《台語荒漠甘泉（全羅版）》

 | | | 轉寄

"Kap Tsú kiat-ha̍p"

作者 陳清俊 翻譯 2009.09.27

listen

Káu ge̍h jī-tshit (Káu ge̍h jī-tsa̍p-tshit ji̍t)

"Guá í-king tshē-tio̍h sio̍k-huê i ê." (Iok-pik-kì 33:24)

Sio̍k-lîng ê i-tī sī sio̍k-lîng ê sing-ua̍h. Ki-tok tsuè lán ê Tsú, tsiū-sī Ki-tok ê sìⁿ-miā tī lán sin-thé ê lāi-bīn. Lán ê thé kap Ki-tok ê thé liân-ha̍p tsuè tsi̍t thé, tuì lán ê sin-thé piáu-hiān tshut I ê sìⁿ-miā. I koh-ua̍h îng-kng ê thé sī tsin si̍t. Kap I tuì sí koh-ua̍h siâng-khuán ê sū-si̍t, ua̍h-ua̍h ê Tsú kap sin, taⁿ tsē tī Siōng-tè ê tsiàⁿ-pîng.

Tâng tsit ê Ki-tok, tuà só͘-ū ê lîng-sìng kap tuā kuân-lîng, sio̍k-tī lán. Lán sī I ê tsi-thé, I ê bah, I ê kut. Lán nā siong-sìn tsit ê sū-si̍t, lán thang tuì Siōng-tè ê kiáⁿ ê sìⁿ-miā tit-tio̍h lán ê sìⁿ-miā.

Tshin-ài ê Tsú, kiû lí pang-tsān guá liáu-kái koh si̍t-hîng tsit tsat king-bûn "To̍k-to̍k sing-khu ... sī uī-tio̍h Tsú, Tsú iā sī uī-tio̍h sing-khu." (I Ko-lîm-to 6:13) --- A.B. Simpson

"Lí ê Siōng-tè Iâ-hô-hua tī lí ê tiong-kan, tsiū-sī tsuân-lîng ê, tsín-kiù ê." Jī-tsa̍p guā nî tsîng, tsit tsat sìng-king hō͘ guá thâu tsi̍t pái tsai sìn-sim i-tī ê tō-lí, i-tī guá ià-siān ê sin-thé kap sim-su. Hiān-tsāi guá pí í-tsîng mn̂g khui khah khui, hō͘ íng-ua̍h ê Ki-tok sî-sî khik-khik tsìn-ji̍p guá siū sio̍k ê sin-thé. I ji̍p-lâi īng I ê lîng tshiong-muá guá, sù guá li̍k-liōng, kap ua̍h-li̍k. Hō͘ guá tsuân-sin tsìn-ji̍p tī "sin ê thiⁿ sin ê tuē" (Khé-sī-lio̍k 21:1) ê kíng-kài.

Līng-guā tsi̍t tsat kóng, "Thiàⁿ Tsú lí ê Siōng-tè" (Lō͘-ka 10:27) Nā-sī Tsú sī guá ê Siōng-tè, tī tsuân-lîng Siōng-tè ê lāi-bīn ê it-tshè iā sī guá ê. I tuà tī guá lāi-bīn, I só͘-ū it-tshè guá iā ū. "Tsì-tuā tsuân-lîng ê Siōng-tè, bān-kun ê Iâ-hô-hua, sī I ê miâ." (Iâ-lī-bí 32:18) I tsin sī tsuân-lîng ê Siōng-tè, sī tī guá lāi-bīn ê Siōng-tè. Tshin-tshiūⁿ thài-iông sī Thài-iông-hē ê tiong-sim, I sī tī guá lāi-bīn ê tiong-sim, ua̍h-ua̍h ê Sìng-pē, Sìng-kiáⁿ kap Sìng-lîng. I sī guá lāi-bīn saⁿ-tîng ê huat-tiān-ki, tī guá ê si̍t-thé kang-tsok, pau-kuat guá ê náu kap sîn-king hē-thóng.

Jī-tsa̍p-it nî lâi, tsit ê tsin-lí tuì guá m̄-nā sī ua̍h-thiàu-thiàu ê sū-si̍t, koh huat-tián kàu khah tshim khah kāu. Hiān-tsāi guá í-king tshit-tsa̍p hè, tī tsin tsuē hong-bīn pí saⁿ-tsa̍p guā hè ê sî khah siàu-liân, khah ióng-tsòng. Taⁿ guá khò Siōng-tè ê li̍k-liōng teh sing-ua̍h. Sin, sim nn̄g hong-bīn ê sîng-tsiū pí kè-khì jīm-hô sî-tsūn lóng ke tsi̍t pē. Īng tsi̍t-puàⁿ ê khuì-la̍t, guá ê sin, sim, lîng ê sìⁿ-miā tsiū ná tsi̍t kháu ê tsíⁿ-tsuí, íng-uán muá-muá. Bô-lūn thiⁿ-khì ū sím-mi̍h ki̍k-lia̍t ê piàn-huà, guá káng-tō, kàu-tok, mî-ji̍t ê lú-hîng, lóng buē siān, ná tshin-tshiūⁿ hé-tshia tsing-khì-ki tshiong-muá tsing-khì tsin ū-la̍t lâi thui-sak hé-tshia hiah iông-īⁿ.

Guá siū kiù-sio̍k, sìng-huà, i-tī ê sin, hûn kap lîng,
Hun-pa̍t tsuè sìng hiàn tī Tsú, Lí bīn-tsîng,
Uân-uân tsuân-tsuân ê tsâi-lîng,
Kap Lí ê îng-kng kiat-liân tsuân it-sing.
Ha-lé-lu-iá! --- Henry Wilson


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com