《《平民ê基督傳》》

 | | | 轉寄

Tēsì koàn Tētsa̍pit tsiuⁿ Siōngtè ê kok 第四卷 第十一章上帝Ê國

作者 Tâi e̍k:Ko Tiktsiong,Siutēng Lîm Tsùnio̍k & Tsng Hūiphêng 2024.08.11





Tētsa̍pit tsiuⁿ Siōngtè ê kok


Kèngjiân kàu ū tsi̍t ji̍t, Iésu to̍h tshutthâu lâi kiànsiat Siōngtè kok éngoán ê tēki tī tsit tēbīn tsiūⁿ. Tsit ji̍t m̄ sī kantaⁿ tī Kapehnáum ê kò͘sū tiong, iā sī tī sèkài le̍ksú tiong tēit tshutmiâ ê ji̍t. Tī kúinā gue̍hji̍t kú ê tiongkan, I íking teh tsúnpī, iā ū tsētsē hó kaupôe ê lâng teh tòe I. Iūkoh I ê sùtô͘ mā ū kintòe I, sūhāu I, tùi tsitê siâⁿ kòe kàu hitê siâⁿ. Tsóng·sī tsitê lóng sī kantaⁿ tsi̍t lâng ê ūntōng, kantaⁿ oákhò to̍kto̍k tsi̍t lâng ê sèⁿmiā niāniā, iā tsitê sèⁿmiā tsiāmtsiām ū lâng puttsí teh oànhūn I, mā ū lâng íking teh kèbô͘ beh bia̍t I. I tsaiiáⁿ I ê lîmtsiong sī kīn tī bo̍ktsêng. Tsit sî sī tio̍hài hē I ê sèng kok ê éngoán ê tēki ê sîtsūn.

Tītsia lán tikkhak tio̍h tshah tsit tsiuⁿ tsòhóe lâi siūⁿ I ê sèng kok ê būntê.

lán nā tshéngkàu giánkiù le̍ksú ê ha̍ktsiá, mn̄g khòaⁿ siáⁿ lâng sī gâu kó͘tshue hitkhoán úitāi ê sū, á·sī hitkhoán tshingkiat, khókèng, thang thiàⁿ ê sū, íki̍p hitkhoán súisúi tshutmiâ tī le̍ksú siōng ê hó miâsiaⁿ ê sū·ê, in to̍h beh ittì lâi ìn kóng sī hitkhoán jia̍tsim ka, hitkhoán sim ū tsûn úitāi ê lísióng ê lâng. Inūi in ū khòaⁿkìⁿ īsiōng, ū khǹg tōa ê ǹgbāng, ū ló͘le̍k, ū siūkhó͘, hoānsè iā khéng hising kàu tī sí, lâi hō͘ i si̍thiān, thang hō͘ tsitê sèkài tsiâⁿtsò tsi̍tê khah kosiōng, khah hó khiākhí ê só͘tsāi.

Tse sī sūsi̍t ê ōe, le̍ktāi hiahê tōa īsiōngka, jia̍tsimka, lóng sī sianhong teh thêko jînlūi ê singua̍h. Tsóng·sī Hokimsu ê kò͘sū ū kàsī lán tsai in ittshè só͘ū ê īsiōng, putkò sī tī 2000 nî tsêng, tùi thiⁿ·ni̍h lo̍hlâi hit tsi̍tê tōa ê īsiōng ê phòaⁿtoàn, iáⁿtsiah jîí; iā tī hiahê jia̍tsim ka ê pōeāu, ū tsi̍tê tsiàⁿ jia̍tsimka ê thâulâng tīleh; I ū tiàmtī ba̍ktshiūⁿ ê kangtiûⁿ lâi khòaⁿkìⁿ I ê īsiōng, lâi bāngsióng I ê kèōe, iā āulâi ū tshutthâu lâi piáubêng tī tsèng lâng ê bīntsêng, sòa lôle̍k, siūkhó͘, sīmtsì khéng sí lâi hō͘ I só͘ khòaⁿ ê īsiōng tittio̍h si̍thiān.

Góa ū siôngsiông teh siàuliām góa só͘ bat, só͘ kèngài ê sò͘ miâ ê jia̍tsimka, inūi in ū tsin jia̍t sim lâi tô͘bô͘ jînlūi ê hēnghok. In ūê sī jia̍tsim tī gōapang ê suankàu, ū ê kìmtsiúhōe, ko͘jîīⁿ, jîtông ê ūntōngtiûⁿ, íki̍p iónglóīⁿ téng ê sūgia̍p. Tshintshiūⁿ ū tsi̍t ūi pêngiú, tsit sî khiok sī tiàmtī hitê tiùⁿlî lāi, tī i ê só͘ tiàm hitê siâⁿ·ni̍h hiahê bô lâng thang pangtsō͘ ê kaikip ê lâng, iā te̍kpia̍t hiahê pêngbîn khut ê sèhàn gíná, sī puttsí tíntāng i ê sim, tìkàu ta̍kpái góa kah i tsòhóe tâmlūn ê sî, i kàu bóe to lóng sī jia̍tsim lâi kóngkhí hit hongbīn ê ōe. I sī sêngsi̍t koh khiamsùn ê lâng, iā puttsí ū kuattoàn lâi tshîsiú i ê lísióng, kàu lō͘bé ū tshuipik in tiongkan tsi̍t thoân lâi kiànsiat tsi̍tê ū kèta̍t ê siāhōe hōngsū liânbêng tī hitê siâⁿ·ni̍h. Siatsú nā bô ū hitkhoán ê jia̍tsimka tī·leh, ūiáⁿ tsitê sèkài beh piànsêng tsi̍tê khóliân ê sèkài!

Lán ài ēng kèngkhiân lâi kóng in hitkhoán jia̍tsim ka, tsit sî sī tùi hn̄ghn̄g ê só͘tsāi lâi teh tsísī lán bat lán Tsú ê susiúⁿ. Lán bat siūⁿtio̍h tī Iésu ê simlāi, I só͘ puttsí jia̍tsêng, te̍kpia̍t tsùtiōng ê têba̍k? lán thang kèngkhiân lâi kóng I tehkhòaⁿ hitê būntê tshaputto sī tshintshiūⁿ bô kóng bōe ēngtit·ê.

Taⁿ tàuté hitê têba̍k sī siáⁿmi̍h? tshiáⁿ lâi siūⁿ, hitê têba̍k to̍h sī I ittshè ê kàsī ê tiongsim tiám, sī I tùi tī sèkài ê tsionglâi só͘ khòaⁿ ê īsiōng. Hitê têba̍k, to̍h sī I tsho͘tsho͘ tshutthâu ê sî só͘ thoân ê têba̍k. Iā tī kohua̍h āu hit sìtsa̍p ji̍t, I ê tsòeāu ê kàuhùn mā iûgoân sī kuanhē tī hit tiám. Tsa̍pjī sùtô͘ siū tshikhián mā sī beh thôaⁿ hit tiám. Tshittsa̍p ê ha̍ksing iū sī lia̍h hit tiám tsò in ê têba̍k. I ittshè ê kàsī, sī kuanhē tī hit tiám, I ittshè ê phìjū tshaputto lóng sī teh suatbêng hit tiám. Siatsú lán nā khì hian kingbûn lūiphian, lán ē khòaⁿtio̍h tī Hokimsu tiong iok ū tsi̍tpah pái, teh kóng khí hitê têba̍k.

Tútú tshintshiūⁿ góa só͘ íking kóngkhí·ê, hoānnā ū jia̍tsêng, ū tsâitiāu ê úitāi ê kàusu, in ta̍k lâng to lóng ū in ê tiongsim lísiūⁿ, puttsí tshuthiān tī in ê susiúⁿ tiong, ia̍h putsî to teh kóng khí hit tiám, iā kóng liáu sī koh kóng; tshintshiūⁿ ánne, lán thang ēng kèngkhiân lâi kóng tsitê sînsèng ê kàusu, iûgoân ū hitkhoán putsî teh kóng khí ê tsi̍tê tiongsim susiúⁿ tī·leh.

I ū tshingho͘ hitê tiongsim susiúⁿ kiòtsò "Siōngtè ê kok". Lán ē kìtit, I tsho͘tsho͘ tshutthâu ê sî, ū suanthoân kóng,"Siōngtè ê kok kīn lah." Tī sing thiⁿ ê ítsêng, I tsòeāu ê kàsī iûgoân sī kuanhē tsittiám, tshintshiūⁿ ū kìtsài kóng,"Τī sìtsa̍p ji̍t ê tiongkan, tshuthiān hō͘ sùtô͘ khòaⁿkìⁿ, sòa kánglūn Siōngtè kok ê sū." Lán lóng ē kìtit, I ittshè ê phìjū tshaputto mā lóng sī teh suatbêng tsit tiâu ê tōlí. Siōngtè ê kok sī tshintshiūⁿ tsi̍t lia̍p kòatshàitsí, sī tshintshiūⁿ kàⁿ, sī tshintshiūⁿ tsi̍tê khǹgba̍t ê pópòe, sī tshintshiūⁿ bāng pha tī hái·ni̍h, téngténg. I lóng sī kóngkhí Siōngtè ê kok!

Tse to̍h sī lán tsìntsêng ài bêng ê tiám, tī Iésu ê simsu tiong, ū tsi̍t hāng pí pa̍t mi̍h kohkhah tiōngiàu ê tiongsim ê jia̍t bāng tī·leh, ia̍h I ū tshingho͘ hitê tiongsim ê jia̍t bāng kiòtsò sī "Siōngtè ê kok".

Taⁿ, I teh kóng tsitê "Siōngtè ê kok" sī siáⁿmi̍h ìsù? tse kám sī kantaⁿ síāu só͘ beh kiâⁿ khì hitê tsionglâi ê thiantông? kuattoàn m̄ sī. Tēit iàukín sī kuanhē tī tsitê hiānsi̍t, hitê ôngkok tio̍hài khaisí tī tsit tēbīn tsiūⁿ sòa lâi tióngtōa, āulâi khuikhuah kàu tī thong sèkan, lâi tsiokhok tsoân jînlūi.

Tsiàu I só͘ tsháiōe, só͘ piáubêng ê tsêngkéng, thang kóng sī tshintshiūⁿ ánne. Siōngtè ê kok sī tshintshiūⁿ tsi̍t lia̍p sèsè ê tséngtsí, iā āulâi ē tōatsâng, kàu tsiâⁿtsò tsi̍t tsâng tián puttsí khuikhuah ê tshiū. Sī tshintshiūⁿ kàⁿ khǹg tī mīhún lāi, kàu kui tshn̂g lóng huatkàⁿ. Sī tshintshiūⁿ tsi̍t lia̍p tséngtsí, tī àmtiong ê tiongkan tsiāmtsiām teh tióngtōa. Sī tshintshiūⁿ be̍h teh tshut khílâi, khíthâu sī ng, āulâi ū sūi, koh āulâi sūi to̍h kiattsiâⁿ ngó͘kok. Siōngtè ê kok bêngbêng sī tsi̍tê ua̍hua̍h ē tióngtōa ê sūsi̍t, sī ē tsiāmtsiām khuikhuah kàu tī thong sèkan, lâi tsiokhok thong sèkan, hō͘ tsoân jînlūi tittio̍h hokkhì.

Siōngtè ê kok sī tsi̍tê súisúi ê kèōe, ài beh khítsō tsi̍tê súisúi ê sèkài. Tse sī sio̍k tī khah kosiōng ê lâng só͘ khòaⁿ ê īsiōng, to̍h sī ióngkám kah inghiông, sī gī kah thiàⁿthàng, sī tsinsi̍t ê tapo͘, sûnkiat ê tsabó͘ ê īsiōng, tse sī hiahê Siōngtè ê búsū, to̍h sī beh tshutthâu tùi sèkài lâi sàutû pōgio̍k, íntshōa tsitê khóliân ê sèkài, piàn ìn tsò sìtsiàⁿ·ê, só͘ phō ê tsi̍tê oántāi ê īsiōng. Iésu só͘ khòaⁿ·ê, to̍h sī tī tēbīn tsiūⁿ tio̍h si̍thiān ê n̂gkim sîtāi ê īsiōng, to̍h sī gī, thiàⁿthàng ê Siōngtè só͘ beh tsiphòe ê ôngkok, iā tīhia tsèng lâng beh ēng thiàⁿ sio ho̍ksāi.

Tī kúinā nî ê tiongkan, I ū tiàmtī Natsalia̍t ê suaⁿténg, lâi be̍ksióng I ê īsiōng. I ná teh tsò íá, íki̍p gûtaⁿ, lâi kiongkip tsèng lâng ê lō͘ēng ê sî, I ê īsiōng ná huatta̍t, ná tsìnpō͘. Tshiáⁿ lán ēng tôngtsêng ê sim, lâi siūⁿ I ê susiúⁿ. Siatsú I ê īsiōng nāsī íking si̍thiān, to̍h tē·ni̍h beh ǹg Tsú lâi gîm sin ê si, iā hiānsè ê singua̍h nāsī suah liáu, hit sî I ê sèng kok ê jînbîn, to̍h beh tsìn ji̍pkhì tī tiùⁿlî lāi, tsiâⁿtsò tī hitê bô khòaⁿkìⁿ ê sèkài ê Siōngtè kok ê tsi̍toân. Tse to̍h sī tsitê siàuliân ê jia̍tsim ka tī Natsalia̍t ê kangtiûⁿ só͘ khòaⁿ ê īsiōng, tse sī I só͘ teh kóng ê "Siōngtè ê kok".

Tsóng·sī tse m̄ sī kantaⁿ tsi̍t tsióng ê lísióng hiong, ia̍h m̄ sī tsi̍tê bāngsióngka só͘ khòaⁿ ê īsiōng niāniā. I ū suanthoân kóng tse sī tsi̍tê si̍ttsètik ê kèōe, tio̍h si̍thiān tī tsit sèkan.

Tēit, I ū kàsī lán tsai, Siōngtè ê kok sī íking tī·leh. Tshiáⁿ lán ē kìtit, I ū ēng pa̍t ê miâtshing kiò i thiankok. Tshiáⁿ lán ē kìtit, I só͘ huanhù lán tio̍h kîtó ê ōe.

Lí ê kok lâikàu, Lí ê tsíì tit tsiâⁿ, tī tē·ni̍h, tshintshiūⁿ tī thiⁿ·ni̍h.

Ìsù sī tio̍h kiû kóng goān Lí ê kok lâikàu, Lí ê tsíì tit tsiâⁿ, tshintshiūⁿ íking ū tī thiⁿ·ni̍h tsi̍tiūⁿ.

Tsit tsióng susiúⁿ, lán thiaⁿliáu sī ē tsiksî tsheⁿkiaⁿ, inūi lán tī tsitê bu̍ttsit tsúgī ê sèkài, sī tsin khoài hutlio̍k tsitê susiúⁿ, to̍h sī kóng tsitê ôngkok tsiàu I lóng tsóng ê koânpèng, kah lóng tsóng ê lu̍thuat, sī íking tsûntsāi tī I só͘ lo̍hlâi hitê sînlêng ê sèkài. I lâikàu sèkan, tsíū sī ài tùi hitê íking tsûntsāi tī thiⁿ·ni̍h ê ôngkok lâi hunsiat tsi̍tê sin ê ôngkok tī tsit tēbīn tsiūⁿ niāniā. Hitê ôngkok ū khaithok tsi̍tê tōa ê sūgia̍p, to̍h sī ài sóa tshut I ê jînbîn tī tsi̍tê sin ê tēhng, tshintshiūⁿ Lômá tèkok só͘ koànsì teh tsò·ê. Tse to̍h sī Páulô tùi Huili̍ppóe ê sìntô͘ só͘ kóng ê susiúⁿ. "lán sī thiⁿténg ê kokbîn." Huili̍ppóe lâng sī khuakháu in sī Lômá tèkok ê kokbîn. Inūi ū Lômá tsò in ê āupiah suaⁿ. In sī Lômá ê kokbîn, Lômá ê koânpèng, te̍kkoân, i ê khuakháu, i ê tēūi, lóng sī sio̍k tī in. In sī Lômá ê kokbîn. Tsóng·sī Huili̍ppóe ê Kitoktô͘ iûgoân iáu sī tsi̍tê koh khah tōa ê ôngkok ê kokbîn, to̍h sī thiankok ê kokbîn, hitê kunông ū kiànsiat I ê sin ê tēhng tī tēbīn tsiūⁿ. " Lán sī thiⁿ·ni̍h ê kokbîn." Hitê tsoân sînlêng ê sèkài, iā tiàmtī hitê sèkài ê Siōngtè, tsèng thiⁿsài, thiⁿsàitiúⁿ, íki̍p tsèng thiankun, lóng ū sêngjīn lán.

Tsitê susiúⁿ sī ē kó͘tshue lán ê sim, hō͘ lán tī sitbōng ê ji̍t thang tittio̍h ǹgbāng kah ióngkám. Tsá tāi ê Kitoktô͘, tī lôhoân kah hāmhāi ê sî, sī ū suiàu tsit tsióng susiúⁿ. Kimji̍t ê Kitoktô͘ tng tī khó͘lān, lâng lóng teh kóng Kitok íking sitpāi, I ê sèng kok tehbeh tókhì ê sî, iā sī suiàu I. M̄sī ánne niāniā, lán ê simba̍k tio̍h putsî gia̍h koân ǹg Tsú! tsoân sînlêng ê sèkài sī khiākhí tī tsitê sèsè ê ôngkok ê pōeāu. Só͘í tēga̍k ê koânpèng bētàng iâⁿ· I. Suijiân ū tsióngtsióng ê sitpāi, Kitok tsòeāu tik khak ē tiksèng.

Lán nā khiā tī háihōaⁿ, to̍h ē khòaⁿkìⁿ tiâuliû tsi̍t khik kòe tsi̍t khik, sī tsi̍t tsìn tsi̍t thè. Tsóng·sī hitê tiâuliû putsî to teh lâu óa lâi! tsi̍t sèkí kòe tsi̍t sèkí, tsèng lâng lóng tsùì tehkhòaⁿ tsingsîn kài ê tiâuliû, tsitê iûgoân sī tsi̍t tsìn tsi̍t thè. Tsóng·sī Siōngtè sī khiākhí tī hitê pōeāu, hitê tiâuliû putsî teh óa lâi. Suisī ū tsióngtsióng ê sitpāi, iáukoh ū tsi̍t ji̍t, "sèkan ê ôngkok beh tsiâⁿtsò lán ê Tsú kah I ê Kitok ê ôngkok; I beh tsò ông kàu tāitāi bô tsīn."

Tsitê sūsi̍t sī teh suatbêng, ántsóaⁿ I tī hitê sitì ê saⁿ nî teh kiànsiat I ê sèng kok ê tiongkan, só͘ū phō hitê tiāmtsēng ê khaksìn kah huaⁿhí ê lo̍kkuan. Tsūjiân Siōngtè kok ê si̍thiān, sī ū puttsí khùnlân ê só͘tsāi tī·leh. Inūi tsitê khóliân hātsiān ê bîntso̍k, tikkhak tio̍h tshéⁿngō͘ lâi sìngióng tsitê thiⁿ·ni̍h ê īsiōng, sòa tsiapla̍p I, himbō͘ I, hângho̍k I. Sī lah, Tsóng·sī I ê sim lóng bô kínkip, I ū khòaⁿ kàu éngoán, I ê sèng kok úntàng sī bōe ē sitpāi. Ū kúinā pah bān lâng beh m̄tsai iáⁿ tsitê īsiōng lâi síkhì, sòa kiâⁿkòe kàu tī hitê pia̍tsè kài. Tsóng·sī Siōngtè kok ê īsiōng, iûgoân sī tī hitê pa̍tsèkài teh thènghāu in, Iésu ê sim kàugia̍h ē jímtit lâi thènghāu in.

I ê sim lóng bô tsi̍tsutá kínkip, I putkò ū kā thiankok ê tséngtsí the̍h lâi iā tī Pale̍ksuting hitê sèsè ê ngtshioh tē niāniā. I putkò sī ài tsūtsi̍p tsi̍t thoân tsīntiong ê lâng lâi tsò khítiám, thang lâi kautài I ê sūgia̍p; iūkoh I beh ji̍tji̍t kah in tī·leh, kàu sèkan ê lō͘bóe, I si̍ttsāi sī ēkhamtit thunlún lâi thènghāu.

Tsóng·sī I só͘ tsò·ê, m̄ sī kantaⁿ ánne niāniā, sī ài beh hō͘ hitê īsiōng tittio̍h si̍thiān. Kàu Iésu tiàm sèkan saⁿ nî liáu, iūkoh I kohua̍h, tsiūⁿ thiⁿ liáuāu, lūnkhí Siōngtè ê kok, tsèng lâng só͘ ha̍ksi̍p ê sī ánne. In tsai hitê tùi in lâi suanthoân Siōngtè kok ê sī Siōngtè, iā Siōngtè ū tshú lâng ê hêngtsōng; iā lâi kah lâng tsòhóe khiākhí, iā tsèng lâng thang khaksi̍t bêngpe̍k tiàmtī hitê sèng kok ê pōeāu ê Siōngtè, m̄ sī tsi̍tê bētàng kóngtshut ê Sèng Sîn niāniā, hoántńg sī tsi̍tê ū tō͘liōng, gâu tôngtsêng, tshintshiat êPē, koh sī lâng ê pêngiú. Tsitê khóliân ê sèkài, tī kòikhì ū bôngba̍k lâi teh tshúimô͘ hitê úitāi thang kiaⁿhiâⁿ ê tsûntsāi tsiá, to̍h sī ēng I ê tshiú lâi teh hûtshî in ê. In khòaⁿkìⁿ tī tsiuûi ū kiaⁿhiâⁿ ê tsūjiânkài; bénglia̍t ê tōahong, tī tshiūnâ tiong ū teh hiùhiù háu ê siaⁿim, tùi thiⁿ·ni̍h ū sî ū lûi tân, Sémh nà Sémh; ū lo̍h pha̍uh, lo̍h hóe; tùi ánne simlāi kîkoài, m̄tsai tàuté hitê tshiauua̍t ittshè ê ua̍hmiā ê tsûntsāi tsiá sī siáⁿ khoán. Taⁿ in íking tsaiiáⁿ, in tsai Iésu sī Siōngtè, hit sî in to̍h tsai Siōngtè sī siáⁿ khoán. In ū khòaⁿkìⁿ tī I ê sin piⁿ siôngsiông ū sèhàn gíná óa lâi lám i ê āmkún. In ū khòaⁿkìⁿ I teh biánlē hiahê bô ǹgbāng, khóliân ê hāténg ê lâng. In ū khòaⁿkìⁿ I ê thiàⁿthàng, I ê hising, I ê gâu thè sitpāi ê lâng siongsim, íki̍p I ê jîntsû gâu thè lâng khòalū. In tī khíthâu lóng m̄tsai I sī Siōngtè, liân hiahê tēit tsaibat I ê lâng, iûgoân to sī ánne. In tsíū tsaiiáⁿ tī jînlūi tiong I sī tēit ū ióngkám, tēit ū jîntsû, tēit khóài ê tângphōaⁿ. Tsóng·sī hitê bētàng kóngtshut ê òbiāu, ū tsiāmtsiām hiántshut kng lâi tsiò tī in ê bīntsêng. I íking tùi sílâng tiong kohua̍h, iā Sèng Sîn lâikàu liáuāu, hit sî in ēng kámthàn kah kiaⁿùi ê liāmthâu lâi bêngpe̍k hitê tsò in ê tângphōaⁿ, pêngiú kah in tsòhóe kiâⁿ ê, to̍h sī éngua̍h ê Siōngtè. Tshiáⁿ siūⁿ in íking bêngpe̍k ánne, hit sî in ū kámsióng siáⁿ khoán!

Tsóng·sī in m̄ sī kantaⁿ bêngpe̍k ánne niāniā, in tsai I ū tsiâⁿtsò jio̍kthé hòasin tiàmtī lâng ê tiongkan, iā tsai Siōngtè ê sèngtsit, Siōngtè ê sîn, Siōngtè ê koânlêng kah khùila̍t, beh tshiongmóa tī lán khóliân ū tsōe ê lâng ê tiongkan. Lán bat khòaⁿtio̍h hitkhoán pînhueh ê tsabó͘ gíná, tò tī pēⁿīⁿ teh behsí·ê? góa bat khòaⁿkìⁿ hitkhoán tsabó͘ gíná tò tī pēⁿīⁿ, iā tī I ê sin piⁿ ū tsi̍tê ióngtsòng ê tapo͘ lâng khiā teh, āulâi ising ū lâi tshiattn̄g hitê tapo͘ lâng ê hueh koán, iā sòa tshiattn̄g tsabó͘ gíná ê, to̍h kā tapo͘ ê hueh koán the̍h lâi tsiap tī tsabó͘ ê, tùi ánne ū ióngtsòng ê ua̍hmiā ê tiâuliû tùi tapo͘ lâng thàu kàu hitê tsabó͘ gíná, hō͘ i lâi tittio̍h sin ê khùila̍t. Lūn hòasin ê ìsù, thang kóng sī ū tāmpo̍h tshintshiūⁿ ánne. Lūn sènglétián ê ìsù, iā sī iûgoân tāmpo̍h tshintshiūⁿ ánne,"sī beh hō͘ lán ê simsîn tittio̍h sinsian ê khùila̍t." Tse to̍h sī I tùi hiahê khóliân ê tsōejîn, to̍h sī hō͘ tsōeok só͘ khó͘tshó͘ ·ê, só͘ ìntap ê ōe. I ū kóng,"góa lâi sī beh hō͘ in ū ua̍h, koh ū hongsēng." Hitê ìsù sī kóng hiahê tēit khóliân hō͘ tsōe só͘ khó͘tshó͘ ê lâng, nā tittio̍h Siōngtè kok ê sin ê khùila̍t, sī ē tsìnpō͘ kàu khahkosiōng tī khah tsá ê sèkài hiahê úitāi ê sèngjîn. M̄nā ánne, I lâikàu sèkan sī ūitio̍h lán ê tsōe lâi sí,"hiàn I ê sèⁿmiā lâi sio̍khôe tsētsē lâng." āulâi I ū tùi sílâng tiong kohua̍h, sòa ēng hitkhoán ē tshìkik lâng ê sim ê tsionglâi ê hibāng, lâi hō͘ in puttsí tsheⁿkiaⁿ. I ū kā in kóng bô ū sí tī·leh, lâng ê ua̍hmiā sī éngoán teh tsìntsêng; i ê ôngkok sī éngoán beh tsìnji̍p tī hitê kîī ê sèkài, to̍h sī Siōngtè ê thiàⁿ só͘ pauûi ê.

Iésu só͘ thoân ê Siōngtè kok ê hokim, sī tāmpo̍h tshintshiūⁿ tsit khoán ê ìsù.
I ū sìniōng lâng, sòa kauthok lâng lâi suanthoân I tsitê kèōe.

Tī khah tsá, lán tiongkan ū ê teh kîkoài, ántsóaⁿ I ē jímtit bô siàu liām tio̍h tī I ê púnsiâⁿ, tsoân Pale̍ksuting, tsoân sèkài, hiahê bô hóikái ê tsèng lâng, ántsóaⁿ I ē jímtit bô siūⁿ ài beh tshut khì thoân kà hō͘ ta̍k só͘tsāi ê lâng hóikái, á·sī siōng tsió mā tio̍h tùi in lâi suanthoân i ê hokim. Lán phahsǹg lâng bô thiaⁿtio̍h tōlí lâi sí, úntàng sī sitlo̍h thiaⁿ tōlí ê kihōe. Tsóng·sī Iésu bêngbêng bô ánne siūⁿ, Siōngtè ê susiúⁿ, kah lán ê sībô siotâng. I ê hokim ū kàsī kóng lán tio̍h kā bān lâng lâi kauthok tī I ê éngoán ê thiàⁿthàng, iā tsiàu I hitê thiàⁿ, sī khah bô ài siáⁿmi̍h lâng tútio̍h bia̍tbô. Bô tsi̍t lâng ē sitlo̍h kīn óa Siōngtè kok ê kihōe, bôlūn sī tī hiānsè, á·sī tī lâisè. Lâng nāsī tshut tùi m̄tsai iáⁿ, to̍h bô tsi̍tê ē tútio̍h sitlo̍h. Nāsī Pē kèngjiân tshun I ê tshiú ài beh phō I, ēng I ê éngoán ê thiàⁿ lâi beh kuansim I, iáukoh kò͘ì lâi kītsua̍t, tse to̍h bô kóng Tsóng·sī mā bô, to̍h úntàng bô tsi̍t lâng ē tútio̍h sitlo̍h.

Tshintshiūⁿ ánne, Iésu só͘ tsò tēit tiōngiàu ê sūgia̍p, to̍h m̄ sī beh thoân hokim kàu hō͘ kôkô ê lâng lóng thiaⁿtio̍h, sòakàu hō͘ kôkô ê lâng lóng hóikái, putkò sī ài beh tso͘tsit tsitê thoânthé (Society), thang hō͘ I tshutkhì tī ta̍k sîtāi lâi suanthoân hokim kóng,"Siōngtè ê kok kīn lah."

Lán nā lâi khòaⁿ, I ū ántsóaⁿ sìniōng lâng, ū kā tsitê kèōe lâi kautài lâng, tse sūsi̍t lóng kámkhài bû liōng. Khaksi̍t lán to lóng bōe kham tit siū kautài, koh iā lâi kautài lán, lán nā siūⁿtio̍h ánne, to̍h bô ū siáⁿmi̍h sūsi̍t ē pí tsitê kohkhah ē kámtōng lán. Tī I thoânkàu saⁿ nî ê tiongkan, tsèng lâng lóng bô hiántshut ū siongtong ê líiû, hō͘ I khòaⁿ sī ē kham tit sìniōng, lâi kautài tsitê iàukín ê kang. Tsóng·sī I ē khòaⁿ kàu lâng ê simté. Si̍ttsāi tsiônglâi bōe bat ū lâng tshintshiūⁿ Iésu ê gâu sìniōng lâng, sòa hótáⁿ lâi kautài lâng, lâi tsò I ê kang.

Góa bat simsik ê thoânsuat teh kóng, lán ê Tsú koh tńgkhì thiⁿ·ni̍h, hit sî thiⁿsài Kapiklia̍t ū mn̄g I kóng,

"Tsú ah, Lí ū oânsêng Lí ê kèōe bô? Lí ū thoânkàu hō͘ lóngtsóng ê lâng hóikái, lâi tsò Siōngtè kok ê kokbîn?"

I ìn kóng,"bô, góa sī tsíū khì kiànsiat góa ê ôngkok, kantaⁿ tùi lâng lâi kóngkhí hitê siausit, sòa ǹgbāng tī āulâi I ē ná tsìnpō͘."

"Tsóng·sī, Tsú ah, sèkài beh ántsóaⁿ thang bat I."

"Ē nò͘! ū Piattò͘, Iâkop, íki̍p Iôhaneh, kah kîtha ê ha̍ksing thang thôaⁿ."

"Tsóng·sī in hoānsè nā bē kìtit khì, á·sī hutlio̍k khì, á·sī pàngsak khì leh."

"In úntàng bô pàngsak. Góa ū sìniōng in, sòa lâi kautài in."

Bô lah, in tiāⁿtio̍h sībô pàngsak khì. Ia̍h kàu ē tiāⁿtio̍h sībô pàngsak khì. Tsóng·sī, ah! khósioh khah tsá hitê ū kongtshái ê īsiōng, ū tsiāmtsiām khah bô bêng! Tī le̍ksú tiong, tēit thang aisiong ê kò͘sū, to̍h sī tsētsē káikiktsiá ê kosiōng ê lísióng, ū ántsóaⁿ hō͘ I ê ha̍ksing liânlūi, tìkàu kàngkē khì!Lūn lán só͘ū ê Siōngtè kok ê lísióng, sī bênghián khah hāténg, līkí ê ìsù, putkò khòaⁿtsò sī hō͘ lán púnsin thang tittio̍h ji̍p thiantông ê tsi̍tê tshiútōaⁿ niāniā. Lán lóng sī hunphài, huntóng, bô ū sio kiatliân ê kàuhōe, thang tsìntsêng lâi tiksèng, kiànsiat Siōngtè ê ôngkok. Lán sī m̄ tsiâⁿ mi̍h ê lâng, bōe kham tit siū kautài Siōngtè kok ê kangtêng. Tsóng·sī lán ēthang kohkhah tsìnpō͘ lah, lán bô lóngtsóng sitpāi lah.

Tshintshiūⁿ ánne, lán teh kángkiù tsitê kò͘sū ê sî, tio̍h ē kìtit I tshutthâu lâi thoânkàu ê tsi̍tê hiánbêng ê bo̍ktik, sī ài beh hingkhí tsi̍tê sèsè ê thoânthé, to̍h sī beh sòatsiap tī ta̍k sîtāi ê. Ji̍t kòeji̍t tī sioliân ê tiongkan, I ū tsūtsi̍p tsi̍tê sèsè ê thoânthé lâi tiàmtī I ê sin piⁿ, lâi kéngsoán in tsiâⁿtsò I tsionglâi ê kàuhōe ê tséngtsí, lâi tùi in piáubêng I ê lísióng, ēng I ê susiúⁿ lâi kó͘tshue in ê sim, ēng I ê singua̍h lâi kámkik in, só͘í kàu tī I tsiūⁿ thiⁿ khì ê sî, thang hō͘ in tsiâⁿtsò ū hùnliān, kàu tsiâⁿsèng ê tsi̍t thoân, to̍h sī Sèng Sîn só͘ tshiongmóa ê, piānpiān thang lâi sòatsiap I ê kèōe.


第十一章 上帝Ê國


竟然到有一日，耶穌to̍h出頭來建設上帝國永遠ê地基tī tsit地面上。Tsit日m̄是kan-taⁿ tī迦百農ê故事中，也是tī世界歷史中第一出名ê日。Tī幾nā月日久ê中間，伊已經teh準備，也有tsē-tsē好交陪ê人teh tòe伊。又koh伊ê使徒mā有跟tòe伊，侍候伊，tùi tsit-ê城過到hit-ê城。總是tsit-ê lóng是kan-taⁿ一人ê運動，kan-taⁿ óa靠獨獨一人ê性命niā-niā，也tsit-ê性命漸漸有人不止teh 怨恨伊，mā有人已經teh計謀beh滅伊。伊知影伊ê臨終是近tī 目前。Tsit時是tio̍h-ài hē伊ê聖國ê永遠ê地基ê時tsūn。

Tī-tsia咱的確tio̍h插tsit章做伙來想伊ê聖國ê問題。

咱若請教研究歷史ê學者，問看啥人是gâu鼓吹hit款偉大ê事，á是hit款清潔、可敬、thang疼ê事，以及hit款súi-súi出名tī歷史上 ê好名聲ê事-·ê，in to̍h beh一致來應講是hit款熱心家，hit款心有存偉大ê理想 ê人。因為in有看見異象，有khǹg大ê ǹg望，有努力，有受苦，hoān-sè也肯犧牲到tī死，來hō͘伊實現，thang hō͘ tsit-ê世界成做一个khah高尚，khah好khiā起ê所在。

這是事實ê話，歷代hiah-ê大異象家、熱心家，lóng是先鋒teh 提高人類ê生活。總是福音書ê故事有教示咱知in一切所有ê異象，不過是tī 2000年前，tùi天裡落來hit一个大ê異象ê判斷、影跡而已；也tī hiah-ê熱心家ê背後，有一个眾熱心家ê頭人tī--leh;伊有tiàm-tī木匠ê工場來看見伊ê異象，來夢想伊ê計畫，也後來有出頭來表明tī眾人ê面前，續勞力、受苦，甚至肯死來hō͘ 伊所看ê異象得tio̍h實現。

我有常常teh siàu念我所bat，所敬愛 ê數名 ê熱心家，因為in有真熱心來圖謀人類ê 幸福。In有ê是熱心tī外邦ê宣教，有ê 禁酒會、孤兒院、兒童ê運動場，以及養老院等 ê事業。親像有一位朋友，tsit時卻是tiàm-tī hit-ê帳籬內，tī伊ê所tiàm hit-ê城裡hiah-ê無人thang幫助ê 階級ê人，也特別hiah-ê平民窟ê細漢gín-á，是不止振動伊ê心，致到ta̍k-pái我kah伊做伙談論ê時，伊到尾to lóng是熱心來講起hit方面ê話。伊是誠實koh謙遜 ê人，也不止有決斷來持守伊ê理想，到路尾有催逼in中間一團來建設一个有價值 ê社會奉事聯盟tī hit-ê城裡。設使若無有hit款ê熱心家tī-·leh，有影 tsit-ê世界beh變成一个可憐ê世界！

咱ài用敬虔來講in hit款熱心家，tsit時是tùi遠遠ê所在來teh指示咱bat咱主ê思想。咱bat想tio̍h tī耶穌ê心內，伊所不止熱誠，特別注重 ê 題目?咱thang敬虔來講伊teh看hit-ê問題差不多是親像無講bōe用得-·ê。

Taⁿ到底 hit-ê題目是啥物？請來想，hit-ê 題目to̍h是伊一切ê教示ê中心點，是伊tùi tī世界ê將來所看ê異象。Hit-ê 題目，to̍h是伊初初出頭ê時所傳ê 題目。也tī koh活後hit四十日，伊ê最後ê教訓mā猶原是關係 tī hit點。十二使徒受差遣mā是beh傳hit點。七十ê學生又是掠hit點做in ê 題目。伊一切ê教示，是關係 tī hit點，伊一切ê譬喻差不多lóng是teh說明hit點。設使咱若去掀經文彙編，咱會看tio̍h tī福音書中約有一百pái，teh講起hit-ê 題目。

Tú-tú親像我所已經講起ê，凡若有熱誠，有才tiāu ê偉大ê教師，in ta̍k人to lóng有in ê中心理想，不止出現 tī in ê思想中，亦不時to teh講起hit點，也講了是koh講；親像án-ne，咱thang用敬虔來講tsit-ê神聖 ê教師，猶原有hit款不時teh講起ê一个中心思想 tī-·leh。

伊有稱呼hit-ê中心思想叫做「上帝ê國」。咱ē記得，伊初初出頭ê時，有宣傳講：「上帝ê國近lah。」Tī升天ê以前，伊最後ê教示猶原是關係tsit點，親像有記載講：「Τī四十日ê中間，出現hō͘使徒看見，續講論上帝國ê事。」咱lóng ē記得，伊一切ê譬喻差不多mā lóng是teh說明tsit條ê道理。上帝ê國是親像一粒芥菜子，是親像酵，是親像一个khǹg密 ê寶貝，是親像網拋tī海裡，等等。伊lóng是講起上帝ê國！

這to̍h是咱進前ài明ê點，tī耶穌ê心思中，有一項比別物koh-khah重要ê中心ê熱望tī-·leh，亦伊有稱呼hit-ê中心ê熱望叫做是「上帝ê國」。

Taⁿ，伊teh講tsit-ê「上帝ê國」是啥物意思？這kám是kan-taⁿ死後所beh行去hit-ê將來ê天堂?決斷m̄是。第一要緊是關係 tī tsit-ê 現實，hit-ê王國tio̍h-ài開始tī tsit地面上續來長大，後來開闊到tī thong世間，來祝福全人類。

照伊所彩畫，所表明ê情景，thang講是親像án-ne。上帝ê國是親像一粒細細ê 種子，也後來ē大叢，到成做一叢展不止開闊ê樹。是親像酵khǹg tī麵粉內，到kui床lóng發酵。是親像一粒種子，tī暗中 ê中間漸漸 teh長大。是親像麥 teh出起來，起頭是秧，後來有穗，koh後來穗to̍h結成五穀。上帝ê國明明是一个活活ē長大ê事實，是ē漸漸開闊到tī thong世間，來祝福thong世間，hō͘全人類得tio̍h福氣。

上帝ê國是一个súi-súi ê計畫，ài beh起造一个súi-súi ê世界。這是屬tī khah高尚ê人所看ê異象，to̍h是勇敢kah英雄，是義kah疼痛，是真實ê ta-po͘，純潔ê tsa-bó͘ ê異象，這是hiah-ê上帝ê武士，to̍h是beh出頭tùi世界來掃除暴虐，引tshōa tsit-ê可憐ê世界，變應做四正-·ê，所抱ê一个遠大ê異象。耶穌所看-·ê，to̍h是tī地面上tio̍h實現 ê 黃金時代ê異象，to̍h是義、疼痛ê上帝所beh 支配ê王國，也tī-hia眾人beh用疼相服事。

Tī幾nā年ê中間，伊有tiàm-tī拿撒勒ê山頂，來默想伊ê異象。伊ná teh做椅á，以及牛擔，來供給眾人ê路用ê時，伊ê異象ná發達，ná 進步。請咱用同情ê心，來想伊ê思想。設使伊ê異象若是已經實現，to̍h地裡beh ǹg主來吟新ê詩，也現世 ê生活若是suah了，hit時伊ê聖國ê人民，to̍h beh進入去tī帳籬內，成做tī hit-ê無看見ê世界ê上帝國ê一員。這to̍h是tsit-ê少年ê熱心家tī拿撒勒ê工場所看ê異象，這是伊所teh講ê「上帝ê國」。

總是這m̄是kan-taⁿ一種 ê理想鄉，亦m̄是一个夢想家所看ê異象niā-niā。伊有宣傳講這是一个實際的ê計畫，tio̍h實現 tī tsit世間。

第一，伊有教示咱知，上帝ê國是已經tī-·leh。請咱ē記得，伊有用別个名稱叫伊天國。請咱ē記得，伊所吩咐咱tio̍h祈禱ê話。

你ê國來到，你ê旨意得成，tī地裡，親像tī天裡。

意思是tio̍h求講願你ê國來到，你ê旨意得成，親像已經有tī天裡一樣。

Tsit種思想，咱聽了是ē即時生驚，因為咱tī tsit-ê物質主義 ê世界，是真快忽略tsit-ê思想，to̍h是講tsit-ê王國照伊lóng總 ê權柄，kah lóng總 ê律法，是已經存在tī 伊所落來hit-ê神靈ê世界。伊來到世間，只有是ài tùi hit-ê已經存在tī天裡ê王國來分設一个新ê王國tī tsit地面上niā-niā。Hit-ê王國有開拓一个大ê事業，to̍h是ài移出伊ê人民tī一个新ê地方，親像羅馬帝國所慣勢teh做-·ê。這to̍h是保羅tùi腓立比ê信徒所講ê思想。「咱是天頂 ê國民。」腓立比人是誇口in是羅馬帝國ê國民。因為有羅馬做in ê後壁山。In是羅馬ê國民，羅馬ê權柄、特權，伊ê誇口，伊ê地位，lóng是屬tī in。In是羅馬ê國民。總是腓立比ê基督徒猶原猶是一个koh-khah大ê王國ê國民，to̍h是天國ê國民，hit-ê君王有建設伊ê新ê地方tī地面上。「咱是天裡ê國民。」Hit-ê全神靈ê世界，也tiàm-tī hit-ê世界ê上帝，眾天使、天使長，以及眾天軍，lóng有承認咱。

Tsit-ê思想是ē鼓吹咱ê心，hō͘咱tī失望ê日thang得tio̍h ǹg望kah勇敢。早代ê基督徒，tī勞煩 kah 陷害 ê時，是有需要tsit種思想。今日ê基督徒當tī 苦難，人lóng teh講基督已經失敗，伊ê聖國teh-beh 倒去ê時，也是需要需要伊。M̄是án-ne niā-niā，咱ê心目tio̍h不時gia̍h高ǹg主！全神靈ê世界是khiā起tī tsit-ê細細ê王國ê背後。所以地獄 ê權柄bē-tàng贏伊。雖然有種種ê失敗，基督最後的確會得勝。

咱若khiā tī海岸，to̍h會看見潮流一刻過一刻，是一進一退。總是hit-ê潮流不時to teh流óa來！一世紀過一世紀，眾人lóng注意teh看精神界ê潮流，tsit-ê猶原是一進一退。總是上帝是khiā起tī hit-ê背後，hit-ê潮流不時teh óa來。雖是有種種ê失敗，iáu-koh有一日，「世間ê王國beh成做咱ê主kah伊ê基督ê王國；伊beh做王到代代無盡。」

Tsit-ê事實是teh說明，án怎伊tī hit-ê失意 ê三年teh建設伊ê聖國ê中間，所有抱hit-ê 恬靜ê確信kah歡喜ê樂觀。自然上帝國ê實現，是有不止困難 ê所在tī-·leh。因為tsit-ê可憐下賤 ê民族，的確tio̍h醒悟來信仰tsit-ê天裡ê異象，續接納伊，欣慕伊，降服伊。是lah，總是伊ê心lóng無緊急，伊有看到永遠，伊ê聖國穩當是bōe-ē失敗。有幾nā百萬人beh m̄知影tsit-ê異象來死去，續行過到tī hit-ê別世界。總是上帝國ê異象，猶原是tī hit-ê別世界teh thèng候in，耶穌ê心夠額會忍得來thèng候in。

伊ê心lóng無一屑á 緊急，伊不過有kā天國ê 種子 the̍h來掖tī巴勒斯坦hit-ê細細ê秧蓆地(ng-tshioh)地niā-niā。伊不過是ài聚集一團盡忠ê人來做起點，thang來交帶伊ê事業；又koh 伊beh日日kah in tī-·leh，到世間ê路尾，伊實在是ēkham得吞忍來thèng候。

總是伊所做ê，m̄是kan-taⁿán-ne niā-niā，是ài beh hō͘ hit-ê異象得tio̍h實現。到耶穌tiàm世間三年了，又koh 伊koh活，上天了後，論起上帝ê國，眾人所學習ê是án-ne。In知hit-ê tùi in來宣傳上帝國ê是上帝，也上帝有取人ê形狀；也來kah人做伙 khiā起，也眾人thang確實明白tiàm-tī hit-ê聖國ê背後ê上帝，m̄是一个bē-tàng講出ê聖神niā-niā，反轉是一个有肚量、gâu同情、親切ê父，koh是人ê朋友。Tsit-ê可憐ê世界，tī過去有盲目來teh揣摩hit-ê偉大thang驚惶ê存在者，to̍h是用伊ê手來teh扶持in ê。In看見tī周圍有驚惶ê自然界；猛烈 ê大風，tī樹林中有teh hiù-hiù哮ê聲音，tùi天裡有時有雷tân，閃nà閃；有落雹，落火；tùi án-ne心內奇怪，m̄知到底 hit-ê超越一切ê活命ê存在者是啥款。Taⁿ in已經知影，in知耶穌是上帝，hit時in to̍h知上帝是啥款。In有看見tī伊ê身邊常常有細漢gín-á óa來攬伊ê頷頸。In有看見伊teh勉勵hiah-ê無ǹg望，可憐ê 下等 ê人。In有看見伊ê疼痛，伊ê 犧牲，伊ê gâu替失敗ê人傷心，以及伊ê仁慈gâu替人掛慮。In tī起頭lóng m̄知伊是上帝，連hiah-ê第一知bat伊ê人，猶原to是án-ne。In只有知影tī人類中伊是第一有勇敢，第一有仁慈，第一可愛ê同伴。總是hit-ê bē-tàng講出ê奧妙，有漸漸顯出光來照tī in ê面前。伊已經tùi死人中koh活，也聖神來到了後，hit時in用感嘆kah驚畏 ê念頭來明白hit-ê做in ê同伴、朋友kah in做伙行ê，to̍h是永活ê上帝。請想in已經明白án-ne，hit時in有感想啥款！

總是in m̄是kan-taⁿ明白án-ne niā-niā，in知伊有成做肉體化身tiàm-tī人ê中間，也知上帝ê性質，上帝ê神，上帝ê權能kah氣力，beh 充滿tī咱可憐有罪ê人ê中間。咱bat看tio̍h hit款貧血ê tsa-bó͘ gín-á，倒 tī病院teh beh死-·ê ?我bat看見hit款tsa-bó͘ gín-á倒 tī病院，也tī伊ê身邊有一个勇壯 ê ta-po͘人khiā teh，後來醫生有來切斷hit-ê ta-po͘人ê血管，也續切斷tsa-bó͘ gín-á ê，to̍h kā ta-po͘ ê血管 the̍h來接 tī tsa-bó͘ ê，tùi án-ne有勇壯 ê活命ê潮流tùi ta-po͘人thàu到hit-ê tsa-bó͘ gín-á，hō͘ 伊來得tio̍h新ê氣力。論化身ê意思，thang講是有淡薄親像án-ne。論聖禮典 ê意思，也是猶原淡薄親像án-ne，「是beh hō͘咱ê心神得tio̍h新鮮ê氣力。」這to̍h是伊tùi hiah-ê可憐ê罪人，to̍h是hō͘罪惡所苦楚 -·ê，所應答ê話。伊有講：「我來是beh hō͘ in有活，koh有豐盛。」Hit-ê意思是講hiah-ê第一可憐hō͘罪所苦楚 ê人，若得tio̍h上帝國ê新 ê氣力，是ē進步到khah高尚tī khah早ê世界hiah-ê偉大ê聖人。m̄-nā án-ne，伊來到世間是為tio̍h咱ê罪來死，「獻伊ê性命來贖回tsē-tsē人。」後來伊有tùi死人中koh活，續用hit款ē刺激人ê心ê將來ê希望，來hō͘ in不止生驚。伊有kā in講無有死tī-·leh，人ê活命是永遠teh進前；伊ê王國是永遠beh進入tī hit-ê奇異ê世界，to̍h是上帝ê疼所包圍ê。

耶穌所傳ê上帝國ê福音，是淡薄親像tsit款ê意思。
伊有信用人，續交託人來宣傳伊tsit-ê計畫。

Tī khah早，咱中間有ê teh奇怪，án怎伊ē忍得無siàu念tio̍h tī伊ê本城，全巴勒斯坦，全世界，hiah-ê無悔改ê眾人，án怎伊ē忍得無想ài beh出去傳教hō͘ ta̍k所在ê人悔改，á是上少mā tio̍h tùi in來宣傳伊ê福音。咱phah算人無聽tio̍h道理來死，穩當是失落聽道理ê機會。總是耶穌明明無án-ne想，上帝ê思想，kah咱ê是無相同。伊ê福音有教示講咱tio̍h kā萬人來交託tī伊ê永遠ê疼痛，也照伊hit-ê疼，是khah無ài啥物人tú-tio̍h滅無。無一人會失落近óa上帝國ê機會，無論是tī現世，á是tī來世。人若是出tùi m̄知影，to̍h無一个ē tú-tio̍h失落。若是父竟然伸伊ê手ài beh抱伊，用伊ê永遠ê疼來beh關心伊，iáu-koh 故意來拒絕，這to̍h無講總是mā無，to̍h穩當無一人ē tú-tio̍h失落。

親像án-ne，耶穌所做第一重要ê事業，to̍h m̄是beh傳福音到hō͘ 個個ê人lóng聽tio̍h，續到hō͘ 個個ê人lóng悔改，不過是ài beh 組織 tsit-ê團體(Society)，thang hō͘ 伊出去tī ta̍k時代來宣傳福音講：「上帝ê國近lah。」

咱若來看，伊有án怎信用人，有kā tsit-ê計畫來交帶人，這事實lóng感慨無量。確實咱to lóng bōe kham得受交帶，koh也來交帶咱，咱若想tio̍h án-ne，to̍h無有啥物事實會比tsit-ê koh-khah ē 感動咱。Tī伊傳教三年ê中間，眾人lóng無顯出有相當ê理由，hō͘伊看是ē kham得信用，來交帶tsit-ê要緊ê工。總是伊ē看到人ê心底。實在從來bōe bat有人親像耶穌ê gâu信用人，續好膽來交帶人，來做伊ê工。

我bat sim-sik ê傳說teh講，咱ê主koh tńg去天裡，hit時天使Ka-pik-lia̍t有問伊講：
「主ah，你有完成你ê計畫無？你kám有傳教hō͘ lóng總 ê人悔改，來做上帝國ê國民?」
伊應講：「無，我是只有去建設我ê王國，kan-taⁿ tùi人來講起hit-ê消息，續ǹg望tī後來伊ē ná 進步。」
「總是，主ah，世界beh án怎thang bat伊。」
「Ē nò͘！有彼得、雅各，以及約翰，kah其他ê學生thang傳。」
「總是in hoān-sè若bē記得去，á是忽略去，á是放sak去leh。」
「In穩當無放sak。我有信用 in，續來交帶in。」
無lah，in tiāⁿ-tio̍h是無放sak去。亦到ē tiāⁿ-tio̍h是無放sak去。總是，ah!可惜khah早hit-ê有光彩ê異象，有漸漸khah無明！Tī歷史中，第一thang哀傷ê故事，to̍h是tsē-tsē改革者ê高尚ê理想，有án怎hō͘伊ê學生連累，致到降低去！論咱所有ê上帝國ê理想，是明顯khah下等、利己ê意思，不過看做是hō͘咱本身thang得tio̍h入天堂ê一个手段niā-niā。咱lóng是分派、分黨，無有相結聯ê教會，thang進前來得勝，建設上帝ê王國。咱是m̄成物ê人，bōe kham得受交帶上帝國ê工程。總是咱ē-thang koh-khah進步lah，咱無lóng總失敗lah。

親像án-ne，咱teh講究tsit-ê故事ê時，tio̍h ē記得伊出頭來傳教ê一个顯明ê目的，是ài beh興起一个細細ê團體，to̍h是beh續接tī ta̍k時代ê。日過日tī相聯ê中間，伊有聚集一个細細ê團體來tiàm-tī伊ê身邊，來揀選in成做伊將來ê教會ê 種子，來tùi in表明伊ê理想，用伊ê思想來鼓吹in ê心，用伊ê生活來感激in，所以到tī伊上天去ê時，thang hō͘ in成做有訓練，到成聖 ê一團，to̍h是聖神所充滿ê，便便thang來續接伊ê計畫。