《台語荒漠甘泉（全羅版）》

 | | | 轉寄

"Sìn-sim"

作者 陳清俊 翻譯 2008.12.07

listen


Tsa̍p-jī ge̍h tshue-tshit (Tsa̍p-jī ge̍h tshit ji̍t)

"Lín beh bô khuàⁿ-kìⁿ hong, bô khuàⁿ-kìⁿ hō͘; iáu-kú tsit ê suaⁿ-kok, tsuí beh muá-muá, hō͘ lín thang lim; tsiū-sī lín, kap lín ê tsing-siⁿ, lín ê siù, lim i. Tsāi Iâ-hô-hua iáu khuàⁿ tsit-ê tsuè sió-khuá; I iā beh īng Mô͘-ap lâng kau tī lín ê tshiú." (Ṳ Lia̍t-ông-kì 3:17-18)

Tī lâng ê lí-sìng khuàⁿ, Siōng-tè ê ìng-ún kun-pún bô khó-lîng si̍t-hiān, tsóng-sī sím-mi̍h lóng buē khó-tó Siōng-tè. Bô-siaⁿ bô-seh, bô tiāu-thâu, tsuí tuì khuàⁿ-buē-tio̍h kap khuàⁿ-khí-lâi put-khó-lîng ê guân-thâu lâu kui mî, "Keh tsá-khí ... piàn-tuē tsiū ū tsuí muá-muá, ... ji̍t tsiò tī tsuí nih; ...tsuí âng tshin-tshiūⁿ huih." (Ṳ Lia̍t-ông-kì 3:20, 22)

Lán ê siong-sìn lóng sī ài khuàⁿ guā-tsāi ê tsìng-kù, tsin tsuē lâng ê sìn-sim sī pîng kám-kak. Bô khuàⁿ uē tio̍h ê tsìng-kù, tsiū bô beh siong-sìn Siōng-tè ìng-ún ê tsin-si̍t-sìng. Tān-sī tsi̍t ê lâng sìn-sim tsuè tuā ê sìng-lī sī "Lín tio̍h tiāⁿ-tiāⁿ, tio̍h tsai Guá sī Siōng-tè." (Si-phian 46:10)

Sìn-sim siōng uí-tāi ê sìng-lī sī khiā tī buē-tàng huâiⁿ-kè ê Âng-hái huāⁿ tíng, thiaⁿ-tio̍h Iâ-hô-hua kóng, "M̄-bián kiaⁿ, tsuè lín khiā-teh, khuàⁿ Iâ-hô-hua kin-á-ji̍t uī-tio̍h lín só͘ beh kiâⁿ ê tsín-kiù." (Tshut-ai-ki̍p-kì 14:13) kap "tsìn-tsîng khì." (Tshut-ai-ki̍p-kì 14:15) Pîng sìn-sim hiòng tsîng kiâⁿ, khuàⁿ sī bô sím-mi̍h tiāu-thâu, bô thiaⁿ-tio̍h sím-mi̍h siaⁿ-seh kò-iūⁿ, tsiū ǹg tsuí tiong ta̍h tshut thâu tsi̍t pō͘, má-siōng khuàⁿ-kìⁿ hái-tsuí pun-khui, kè-sio̍k tuā-pō͘ kiâⁿ, tsiū khuàⁿ-kìⁿ hái tiong khui-tshut tsi̍t-tiâu thong-lō͘.

Muí-pái guá khuàⁿ tio̍h Siōng-tè kî-biāu ê tsok-uî, tshin-tshiūⁿ sîn-jiah-sìng ê i-tī, tsiàu Siōng-tè an-pâi ti̍k-sû ê kiù-un, tíng-tíng, hō͘ guá siōng kám-tōng ê sī, tsiah ê sū lóng sī tī tsua̍t-tuì tsīng-tsīng tiong lâi uân-sîng ê. Līng-guā tsi̍t tiám guá tsin kám-tōng ê sī khuàⁿ-buē-tio̍h tuā-tuā khua-kháu ê kóng-kò, á-sī hì-ki̍k-sìng ê piáu-ián. Guá khiā tī bān-kuân-lîng Siōng-tè ê bīn-tsîng kám-kak tsi̍t-tiám-á lō͘-īng toh bô, Hiáu-gō͘ I tsuè tsiah ê sū sī tsin khin-khuài ê, bô su-iàu sím-mi̍h la̍t, iā bô su-iàu guá tàu-saⁿ-kāng.

Sìn-sim ê tsok-uî m̄-sī tsāi-tī tsit-būn, sī tsāi-tī sūn-tsiông. Tíng-bīn ê king-bûn ê kò͘-sū sī Siōng-tè kiò tsìng-lâng "Tsit ê suaⁿ-kok lín tio̍h piàn-piàn khui kau." (Ṳ Lia̍t-ông-kì 3:16) Tsìng-lâng sūn-thàn. Tsuí tuì tshiau tsū-jiân ê tsuí-guân bô-thîng lâu lâi, kau té tsuí kàu tīⁿ. Tuì lán kóng, tse sī tsi̍t ê sìn-sim tsin hó ê kà-sī!

Lí hi-bāng tit-tio̍h sio̍k-lîng ê tsiok-hok mah? Án-ni lí tsiū ài khì ó͘ kau, lâi hō͘ Siōng-tè tshiong-muá. Tsóng-sī I sī tī siōng buē siūⁿ-tio̍h ê só͘-tsāi, īng siōng ì-guā ê hong-huat lâi uân-sîng tsit ê sū. Guān Tsú hō͘ lán ū tsit khuán ê sìn-sim. "Sī tuì sìn, m̄-sī tuì só͘ khuàⁿ," (Ṳ Ko-lîm-to 5:7) lâi tsuè tāi-tsì, guān I lâi pang-tsān lán, sui-jiân lán khuàⁿ-buē-tio̍h hong, iā khuàⁿ-buē-tio̍h hō͘. --- A.B. Simpson

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com