《台語荒漠甘泉（全羅版）》

 | | | 轉寄

"Íng-uán tsûn-tsāi tī sin-piⁿ"

作者 陳清俊 翻譯 2009.09.06

listen


Káu ge̍h tshue-la̍k (Káu ge̍h la̍k ji̍t)

"to̍k-to̍k lí kú-tn̂g tī-teh." (Hi-pik-lâi 1:11)

Sè-tsiūⁿ tsin tsuē lâng ko͘-tuaⁿ tsē tī hé-lô͘ piⁿ, piⁿ-á ū tsi̍t-tè í-á, í-tsîng ū lâng tsē kè, taⁿ khang-khang, buē kìm-tit lâu tshut ba̍k-sái. In siông-siông ko͘-tuaⁿ tsē, tsóng-sī in bô siūⁿ tio̍h tsi̍t ê khuàⁿ-buē-tio̍h ê lâng, tsiū tī sin-piⁿ. M̄-tsai sím-mi̍h guân-in, in khiok bô kám-kak tio̍h I ê tông-tsāi. Uē kám-kak-tio̍h ê lâng ū hok-khì. Tsóng-sī tsin tsió-sò͘, in-uī sī kuat-tīng tī in ê sim-tsîng, kám-tsîng, sin-thé tsîng-hîng, kap thiⁿ-khì. Guā-bīn ê hō͘, kāu-bū, bô bîn, thàng-thiàⁿ, lóng íng-hióng in ê sim-tsîng, hō͘ in ê sī-kak bông-bū, suah kám-kak buē-tio̍h I ê tông-tsāi.

Tsóng-sī iáu-ū tsi̍t hāng pí kám-kak khah-hó khah ū hok-khì ê mi̍h, kap kok-tsióng ê khuân-kíng bô kuan-hē, khiok siông-siông kap lí tông-tsāi. Tsiū-sī sîng-jīn hit ê khuàⁿ-buē-tio̍h ê tông-tsāi, I sī hiah-nih kî-biāu, pîng-tsīng, an-uì tìn-tīng koh un-luán. Sîng-jīn Tsú ê tông-tsāi, I tsiū tī lí tsia, tī lí sin-piⁿ. I ê tông-tsāi sī tsin-si̍t, tng lí sîng-jīn tse, uē tsing-ka lí khì kám-kak ê lîng-li̍k, tān-sī tsua̍t-tuì m̄-sī khò kám-kak.

Sī, m̄-nā sī tsit ê tsin-lí ê tsûn-tsāi, m̄-sī mi̍h-kiāⁿ, sū-si̍t, á-sī tîn-suat, iáu-ū tsi̍t ê Tsú tī tsia. I sī jia̍t-sim ê pîng-iú, tsuân-lîng ê Siōng-tè. Hō͘ ai-khàu ê lâng ū hí-lo̍k ê tsin-lí, bô-kuán i uī-sím-mi̍h lâi khàu, iā bô-kuán in ê liú-tshiū tsai tī sím-mi̍h hô piⁿ (Si-phian 137:1-2). --- Samuel Dickey Cordon

Guá tsá-tsîng ê huan-lo̍k sit-khì,
Khah-tsá só͘-ū ê tsâi-pó iā bô-khì,
Hō͘ guá iau-gō ê sim uē tit pá ê si̍t-hiān,
Sī, Tsú ah, Lí sī tī tsia, lóng bô piàn.

Khue-tsuí uē ta, koh uē tīⁿ,
Hiah-nih hīng-hok, hong-hù, tsū-iû ê iú-gî,
Khong-tiong ū ji̍t tsiò iā ū hûn jia-pì,
Tsú ah, Lí sī tī tsia, guá ê sim ū Lí.

Thé-la̍t sue-thè, kha-sng tshiú-nńg,
Buē thang koh uī huan-lo̍k phun-pháu phah-sǹg,
Uī-hô thó͘-khuì, kui-ji̍t iu-tshiû buē-tn̄g,
Tsú ah, Lí sī tī tsia, iáu ū siáⁿ khah kú-tn̂g?

It-sing ê ji̍t-tsí, pîng-iú, iú-gî, hí-lo̍k,
Tuì guá tsuē-tsió lóng tshiong-tsiok,
Pi-tshám buē-tàng siong guá, guá iáu beh gîm-si,
Tsú ah, Lí sī tī tsia, guá ê sim ū Lí. --- J. Danson Smith


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com