《台語荒漠甘泉（全羅版）》

 | | | 轉寄

"Bi̍t-sik tiong ê khé-sī"

作者 陳清俊 翻譯 2009.04.05

listen


Sì ge̍h tshue-gō͘ (Sì ge̍h gō͘ ji̍t)

"Tio̍h ji̍p tshù, kuaiⁿ-mn̂g, lí kap lí ê kiáⁿ tiàm lāi-bīn," (Ṳ Lia̍t-ông-kì 4:4)

Tsit ê kuáⁿ-hū kap i ê kiáⁿ pit-su tan-to̍k kap Pē Siōng-tè tī-teh. In beh tshù-lí ê, m̄-sī tsū-jiân ê huat-tsik, m̄-sī tsìng-hú, m̄-sī kàu-huē, iā m̄-sī bo̍k-su, sīm-tsì m̄-sī Thiⁿ-pē uí-tāi ê sian-ti Í-lī-sa. In pit-su kap lâng keh-lī, bô-kuán lâng ê lí-tì, tû-khì tsū-jiân-lu̍t, ná tshin-tshiūⁿ hōng hiat tī puàⁿ khong-tiong tsi̍t-iūⁿ. Só͘ thang khò ê tsí-ū Pē Siōng-tè na-tiāⁿ, tsiū-sī sîn-jiah ê guân-thâu lâi tsiap-tshiok.

Tse sī Pē Siōng-tè tshù-lí lán sū-bū ê tsi̍t tsióng pān-huat, lán pit-su tsìn-ji̍p tsi̍t king kî-tó kap tshau-liān sìn-sim ê keh-lī pì-bi̍t-sik, tī hia beh ū hong-hong hù-hù ê sîng-kó tit-tio̍h. Ū-sî Thiⁿ-pē uē tsō tsi̍t tsō tshiûⁿ sì-bīn uî lán, tû khì lán pîng-siông ê uá-khò, tshú khì lán pîng-siông ê pān-sū huān-sik, tsiong lán kuaiⁿ tī tsi̍t ê sio̍k-thiⁿ, tsuân-sin, liāu-sióng buē tio̍h ê khuân-kíng ni̍h, sī lán kè-khì só͘ bô ê king-giām, lán iā m̄-tsai beh huat-sing sím-mi̍h tāi-tsì. Lán ê sing-ua̍h tshin-tshiūⁿ tsi̍t phit pò͘, Thiⁿ-pē tsiàu I ê siōng-sin ê tô͘-iūⁿ lâi tsián lâi tshâi, lán tsí-ū tsuan-it gióng-bōng I.

Tuā-to-sò͘ ê ki-tok-tô͘ kè tan-tiāu ê sing-ua̍h, tuì só͘ huat-sing ê sū-bū tsha-put-to lóng liāu-sióng uē kàu. Tsóng-sī Thiⁿ-pē tshuā lâng tsìn-ji̍p buē thang ū-tshik ê tsîng-hóng, sī iû I keh-lī tshut-lâi ê, lâng tsí-ū tsai Thiⁿ-pē teh pó-pì in, tī tuì-hù in ê sìⁿ-miā, it-tshè ê ǹg-bāng sī uân-tsuân tuì I lâi.

Lán ài tshin-tshiūⁿ tsit uī kuáⁿ-hū, pit-su kap it-tshè guā-tsāi ê sū-bu̍t keh-lī, tuì lāi-sim uân-tsuân uá-khò I, jiân-āu tsiū beh khuàⁿ-tio̍h I só͘ tuì lán kiâⁿ ê sîn-jiah, kî-sū. – tuì “Lîng-niû”

Siōng-tè ài lâng jīn-bat I siōng-hó ê lō͘-kìng, tsiū-sī hō͘ lâng king-li̍k tio̍h siōng kan-lân ê khó-giām. – tuì “Pó-tsio̍h”

Tng Siōng-tè kuaiⁿ lán tī bi̍t-sik tiong,
Tng lán tī iu-siong kan-khó͘, I kóng,
Keh-lī suan-huâ, Sim tuì sim siong-thong,
Khé-sī lán pó-puè ê su-sióng.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com