《台語荒漠甘泉（全羅版）》

 | | | 轉寄

"Sìn-sim ê sîng-tióng"

作者 陳清俊 翻譯 2009.07.12

listen


Tshit ge̍h tsa̍p-jī (Tshit ge̍h tsa̍p-jī ji̍t)

"Tsóng-sī I tsai guá só͘ kiâⁿ ê lō͘; I tshì-liān guá liáu-āu, guá beh tshin-tshiūⁿ kè thuàn-liān ê kim." (Iok-pik-kì 23:10)

Po̍k-hong tiong sìn-sim tsing-tióng! Tsit kù té-té ê uē tuì tsi̍t ê king-li̍k tio̍h ū sìⁿ-miā ui-hia̍p ê lâng sī ū hô-tíng tuā ê ì-gī!

Sìn-sim sī Siōng-tè só͘ sù ê li̍k-liōng, si̍t-si khí-lâi, uē khuàⁿ-tio̍h só͘ buē-thang khuàⁿ-kìⁿ ê tāi-tsì. Tuì tshiau-tsū-jiân ê sū-bu̍t, hō͘ bô khó-lîng ê piàn tsuè khó-lîng. Sī, Sìn-sim tī po̍k-hong tiong tsing-tióng, tī lîng-sìng-kài tsân-tshù ê jiáu-luān, kiáu-jiáu tiong sîng-tióng. Po̍k-hong sī tng tsū-jiân la̍t hō͘-siong tshiong-thu̍t tiong sán-sing ê; lîng-sìng ê po̍k-hong iā sī tī tshiau-tsū-jiân kài tuì-huán la̍t ê tshiong-thu̍t só͘ sán-sing ê. Tī tsit tsióng tshiong-thu̍t ê khì-hun tiong, sìn-sim tshē tio̍h siōng puî ê thô͘, thang tsin kín sîng-si̍k.

Siōng tsho͘ siōng tuā ê tshiū m̄-sī siⁿ tī tshiū-nâ lāi, khiok sī siⁿ tī sì-bīn ū hong tshe-lâi tshe-khì ê khòng-khuah ê só͘-tsāi. Kông-hong uē tshe uan, tshe tsi̍h, uan-khiau, hō͘ i piàn tsuè tuā tshiū thâu. Tsiah ê tshiū, bo̍k-liāu siōng kian-tīng, ba̍k-tshiūⁿ īng lâi tsuè kang-kū ê pìⁿ.

Siâng-khuán, tī lîng-sìng siōng, tng lí khuàⁿ tio̍h tsi̍t uī lîng-sìng ū sîng-tsiū ê lâng, lí nā kap i tâng-kiâⁿ, hit tiâu lō͘ pīng m̄-sī íng-uán thài-iông tshàn-lān, iá-hue muá sì-kuè. Tú-tú siong-huán, he sī guî-hiám tsin tsuē tsio̍h-thâu koh ue̍h ê sió-lō͘, ū tē-gi̍k ê hong siūⁿ beh kā i tshe tó, ū tsiam-tsiam ê tsio̍h siong i kha-té, ū tshì-á tsha̍k phuà bīn-phê, ia̍h ū to̍k-tsuâ tī sì-tsiu-uî teh thò͘ tsi̍h tng tán.

Sìn-sim ê lō͘ ū pi-siong iā ū khuài-lo̍k, ū khùn-khó͘ iā ū i-hó an-uì, ū lâu ba̍k-sái iā ū tshiò ê sî, ū tshì-giām iā ū sìng-lī, ū tshiong-thu̍t iā ū tik-sìng, jî-tshiáⁿ iáu ū tsin-tsuē khùn-lân, guî-hiám, siū phah, khún-pik, siū gō͘-huē, huān-lān, khùn-khó͘, tíng-tíng. Put-kò “tī tsiah ê lóng-tsóng ê sū, lán tuì thiàⁿ lán ê, tik-sìng kàu ū tshun.” (Lô-má 8:37)

Tio̍h, tī “lóng-tsóng ê sū” sīm-tsì tī po̍k-hong tiong, siōng kiông-lia̍t ê tuā-hong tiong lóng “tik-sìng kàu ū tshun.” Lí khó-lîng siūⁿ ài tô-siám khó-giām, bô ài siū kiông-lia̍t ê po̍k-hong ê thua-buâ, tsóng-sī lí ing-kai bīn-tuì i! Siōng-tè tī muí tsi̍t ê khó-giām tiong-sim teh thìng-hāu lí, I uē tsiong I ê pì-bi̍t kā lí kóng. Tng lí tshut-lâi ê sî, bīn beh huat kng, koh ū liân tē-gi̍k ê ok-mô͘ to buē thang iô-tāng ê sìn-sim. --- E.A. Kilboorne

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com