《台語荒漠甘泉（全羅版）》

 | | | 轉寄

"Khioh-tio̍h ka-kī ê sìⁿ-miā"

作者 陳清俊 翻譯 2008.11.30

listen


Tsa̍p-it ge̍h saⁿ-tsa̍p (Tsa̍p-it ge̍h saⁿ-tsa̍p ji̍t)

"Lí uī ka-kī tô͘-bô͘ tuā tāi-tsì mah? bo̍h-tit tô͘-bô͘. Khuàⁿ ah, in-uī guá beh hō͘ tsai-ē kàng-lo̍h tī kìⁿ ū hiat-khì ê. Tsóng-sī lí bô-lūn khì toh-lo̍h, Guá beh hō͘ lí khioh-tio̍h ka-kī ê sìⁿ-miā; tse sī Iâ-hô-hua kóng ê." (Iâ-lī-bí 45:5)

Tse sī tsi̍t ê uī lí hiān-tsāi khó-lîng siū ki̍k-tuā ap-li̍k ê khùn-kíng ê ìng-ún. Ìng-ún lí ū an-tsuân pó-tshî sìⁿ-miā. Sî-sè ná-lâi ná khùn-lân, bua̍t-sè tuā huān-lān lâi ê sî, tsit ê ìng-ún sī tsin sik-ha̍p.

King-bûn kóng "khioh-tio̍h ka-kī ê sìⁿ-miā" sī sím-mi̍h ì-sù? Tsiū-sī tuì ti̍k-jîn ê tshuì tiong tsiong lí ê sìⁿ-miā tshiúⁿ tò-tńg lâi, ná tshin-tshiūⁿ Tāi-pit tsiong iûⁿ tuì sai ê tshuì tshiúⁿ tńg lâi tsi̍t-iūⁿ. Ì-sù sī bô hō͘ lí siám-pī tsiàn-tsing, á-sī bô kap tuì-ti̍k tí-khòng, sī "tī guá tuì-ti̍k ê bīn-tsîng, lí kā guá pâi-siat iân-sia̍h." (Si-phian 23:5) Po̍k-hong-hō͘ tiong ū jia-khàm thang bih ê só͘-tsāi, ti̍k-jîn uî-khùn tiong ū iàu-sài pó-hō͘, tī put-tuān ap-li̍k ē sìⁿ-miā thang pó-tsûn. I ê ì-sù sī lí ū Siōng-tè ê an-uì kap ǹg-bāng, tshin-tshiūⁿ Pó-lô só͘ tit-tio̍h ê, hit-sî i kap tâng-kang "tú-tio̍h huān-lān, siū teh-tāng tsin thiám kàu tng buē khí, liân ua̍h iā bô ǹg-bāng." (Ṳ Ko-lîm-to 1:8) I ê ì-sù sī Tsú tuì Pó-lô ê hit-tsióng pang-tsān, Pó-lô ê "jio̍k-thé lāi ê tshì" (Ṳ Ko-lîm-to 12:7) sui-jiân bô tû-khì, tsóng-sī Ki-tok ê lîng-li̍k pì-iū i, hō͘ i tsai "ū Siōng-tè ê un, tsiū kàu-gia̍h;" (Ṳ Ko-lîm-to 12:9)

Guān "lí bô-lūn khì toh-lo̍h, ... (Tsú) beh hō͘ lí khioh-tio̍h ka-kī ê sìⁿ-miā." Guān Tsú hiān-tsāi tsiū pang-tsān lí tī khùn-lân tiong tik-sìng. --- tuì "Tī tē ná tī thiⁿ"

Lán siông-siông kiû thuat-lī khó͘-lān, sīm-tsì sìn-khò Siōng-tè uē hō͘ lán thuat-lī khó͘-lān. Tān-sī lán bô kiû I hō͘ lán tī khó͘-lān tiong piàn tsuè kian-kiông ê lâng. Lán bô kiû uē sing-ua̍h tī khó͘-lān tiong, put-kuán juā-kú, in-uī tsāi lán ê Tsú ê tsi-tshî kap pó-hō͘, uē kè-sio̍k sing-tsûn tī khó͘-lān tiong bô siū siong-hāi.

Kiù-tsú Iâ-so͘ tī khòng-iá king-li̍k kè sat-tàn sì-tsa̍p mî-ji̍t kan-lân ê tshì-thàm, jio̍k-thé luán-jio̍k, su-iàu tsia̍h-mi̍h kap hioh-khùn. Hit saⁿ ê Hi-pik-lâi tshing-liân tī "khí hé-lô͘ pí pîng-siông tshit-pē khah jia̍t" (Tān-í-lí 3:19) ê jia̍t-hé tiong kè-liáu tsi̍t tuāⁿ sî-kan. Sui-jiân siū po̍k-kun ê khok-hîng, in an-jiân tsū-tsāi thìng-hāu tit-kiù ê sî-khik lâi-lîm. Tān-í-lí tī sai ê tiong-kan kè tsi̍t mî, tng i "tshut-hia̍t, i ê sing-khu lóng bô siū-siong, in-uī i uá-khò i ê Siōng-tè." (Tān-í-lí 6:23)

In lóng uē tī ti̍k-jîn ê bīn-tsîng jím-nāi, in-uī in ū Siōng-tè tông-tsāi.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com