《台語荒漠甘泉（全羅版）》

 | | | 轉寄

"Thìng-hāu"

作者 陳清俊 翻譯 2009.11.01

listen



Tsa̍p-it ge̍h tshue-it (Tsa̍p-it ge̍h it ji̍t)

"Hûn tī huē-bō͘-tíng thîng... Í-sik-lia̍t lâng tsiū... bô khí-sin." (Bîn-sò͘-kì 9:19)

Tse sī sūn-ho̍k Siōng-tè ê tsuè-ko khó-giām. Hûn nā tsiām-tsiām kńg khí-lâi tī huē-bō͘ ê tíng-bīn, Í-sik-lia̍t lâng tsiū siu-si̍p tiùⁿ-pâng khai-sí hiòng tsîng kiâⁿ. Ū kái-pàin, ū piàn-huà, hō͘ lâng sim-sîn hing-hùn, iân-lō͘ khuàⁿ bô siâng ê hong-kíng, koh tī bô siâng só͘-tsāi tsat-iâⁿ, it-tshè lóng sī huaⁿ-hí ê.

Tsóng-sī it-ti̍t teh thìng-hāu bô khí-kiâⁿ, tsiū bô siâng-khuán ê sim-tsîng. "tng hûn thîng-teh," put-kuán tsat-iâⁿ ê só͘-tsāi bô hó-sè, juā-tsiâⁿ jua̍h, put-kuán guî-hiám tī sì-tsiu-uî, in bô pa̍t-hāng suán-ti̍k, tsí ū thîng-teh bô î-tāng.

Si-phian án-ni kóng, "Guá bat thun-lún thìng-hāu Iâ-hô-hua, I àⁿ lo̍h ǹg guá, thiaⁿ guá ê kiû-kiò." (Si-phian 40:1) Siōng-tè tsuáⁿ-iūⁿ tuì-thāi kū-iok sî-tāi ê sìng-tô͘, I iā siâng-khuán án-ni tuì-thāi li̍k-tāi ê sìn-tô͘, tsóng-sī I siông-siông ài lán thìng-hāu. Tng lán tī tuì-ti̍k bīn-tuì-bīn ê thâu-tsîng, tī guî-hiám kap kiaⁿ-hiâⁿ só͘ pau-uî ê sî, tī bô kian-kò͘ ê tsio̍h-puâⁿ ē, lán kiám iáu beh thìng-hāu? Tse kiám m̄-sī lán ài kín-kín siu-si̍p hîng-lí, tiùⁿ-pâng lī-khui ê sî mah? Lán kiám iáu-buē ta̍t-kàu tsuân-jiân tó lo̍h-khì ê tē-pō͘ mah? Lán kiám buē thang thuat-lī kuāⁿ lâu muá-bīn ê jua̍h, tsìn-kàu "tshiⁿ-tshuì ê tsháu-po͘... thang an-hioh ê tsuí-piⁿ," mah? (Si-phian 23:2)

Siōng-tè bô kóng uē, tsīng-tsīng, "hûn thîng tī huē-bō͘ tíng," lán pit-su thìng-hāu. Lán thìng-hāu, in-uī lán thang khíng-tīng Siōng-tè uē kiòng-ìng má-ná, kap tuì tsio̍h-puâⁿ lâu tshut ê tsuí, I uē jia-tsah pó-hō͘ lán bô siū tuì-ti̍k ê kong-kik. Siōng-tè hē lán tī hiān-tsāi ê uī-tì, it-tīng pó-tsìng I ê tông-tsāi, koh kiòng-ìng lán ji̍t-siông ê su-iàu.

Siàu-liân lâng ah, ài thìng-hāu, m̄-thang tshiong-kông, luān-luān kái-pài. Bo̍k-tsiá ah, khiā tī lí ê kang-uī, ti̍t-kàu hûn-thiāu tshing-tshó khai-sí î-tāng. Thìng-hāu Tsú hō͘ lí I ê khuài-lo̍k! I buē siuⁿ bān! --- tuì "Muí-ji̍t lîng-siu"

Tsi̍t tiám-tsing ê thìng-hāu sī su-iàu ing-kai,
Beh ta̍t kàu siōng kuâiⁿ ê só͘-tsāi!
Guá khat-bō͘ kàu hia, tsóng-sī koh-khah khat-bō͘ tsiàu I ê an-pâi!

"Guá ê kiáⁿ ah, tsīng-tsīng khiā,"
Thìng-hāu gî-sim kiaⁿ-hiâⁿ ê lâng siau-siā,
Guá khat-bō͘ kàu hia, tsóng-sī koh-khah khat-bō͘ sìn-khò I lâi kiâⁿ!

Tsiap-siū sī hó, hù-tshut iā sī hó-ì,
Koh-khah hó ê sī
Bô-lūn tī hn̄g-kūn, kuâiⁿ-suaⁿ tshim-ian, sìn-khò I ê tsí-sī!



附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com