《台語荒漠甘泉（全羅版）》

 | | | 轉寄

"Kiû tsiū tit-tio̍h"

作者 陳清俊 翻譯 2009.10.25

listen


Tsa̍p ge̍h jī-gō͘ (Tsa̍p ge̍h jī-tsa̍p-gō͘ ji̍t)

"Lín kàu taⁿ bē bat tī guá ê miâ kiû sím-mi̍h; lín tio̍h kiû tsiū uē tit-tio̍h, hō͘ lín ê huaⁿ-hí muá muá." (Iok-hān 16:24)

Bí-kok lāi-tsiàn ê sî, ū tsi̍t ê kiáⁿ khì tsham-ka Liân-ha̍p-kun. I ê lāu-pē sī gûn-hâng-ka, sui-jiân i tông-ì kiáⁿ khì tsham-kun, tsóng-sī hō͘ kiáⁿ tshut-tsing sio-thâi khiok uē tsin siong-sim.

Kiáⁿ tshut-tsing liáu-āu, i tuì kun-jîn ê tshù-kíng tsin kuan-sim tsin tsù-ì. Khuàⁿ-tio̍h tshīng tsè-ho̍k ê sū-ping, i ê sim tsiū thiàu tshut-khì, ná tshin-tshiūⁿ khuàⁿ-tio̍h i ê kiáⁿ tsi̍t-iūⁿ. Siông-siông pàng-hē sing-lí bô tsuè, īng tsîⁿ īng sî-kan tsiàu-kò͘ siū siong ê ping. Pîng-iú khǹg i m̄-thang bô kò͘ ka-kī ê sū-gia̍p, i tsiū thiaⁿ pîng-iú ê khó͘-khǹg, uân-tsuân thîng-tsí koh hòng-khì kiù-tsè siong-ping ê kang-tsok.

Tsóng-sī ū tsi̍t-kang, tsi̍t ê siàu-liân sū-ping tshīng kū-kū thè-sik ê kun-ho̍k kiâⁿ ji̍p gûn-hâng. Tuì i ê bīn kap tshiú só͘ siū ê siong, tsai i tú-tú tuì lio̍k-kun iá-tsiàn pīⁿ-īⁿ tshut-lâi ê. Gûn-hâng-ka khuàⁿ-kìⁿ hit ê khó-lîn ê siàu-liân ping tú tshun tshiú tī tē-á-lāi jîm sím-mi̍h mi̍h ê sî, gûn-hâng-ka ka-kī lia̍h tsuè bîng-pi̍k i ê ì-sù, tsiū-kóng, "Siàu-liân lâng, guá kin-á-ji̍t ti̍k-pia̍t bô îng, buē-thang pang-tsān lí, lí ài khì lio̍k-kun tsóng-pō͘, tī hia ū kuaⁿ-uân uē tsiàu-kò͘ lí."

Hit ê khó-lîn ê siong-ping iû-guân khiā teh, ná tshin-tshiūⁿ thiaⁿ bô i ê ì-sù. I kè-sio̍k tī khò͘ ê la̍k-tē-á tshē, tshiau-tshut tsi̍t-tiuⁿ lah-sap lah-sap ê tsuá-tiâu-á, i tsiong hit tiuⁿ o͘-o͘ ê tsuá-tiâu hē-tī gûn-hâng-ka ê bīn-tsîng, hō͘ i khuàⁿ, tíng-bīn siá:

Tshin-ài ê hū-tshin:

I sī guá ê pîng-iú, tī tíng-pái sio-tsiàn ê sî siū siong, tuì pīⁿ-īⁿ tshut-lâi khuàⁿ lí. Tshiáⁿ lí tsiap-thāi i tshin-tshiūⁿ tsiap-thāi guá tsi̍t-iūⁿ.

Lí ê kiaⁿ Tsha-lī

Gûn-hâng-ka tsit ē khuàⁿ tio̍h tsit tiuⁿ tsuá-tiâu ê lāi-iông, i tsiām-sî pàng-hē kang-tsok, tuà i kàu ka-kī ê tuā-tshù, tsiong kiáⁿ-jî ê pâng-king hō͘ i īng, tsia̍h-pn̄g ê sî, iā sī tsē tī kiáⁿ só͘ tsē ê í-á uī. Tsiàu-kò͘ i ê lim-tsia̍h, tshin-tshiūⁿ tsiàu-kò͘ ka-kī ê kiáⁿ tsi̍t-iūⁿ. I tit-tio̍h tshiong-hun ê hioh-khùn kap thiàⁿ-hō͘, kín-kín hue-hok kiān-khong, tsiah koh sàng i huê kàu i guân-lâi ho̍k-bū ê tan-uī kè-sio̍k uī kok hāu-lô.

Hiān-tsāi lí beh khuàⁿ-kìⁿ Guá só͘ kiâⁿ ê sū. (Tshut-ai-ki̍p-kì 6:1)


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com