《台語荒漠甘泉（全羅版）》

 | | | 轉寄

"Iân-tî kap khó͘-lān"

作者 陳清俊 翻譯 2009.10.18

listen



Tsa̍p ge̍h tsa̍p-pueh (Tsa̍p ge̍h tsa̍p-pueh ji̍t)

"Lí tik-khak tio̍h tsai, lí ê hō͘-è beh tshut-guā tī pa̍t-lâng ê tuē, ... hit-uī ê lâng beh khó͘-tshó͘ in sì-pah nî. ... āu-lâi in beh tuà tsuē-tsuē tsâi-bu̍t tuì-hia tshut-lâi." (Tshòng-sè-kì 15:13-14)

Guá thang khíng-tīng Siōng-tè ìng-ún hō͘ guá ê hok-khì tiong, ū tsi̍t-pō͘-hūn sī "iân-tî" kap "siū-khó͘." A-pik-la̍h-hán it-sing king-li̍k iân-tî, khuàⁿ loh ná tshin-tshiūⁿ Siōng-tè ê ìng-ún íng bô si̍t-hiān ê ji̍t, i ê hō͘-è king-kè tn̂g-kî ê iân-tshiân. Tān-sī he khak-si̍t sī iân-tî, tng ìng-ún si̍t-hiān lah, in tik-khak "tuà tsin-tsuē tsâi-bu̍t tuì hia tshut-lâi."

Siōng-tè īng iân-tî lâi khó-giām lán, koh kap iân-tî tsuè-hé lâi ê, iáu-ū khó͘-lān. Tsóng-sī king-kè tse it-tshè, Siōng-tè ê ìng-ún iáu-kú iú-hāu. Guá ū I tī Ki-tok ê sin-iok, kap I tap-ìng hō͘ guá, guá só͘ su-iàu suè ê ìng-ún, hiah ê iân-tshiân kap khó͘-lān si̍t-tsè-siōng sī ìng-ún hok-khì ê tsi̍t pō͘-hūn. Guān guá kin-á-ji̍t in-uī iân-tî kap khó͘-lān lâi o-ló I. Guān guá uē "ióng-tsòng, ... kian-kò͘; ... thìng-hāu Iâ-hô-hua." (Si-phian 27:14) --- Tsarles Gallaudet Trumbull

Khó͘-sim siong-sim kú-kú tn̂g-tn̂g,
Tsuē-tsuē nî ê kî-tó bô tn̄g?
Sìn-sim khai-sí sit-khì? Hi-bāng khai-sí sit kng?
Siūⁿ kóng só͘ lâu ê ba̍k-sái lóng bô sǹg?
M̄-thang kóng Thiⁿ-pē bô thiaⁿ lí ê kî-tó,
Bó͘-sî, bó͘-tē, lí beh tit-tio̍h lí só͘ ǹg.

Iáu-buē huê? M̄-thang kóng sī bô khó-lîng.
Sī lí ê kang-tsok iáu buē uân-sîng.
Tng lí khai-sí kî-tó ê sî, kang-tsok tsiū tsìn-hîng,
Siōng-tè beh uân-sîng I buē-suah ê kang-thîng,
Ká-sú lí kè-sio̍k sio-hiuⁿ, kî-tó,
Bó͘-sî, bó͘-tē, lí beh khuàⁿ-kìⁿ I ê kong-îng.

Iáu-buē huê? Ū sìn, buē bô huê-ìng.
Sìn ê siang-kha khiā tiâu tī tsio̍h-puâⁿ tíng,
Tī kông-hong po̍k-ú tiong khiā tsīng-tsīng,
Siōng tuā siaⁿ ê luî kòng, iā buē iô-tāng piàn-king,
Tsai tsuân-lîng ê Siōng-tè í-king thiaⁿ kî-tó,
Bó͘-sî, bó͘-tē, huah-kóng, "Tik-khak uân-sîng." --- Ophelia G. Browning

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com