《《平民ê基督傳》》

 | | | 轉寄

TēGō͘ koàn TĒ11 tsiuⁿ LŌ͘ Ê CHĪNBÓE第五卷第十一章 路Ê盡尾

作者 Tâi e̍k:Ko Tiktsiong,Siutēng Lîm Tsùnio̍k & Tsng Hūiphêng 2024.12.08





TĒ11 tsiuⁿ LŌ͘ Ê CHĪNBÓE

Tsit ê Tô͘tiong ê kìlio̍k, tāiiok sī beh tshingtshó. I sī íking kiâⁿ kàu ū khòaⁿkìⁿ hit ê lō͘ ê tsiongtiám. Iā sî sī íking kàu, Iésu māsī íking ū kuatì. Só͘í I ū ti̍tti̍t kiâⁿ tsiūⁿ Êlúsalém, beh siū lâng hāisí.

Hitnî ê Pôaⁿkètsueh íking kūn, iā tsit pái ê Pôaⁿkètsueh, sī tsiônglâi tī Êlúsalém só͘ bat tsútshuiê ê tiongkan, sī tēit gûihiám iā sī tēit ē iôtsuah lâng ê sim. Inūi itpuaⁿ ê bîntsiòng, tī ítsêng to íking kàugia̍h siū kámtōng, sīmtsì tsit pái koh khòaⁿkìⁿ I ū hō͘ La̍htsalō͘ kohua̍h, só͘í in ū ithuat siū tōa ê kámtōng. Bôlūn sī tī kuelō͘·ni̍h, ásī tī tshītiûⁿ·ni̍h, tsènglâng lóng bô teh kóngkhí pa̍tmi̍h. Tī hit tiâu beh thàng kàu Bēthaniah ê tōlō͘ siōng, ta̍k ji̍t ū kui tōatīn ê kuanlámtsiá tehbeh khì khòaⁿ hit ê khangbōng, íki̍p tùi pa̍t sèkài koh tńglâi hit ê lâng ê tshù. Siōngtè kójiân ū lâi hóngbūn I ê pehsìⁿ; iā Mesíiah sī íking lâi, ài hō͘ Ísiklia̍t tittio̍h tsūiû!

Tiàm tī Êlúsalém hiah ê sītōa, suijiân bēthang huijīn Iésu sī kiâⁿ ê sînjiah; iáukú ū piàⁿmiā ài beh tsó͘tsí pehsìⁿ. Inūi tsiàu hiah ê sītōa teh phahsǹg, tī tsittia̍p tùi ta̍k kok tsūtsi̍p óa lâi ê tsènglâng nā lóng siū iôtōng, tsiū bānsū ê kiatkio̍k sī tsāi tī ba̍ktsêng. Iā in sī siāng tōa ǹgbāng, tī hit ji̍t Iésu bô lâi hù Pôaⁿkètsueh. Tī Êlúsalém ê pehsìⁿ, bôlūn sī I ê pêngiú, ásī I ê tùite̍k, to lóng ēng tâng tsi̍tiūⁿ ê siaⁿim, mn̄g kóng, “Lín phahsǹg tsáiⁿiūⁿ? I kám bô beh lâi hù tseh?”

Sī! I sī beh lâi hù. Siatsú in thang khòaⁿ I teh lâi ê khoánsit! Tsit pang Iésu m̄sī tsiâⁿtsòe tshintshiūⁿ in sī kiaⁿùi, sī himbō͘ ê tsi̍t ê kikbēng ê ióngkám ê tsítōtsiá, ū thang khuakháu I ê koânsè lâi tsiūⁿ Êlúsalém, hoántńg sī tsiâⁿtsòe tshintshiūⁿ tsi̍t ê thiāmtsēng, pisiong ê lâng, kanta gia̍hba̍k lâi khòaⁿ hit pêng ê sèkài, iā kakī tsi̍t lâng lâi kiâⁿ tī tsit tēbīntsiūⁿ, tsiūsī hō͘ I sitbāng· ê. Piattò͘ ē kìtit hit ê ua̍hua̍h ê tsêngkéng, tsiūsī tsiàu i tùi Mákhó só͘ kóng· ê kóng, “Goán tsiūⁿ Êlúsalém, tī lō͘·ni̍h, Iésu kiâⁿ tī goán ê thâutsêng, ha̍ksing gôngngia̍h, tòe ê lâng kiaⁿhiâⁿ. Iésu ū koh tsiong I sī beh tútio̍h ê sū kā goán kóng.”

Hit ê tsêngkéng sī puttsí hiánjiân. Tsiūsī tī Ehulaim ê phahng ê hiongtshuan hit tiâu léngtsēng ê suaⁿlō͘·ni̍h, ū tsi̍t thoân puttsí kiaⁿhiâⁿ ê ha̍ksing, tsi̍t sim kîkoài, iā tsi̍t sim jûloān; tāike tsùì teh khòaⁿ Iésu, tsiūsī kakī tsi̍t lâng tiāmtiām teh kiâⁿ tī in ê thâutsêng· ê. Kháh tsa tī Galílaiah ê sîtāi, in sī lóng koànsì tsin tsūiû, tsin khoàilo̍k lâi tsòe I ê tângphōaⁿ, kap I saⁿkap lúhêng, tsóngsī tsit pang tsiū tsámjiân kohiūⁿ. Iā hit ê kuanhē māsī ū teh piànōaⁿ. Tī sò͘ gue̍hji̍t lâi, in tùi Iésu ê àitsêng íki̍p khimgióng ê sim, sī ithuat tshim, iā sòa siⁿkhí tsi̍t tsióng tsonggiâm, kèngùi ê liāmthâu. In ū tsiāmtsiām kámkaktio̍h kiaⁿhiâⁿ, kámthàn, òbiāu, iā sòa ná siⁿtshut tshiⁿkiaⁿ ê sim, lâi teh khòalū hit ê sī beh kàu ê gûiki. I ū tsiāmtsiām teh līkhui in. In sī bēē liáukái I. In sī m̄tsaiiáⁿ só͘ beh kàu ê sū. Tsóngsī khaksi̍t in tsòe tēit bēthang liáukái ·ê, tsiūsī I ê sitpāi kap I ê sí.

Lán úntàng beh phahsǹg in tāike kàu tī tsit sî, tiāⁿtio̍h sī bēthang gō͘kái I. Inūi tī ítsêng I sī íking nn̄g pái, khiok sī bô hiah siôngsè, lâi tùi in tiongkhok I sī beh tútio̍h ê sū. Tsóngsī in tsittia̍p bêngbêng mā iáusī ū gō͘kái I. In teh phahsǹg, lūn I ê sū sī bô tútú tsiàu I só͘ kóng· ê. I suijiân ū kóng I beh siū hāisí, iā beh kohua̍h, tse úntàng ū pa̍tmi̍h khah sînpì ê ìsù tī·leh. Àntsóaⁿ I tī túátsiah to ē hō͘ La̍htsalō͘ tùi sí kohua̍h, thàithó I huaⁿhí jímsiū sísit? In iûgoân ū jiámtio̍h kokbîn ê tsingsîn, ū teh piktshiat thènghāu I ê kok, iā khòaⁿ I tī Bēthaniah só͘ kiâⁿ hit ê sînjiah, bô m̄sī ithuat teh tshioktsìn I ê kok. Ísiklia̍t ê êngkng tshànlān ê ji̍ttsí sī íking teh pikóa lah. Kiámtshái tsittia̍p tútú tsènglâng lóng tsūtsi̍p beh lâi hù Pôaⁿkètsueh ê sî, Tsú Siōngtè beh ēng I ê tsó͘ Tāipi̍t ê ūi hō͘ I. I beh tsòe ông tī Ngákok ê ke kàu tāitāi, I ê kok iā bô kiôngtsīn.

Lán nā sòatsiap lâi tòe in kiâⁿ tī hit tiâu lō͘, hitsî lán tsiū ē tsaiiáⁿ in ū putsî khǹg tsit hō bāngsióng tī·leh! Lán bô koh ū thang khòaⁿkìⁿ khah hó ê sūsi̍t, pí tī tsi̍tⁿ̄g ji̍t āu só͘ tútio̍h ê thang lâi kantsèng in sī iáu ū kò͘tsip hit hō bāngsióng.

In ū kiâⁿ kàu tsiaptio̍h tùi pakpêng thànglo̍hlâi hit tiâu ê suaⁿlō͘; tīhia lâi tsiaptio̍h tùi Galílaiah lo̍hlâi beh hù Pôaⁿkètsueh ê tsi̍t thoân ê sûnlétsiá. Lán thang sióngsiōng, tī hit tiongkan úntàng iûgoân ū Kapehnáum ê lâng saⁿkap tsòetīn teh kiâⁿ, iā tāike kàu ji̍tàm ê sî, in tsiū saⁿkap hiohkhùn. Tī ū tsi̍t ê gue̍hkng mî, lán ū khòaⁿkìⁿ tsi̍t ê hūjînlâng óakhì tsiūkūn Iésu. Tsit ê hūjînlâng tsiūsī tī nn̄g nî tsêng tī Kapehnáum ê kuelō͘·ni̍h lán sī ū khòaⁿkìⁿ ·ê, tī hitsî i ū kap i ê tiōnghu, íki̍p i nn̄g ê sèkiáⁿ, saⁿkap tsòetīn beh khì hōetn̂g thiaⁿ Iésu thâutsi̍t pái ê suatkàu. Tsit ê kiaungō͘ ê lāu hūjînlâng ū ēng tsoân tsingsîn khǹg tsi̍t ê iásim tī·leh. Kiám sī bô kèta̍t ê iásim ? Siáng káⁿ ánni kóng? Inūi tse sī tsi̍t ê tsīntiong tòe Iésu kàu tī si̍pjīkè kha ê hūjînlâng só͘ phāu ê iásim, iā sī tsi̍t ê tsòe lāubú ê lâng só͘ phāu ê iásim, sī tsoânjiân m̄sī ūitio̍h i púnsin, sī ūitio̍h i ê kiáⁿ ê. Tsit ê hūjînlâng teh phahsǹg Iésu ê tiksèng ê ji̍t sī íking pikkūn, iā I ê Sèngkok sī tehbeh si̍thiān lah. In nn̄g ê kiáⁿ, tsiūsī tī Iésu só͘ tēit sìnjīm ê saⁿ lâng tiong ê tsāilāi. I ū siôngsiông thiaⁿkìⁿ in hiah ê kiáⁿ ū teh gīlūn tī āulâi siáng thang tsòe tēit tōa.

Tsit ê hūjînlâng tsi̍tē kiâⁿóa beh khì tsiūkūn Iésu, hitsî i ê kiáⁿ tsaiiáⁿ, ásī thang kóng, ū liāutio̍h in lāubú ê ìsù, tsiū tùi Iésu kóng, “Siansiⁿ ah, tshiáⁿ lí iôngún goán lāubú lâi tùi lí pínkiû tsi̍t hāng sū, hó m̄?” I ū hiántshut tsòe tsi̍t ê jîntsû ê Kokông lâi ìn i kóng, “Ài góa kā lí kiâⁿ símmi̍h ah?” “Goān lí tshut bēnglēng, hō͘ góa tsit nn̄g ê kiáⁿ tī lí ê kok, tsi̍t ê tsē lí ê tsiàⁿpêng, iā tsi̍t ê tsē lí ê tòpêng.” Iésu tsiū ēng tshintshiat, lînbín ê sim lâi khòaⁿ tsit ê hūjînlâng, íki̍p i ê kiáⁿjî. In sī tsoânjiân m̄ tsaiiáⁿ in sī bô teh liâubāng ê sū, sī íking tehbeh tsiâⁿ lah!

“Lín só͘ kiû ê, lín m̄tsai. Góa só͘ lim ê pue, lín kám ē lim? Góa só͘ siū ê sé, lín kám ē siū?”

Bô giâugî, tī hitsî Ngákok kap Iôhaneh thiaⁿ tsit kù, sī lia̍htsòe Iésu teh kóng, tī tsionglâi nā beh khí kikbēng, tsiū úntàng ē tútio̍h tsin kankhó͘ ê sū, iā ū sî kiámtshái in tio̍h ài piàⁿmiā lâi póhō͘ I, khah iàukín tī in púnsin. Só͘í in tsiū bô kiaⁿ, ìn I kóng, “Ē lah.”

Iésu ū bat in. Iā I ū tsaiiáⁿ, nā ū pitiàu ê sî, in kójiân kamgoān ūitio̍h I lâi sí. I sī pí in púnsin kohkhah tsaibat in ê khoán. I sī pí lán púnsin kohkhah tsaiiáⁿ lán sī iáu ū khùila̍t thang kiâⁿ kohkhah hó ê sū. In khiā tī i ê bīntsêng, hitsî in sī gâu kò͘ kakī, sī gâu khǹg iásim ê lâng, tsóngsī I kiám sī ū khòaⁿkàu tī in ê tsionglâi sī beh siū ê tshì, tsiūsī “Hilu̍t ông beh ēng to thâi Iôhaneh ê hiaⁿtī Ngákok,” iā hit ê nîlāu ê Iôhaneh beh tsīntiong tī i só͘ kèngài ê Tsú, kamgoān tútio̍h sûnlān? Khaksi̍t tshintshiūⁿ hit khoán ōe kámtōng lâng ê īⁿsiōng, sī ū hiántshut tī i só͘ ìntap ê ōe.

“Góa só͘ lim ê pue, lín beh lim i; góa só͘ siū ê sé, lín beh siū i; tsóngsī tsē góa ê tsiàⁿpêng, tòpêng, m̄sī góa ēthang hō͘ lâng, to̍kto̍k ūitio̍h símmi̍h lâng pīpān ê, tsiū hō͘ i.”

Tsóngsī in mā iáu thiaⁿ bô. Iā in lāubú kiám iûgoân thiaⁿ bô? Hūjînlâng sī ū tsi̍t tsióng kîkoài ê púnlêng tī·leh, sī puttsí bíntsia̍t, khoài liáukái i ê sim só͘ kámtshioktio̍h ê sū. I tsùì lâi khòaⁿ i só͘ kèngài ê Tsú, hitsî hit ê thang hânsim ê ūkò ê ōe, kiám bô phahtio̍h i ê sim? Khah tsá tiàm tī Kapehnáum hit ê khoàilo̍k ê ji̍ttsí sī íking khì lah. Tsittia̍p I khòaⁿliáu sī ithuat tsonggiâm, thang kiaⁿ ê khoán, ū lī lán ná hn̄g. I sī bô tshintshiūⁿ Ông, beh tsìntsêng khì siū hong lâi tittio̍h I ê Kok. I hoántńg sī tshintshiūⁿ Ông beh tsìntsêng khì tsiūkūn sísit. Tàutí Iésu púnsin, íki̍p i ê sèkiáⁿ só͘ beh lim ê pue íki̍p só͘ beh siū hit ê bô hó tiāuthâu ê sé sī símmi̍h?

Tsebehtái ê kiáⁿ ê lāubú ah, tsit khoán susióng suisī lí tsittia̍p bô líkái, tī āulâi úntàng ē lah. Lí íki̍p lí hiah ê beh tsē tī i ê tsiàⁿpêng kap tòpêng ê ióngkám ê kiáⁿ, úntàng beh liáukái i. Inūi hit ê káibê ê ji̍t sī íking kūn lah, hitsî lí beh phakpài tī tsú ê bīntsêng, khòaⁿkìⁿ Tsú hō͘ lâng tèng tī thang kiànsiàu ê si̍pjīkè, koh tī i ê tsóiūpêng ū tâng siū tēngtsōe ê tsha̍t!

Tsit ê sūkiāⁿ sī iáubē kiatkio̍k. Tī tsit hō giâmsiok ê gûiki, liân tī tsa̍pjī ha̍ksing ê thoânthé tiong, iáu ū khòaⁿkìⁿ kò͘kí ê sim, tse si̍ttsāi sī kethiⁿ Iésu ê kankhó͘. I kap lán saⁿ kaupôe ê sî, khahsiông I lóng sī sitbāng. “I bat lán ê sèngtsêng; I ē kìtit lán sī thô͘.” Hitsî tsèng ha̍ksing thiaⁿliáu tsūjiân sī tsin siūkhì. Hutjiân in tsiū puttsí tòngbētiâu Ngákok kap Iôhaneh só͘ tsòe ê thàitō͘. Hiah ê ha̍ksing lóng sī ke̍k tsiàu lâng ê khoán. Tsóngsī tsit khoán sèngphiah sī bēēngtit hiántshut tī Iésu ê bīntsêng. Iésu tsiū kiò in óalâi. Tsêng bat tsi̍t pái ūitio̍h in tāike gâu saⁿ oàntò͘, I tsiū phō tsi̍t ê sèhàn gínná lâi tī in tiongkan kàsī in. Tsit pái I ū koh ēng unjiû ê ōe lâi tsikpī in, lâi hoksu̍t hit ê kàsī. Kongtō lâi kóng, kàu kingkòe kúinā nî āu, in to lóng iáu ē kìtit I só͘ biánlē ê ōe, tsiūsī kóng,
“Lín tsai gōapang só͘ tsun tsòe jînkun· ê tsòe Tsú lâi tīlí in, in ê tāijîn koánhat in. To̍kto̍k lín tiongkan m̄sī ánni; lín tiongkan ài tsòe tōa ·ê, beh tsòe lín ê tsheēng; lín tiongkan ài tsòe thâu· ê, beh tsòe tsènglâng ê lô͘po̍k. Inūi Jîntsú kàu m̄sī beh tsheēng lâng, sī beh hō͘ lâng tsheēng, koh hiàn I ê sìⁿmiā lâi sio̍khôe tsētsē lâng.”

Hit ê hênglia̍t ū sòatsiap teh tsìntsêng. Kè kúiji̍t āu, lán ū koh khòaⁿkìⁿ tī tsit ê tô͘tiong sī tútio̍h· ê, iáu tsi̍t ê tsêngkéng. Tsittia̍p in sī kiâⁿ kūn Êlúsalém. Tùi pakpêng lo̍hlâi hiah ê kui tōatīn ê sûnlétsiá, sī íking kiâⁿ kàu tī Iélīkho siâⁿ, iā tsit ê siâⁿ·ni̍h ê pehsìⁿ ū kui tōatīn tshutlâi beh tsihtsiap in. Inūi ū piànpiàn hong siaⁿ kóng, hit ê tī Bēthaniah hō͘ La̍htsalō͘ kohua̍h ê Iésu, ū kap tsèng tāike tsòetīn tī teh lâi, iūkoh ū thiaⁿkìⁿ kóng, I sī Siōngtè ê Mesíiah beh lâi tsínkiù Ísiklia̍t thuatlī Lômá lâng ê appik. In ê jia̍tsêng ê tsiapthāi, sī piáubêng Iésu ū tittio̍h tsèng pehsìⁿ ê sim. Tī tsit khoán tsêngkéng, tsèng ha̍ksing kiám bô kanta tāising khòaⁿkìⁿ in ê Tsú ê tiksèng?

Tī hit ê kûntsiòng ê jia̍tnāu, âukiò kap suanjióng ê tiongkan, ū tsi̍t ê tshiⁿmî lâng kap tsèng tāike ti̍tti̍t tsàmkhì kàu tī hit ê siâⁿmn̂g kháu ê só͘tsāi.

Hit ê tshiⁿmî lâng tsiū mn̄g kóng, “Bô ah, sī símmi̍h tāitsì lè?” Tī i ê sinpiⁿ teh kiâⁿ ê lâng tsiū tōa siaⁿ huaⁿhí âukiò lâi ìn i kóng, “Natsalia̍t lâng Iésu beh tùi tsia kè!” Tùi ánni, tī tiapákú ê tiongkan, tsit ê tshiⁿmî lâng tsiū siⁿtshut huisiông tōa ê ǹgbāng. I sī phahsǹg i ê kiùtshiⁿ íking kàu lah! Hit ê bat tī Êlúsalém ihó tsi̍t ê tshiⁿmî ê Iésu! I beh tùi tsia kòe! Iésu íking kiâⁿ kòebīn khì lah? Hāi lah! Hitsî i tsiū tshut tōa siaⁿ, ēng tsoân tsingsîn lâi âukiò, oánjiân tshintshiūⁿ tī tsúitiong beh tîmsí ê lâng só͘ huattshut tsi̍t khoán tsòeāu ê hibōng ê siaⁿim. Liân tī hit ê kûntsiòng puttsí nāutōng ê tiongkan, Iésu iā ū thiaⁿkìⁿ i ê âukiò ê siaⁿ kóng, “Tāipi̍t ê hō͘è, Iésu, khólîn góa!” Tsit ê tshiⁿmî lâng ū ēng tsènglâng só͘ ài tshingho͘ I ê miâ, tsia̍ptsia̍p lâi piktshiat kiû kiò I ê pangtsān. Tsènglâng tsiū tshutla̍t lâi tsó͘tsí i, kiò i tio̍h tsēngtsēng; tsóngsī bô tsi̍t ê ēthang hō͘ i tsēngtsēng. “Tāipi̍t ê hō͘è ah, Tāipi̍t ê hō͘è ah, khólîn góa!”

Tùi ánni, Iésu tsiū tôngtsêng i, tútú sī tshintshiūⁿ lâng nā ū piktshiat kiûkiò I, hitsî I tsiū bô lūn sī tùi i, ásī tùi lán, putsî to tikkhak ē thiaⁿ. Suijiân kûntsiòng jia̍tnāu ê siaⁿim, iā bēē thatgāitio̍h I ê hīkhang. I tsiū tsó͘tòng tsoân hênglia̍t ê lâng lâi thêng tī hit ê só͘tsāi.
Iésu tsiū kóng, “Kiò i lâi.” Iā hiah ê tshintshiat ê lâng, tsiū khì kā hit ê tshiⁿmî lâng kóng, “Patímái hiaⁿ ah, an lí ê sim! Khílâi! I teh kiò lí ah!” I tsiū pàngsak i ê kū ê gōathò. Lâng tsiū tshōa i, i tsiū ngia̍uhngia̍uhtshuah kiâⁿ óalâi Iésu ê bīntsêng. “Sèkiáⁿ ah, ài góa kā lí tsòe símmi̍h?” “Lia̍pphonî, góa ài tittio̍h khòaⁿkìⁿ!” Tùi ánni, i liâmpiⁿ tittio̍h khòaⁿkìⁿ, tsiū tī lō͘ni̍h lâi tè Iésu.

Tsènglâng khòaⁿliáu, sòa tsēngtsēng tshiⁿkiaⁿ I sī kiâⁿ tsit ê tshiautsūjiân ê sū. Tùi ánni, in tsiū siⁿkhí kapōe ê jia̍tsêng ài beh tòe I. Iā in khòaⁿkìⁿ tsit hō tshintshiat ê hêngûi, sim tōa siū kámtōng. Si̍ttsāi Kitok ēthang tittio̍h lâng, m̄sī ēng I ê koânlêng, to̍kto̍k sī ēng I ê thiàⁿthàng. Tsit ê Patímái ê siausit, tsiū tsiksî thoânpò tī hit ê sìhng. Tsittia̍p tsoân tshī ê pehsìⁿ ū lóng tshutlâi tsak óa tī Iésu ê sinpiⁿ, ài beh khòaⁿ I.

Tī hit ê kûntsiòng ê āubīn, ū tsi̍t ê tshēng hó itsiûⁿ ê lâng, tìì ài beh khòaⁿ Iésu, inūi “i singkhu ésè.” Suijiân i sī hógia̍h lâng, iáukú bô tsi̍t lâng beh puah lō͘ hō͘ i. Inūi tsit ê lâng tsiūsī Satkai, teh tsòe thiuhiòng· ê, sī Iélīkho siâⁿ ê sòikuan tiúⁿ, iā lâng lóng teh kóng, i só͘ ū ê tsâisán lóng sī ēng hit khoán pháiⁿ ê huattō͘ lâi tshiaptshú lâng ê. Tsiàu tsit ê kò͘sū sī teh àmsī lán tsai tsit ê Satkai lâi beh khòaⁿ Iésu, m̄sī kanta ūitio̍h tsi̍t tsióng ê hò͘ⁿkîsim nātiāⁿ, sī iáu ū koh khah tshim ê tōngki tī·leh. Hitji̍t bô lūn símmi̍h khoán ê tsó͘tòng, to bô huattō͘ thang kiò i tńgkhì. Ū tsētsē siâⁿ·ni̍h ê gínná, tútú sī tsiàu gínná ê khoánsit, ū pehtsiūⁿ tshiūténg lâi khòaⁿ tsènglâng teh kingkòe ê tsêngkéng. Tsit ê ū tsâisán, ū tēūi ê giâmsiok ê lāutōa lâng, iûgoân bô sioh i ê tsungiâm lâi kap tsènglâng saⁿkap khiā tsòhóe, tshimtshim himbō͘ ài khòaⁿ Iésu. Tī Kapehnáum hit ê hiòngkuan ê Máthài ê siausit, sī bián giâugî, úntàng ū thoân kàu tī Iélīkho tsit ê hiòngkuan lâi hō͘ Satkai thiaⁿkìⁿ. Só͘í i ū siⁿkhí tsióngtsióng ê simsu kap io̍kbōng, iā ū puttsí himbō͘ ài kìⁿtio̍h Máthài ê pêngiú Iésu.

I só͘ khòaⁿ ê Iésu sī tsit ê khoánsit! SĪ tsi̍t ê koân, koh tshēng pe̍hsaⁿ ê Sianti, iā I ê bīnmāu ū ióngkám, ū tshintshiat, koh puttsí ū uigiâm ê khoánsit, tiāmtiām teh kiâⁿ tī tsènglâng ê tiongkan; sī tsi̍t ê úitāi ê Ιûthài lâng, lóng bô biáusī thiuhiòng kap ū tsōe· ê! Lán sī lóng m̄ tsaiiáⁿ tī lán pêngsiông só͘ bat ê lâng ê simlāi ū símmi̍h io̍kbōng, ásī ū símmi̍h bô boántsiok ê só͘tsāi. Tshintshiūⁿ tī lán ê sinpiⁿ ū tsētsē lán só͘ bô tsùìtio̍h ê lâng ê khoán, tsit ê bûliâu ê hógia̍h lâng Satkai ê simsîn sī bô boántsiok,m̄ koh ū khǹg tsin tōa ê io̍kbōng tī·leh, inūi to̍kto̍k Siōngtè ígōa sī bô thang hō͘ i ê sim boántsiok. Nā m̄sī ūitio̍h ánni, Iésu tsiū kuattoàn bô tiâukang lâi thêngkha, sòa gia̍hthâu lâi khòaⁿ i tī tshiū ê téngbīn, iā kahná tshintshiūⁿ ji̍p lâi Iélīkho lóng bô khǹg símmi̍h pa̍tmi̍h bo̍ktik, to̍kto̍k sī ūitio̍h beh tshōe i ê khoánsit, tsiū sòa tùi i kóng, “Satkai kínkín lo̍hlâi, inūi kináji̍t góa tikkhak tio̍h tiàm tī lí ê ke.” Tùi ánni, Satkai tsiū tsin tshiⁿkiaⁿ, lâi tsaiiáⁿ tsi̍t hāng sūsi̍t, tsiūsī lán só͘ tio̍h tsaiiáⁿ thang tsòe lán éngoán ê līik ê; iā tsit ê sūsi̍t tsiūsī kóng, ta̍k pái lán ê simlāi ū himbō͘ Iésu ê sî, bô tsi̍t pái Iésu m̄ tsaiiáⁿ.

Tsit ê siū lâng só͘ biáusī ê thiuhiòng ēthang tittio̍h Iésu lâi in tau kap i saⁿkap tsē toh, iā sòa saⁿkap kóngōe lâi bat i, koh Iésu m̄sī kanta bat i ê pháiⁿ nātiāⁿ, mā sòa bat i iûgoân ū teh himbō͘ hó ê só͘tsāi, tshìsiūⁿ i m̄tsai ū kámsióng siáⁿkhoán! Tī thiàⁿthàng ê lāibīn ū tsi̍ttsióng kîkoài ê khùila̍t, ē liáukái pa̍t lâng ê simtsêng; koh pa̍tlâng suisī ū khuattiám, iáukú iā ē gâu sìniōng i.

Lán sûilâng lóng ū nn̄g ê lângkhoán tī·leh. Tsiàu sèkan só͘ bat lán· ê, sī tsi̍t khoán; iā tsiàu Siōngtè só͘ bat lán· ê, sī koh tsi̍t ê si̍ttsāi ê lângkhoán. Tshintshiūⁿ ánni, tsiàu Iélīkho ê lâng só͘ bat tsit ê Satkai sī tsi̍t ê thiuhiòng· ê, ū tsōe ê lâng, sī tsi̍t ê bô himbō͘ beh tshutse̍k tī kàuhōe ê lâng, iā inūi lâng m̄ài i, só͘í i iā m̄ài lâng. Tsóngsī tsiàu Iésu só͘ bat tsit ê Satkai sī tsi̍t ê ùi siàulé ê lâng, sī ài kap lâng tsòe pêngiú, ū himbō͘ khah hó ê sū. Iésu tsaiiáⁿ i m̄ài tshutse̍k tī kàuhōe, sī ūitio̍h lâng to khòaⁿkhin i íki̍p i ê katso̍k. Só͘í suijiân tsènglâng lóng gō͘kái lán, lán iā tio̍h sìn Siōngtè; inūi I tikkhak bô gō͘kái lán.

Satkai ē pìⁿtsòe hiahni̍h ngīsim lâi tsòepháiⁿ, lóng sī ūitio̍h i ê tshùpiⁿ thâubóe gâu biáusī i. Tsóngsī i hit khoán ngī ê simkuaⁿ, tsi̍tē kàu tī hit ê ē líkái i, ē sìniōng i ê Lâng ê bīntsêng, tsiū tsiksî kakī nńg khì. Tī hit ê kîīⁿ ê àmthâuá, in ū saⁿkap tâmlūn símmi̍h, lán khioksī m̄tsai pòaⁿhāng. Tsóngsī lán tsai Iésu ū tittio̍h Satkai ê sim, hō͘ i éngoán tsiâⁿtsòe tsi̍t ê tiongsi̍t ê ha̍ksing. Lán thang sióngsiōng Iésu beh līkhui i khì ê sî, kiatkio̍k i sī bē biántit tùi Iésu lâi tsiùtsōa kóng, “Tsú ah, tùi kináji̍t khí, góa beh tsiong só͘ ū ê tsi̍tpòaⁿ hō͘ sònghiong lâng; nāsī ū bat uaiⁿ símmi̍h lâng, tsiū tsiong sìpōe pôe i.”

Tsóngsī Iélīkho siâⁿ ê pehsìⁿ khòaⁿliáu simlāi sòa tsin bô tsànsêng. Pehsìⁿ ê jia̍tsêng sòa hutjiânkan lóng léngkhì. “I ji̍p khì hioh tī pháiⁿ lâng ê tshù.” Lán tītsia ài pâilia̍t hit ê Sitlo̍h iûⁿá, Sitlo̍h gûná kap Lōngtōngtsú ê phìjū, inūi tsiahê, Lō͘ka ū kìtsài tī tsit ê tô͘tiong ê kìik ê lāibīn. Siatsú lán ēthang phahsǹg tī kehji̍t Satkai ū tsiàu Máthài ê khoán, ūitio̍h Tsú lâi khui tsi̍t ê līpia̍t ê iànhōe, tsiauthāi i ê pêngiú lâi hù hit ê iânsia̍h, lán tsiū thang tī Hokimsu ê lāibīn lâi tshōetio̍h tsin túhó ê pōikéng. “Tsèng thiuhiòng· ê kap pháiⁿlâng teh tsiūkūn Iésu lâi thiaⁿ I. Huatlīsài lâng kap Kingha̍ksū ngia̍uhngia̍uhliām kóng, Tsit ê lâng tsiapla̍p pháiⁿlâng sòa kap in tsia̍h.” Tse tsiūsī I só͘ hō͘ lâng bô huaⁿhí ê só͘tsāi, I ū kap thiuhiòng·ê saⁿkap tsia̍h. Siatsú lán tsitkhoán ê tshuitshik sī bô tshò, siatsú tùi tsit ê iànhōe ū lâi siⁿtshut Sitlo̍h iûⁿ, Sitlo̍h gûná íki̍p Lōngtōngtsú ê phìjū, si̍ttsāi lán lóng m̄ tsaiiáⁿ lán ū siū Satkai ê tōa ê tììm.

Hoānnā lâng ū kap Kitok saⁿkap khiākhí, i tsiū ē pìⁿtsòe tsi̍t ê sin tshòngtsō ê lâng. Iésu ū kóng, “Kináji̍t tsínkiù kàu tī tsit ê ke.” Tshintshiūⁿ ánni, Satkai ū līpia̍t i tsitpái só͘ tshōetio̍h ê sin ê pêngiú; iā tī tēbīntsiūⁿ sī kuattoàn bô thang koh kìⁿ I ê bīn. Inūi tī nn̄g lépài āu i ū thiaⁿkìⁿ kóng lâng ū tèng I tī Êlúsalém.

Lūn Satkai ê sū, lán sī tsaiiáⁿ ·ê, sī kanta ánni nātiāⁿ. Ū thoânsuat sī teh kóng, i ū tsòe kàuhōe lāi tsi̍t ê tiōngiàu ê jînbu̍t, iā tī khah āulâi ū tsòe Kaisatlīa ê kàmtok. Iā koh ū tsi̍t ê thoânsuat, tsiūsī góa tī khah tsá tī bó͘ só͘tsāi só͘ thiaⁿkìⁿ· ê, tsittia̍p khiok sī bô lōa bêng, putkò iáu ē kìtit tāmpo̍h, tsiūsī kóng ū tsi̍t ê tsin lāu ê lâng, i ê sinkhu sī ésé; i ū ta̍k tsákhí lâi tī Iélīkho ê hūkūn teh tsiàukò͘, teh póhō͘ tsi̍t tsâng lāu tsâng ê sngtsâi tshiū. Iā ū tsi̍tji̍t, tsi̍t ê siⁿhūn lâng ū tùi hia beh kingkòe, ū mn̄g i kóng, “Lāupeh ah, Lí siáⁿsū hiahni̍h kuansim teh koánkò͘ hit tsâng ê sngtsâi lè?” Hitsî hit ê lāulâng tsiū hutjiân ho̍ktò i siàuliân ê gánkong, lâi ìn kóng, “Sī inūi góa bat tùi tī tsit tsâng tshiū ê tshiūki, lâi thâu tsi̍tpái khòaⁿtio̍h góa ê Tsú.”

Tsit ê kò͘sū tsiūsī tsóngkiat tsit ê tô͘tiong ê kìik. Koh kòelâi lán tsiūsī khòaⁿkìⁿ Tsú beh ji̍p Êlúsalém lâi siū lâng hāisí.




第十一章 路Ê盡尾
Tsit-ê途中ê記錄，大約是beh清楚。伊是已經行到有看見hit-ê 路ê終點，也時是已經到，耶穌mā是已經有決意，所以伊有直直行上耶路撒冷，beh受人害死。

Hit年ê Pôaⁿ過節已經近，也tsit pái ê Pôaⁿ過節，是從來tī耶路撒冷所bat主催-·ê ê中間，是第一危險也是第一ē搖tsuah人ê心。因為一般ê民眾，tī以前to已經夠額受感動，甚至 tsit pái koh看見伊有hō͘拉撒路koh活，所以in有koh-khah受大ê感動。無論是tī 街路裡，á是tī 市場裡，眾人lóng無teh講起別物。Tī hit條beh thàng到伯大尼ê 道路上，ta̍k日有kui大陣 ê觀覽者 teh-beh去看hit-ê空墓，以及tùi別世界koh tńg來hit-ê人ê厝。上帝果然有來訪問伊ê人民；也彌賽亞是已經來，ài hō͘以色列得tio̍h自由！

Tiàm tī耶路撒冷hiah-ê序大，雖然bē-tàng非認耶穌所行ê神蹟；iáu-koh有拚命ài beh 阻止人民。因為照hiah-ê序大teh phah算，tī tsit時 tùi ta̍k國聚集óa來ê眾人若lóng受搖動，to̍h萬事ê 結局是在tī目前。也in是siāng大ǹg望，tī hit日耶穌無來赴Pôaⁿ過節。Tī耶路撒冷ê人民，無論是伊ê朋友，á是伊ê對敵，to lóng用同一樣ê聲音，問講：「Lín phah算án怎？伊kám無beh來赴節?」

是！伊是beh來赴。設使in thang看伊teh來ê款式！Tsit pang耶穌m̄是成做親像in所驚畏，所欣慕ê一个革命ê勇敢 ê 指導者，有thang誇口伊ê權勢來上耶路撒冷，反轉是成做親像一个恬靜、悲傷 ê人，kan-taⁿgia̍h目來看hit-pêng ê世界，也ka-kī一人來行tī tsit地面上，to̍h是hō͘伊失望 ê。彼得ē記得hit-ê活活ê情景，to̍h是照伊對馬可所講ê講：「阮上耶路撒冷，tī路裡，耶穌行tī阮 ê頭前，學生gông-ngia̍h，tòe ê人驚惶。耶穌有koh kā伊所beh tú-tio̍h ê事kā阮講。」

Hit-ê情景是不止顯然，to̍h是tī以法連 ê pha荒ê鄉村hit條冷靜ê山路裡，有一團不止驚惶 ê學生，一心奇怪，也一心jû亂；大家注意teh看耶穌，to̍h是ka-kī一人恬恬 teh行tī in ê頭前 ê。Κhah 早 tī加利利ê時代，in是lóng 慣勢真自由，真快樂來做伊ê 同伴，kah伊做伙旅行，總是tsit pang to̍h明顯koh樣。也hit-ê關係mā是有teh變換，tī數月日來，in tùi耶穌ê愛情以及欽仰 ê心，是koh-khah深，也suah生起一種莊嚴、敬畏 ê 念頭。In有漸漸感覺tio̍h驚惶、感歎、奧妙，也suah ná生出生驚ê心，來teh掛慮 hit-ê所beh到ê危機。伊有漸漸 teh離開in，in是bē-ē了解伊。In是m̄知影所beh到ê事，總是確實in最第一bē-tàng了解-·ê，to̍h是伊ê 失敗 kah伊ê死。

咱穩當beh phah算in大家到tī tsit時，tiāⁿ-tio̍h是bē-tàng誤解伊。因為tī以前伊是已經兩pái，卻是無hiah詳細，來對in忠告伊所beh tú-tio̍h ê事。總是in tsit時明明mā猶是有誤解伊。In teh phah算，論伊ê事是無tú-tú照伊所講-·ê。伊雖然有講伊beh受害死，也beh koh活，這穩當有別物 khah神祕ê意思 tī-·leh。Án怎伊tī tú-á-tsiah to ē hō͘拉撒路tùi死koh活，thài-thó歡喜忍受死失？In猶原有染tio̍h國民ê精神，有teh迫切thèng候伊ê國，也看伊tī伯大尼所行hit-ê神蹟，lóng是koh-khah teh促進伊ê國。以色列ê榮光燦爛 ê日子是已經teh逼óa lah。Κiám-tshái tsit時 tú-tú眾人lóng聚集beh來赴Pôaⁿ過節ê時，主上帝beh用伊ê祖大衛 ê位hō͘伊。伊beh做王 tī雅各ê家到代代，伊ê國也無窮盡。

咱若續接來tòe in行tī hit條路，hit時咱to̍h ē知影in有不時khǹg tsit種夢想 tī-teh!咱無koh有thang看見khah好ê事實，比 tī一兩日後所tú-tio̍h ê thang來見證in是iáu有固執hit款夢想。

In有行到接tio̍h tùi北pêng thàng落來hit條 ê山路；tī-hia來接tio̍h tùi加利利落來beh赴Pôaⁿ過節ê一團ê巡禮者。咱thang想像，tī hit中間穩當猶原有迦百農ê人做伙做陣 teh行，也大家到日暗ê時，in to̍h做伙歇睏。Tī有一个月光暝，咱有看見一个婦人人óa去就近耶穌。Tsit-ê婦人人to̍h是tī兩年前tī迦百農ê 街路裡咱所有看見-·ê，tī hit時伊有kah伊ê丈夫，以及伊兩个細kiáⁿ，做伙做陣 beh去會堂 聽耶穌頭一pái ê說教。Tsit-ê驕傲ê 老婦人人有用全精神khǹg一个野心tī-·leh。Κám是無價值 ê野心?啥人敢án-ne講？因為這是一个盡忠tòe耶穌到tī十字架腳ê婦人人所抱ê野心，也是一个做老母 ê人所抱ê野心，是全然m̄是為tio̍h 伊本身，是為tio̍h伊ê kiáⁿ-·ê。Tsit-ê婦人人teh phah算耶穌ê得勝 ê日是已經逼近，也伊ê聖國是teh-beh實現 lah。In兩个kiáⁿ，to̍h是tī耶穌所第一信任 ê 三人中 ê 在內。伊有常常聽見in hiah-ê kiáⁿ有teh議論tī後來啥人 thang做第一大。

Tsit-ê婦人人一下行óa beh去就近耶穌，hit時伊ê kiáⁿ知影，á是thang講，有料tio̍h in 老母 ê意思，to̍h對耶穌講：
「先生ah，請你容允阮老母來對你稟求一項事，好m̄？」 伊有顯出做一个仁慈 ê國王來應伊講： 「Ài我kā你行啥物ah?」 「願你出命令，hō͘我tsit兩个kiáⁿ tī你ê國，一个坐你ê 正pêng，也一个坐你ê 倒pêng。」 耶穌to̍h用親切、憐憫 ê心來看tsit-ê婦人人，以及伊ê kiáⁿ兒。In是全然m̄知影in所無teh遼望 ê事，是已經teh-beh 成 lah!

「Lín所求 ê，lín m̄知。我所lim ê杯，lín kám ē lim ?我所受ê洗，lín kám ē受?」

無僥疑，tī hit時雅各kah約翰聽tsit句，是掠做耶穌teh講，tī將來若beh起革命，to̍h穩當ē tú-tio̍h真艱苦ê事，也有時hoān-sè in tio̍h ài拚命來保護伊，khah要緊tī in本身，所以in to̍h無驚，應伊講：「Ē lah。」

耶穌有bat in，也伊有知影，若有必要 ê時，in 果然甘願為tio̍h伊來死。伊是比 in本身 koh-khah知bat in ê款。伊是比咱本身 koh-khah知影，咱是iáu有氣力thang行koh-khah好ê事。In khiā tī伊ê面前，hit時in是gâu顧ka-kī，是gâu khǹg野心ê人，總是伊kám是有看到tī in ê將來所beh受ê試，to̍h是「希律王beh用刀thâi約翰 ê兄弟雅各」，也hit-ê年老ê約翰beh 盡忠tī伊所敬愛 ê主，甘願 tú-tio̍h殉難？確實親像hit款ē感動人ê異象，是有顯出tī伊所應答ê話。

「我所lim ê杯，lín beh lim伊；我所受ê洗，lín beh受伊；總是坐我ê 正pêng，倒pêng，m̄是我ē-thang hō͘人，獨獨為tio̍h啥物人準備ê，to̍h hō͘伊。」

總是in mā猶聽無，也in 老母 kám猶原聽無?婦人人是有一種奇怪 ê本能tī-·leh，是不止敏捷，快了解伊ê心所感觸tio̍h ê事。伊注意來看伊所敬愛 ê主，hit時hit-ê thang寒心ê預告 ê話，kám無phah-tio̍h伊ê心?Khah 早 tiàm tī迦百農hit-ê快樂ê日子是已經去lah。Tsit時 伊看了是koh-khah莊嚴，thang驚ê款，有離咱ná 遠。伊是無親像王，beh進前去受封來得tio̍h伊ê國。伊反轉是親像王beh進前去就近死失。到底耶穌本身，以及伊ê 細kiáⁿ所beh lim ê杯以及所beh受hit-ê無好兆頭 ê洗是啥物？

Se-pí-thài ê kiáⁿê 老母ah，tsit款思想雖是你tsit時無理解，tī後來穩當會lah。你以及你hiah-ê beh坐tī伊ê 正pêng kah 倒pêng ê勇敢 ê kiáⁿ，穩當beh了解伊。因為hit-ê解迷ê日是已經近lah，hit時你beh仆拜tī主ê面前，看見主 hō͘人釘tī thang見笑 ê十字架，koh tī伊ê左右pêng有同受定罪ê賊！

Tsit-ê事件是iáu未結局，tī tsit種嚴肅ê 危機，連tī十二學生ê團體中，iáu有看見顧己 ê心，這實在是加添耶穌ê艱苦。伊kah咱相交陪ê時，khah常伊lóng是失望。伊bat咱ê 性情；伊ē記得咱是土。Hit時眾學生聽了自然是真受氣，忽然in to̍h不止tòng-bē-tiâu雅各kah約翰所做ê態度。Hiah-ê學生lóng是極照人ê款，總是tsit款性癖是bē用得顯出tī耶穌ê面前。耶穌to̍h叫in óa來。前bat一pái為tio̍h in大家gâu相怨妒，伊to̍h抱一个細漢gín-á來tī in中間教示in。Tsit pái伊有koh用溫柔ê話來責備in，來覆述hit-ê教示。公道來講，到經過幾nā年後，in to lóng猶ē記得伊所勉勵ê話，to̍h是講：
「Lín知外邦所尊做人君ê做主來治理in，in ê大人管轄in。獨獨lín中間m̄是án-ne;lín中間ài做大-·ê，beh做lín ê差用；lín中間ài做頭-· ê，beh做眾人ê 奴僕。因為人子到，m̄是beh差用人，是beh hō͘人差用，koh 獻伊ê性命來贖回tsē-tsē人。」

Hit-ê行列有續接teh進前，過幾日後，咱有koh看見tī tsit-ê途中所tú-tio̍h-· ê，猶一个情景。Tsit時 in是行近耶路撒冷，tùi北pêng落來hiah-ê kui大陣 ê巡禮者，是已經行到tī耶利哥城，也tsit-ê城裡ê人民有kui大陣出來beh tsih接in。因為有遍遍風聲講，hit-ê tī伯大尼hō͘拉撒路koh活 ê耶穌，有kah眾大家做陣 tī teh來，又koh有聽見講，伊是上帝ê彌賽亞beh來拯救以色列脫離羅馬人ê壓迫。In ê熱誠ê接待，是表明耶穌有得tio̍h人民眾人 ê心。Tī tsit款情景，眾學生kám無kan-taⁿ 進前看見in ê主ê 得勝 ?

Tī hit-ê 群眾ê熱鬧、喉叫kah相嚷ê中間，有一个青瞑人kah眾大家直直tsàm去到tī hit-ê城門口 ê所在。

Hit-ê青瞑人to̍h問講：「無ah，是啥物tāi-tsì leh？」Tī伊ê身邊teh行ê人to̍h大聲歡喜喉叫來應伊講：
「拿撒勒人耶穌beh tùi tsia過！」 Tùi án-ne，tī 一時á久ê中間，tsit-ê青瞑人to̍h生出非常大ê ǹg望。伊是phah算伊ê 救星已經到lah!Hit-ê bat tī耶路撒冷醫好一个青瞑 ê耶穌！伊beh tùi tsia過！耶穌已經行過面去lah?害lah!Hit時伊to̍h出大聲，用全精神來喉叫，宛然親像tī 水中beh沈死ê人所發出一款最後ê希望 ê聲音。連tī hit-ê 群眾不止鬧動ê中間，耶穌也有聽見伊ê喉叫ê聲講：

「大衛 ê後代，耶穌，可憐我！」 Tsit-ê青瞑人有用眾人所ài稱呼伊ê 名，tsia̍p-tsia̍p來迫切求叫伊ê幫助。眾人to̍h出力來阻止伊，叫伊tio̍h 靜靜；總是無一个ē-thang hō͘伊靜靜。」大衛 ê後代ah，大衛 ê後代ah，可憐我！」
Tùi án-ne，耶穌to̍h同情伊，tú-tú是親像人若有迫切求叫伊，hit時伊to̍h無論是對伊，á是tùi咱，不時to 的確會聽。雖然群眾熱鬧ê聲音，也bē-ē that-gāi-tio̍h伊ê 耳孔。伊to̍h阻擋全行列 ê人來停 tī hit-ê所在。
耶穌to̍h講：「叫伊來。」 也hiah-ê 親切 ê人，to̍h去kā hit-ê青瞑人講： 「巴底買兄ah，安你ê心！起來！伊teh叫你ah!」 伊to̍h放sak伊ê舊ê外套，人to̍h tshōa伊，伊to̍h ngia̍uh-ngia̍uh-tshuah行óa來耶穌ê面前。 「細kiáⁿah，ài我kā你做啥物？」 「Lia̍p-pho-nî，我ài得tio̍h看見！」 Tùi án-ne，伊liâm-piⁿ得tio̍h看見，to̍h tī路裡來tòe耶穌。

眾人看了，suah 靜靜生驚伊所行tsit-ê 超自然 ê事。Tùi án-ne，in to̍h生起加倍ê熱誠ài beh tòe伊。也in看見tsit種 親切 ê行為，心大受感動。實在基督ē-thang得tio̍h人，m̄是用伊ê權能，獨獨是用伊ê疼痛。Tsit-ê巴底買ê消息，to̍h即時傳報 tī hit-ê四方。Tsit時全市 ê人民有lóng出來tsak óa tī耶穌ê身邊，ài beh看伊。

Tī hit-ê 群眾ê後面，有一个穿好衣裳 ê人，致意ài beh看耶穌，因為「伊身軀矮細。」雖然伊是好額人，iáu-koh無一人beh撥路hō͘伊。因為tsit-ê人to̍h是撒該，teh做抽稅-· ê，是耶利哥城ê稅關長，也人lóng teh講，伊所有ê 財產 lóng是用hit款pháiⁿ ê法度來竊取人ê。照tsit-ê故事所teh暗示咱知，tsit-ê撒該來beh看耶穌，m̄是kan-taⁿ為tio̍h一種ê好奇心niā-niā，是iáu有koh-khah深ê 動機tī-·leh。Hit日無論啥物款ê 阻擋，to無法度thang叫伊tńg去。有tsē-tsē城裡ê gín-á，tú-tú是照gín-á ê款式，有peh上樹頂來看眾人teh經過 ê情景。Tsit-ê有財產，有地位 ê嚴肅ê 老大人，猶原無惜伊ê尊嚴kah眾人做伙 khiā做伙，深深欣慕ài看耶穌。Tī迦百農hit-ê稅關ê馬太ê消息，是免僥疑，穩當有傳到tī耶利哥tsit-ê稅關來hō͘撒該聽見。所以伊有生起種種 ê心思kah慾望，也有不止欣慕ài見tio̍h馬太ê朋友耶穌。

伊所看ê耶穌是tsit-ê款式！是一个高，koh 穿白衫ê先知，也伊ê面貌有勇敢，有親切，koh不止有威嚴 ê款式，恬恬 teh行tī眾人ê中間；是一个偉大ê偤太人，lóng無藐視抽稅kah有罪-· ê！咱是lóng m̄知影tī咱平常所bat ê人ê心內有啥物慾望，á是有啥物無滿足ê所在。親像tī咱ê身邊有tsē-tsē咱所無注意tio̍h ê人ê款，tsit-ê無聊 ê好額人撒該ê心神是無滿足，m̄-koh有khǹg真大ê慾望 tī-·leh，因為獨獨上帝以外是bē-tàng hō͘伊ê心滿足。若m̄是為tio̍h án-ne，耶穌to̍h決斷無tiâu-kang來停腳，suah gia̍h頭來看伊tī 樹ê 頂面，也kah-ná親像入來耶利哥lóng無khǹg啥物別物目的，獨獨是為tio̍h beh tshōe伊ê款式，to̍h suah 對伊講：「撒該緊緊落來，因為今á日我的確 tio̍h tiàm tī你ê家。」Tùi án-ne，撒該to̍h真生驚，來知影一項事實，to̍h是咱所tio̍h知影thang做咱永遠ê 利益ê；也tsit-ê事實to̍h是講，ta̍k-pái咱ê心內有欣慕耶穌ê時，無一pái耶穌m̄知影。

Tsit-ê受人所藐視ê 抽稅ē-thang得tio̍h耶穌來in tau kah伊做伙坐桌，也suah做伙講話來bat伊，koh耶穌m̄是kan-taⁿbat伊ê pháiⁿ niā-niā，mā suah bat伊猶原有teh欣慕好ê所在，試想伊m̄知有感想啥款！Tī疼痛ê內面有一種奇怪 ê氣力，ē了解別人ê心情；koh別人雖是有缺點，iáu-koh也ē gâu信用伊。

咱隨人lóng有兩个人款tī-·leh，照世間所bat咱-·ê，是一款；也照上帝所bat咱-·ê，是koh一个實在ê人款。親像án-ne，照耶利哥ê人所bat tsit-ê撒該是一个抽稅-· ê，有罪 ê人，是一个無欣慕 beh出席 tī 教會ê人，也因為人m̄-ài伊，所以伊也m̄-ài人。總是照耶穌所bat tsit-ê撒該是一个畏siàu禮 ê人，是ài kah人做朋友，有欣慕 khah好ê事。耶穌知影伊m̄-ài出席 tī 教會，是為tio̍h人to看輕伊以及伊ê家族。所以雖然眾人lóng誤解咱，咱也tio̍h信上帝；因為伊的確無誤解咱。

撒該會變做hiah-ni̍h硬心來做pháiⁿ，lóng是為tio̍h伊ê 厝邊頭尾gâu藐視伊。總是伊hit款硬ê心肝，一下到tī hit-ê ē理解伊，ē信用伊ê人ê面前，to̍h即時ka-kī軟去。Tī hit-ê 奇異 ê暗頭á，in有做伙 談論啥物，咱卻是m̄知半項。總是咱知耶穌有得tio̍h撒該 ê心，hō͘伊永遠成做一个忠實 ê學生。咱thang想像耶穌beh離開伊去ê時，結局伊是bē 免得對耶穌來咒誓講：「主ah，tùi今á日起，我beh kā所有ê一半hō͘ sàn-tshiah人；若是有bat歪啥物人，to̍h用四倍賠伊。」

總是耶利哥城ê人民看了心內suah真無贊成，人民 ê熱誠suah 忽然間lóng冷-·去。」伊入去歇tī pháiⁿ人ê厝。」咱tī-tsia ài排列 hit-ê失落羊á，失落銀á kah浪蕩子ê譬喻，因為tsiah-ê，路加有記載tī tsit-ê途中ê記憶ê內面。設使咱ē-thang phah算tī 隔日撒該有照馬太ê款，為tio̍h主來開一个離別 ê宴會，招待伊ê朋友來赴hit-ê筵席，咱to̍h thang tī福音書ê內面來tshōe-tio̍h真tú好ê 背景。」眾抽稅-· ê kah pháiⁿ人teh就近耶穌來聽伊，法利賽人kah 經學士ngia̍uh-ngia̍uh念講，tsit-ê人接納pháiⁿ人suah kah in 食。」這to̍h是伊所hō͘人無歡喜ê所在，伊有kah 抽稅ê做伙 食。設使咱tsit款ê 推測是無錯，設使tùi tsit-ê宴會有來生出失落羊，失落銀á以及浪蕩子ê譬喻，實在咱lóng m̄知影咱有受撒該ê大ê 致蔭。

凡若人有kah基督做伙 khiā起，伊to̍h ē變做一个新創造 ê人。耶穌有講：「今á日拯救到tī tsit-ê家。」親像án-ne，撒該有離別伊tsit-pái所tshōe-tio̍h ê新ê朋友；也tī 地面上是決斷bē-tàng koh 見伊ê面，因為tī兩禮拜後伊有聽見講人有釘伊tī耶路撒冷。

論撒該ê事，咱所知影-·ê，是kan-taⁿán-ne niā-niā。有傳說是teh講，伊有做教會內一个重要ê人物，也tī khah後來有做該撒利亞ê 監督。也koh有一个傳說，to̍h是我tī khah 早 tī某所在所聽見-·ê，tsit時卻是無jōa 明，不過猶ē記得淡薄，to̍h是講有一个真老ê人，伊ê身軀是矮細；伊有ta̍k 早起來tī耶利哥ê 附近teh照顧，teh 保護一叢老叢ê桑裁樹。也有一日，一个生份人有tùi hia beh經過，有問伊講：「老伯ah，你啥事 hiah-ni̍h關心teh管顧hit叢桑裁樹 leh？」Hit時hit-ê 老人to̍h忽然復到伊少年ê眼光，來應講：「是因為我bat tùi tī tsit叢樹ê樹枝，來頭一pái看tio̍h我ê主。」

Tsit-ê故事to̍h是總結 tsit-ê途中ê記憶，koh過來咱to̍h是看見主 beh入耶路撒冷來受人害死。