娘á，hit款端莊、好模樣ê自然人而已。其實上帝ê神，tùi咱有khǹg遠大ê ǹg望tī-·leh。伊tsit時不時to teh thèng候咱。聖神是親像咱ta̍k時所teh呼吸ê空氣仝款，自由自在運行tī咱ê身邊。咱bē-tàng講起伊tùi tó位來，也tùi tó位去。咱是lóng bē-tàng講啥款，iáu-koh這是有滿滿ê ǹg望ê思想。咱thang信，上帝ê神，伊ê 自由ê運行，的確m̄是kan-taⁿ界限tī咱ê教會內，kan-taⁿhiah-ê有特權ê眾聖徒tsiah有thang得tio̍h伊ê 充滿niā-niā。

設使咱若有聽見，有啥物無受教育ê步兵，長大tī pháiⁿ-ê家庭，來學人講tsē-tsē ê pháiⁿ話，也lóng bōe-ē曉祈禱，總是伊ê 朋友大家真疼痛伊，因為伊做人是全然無顧tio̍h ka-kī，也伊ê 最後，是親像基督ê款，有替別人來死。咱tùi看見tsit種事實，不得不tio̍h想講，凡若屬tī hit款好，koh完全ê行為，lóng是出tùi頂面來-·ê；咱不得不tio̍h想講，這是tùi耶穌所講起，hit-ê上帝神秘的ê聖神風ê所感化-·ê，因為「咱m̄ 知伊tùi tó位來，tùi tó位去。」