《台語荒漠甘泉（全羅版）》

 | | | 轉寄

"Hó ê kiat-bé"

作者 陳清俊 翻譯 2009.10.04

listen


Tsa̍p ge̍h tshue-sì (Tsa̍p ge̍h sì ji̍t)

"Án-ni Iâ-hô-hua sù-hok Iok-pik ê bé-kíng iâⁿ-kè i ê khí-thâu." (Iok-pik-kì 42:12)

Iok-pik tuì i siū khó͘-lān tit-tio̍h hok-hūn. I siū khó-giām lâi tsìng-bîng i tsuè lâng uân-tsuân. Siâng-khuán, guá siū ê khùn-lân sī beh kian-kiông guá ê phín-keh, hō͘ guá tit-tio̍h tsîng só͘ bô ê un-sù, tsâi-lîng. In-uī siōng si̍k ê ké-tsí sī siⁿ tī siōng tsho͘-piak-piak ê tshiûⁿ-uî tíng. Pit-su ài king-li̍k kè khiam-pi, lâu ba̍k-sái, sí-bông, tsiah uē tit-tio̍h îng-iāu. Tshin-tshiūⁿ Iok-pik ê khó͘-lān hō͘ i tuì Siōng-tè tsìn tsi̍t-pō͘ ê jīm-bat. Hō͘ ka-kī koh-khah khiam-pi. Tsuè-āu i tsiah uē án-ni tuā-siaⁿ kóng, "Taⁿ guá ê ba̍k-tsiu khuàⁿ-kìⁿ Lí." (Iok-pik-kì 42:5)

Ká-sú thong-kè thòng-khó͘ sún-sit guá thang kàu tsong-giâm Siōng-tè ê bīn-tsîng, phak-pài tī I ê bīn-tsîng kî-tó kóng, "guān lí ê tsí-ì tit tsiâⁿ" (Má-thài 6:10) án-ni guá só͘ tit-tio̍h ê sī hô-tíng ê tuā ah. Siōng-tè hō͘ Iok-pik khuàⁿ tio̍h i bī-lâi ê îng-huâ, in-uī tī hiah ê khó͘-lān khùn-khó͘ ê ji̍t-tsí, Siōng-tè hō͘ i jīm-bat tio̍h Siōng-tè ê ò-pì, tsiah uē sîng-khún kóng, "In-uī guá tsai kiù-sio̍k guá ê sī ua̍h-ê." (Iok-pik-kì 19:25) Só͘-í "Iâ-hô-hua sù-hok Iok-pik ê bé-kíng iâⁿ-kè i ê khí-thâu." --- tuì "bi̍k-sióng"

Khùn-lân buē lâi kìⁿ lâng, tû-hui i ê tshiú tiong tuà tsi̍t tiâu kim-tiâu.

Piáu-bīn ê gi̍k-kíng tuì tsìng-ti̍t ê lâng sī iú-lī ê, tsí-iàu guān-ì kè-sio̍k ho̍k-sāi, nāi-sim tán-thāi. Huê-sióng kè-khì ū sîng-tsiū ê lâng, in lóng ū kian-tīng ê sìn-sim, hó-táⁿ hiòng-tsîng bô kiaⁿ khùn-lân! Lán nā bô guān-ì tsiap-siū koh jím-siū khùn-lân, tsin-tsuē hok-hūn tit buē tio̍h. Ū-ê hí-lo̍k sī thong-kè iu-siong tsiah ū ê. Ū-sî Siōng-tè tsin-lí ê khé-sī sī tī tē-tsiūⁿ ê kng sit khì āu tsiah sán-sing. Siu-sîng sī tī ū king-tsok tsìng-tsoh ê āu-bīn.

Iú-sú í-lâi, siōng kian-kiông ê lâng sī tuì khó͘-lān lâi sán-sing. Siōng uí-tāi ê jîn-bu̍t sin tsiūⁿ lóng tuà khó͘-thàng ê siong-jiah. Tshing-nî pah-sè í-lâi ê sûn-tō-tsiá, tshīng îng-kng ê phàu, tíng-bīn ū kim-sih-sih ê kng-khuân, sī thong-kè in ê ba̍k-sái kap siū-siong tiong khuàⁿ tio̍h thian-kok ê tuā-mn̂g. --- Tsapin

Tuì só͘ phuā ê kim-liān, tsai lí thiàⁿ ê tsing-liān,
Tuì thiàⁿ-sim ê piáu-hiān, tsai lí king-kè hé ê tshì-liān,
Tsin-si̍t sim ah, kè-sio̍k tsìn-tián, kng-sih-sih ióng ê kim-liān,
Ū tsīng-huà hé ê un-tián, kap khó͘-lān lô͘ ê thuàn-liān. --- Adelaide Proctor


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com