《台語荒漠甘泉（全羅版）》

 | | | 轉寄

"Tshì-giām"

作者 陳清俊 翻譯 2009.04.12

listen



Sì ge̍h tsa̍p-jī (Sì ge̍h tsa̍p-jī ji̍t)

"Iâ-so͘ siū Sìng Sîn tshiong-muá, tuì Iok-tàn hô tò-lâi; hō͘ Sìng Sîn tshuā I tī khòng-iá-ni̍h sì-tsa̍p ji̍t kú, hō͘ Mô͘-kuí tshì I;." (Lō͘-ka 4:1-2)

Iâ-so͘ sui-jiân siū Sìng-lîng ê tshiong-muá, iáu-kú tio̍h siū tshì-thàm. Siōng tsiap-kūn Siōng-tè ê lâng, tio̍h siū siōng kiông-lia̍t ê tshì-thàm. Ū lâng kóng, "Mô͘-kuí hiòng kuâiⁿ ê só͘-tsāi siā, siā siōng tiōng-iàu ê pō͘-uī. "Mô͘-kuí bat hō͘ Iâ-so͘ ê tsi̍t ê ha̍k-sing m̄-jīn I.”

Uī-sím-mih bô tsin-tsuē lâng ū tshin-tshiūⁿ Lō͘-tik Má-ting (Martin Luther) kap Mô͘-kuí tshiong-thu̍t hiah-nih lī-hāi ê tsîng-hîng? In-uī i tsiong Mô͘-kuí ê tuā pún-iâⁿ tē-gi̍k kā iô-tāng. Koh siūⁿ Bún-iân Iok-hān (John Bunyan) só͘ king-li̍k juā-tuā ê tsing-tsat!

Tsi̍t ê lâng siū Sìng-lîng tshiong-muá liáu-āu, tsiū beh king-li̍k tio̍h kap hit ê tshì-thàm-tsiá Sat-tàn ki̍k-tuā tshiong-thu̍t. Siōng-tè iông-ún lán siū tshì-thàm, ná tshin-tshiūⁿ po̍k-hong-hō͘ tuì siông-tshiū tshue-phah tsi̍t-iūⁿ. Hō͘ lán ê kun tìng koh-khah tshim. Iā tshin-tshiūⁿ lô͘-hé tsiong gân-liāu hang ji̍p-khì tī huî-khì tíng-bīn koh-khah tiâu, hō͘ lán uē kian-sìn put-î.

Lí íng-uán buē thang liáu-kái lí lia̍h-tiâu Ki-tok kàu sím-mi̍h thîng-tō͘, ti̍t-kàu Mô͘-kuí tsīn-la̍t kā lí khiú ê sî, lí tsiah kám-kak tio̍h Ki-tok ê tshiú khan lí tiâu-tiâu-tiâu.

Hui-siông ê thòng-khó͘ pīng m̄ sī tuì hui-siông ê tsuē-gia̍t ê tshú-hua̍t, huán-tńg sī Siōng-tè ti̍k-pia̍t só͘ sù ê khó-giām. Thiⁿ-pē īng tsin-tsuē lāi-to lâi buâ, lâi tshiat tsho͘-tsho͘ ê pó-tsio̍h. Uī tio̍h beh hō͘ I ti̍k-pia̍t thiàⁿ-thàng ê sìng-tô͘ ū koh-khah tshàn-lān ê kong-hui, hō͘ in siông-siông kám-siū tio̍h Pē Siōng-tè īng kang-kū tī in ê sin-tsiūⁿ kang-tsok. --- R. Leighton

Guá guān-ì kiàn-tsìng kóng, guá tī Siōng-tè ê kang-tsok-sik siū Siōng-tè ê hé, thuî, tsho̍k ê tshau-liān, pí kî-thaⁿ ê lâng khah tsuē. Ū-sî guá siūⁿ tû-liáu tī Siōng-tè ê kuáiⁿ-á ē, kî-thaⁿ guá kiám uē ha̍k-si̍p tio̍h sím-mi̍h? Tng guá ê kàu-sik siōng o͘-àm ê sî, guá khuàⁿ liáu siōng tshing-tshó. --- Tsarles H. Spurgeon


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com