《台語荒漠甘泉（全羅版）》

 | | | 轉寄

"Siōng-tè ê tài-niá"

作者 陳清俊 翻譯 2008.10.19

listen


Tsa̍p ge̍h tsa̍p-káu (Tsa̍p ge̍h tsa̍p-káu ji̍t)

"Iâ-hô-hua ê iok-kuī tī thâu-tsîng kiâⁿ." (Bîn-sò͘-kì 10:33)

Ū-sî Siōng-tè íng-hióng lán sī īng kán-tan ê tsiap-tshiok á-sī kám-siū. Tān-sī lán su-iàu tsiàu kám-siū tsuè. Nā-sī tsiap-tshiok sī tuì Siōng-tè lâi, I suà lo̍h-khì uē thê-kiōng tshiong-hun ê tsìng-kù tsìng-si̍t tsit ê sū, liân tsi̍t-tiám-á ê huâi-gî mā bô.

Īng Iâ-lī-bí tsuè lē, i kám-kak Siōng-tè ín-tshuā i khì bué A-ná-tu̍t hit khu tshân. I pīng bô tsi̍t ē kám-kak, tsiū hîng-tōng. Thìng-hāu Siōng-tè si̍t-tsiān tuì i kóng ê ìng-ún. Liáu-āu, i a-tsik ê kiáⁿ lâi khuàⁿ i, thê-gī bué tsit khu tshân, tuà lâi Siōng-tè tsí-sī ê pîng-kù, i huê-tap kóng, "Guá tsiū tsai tse sī Iâ-hô-hua ê uē." (Iâ-lī-bí 32:8)

Iâ-lī-bí thìng-hāu, kàu Siōng-tè tsià-tio̍h I ê tsún-pī tsìng-si̍t i ê kám-kak, jiân-āu i àn-tsiàu tshing-tshing tshó-tshó khuàⁿ tio̍h ê sū-si̍t kang-tsok. Siōng-tè iā thang iōng tsiah ê sū-si̍t hō͘ pa̍t-lâng siong-sìn. Siōng-tè ài lán bîng-pi̍k I tuì bó͘ tsi̍t ê hîng-sè ê sim-ì í-āu, tsiah tshái-tshú hîng-tōng. Lán buē thang hut-lio̍k Tuā Bo̍k-tsiá tuì lán kóng ê uē, tio̍h tshin-tshiūⁿ "Pó-lô kap i ê tâng-phuāⁿ" tī Ti̍k-lô-a hit-khuán, (Sù-tô͘ Hîng-tuān 16:6) thiaⁿ koh kuan-tshat Siōng-tè tī lán ê khuân-kíng tiong tsuè ê kang, thiat-té liáu-kái Tsú ê tsuân-pō͘ sim-ì. --- A.B. Simpson

Siōng-tè ê tshiú-tsáiⁿ kí ǹg tó-uī, I ê tshiú tsiū tī hia khui lō͘.

Íng-uán m̄-thang tī sim-lāi kóng lí it-tīng beh tsuè sím-mi̍h, á-sī it-tīng m̄ tsuè sím-mi̍h, tsí ū thìng-hāu Siōng-tè hián-bîng I ê tō-lō͘. Nā-sī tsit tiâu lō͘ iáu sī ún-tsông teh, he tsin bîng-hián lí iáu m̄-sī tshái-tshú hîng-tōng ê sî. Siōng-tè ài lí khiā tī sím-mi̍h só͘-tsāi, I hū tsuân-pō͘ ê tsik-jīm.

Siōng-tè īng lán só͘ buē bat ê lō͘-thîng,
Tshuā I ka-kī ê kiáⁿ-jî hiòng tsîng.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com