《台語荒漠甘泉（全羅版）》

 | | | 轉寄

"Huān-lān sī ki-huē"

作者 陳清俊 翻譯 2008.09.07

listen


Káu ge̍h tshue-tshit (Káu ge̍h tshit ji̍t)

"Siōng-tè sī guán tô-siám ê só͘-tsāi kap khuì-la̍t. Ia̍h sī huān-lān-tiong ki̍p-sî ê pang-tsān." (Si-phian 46:1)

"Siōng-tè uī-sím-mi̍h m̄ khah tsá lâi pang-tsān guá ah?" Tse sī siông-siông thiaⁿ-tio̍h ê būn-tê. Ài-tsai, Siōng-tè m̄-sī tsiàu lí ê sî-kan-pió lâi tsuè-kang. I ê hó-ì sī īng huān-lān lâi kái-tsō lí, hō͘ lí ha̍k-si̍p tio̍h kà-sī. I ìng-ún, "I tī guî-kip ê sî, Guá tsiū beh kap i tī-teh; Guá beh kiù i, hō͘ i tsun-kuì." (Si-phian 91:15) Tng lí tú-tio̍h huān-lān ê sî, I mî-ji̍t kap lí tông-tsāi, liáu-āu kā lí kiù tshut hiah ê huān-lān. Tng lí bô koh kip-sìng, huân-ló, lí piàn an-tsīng, I tsiū kiù lí tshut-lâi, hit-sî I kóng, "Í-king kàu-gia̍h lah."

Siōng-tè īng huān-lān kàu-io̍k I ê kiáⁿ-jî tsin pó-kuì ê kong-khò. Thong-kè khùn-lân lâi kàu-io̍k lán, tng tāi-tsì kè liáu-āu, lán beh tit-tio̍h îng-iāu ê pò-siúⁿ. Só͘-í huān-lān tiong tsûn-tsāi tiⁿ-bi̍t ê hí-lo̍k kap tsin-si̍t ê kè-ta̍t. I jīm-uî huān-lān m̄-sī tsó͘-tòng, sī tsi̍t ê ki-huē.

Bô tû-khì huān-lān, Kap kiông-lia̍t tsing-tsiàn ê khùn-lân, Tsin-tsiàⁿ an-hioh sù hō͘ lán, Tī I lāi-bīn, tit pîng-an. --- Annie Johnson Flint

Guá bat thiaⁿ-kè tsi̍t ê phok-si̍t ê lāu-tuā-lâng kóng, "Siōng-tè tshì-giām lí ê sî, iā sī lí tshì-giām Siōng-tè ê sî. Khuàⁿ sī-m̄-sī I ê ìng-ún, lí uē tit-tio̍h, tng lí thong-kè I só͘ tshì-giām ê."

Thuat-lī tshì-giām ū nn̄g tsióng. Thâu tsi̍t tsióng tsiū-sī kán-tan tô-thuat tshì-giām, liáu-āu kám-siā Siōng-tè. Līng-guā tsi̍t-tsióng sī tsiong tshì-giām khuàⁿ-tsuè Siōng-tè lâi ê thiau-tsiàn, iau-kiû pí kè-khì koh-khah tuā ê tsiok-hok, lo̍k-ì tsiong tshì-giām tòng-tsuè tsi̍t pái ki-huē, khì tsing-tshú Siōng-tè khah tsuē ê un-tián.

Án-ni tsi̍t ē lâi, liân kap lán tsok-tuì ê mô͘-kuí iā beh piàn-tsuè pang-tsān lán ê. Khuàⁿ, sī tuì lán put-lī ê it-tshè, lóng teh tsi-tshî lán. Tse tsiū-sī "Huán-tńg tī tsiah ê lóng-tsóng ê sū, lán tuì thiàⁿ lán ê, tik-sìng kàu ū tshun." (Lô-má 8:37) tsit kù uē ê ì-sù. ---A.B. Simpson


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com