《台語荒漠甘泉（全羅版）》

 | | | 轉寄

"Siⁿ sí kè-ta̍t-kuan"

作者 陳清俊 翻譯 2009.10.11

listen


Tsa̍p ge̍h tsa̍p-it (Tsa̍p ge̍h tsa̍p-it ji̍t)

"tshin-tshiūⁿ beh sí, kî-si̍t sī ua̍h." (Ṳ Ko-lîm-to 6:9)

Kū-nî guá tsìng tsi̍t-phiàn tsí-sik hue (asters) tī hue-hn̂g nih, ū sió-khuá khah bān, tsóng-sī iā khui liáu tsin suí. Ū-ê í-king khui-hue kiat-tsí, ū-ê tsiah teh-beh khui-hue. Kàu lo̍h-sng ê sî, tsit-phiàn hue hō͘ sng tàng-sí, suí-suí ê hue lóng sí-khì-lah. Ah, in tòng buē-kè hân-líng ê thiⁿ-khì, lóng-tsóng sí-liáu-liáu.

Kui ê tang-thiⁿ lóng bô koh tshap hue-hn̂g ê sū, in-uī tsí-sī tsi̍t ê hue ê bōng-á-po͘. Tsóng-sī kuí lé-pài tsîng, hn̂g-ting (tsoh-sit-lâng) kiò guá tsù-ì khuàⁿ, kui phiàn ê hue-hn̂g huat tshut gō͘-tsa̍p guā tsâng ê tsí-sik hue tsâng. Guân-lâi guá só͘ siūⁿ in lóng hō͘ sng-seh tàng-sí lah. Tsóng-sī sng-seh, tang-thiⁿ ê líng-hong kiám uē thang tuì in tsuè sím-mih?

Sng-seh uē tua̍t-khì guá ê hue, huí-huāi hue, hiat in tī thô͘-kha. Sng-seh tang-hong īng pe̍h-seh ê kha ta̍h hue-hn̂g, tsuè uân in ê kang-tsok kóng, "Tse tsiū-sī lín ê bua̍t-ji̍t lah." Tsóng-sī tshun-thiⁿ kàu, siū sún-huāi ê muí tsi̍t tsâng tsí-sik hue, ū gō͘-tsa̍p tsâng peh khí-lâi kiàn-tsìng kóng, "guán tshin-tshiūⁿ sí khì, kî-si̍t sī ua̍h-teh."

Si̍t-bu̍t ê sè-kài sī án-ni, Siōng-tè kok iā sī án-ni, thong-kè sí, tit-tio̍h íng-uán-ua̍h. Tuì Iâ-so͘ ê siū-tìng sí tī si̍p-jī-kè kap hûn-bōng, tuà kàu íng-uán ua̍h ê Siōng-tè ê pó-tsō kap sìng-tiān lāi. Khuàⁿ, ná sit-pāi, kî-si̍t sī sìng-lī.

Só͘-í bo̍h-tit kiaⁿ siū-khó͘, á sit-pāi. Tse sī thong-kè "tshin-tshiūⁿ siū tsik-hua̍t, kî-si̍t bô tì-kàu sí." (Ṳ Ko-lîm-to 6:9) Sī thong-kè siū phah, thiah kàu tshuì-tshuì-tshuì, suah hō͘ lán piàn-tsuè ū lîng-li̍k ê lâng. Tuì tsi̍t ê sìn-tô͘ ê kian-sim jím-nāi siū-khó͘, tsiah uē sán-sing tsi̍t tuā tui ê sìn-tô͘.

Ū lâng hō͘ sū ê piáu-bīn só͘ li̍k-tio̍h, kun-tè sè-kan ê tiâu-liû. In ê hue khó-lîng sī kín-kín bō͘-sīng, tsiām-sî ê hing-ōng, tān-sī in ê kiat-kio̍k sī íng-uán ê sí-bông. --- Henry Ward Beetser

Sìⁿ-miā ê kè-ta̍t sī tsāi-tī sún-sit,
m̄-sī tsāi-tī só͘-tit;
M̄-sī tsāi-tī lim juā-tsuē tsiú,
sī tsāi-tī tshut juā-tsuē tsiú;
In-uī thiàⁿ ê pún-lîng,
tsāi tī thiàⁿ ê hi-sing;
Tsia̍h-khó͘ siōng-tsuē,
hù-tshut kòng-hiàn iā sī siōng-tsuē.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com