《台語荒漠甘泉（全羅版）》

 | | | 轉寄

"Bô bîng-pi̍k ê sū"

作者 陳清俊 翻譯 2009.09.20

listen


Káu ge̍h jī-tsa̍p (Káu ge̍h jī-tsa̍p ji̍t)

"Guá kiám bô kā lí kóng, lí nā sìn, uē khuàⁿ-kìⁿ Siōng-tè ê îng-kng mah?" (Iok-hān 11:40)


Má-tāi kap Má-lī-a buē-tàng bîng-pi̍k in ê Tsú teh tsuè sím-mi̍h. In lóng tuì I kóng, "Tsú ah, lí nā tī tsia, guá ê hiaⁿ-tī tsiū buē sí." (Iok-hān 11:21,32) Tsit-kù uē puē-āu tsin-tsiàⁿ ê ì-sù sī "Tsú ah, guán buē bîng-pi̍k lí iân-tshiân tsiah kú tsiah lâi, suah hō͘ lí só͘ thiàⁿ ê lâng sí-khì. Guán buē bîng-pi̍k lí hō͘ tsit ê iu-siong thòng-khó͘ lîm-kàu guán. Lí nā tī-teh, it-tshè ê sū tsiū buē huat-sing, lí thài uē bô kín-kín lâi? Hiān-tsāi í-king siuⁿ bān lah. In-uī Lia̍p-sat-lō͘ í-king sí sì-kang lah!" Tān-sī Iâ-so͘ ū tsi̍t ê tuā tō-lí beh huê-tap tsiah ê būn-tê. I ê tiōng-tiám sī "Lín khó-lîng bô bîng-pi̍k, tān-sī guá kā lín kóng, lín nā sìn, tsiū beh bîng-pi̍k."

A-pik-la̍h-hán bô bîng-pi̍k Siōng-tè uī-hô ài i tsiong kiáⁿ lâi hiàn-tsè, tān-sī i siong-sìn Siōng-tè. Tng i khuàⁿ tio̍h i sim-ài ê kiáⁿ koh huê tńg lâi sin-piⁿ, i khuàⁿ-tio̍h Siōng-tè ê îng-kng. Mô͘-se bô bîng-pi̍k Siōng-tè uī-hô ài i tī khòng-iá khiā-khí sì-tsa̍p nî kú. Tān-sī i iā siong-sìn Siōng-tè, āu-lâi i kìⁿ-tio̍h Siōng-tè kiò i tshuā Í-sik-lia̍t thuat-lī tsuè Ai-ki̍p ê lô͘-lē kang-tsok.

Iok-sik bô bîng-pi̍k i ê hiaⁿ-ko uī-sím-mi̍h gi̍k-thāi i, hit ê kan-tsà Ai-ki̍p hū-lú uī-sím-mi̍h tsuè ké ê kan-tsìng hām-hāi i, á-sī uī-sím-mi̍h ài siū hiah tsuē nî ê bô kong-pîng ê kaⁿ-kìm. Tān-sī i siong-sìn Siōng-tè, kàu bé i khuàⁿ-tio̍h só͘ tuà lâi ê îng-kng. Iáu-ū Iok-sik ê lāu-pē Ngá-kok, i bô bîng-pi̍k uī-hô Siōng-tè īng kî-kuài ê hong-sik tsiong Iok-sik tuì i sin-piⁿ tuà tsáu. Tsóng-sī āu-lâi i tuì Iok-sik ê bīn khuàⁿ-tio̍h Siōng-tè ê îng-iāu, in-uī hit-sî Iok-sik í-king tsuè tsi̍t-uī tuā kun-ông huat-ló ê tsái-siòng, m̄-nā tsín-kiù liáu ka-kī, iā tsín-kiù liáu tsuân-kok ê kok-bîn.

Bô-tiāⁿ-tio̍h tī lí ê sìⁿ-miā nih iā ū tsin-tsuē sū lí uē huâi-gî Siōng-tè. Lí khó-lîng beh án-ni kóng, "Guá bô bîng-pi̍k uī-hô Siōng-tè hō͘ guá só͘ thiàⁿ ê lâng kè-sin, sí-khì. Guá bô bîng-pi̍k Siōng-tè uī-hô hō͘ khùn-khó͘ tshim-huān guá. Guá bô bîng-pi̍k Siōng-tè uī-hó tshuā guá kiâⁿ tse uan-uan khiau-khiau ê sió-lō͘. Guá bô bîng-pi̍k guá tsiah-nih tsiu-tsuân ê kè-uē thài uē sit-pāi. Guá bô bîng-pi̍k guá só͘ kín-kip su-iàu ê tsiok-hok, thài uē tsiah-nih bān, m̄ lâi."

Tshin-ài ê pîng-iú, lí m̄-bián uân-tsuân bîng-pi̍k Siōng-tè ê an-pâi. I iā bô kî-thāi lí ê bîng-pi̍k. Tshin-tshiūⁿ lí bô kî-thāi lí ê kiáⁿ-jî bîng-pi̍k lí uī in só͘ tsuè ê it-tshè, lí tsí-sī ài in siong-sìn lí tsiū hó. Ū tsi̍t ji̍t lí iā uē tī lí só͘ bô bîng-pi̍k ê sū khuàⁿ-tio̍h Siōng-tè ê îng-kng. --- J.H.M.

Lán nā tsiong sìⁿ-miā ê mn̂g phah khui,
Tī lāi-bīn khuàⁿ-tio̍h Siōng-tè ê tsok-uî,
Tsiū bîng-pi̍k só͘-ū ê huâi-gî kap huán-tuì,
Tsai muí tsi̍t ê ò-pì lóng ū i ê só-sî saⁿ suî.

Tān-sī, sim-ài ê, m̄-sī hiān-tsāi, sim pàng hō͘ khui,
Siōng-tè ê kè-uē ná pik-ha̍p-hue ê hue-luí,
M̄-thang kā hue-m̂ īng hong-huat ngī tshui,
Sî nā kàu hue tsū-jiân khui kàu tsin suí.

Nā ū nāi-sim, tsiū uē kàu bí-hó ê tē,
Ià-siān ê kha thang hioh, thang thǹg khì uê,
Kàu hit-sî, lán beh bîng-pi̍k só͘ ū it-tshè,
Guá beh kóng, "Siōng-tè si̍t-hîng siōng-hó ê kè-uē."



附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com