《台語荒漠甘泉（全羅版）》

 | | | 轉寄

"Thàu-tsá"

作者 陳清俊 翻譯 2009.09.13

listen


Káu ge̍h tsa̍p-saⁿ (Káu ge̍h tsa̍p-saⁿ ji̍t)

"thàu-tsá lí tio̍h tsiūⁿ Se-nái suaⁿ; tī-hia, tī suaⁿ-bé-liu, khiā tī Guá bīn-tsîng," (Tshut-ai-ki̍p-kì 34:2)

Thàu-tsá, sī guá kap Tsú biān-huē ê sî-kan. Thàu-tsá tshin-tshiūⁿ phû-tô ap tsuè sìng ê tsiap hō͘ guá lim. Thàu-tsá sī Siōng-tè sù guá siōng tuā li̍k-liōng, siōng ū ǹg-bāng ê sî, thang khai-sí tsi̍t kang ê kang-tsok, tsing-sîn pá-pá, bô ià-siān ê khai-sí. Tsang-àm, guá tsa-hng ê ià-siān í-king bâi-tsòng, kin-á-ji̍t thàu-tsá guá ū sin ê khuì-la̍t. Tsiong thàu-tsá hiàn-hō͘ Siōng-tè, tsit ji̍t tsiū siū tsiok-hok. Thàu-tsá kî-tó tsiū-sī thâu tsi̍t ê sìng-lī, hit-ji̍t tsiū beh sūn-lī sîng-kong. Thàu-tsá, guá kap Siōng-tè saⁿ-kìⁿ tī suaⁿ-tíng, sī juā-tsiâⁿ ê sìng-kiat!

Tshin-ài ê Pē, guá ì-ài kap Lí siong-huē, tī ji̍t-ji̍t pîng-siông sing-ua̍h ê pîⁿ-iûⁿ, pīng buē tsó͘-tsí guá lâi kàu Lí sìng ê kuâiⁿ-tshù. Guá tsiàu Lí ê ho͘-tiàu lâi, thang khak-tīng kìⁿ Lí ê bīn, muí-ji̍t thàu-tsá tī tse suaⁿ-tíng ū bí-hó ê khai-sí, guá kui kang tsiū ū khuì-la̍t, muá-sim khuài-lo̍k.

Tsá-khí thiⁿ phú-kng, tsiáu-á tú tshíⁿ, kap Lí tông-tsāi,
Pí tsá-khí khah suí, pí ji̍t-sî khah khó-ài,
Tshing-tsá, kap Lí tsuè-hé kam-tiⁿ ì-ài.

Tī tà-bông, tī tsū-jiân an-tsīng tiong,
Tī tshing-tsá lîng-tsīng lō͘-tsuí siōng,
Tan-to̍k kap Lí lâi-óng kau-thong.

Ji̍t-thâu tuì pîng-tsīng hái-bīn phû khí-lâi,
Thàu-tsá tshiⁿ-sîn tsīng-tsīng so͘-khai,
Lí ê hîng-siōng tshut-hiān tī guá sim-lāi.

Àm-mî, ià-siān sim-lîng, ba̍k-tsiu kheh-kheh hiòng Lí kî-tó siong-thong,
Tī Lí si̍t-ē an-bîn hó-khùn, tsīng-ióng,
Tshing-tsá khùn-tshíⁿ, kìⁿ Lí koh-tsài tiⁿ-bi̍t tshing-sóng. --- Harriest Beetser Stowe

Guá ê lāu-bú ū tsi̍t ê si̍p-kuàn, tsiū-sī muí-ji̍t tsá-tǹg tsia̍h liáu, ū tsi̍t-tiám-tsing ê sî-kan tī i ê pâng-king, ū tha̍k sìng-king, bi̍k-sióng, kî-tó. Hit tiám-tsing, tuì i ná tshin-tshiūⁿ sù hok ê tsuâⁿ-guân, tit-tio̍h li̍k-liōng kap tì-huī, lâi tsún-pī tsuè i tsi̍t ji̍t ê kang-tsok. Sui-jiân ū khuân-kíng ê ap-pik, kok-tsióng mâ-huân ê tsa̍p-sū, i lóng uē sim-pîng khì-hô lâi ìng-tuì.

Guá siūⁿ tio̍h i ê piau-tsún ki-tok-tô͘ sing-ua̍h kap jím-siū it-tshè, tsiū khuàⁿ tio̍h Siōng-tè ê un-tián tit-tio̍h tsua̍t-tuì ê sìng-lī. Guá m̄-bat khuàⁿ-tio̍h i huat phî-khì, iā bô thiaⁿ-kè i kóng siū-khì ê uē. I bô tsham-ka kóng îng-á-uē ê tâm-lūn, iā bô kóng lâng ê tn̂g-té. Si̍t-tsè-siōng guá bô tú-tio̍h i tsi̍t-tiám-á īng pháiⁿ kám-tsîng lâi pān-sū, tse sī hiah-ê "lim ua̍h-miā ê tsuí" (Khé-sī-lio̍k 22:1) kap "tsia̍h ua̍h-miā ê bí-niû" (Iok-hān 6:51) ê lâng só͘ bô ing-kai ū ê. --- Frederick William Farrar

Tsiong sin-sian ê tshiⁿ-hue hiàn hō͘ Siōng-tè, m̄-thang tán kàu hue í-king tiau-siā ê sî tsiah beh hiàn.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com